GWAY GI IDAWUU’D 148
148
1Maŋi Tap̱a mo.
Maŋi Tap̱a mo ’peni momis mo.
Maŋi a’di e mo jin ḵa’dama/ ḵa’dam mo.
2Maŋi a’di mo, aris iman’doyu gwom piti mo.
Maŋi a’di mo, aris unim piti kun ’kon e momis mo.
3Atente/ dhala ppe, maŋi a’di mo,
maŋi a’di mo, aris uma cul kun kushki mo mo.
4Maŋi a’di mo, um momis kun ḵa’dama/ ḵa’dam mo,
dhali um yi’de/ kun ’kona p̱o/ momis mo.
5Dhalki uni bway mo mmomaŋ gway gi Tap̱a mo.
Haali/ a’di ḵanki’da ḵan mo dhali uni ’kokunu mo mmo/uḵ mo.
6Dhali a’di ṯelki uni sho’k ki sule/ sule/ mo dhali ki sule/ sule/ mo.
A’di ki thoson gwayum buni jin mina uni mol pe mo.
7Maŋi Tap̱a ’peni mony’cesh mo,
um kun ta dhan to yi’de/ gi ḵumma/ yi’de/ mo dhali aris moŋ’kulga/ mo,
8o’d dhala dhana wasa/ wosh dhala wasa/ kun ṯelkin mo dhala wasanyjap̱e/ mo,
dhali ’tham jin mii’da p̱unthar uni thimki gwom piti jin ḵana a’diya ḵan mo.
9’Kuwosha turga/ mo dhala ris wosh mo,
cwa kun dho’th maman mo dhali arisa bwanyayiis mo.
10Aris tombwaasho dhali aris to/e mo,
dhali to kun parana ’cesh mo dhali ’dii kun p̱eni mis mo.
11Imaliḵ kun ’kon e mony’cesh mo dhali aris ’kwani mo,
dhali iya/ gi imaliḵ mo dhali aris tap̱a gi mony’cesh mo.
12’Kwani kun ta dhuru’c mo dhali aris nyara/ mmonṯal ’de/ mo,
dhali ’kwani kun tana dhan mo dhali uc̱i mo.
13Dhalki uni maŋ gway gi Tap̱a mo,
haali/ gway piti a’di ’de/ ikaru ki ca mo.
Monycam piti a’di idiki’da p̱o/ mony’cesh mo dhali momis mo.
14A’di ki ’de’k ce gi mowoṯẖ gom ’kwanim piti mo,
maŋa maŋ goma ris unim piti kun dhunu ki she/ ki dhelel dhelel mo,
haali/ ’Kwani ma Israyiil mo tani uni i’dishki a’di is mo.
Maŋi Tap̱a mo.
Currently Selected:
GWAY GI IDAWUU’D 148: Udk
Highlight
Share
Copy
Want to have your highlights saved across all your devices? Sign up or sign in
©Society for International Ministries, 2013
