Zaˍhkaˍriˆ li‸ 6
6
Iˉ mvuhˇ lawˬ awˇ maˬ hta‸ gʼa mawˬ ve
1Oˇ ve hkʼaw‸ nawˉ, awˬ kaˍ awˬ nu ve aw ha teˇ maˬ hta‸ ngaˬ gʼa mawˬ ve yoˬ. Chi teˇ pawˆ, kuiˇ te taˍ ve hkʼaw pui nyiˇ maˬ awˬ kaˍ lo iˉ mvuhˇ lawˬ awˇ maˬ tawˆ la chehˇ ve hta‸ ngaˬ gʼa mawˬ ve yoˬ. 2Awˉ lawˉ peuˇ ve iˉ mvuhˇ lawˬ lehˬ, nyiˉ-ehˍ ve iˉ mvuhˇ lawˬ hpeh‸ leh, awˬ nu ve teˇ maˬ lehˬ naˆ-ehˍ ve iˉ mvuhˇ lawˬ hpeh‸ ve yoˬ. 3Iˉ mvuhˇ lawˬ shehˆ maˬ teˇ maˬ lehˬ hpuˉ-ehˍ ve iˉ mvuhˇ lawˬ hpeh‸ leh, awˇ maˬ teˇ maˬ lehˬ ga‸-ehˍ ve iˉ mvuhˇ lawˬ hpeh‸ ve yoˬ. 4Oˇ htaˇ ngaˬ lehˬ, Iˉ mvuhˇ lawˬ oˇ ve teˇ hpaˍ aˬ hto‸ ma tcuhˉ kuiˬ le, teh‸ mvuhˇ naw ma tcuh yaˇ hta‸ na nyi ve yoˬ.
5Yawˇ kʼoˆ ve, Chi teˇ hpaˍ lehˬ mvuhˇ haw awˇ maˬ hpeh‸ ve yoˬ. Yawˇ hui lehˬ, miˬguiˬ hkʼa peu-eˬ ve Gʼuiˬsha mehˆ gʼuˇ suhˍ tawˆ la taˍ ve yoˬ, teh‸ ngaˬ hta‸ kʼoˆ laˇ ve yoˬ.
6Naˆ-ehˍ ve iˉ mvuhˇ lawˬ lehˬ Baˍbuˍlonˍ venˇ lo kʼai ve yoˬ. Hpuˉ-ehˍ ve iˉ mvuhˇ lawˬ lehˬ mvuhˇ nyi kʼehˬ hpawˇ lo kʼai leh, ga‸-ehˍ ve iˉ mvuhˇ lawˬ lehˬ awˬ hawˉ hpawˇ lo ya‸-e ve yoˬ. 7Ga‸-ehˍ ve iˉ mvuhˇ lawˬ tawˆ la ve teˇ yanˇ, yawˇ hui lehˬ miˬguiˬ hta‸ ca chaˬ nyi gaˇ jaˇ ve yoˬ. Oˇ htaˇ mvuhˇ naw ma tcuh yaˇ lehˬ, Miˬguiˬ hta‸ ca chaˬ nyi tuˬ tawˆ kʼai loˬ, teh‸ yawˇ hui hta‸ kʼoˆ piˇ ve yoˬ. Hkʼe te leh yawˇ hui tawˆ kʼai ve yoˬ. 8Oˇ htaˇ, mvuhˇ naw ma tcuh yaˇ oˇ ve ngaˬ hta‸ kuˬ leh, Baˍbuˍlonˍ mvuhˇmiˬ hpawˇ lo kʼai ve iˉ mvuhˇ lawˬ oˇ ve lehˬ, Gʼuiˬsha nyi ma zuhˆ ve hta‸ mehˉ kʼai piˇ peuˬ, teh‸ kʼoˆ laˇ ve yoˬ.
Yawˇsuˆ hta‸ shi uˉ tcuhˍ hkʼawˆ piˇ tuˬ tawˇ piˇ ve
9Gʼuiˬsha ngaˬ hta‸ chi hkʼe kʼaw‸ kʼoˆ laˇ ve yoˬ. 10Yawˇ kʼoˆ ve, Shu ve mvuhˇmiˬ lo hpeh kʼai ve hta‸ gʼa hkanˍ ve Heˍlaˍdehˇ, Tawˇbiˇyaˆ, leh Yeˍdaˍyaˆ hui tanˇ laˇ ve la‸ shawnˍ teˇ hpaˍ hta‸ yuˬ leh, Zeˍhpaˍniˆ ve yaˇ Yawˇsuˆ ve yehˬ lo kʼai-o. Chaw chi hkʼa peu-eˬ lehˬ Baˍbuˍlonˍ mvuhˇmiˬ lo kʼaw‸ la taˍ ve chaw teˇ hpaˍ hpeh‸ ve yoˬ. 11Yawˇ hui tanˇ laˇ taˍ ve hpu shi oˇ ve teˇ hpaˍ hta‸ yuˬ leh, shi uˉ tcuhˍ teˇ maˬ te peuˬ hkʼaw‸ nawˉ, Yeˍhawˇyaˍdaˆ ve yaˇ paw hkuˇ lonˉ Yawˇsuˆ hta‸ hkʼawˆ piˇ-oˆ. 12Peuˬ hkʼaw‸ nawˉ, kanˇ paˆ uiˍ ve Gʼuiˬsha chi hkʼe kʼoˆ ve yoˬ, teh‸ yawˇ hta‸ kʼoˆ piˇ-oˆ. Awˬ kʼaˉ le‸ teh‸ shu kʼoˆ ve chaw teˇ gʼaˇ uiˍ la da‸ la leh, Gʼuiˬsha ve bon yehˬ hta‸ kʼaw‸ gu te tuˬ yoˬ. 13Yawˇ lehˬ bon yehˬ oˇ ve hta‸ kʼaw‸ gu te leh, jawˇmawˇ teˇ gʼaˇ hkʼa shuˍ awˬ me‸ awˬ hponˇ cawˬ la tuˬ yoˬ. Yawˇ lehˬ, yawˇ ve chaw teˇ hpaˍ hta‸ uˉ peunˍ tuˬ yoˬ. Yawˇ ve kʼaw jaw awˬ paˇ lo, paw hkuˇ teˇ gʼaˇ chehˇ taˍ leh, yawˇ huiˉ maˍ nyiˇ gʼaˇ gʼaˇ gawˬ lehˍ ve awˬ hkʼaw lo teˇ geh kanˉ te kʼai tuˬ yoˬ, teh‸ kʼoˆ piˇ-oˆ. 14Shi uˉ tcuhˍ oˇ ve lehˬ, Heˍlaˍdehˇ, Tawˇbiˇyaˆ, Yeˍdaˍyaˆ leh Yawˇshiˆ hui hta‸ dawˇ nawˇ tuˬ awˬ pon hpeh‸ leh, Gʼuiˬsha ve bon yehˬ hkʼaw hkʼaˬ htaˆ ka‸ cawˬ taˍ tuˬ yoˬ teh‸ ngaˬ hta‸ kʼoˆ laˇ ve yoˬ.
15Vuiˇ kuiˬ lo chehˇ taˍ ve chaw teˇ hpaˍ htawˇ teˇ geh hpoˆ laˬ leh, Gʼuiˬsha ve bon yehˬ hta‸ ga hpoˆ te la tuˬ yoˬ. Bon yehˬ hta‸ chi hkʼe kʼaw‸ gu te chehˇ ve teˇ yanˇ, Gʼuiˬsha ngaˬ hta‸ nawˬ hui geh peu laˇ taˍ ve hta‸ nawˬ hui shiˍ la tuˬ yoˬ. Nawˬ hui lehˬ, Jawˇmawˇ Gʼuiˬsha ve tawˇ hta‸ hkʼa deh‸ na yuˬ chehˇ ve kʼo, chi hkʼa peu-eˬ hpeh‸ la tuˬ yoˬ.
Currently Selected:
Zaˍhkaˍriˆ li‸ 6: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
