Zeˍhpaˍniˆ li‸ 2
2
Venˇbaˆ dawˇ hpfuhˆ tuˬ maˍ piˇ ve
1Ya‸ taw hkawˇ maˇ nawˇ ve chaw teˇ hpaˍ-oˬ, kʼaw‸ nawˇ la-o. 2Suhˉ veˆ hkʼa shuˍ nawˬ hui maˇ ho-eˍ kʼai sheˍ gʼuˇ suhˍ, Gʼuiˬsha nyi ma zuhˆ ve teˇ ceuˬ nawˬ hui awˬ hkʼoˆ lo maˇ gaˬ la sheˍ gʼuˇ suhˍ, kʼaw‸ nawˇ la-o. 3Nyi ma nuˇ nuˇ nehˬ nehˬ cawˬ leh, Gʼuiˬsha ve tawˇ hta‸ na yuˬ chehˇ ve chaw teˇ hpaˍ-oˬ, Gʼuiˬsha geh kʼaw‸ hpfuhˆ kʼaw‸ la-o. Da‸ ve awˬ ceuˬ hta‸ te leh Gʼuiˬsha mehˆ gʼuˇ suhˍ nyi ma nehˬ lehˍ taˍ-o‸. Oˇ hkʼe te ve kʼo, Gʼuiˬsha nyi ma zuhˆ ve awˬ nyi gaˬ la htaˇ, Yawˇ nawˬ hui hta‸ ponˬ laˇ tuˬ naˍ, maˇ shiˍ.
Buiˇshaˆaˉnaˆ chaw hui luˬ kʼai tuˬ ve
4Gaˍsaˍ venˇ hkʼaw chehˇ ve chaw teˇ gʼaˇ ka‸ gʼa ponˬ tuˬ ve maˇ heˆ. Aˍshaˆkeˍlonˍ venˇ lehˬ, gawˬ cu gawˬ pehˆ hpeh‸ kʼai tuˬ yoˬ. Aˍshaˍdawˆ venˇ hkʼaw chehˇ ve chaw teˇ hpaˍ lehˬ, teˇ nyi awˬ hkʼaw lo ceh tiˉ gʼa‸ kʼoˬ ve hta‸ gʼa hkanˍ leh, Eˇkaˍronˍ venˇ yaˇ teˇ hpaˍ htawˇ shu gʼa‸ kʼoˬ ve hta‸ gʼa hkanˍ tuˬ yoˬ. 5Nawˬ hui laˇ tsuhˇ gʼuiˬ pfuhˍ lo chehˇ taˍ ve Hpiˇliˇtiˆ chaw teˇ hpaˍ lehˬ, luˬ kuiˬ sheˆ kuiˬ lo gʼa gaˬ tuˬ yoˬ. Gʼuiˬsha nawˬ hui hta‸ suhˉ jehˬ taˍ peuˬ. Yawˇ hui hta‸ te luˬ te sheˆ leh nawˬ hui teˇ gʼaˇ ka‸ cawˬ taˉ tuˬ ve maˇ heˆ. 6Laˇ tsuhˇ gʼuiˬ pfuhˍ lo cawˬ ve nawˬ hui ve mvuhˇmiˬ lehˬ, yawˬ ehˉ teˇ hpaˍ kʼaˆ caˇ kuiˬ kʼaw‸ hpeh‸ la tuˬ yoˬ. 7A sha‸ te‸ chehˇ taˍ sheˍ ve Yuˇda‸ chaw teˇ hpaˍ lehˬ, nawˬ hui ve mvuhˇmiˬ hkʼaw ca lo‸ chehˇ taˍ tuˬ yoˬ. Yawˇ hui lehˬ a shu yawˇ ve ceˇ caˬ teˇ hpaˍ hta‸ oˇ kaˬ lo hawˉ leh, Aˍshaˆkeˍlonˍ venˇ hkʼaw cawˬ ve yehˬ hkʼaw ca lo‸ zuh‸ tuˬ yoˬ. Yawˇ hui ve Jawˇmawˇ Gʼuiˬsha yawˇ hui geh chehˇ taˍ leh, yawˇ hui hta‸ teˇ pawˆ kʼaw‸ uiˍ la maˇ la piˇ tuˬ yoˬ.
8Kanˇ paˆ uiˍ ve Jawˇmawˇ Gʼuiˬsha kʼoˆ ve, Mawˇbaˆ leh Aˍmonˍ chaw teˇ hpaˍ lehˬ, ngaˬ ve chaw hta‸ hkʼa mvuhˇ hkʼa na kʼoˆ leh, yawˇ hui ve mvuhˇmiˬ hta‸ hiˉ yuˬ tuˬ kʼoˆ da‸ chehˇ ve awˬ hkawˇ hta‸ ngaˬ gʼa kaˇ peuˬ. 9Ngaˬ lehˬ Iˉsaˍreˍlaˆ chaw hui ve te‸ chehˇ ve Gʼuiˬsha hpeh‸ ve hkʼe, Mawˇbaˆ leh Aˍmonˍ mvuhˇmiˬ hta‸ Sawˉdonˍ leh Gawˇmawˇra‸ venˇ hkʼa shuˍ te luˬ te sheˆ piˇ tuˬ yoˬ. Yawˇ hui lehˬ co co taiˍ taiˍ luˬ kʼai sheˆ kʼai leh, aˉ leh‸ miˬ kʼoˍ leh mvuh‸ teˇ hpaˍ yawˇ hui ve mvuhˇmiˬ hkʼaw hkʼa biˇ cawˬ la tuˬ yoˬ. Cawˬ taˍ sheˍ ve ngaˬ ve chaw teˇ hpaˍ yawˇ hui hta‸ te luˬ te sheˆ leh, yawˇ hui ve mvuhˇmiˬ hta‸ yuˬ tuˬ yoˬ, teh‸ Gʼuiˬsha kʼoˆ ve yoˬ.
10Mawˇbaˆ leh Aˍmonˍ chaw teˇ hpaˍ lehˬ, caˆ muiˬ leh Gʼuiˬsha ve chaw teˇ hpaˍ hta‸ hkʼa mvuhˇ hkʼa na kʼoˆ ve pa taw, chi hkʼe ciˍ yanˍ ve hta‸ gʼa hkanˍ tuˬ yoˬ. 11Gʼuiˬsha lehˬ, yawˇ hui hta‸ kawˆ jaˇ piˇ lawˬ tuˬ yoˬ. Yawˇ lehˬ miˬguiˬ hkʼoˆ cawˬ ve gʼuiˬsha teˇ hpaˍ hta‸ yuˬ baˬ leh, chaw yaˇ teˇ hpaˍ Yawˇ hta‸ ceh tiˉ oˉ kʼoˍ pui tuˬ yoˬ.
12Ehˇtaˍyawˇpiˆ chaw teˇ hpaˍ hta‸ htawˇ, Gʼuiˬsha tiˇ pehˍ piˇ tuˬ yoˬ.
13Gʼuiˬsha lehˬ, yawˇ ve kanˇ paˆ hta‸ yehˇ leh Aˍsuˇriˆ chaw hui hta‸ htawˇ te luˬ te sheˆ piˇ tuˬ yoˬ. Niˇnaˍveˍ venˇ lehˬ gawˬ cu gawˬ pehˆ ve chehˇ kuiˬ hpeh‸ la tuˬ yoˬ. 14Chehˇ kuiˬ oˇ ve lehˬ, to nuˇ to shaˆ leh ceˇ caˬ teˇ hpaˍ ve zuh‸ kuiˬ hpeh‸ la tuˬ yoˬ. Hkawˍ tawehˍ leh aˉ naˆ kʼaˍ teˇ hpaˍ yehˬ hkʼoˆ lo mui taˍ leh kuˬ tuˬ yoˬ. Yehˬ teˇ hpaˍ hta‸ htawˇ shu hpaˆ baˬ tuˬ yoˬ. 15A shu yawˇ ve awˬ gʼaˇ awˬ shaˉ hta‸ ceh gʼaˇ va leh nyi ma uiˍ chehˇ ve chaw lehˬ, chi hkʼe te luˬ te sheˆ ve hta‸ gʼa hkanˍ tuˬ yoˬ. Yawˇ hui ve venˇ lehˬ, miˬguiˬ hkʼoˆ lo cawˬ ve awˬ nu ve venˇ teˇ hpaˍ a‸ kehˉ uiˍ jaˇ ve yoˬ, teh‸ dawˆ chehˇ ve yoˬ. Venˇ oˇ ve gawˬ cu gawˬ pehˆ ve chehˇ kuiˬ kʼaw‸ hpeh‸ la leh, haiˬ ve to nuˇ to shaˆ teˇ hpaˍ ve chehˇ kuiˬ hpeh‸ la tuˬ yoˬ. Oˇ kaˬ lo hkʼa hpanˍ kʼai ve chaw hkʼa peu-eˬ kawˆ jaˇ leh hkʼaw‸ nawˉ hpawˇ lo jiˆ kʼo‸-e tuˬ yoˬ.
Currently Selected:
Zeˍhpaˍniˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
