Zaˍhkaˍriˆ li‸ 14
14
Yeˍruˆsaˍlehnˍ leh awˬ nu ve chaw ceuˬ teˇ hpaˍ
1Gʼuiˬsha suhˉ jehˬ tuˬ ve awˬ nyi gaˬ la chehˇ ve yoˬ. Oˇ htaˇ Yeˍruˆsaˍlehnˍ venˇ lehˬ, te luˬ te sheˆ ve hta‸ gʼa hkanˍ leh, canˇ paˍ teˇ hpaˍ lehˬ yawˇ hui hiˉ yuˬ gʼa taˍ ve mawˇ jeˬ teˇ hpaˍ hta‸ nawˬ hui mehˆ gʼuˇ suhˬ lo pehˬ da‸ tuˬ yoˬ. 2Yeˍruˆsaˍlehnˍ venˇ hta‸ ca bawˆ la tuˬ, Gʼuiˬsha lehˬ awˬ nu ve chaw ceuˬ teˇ hpaˍ hta‸ shiˍ veu laˇ tuˬ yoˬ. Venˇ chi hta‸ shu bawˆ yuˬ tuˬ yoˬ. Yehˬ teˇ hpaˍ hta‸ shu taˆ hpfuhˆ leh, yaˇ miˇ teˇ hpaˍ lehˬ shu hkʼa mvuhˇ hkʼa na te ve hta‸ gʼa hkanˍ tuˬ yoˬ. Venˇ yaˇ teˇ hkoˇ lehˬ, shu ve mvuhˇmiˬ lo gʼa ca chehˇ tuˬ yoˬ. 3Oˇ ve hkʼaw‸ nawˉ, Gʼuiˬsha lehˬ ponˬ laˬ htaˇ hkʼe canˇ paˍ oˇ ve teˇ hpaˍ hta‸ gʼa‸ bawˆ tuˬ yoˬ. 4Oˇ htaˇ, Yawˇ lehˬ Yeˍruˆsaˍlehnˍ venˇ mvuhˇ nyi tawˆ hpawˇ lo cawˬ ve Shaˍlonˍ hkʼaw hkʼoˆ huˉ taˍ tuˬ yoˬ. Shaˍlonˍ hkʼaw pui lehˬ, nyiˇ hkoˇ hpeh‸ kʼai leh, awˬ kaˍ lo lawˬ hkʼo‸ lonˉ teˇ maˬ cawˬ tuˬ yoˬ. Hkʼaw pui oˇ ve teˇ hkoˇ baˉ lehˬ, awˬ na hpawˇ lo jiˆ taˆ-e leh, awˬ nu ve teˇ hkoˇ baˉ lehˬ awˬ hawˉ hpawˇ lo jiˆ ya‸-e tuˬ yoˬ. 5Nawˬ hui lehˬ, lawˬ hkʼo‸ chi hkʼaw gʼuiˇ hpaw-e tuˬ yoˬ. Yuˇda‸ mvuhˇmiˬ hta‸ jawˇmawˇ Awˇziˆ uˉ peunˍ chehˇ ve teˇ yanˇ, miˬ hiˆ jaˇ leh nawˬ puˍ nawˬ pi hui gʼuiˇ hpaw-e ve hkʼe nawˬ hui gʼa gʼuiˇ hpaw-e tuˬ yoˬ. Ngaˬ ve Jawˇmawˇ Gʼuiˬsha lehˬ, yawˇ ve mvuhˇ naw ma tcuh yaˇ hkʼa peu-eˬ ve hta‸ shiˍ veu laˇ leh laˬ tuˬ yoˬ.
6Awˬ yanˇ oˇ ve gaˬ la htaˇ, kaˆ ve leh a ngeu kʼa ve maˇ kʼaw‸ cawˬ. 7Naˆ ho‸ ve htawˇ maˇ kʼaw‸ cawˬ. Mvuhˇ hpeu‸ htaˇ htawˇ, mvuhˇ law‸ kʼaw htaˇ hkʼa shuˍ awˬ gʼeuˆ ba lehˍ cawˬ tuˬ yoˬ. Chi hkʼe hpeh‸ la tuˬ ve awˬ yanˇ hta‸ Gʼuiˬsha ceh tiˉ shiˍ ve yoˬ.
8Awˬ nyi oˇ ve gaˬ la htaˇ, gawˬ da‸ jaˇ ve iˉ kaˆ Yeˍruˆsaˍlehnˍ venˇ hkʼaw tawˆ la tuˬ yoˬ. Iˉ kaˆ oˇ ve teˇ hkoˇ lehˬ, Suh ve laˇ tsuhˇ gʼuiˬ hkʼaw lo‸-e leh, awˬ nu ve teˇ hkoˇ lehˬ Awˬ kʼaw ji ve laˇ tsuhˇ gʼuiˬ hkʼaw lo‸-e tuˬ yoˬ. 9Oˇ htaˇ, Gʼuiˬsha lehˬ miˬguiˬ hkʼa peu-eˬ ve hta‸ uˉ peunˍ leh, chaw hkʼa peu-eˬ yawˇ hta‸ ceh tiˉ oˉ kʼoˍ pui tuˬ yoˬ.
10Yeˍruˆsaˍlehnˍ venˇ awˬ paˇ awˬ kui lo cawˬ ve mvuhˇmiˬ teˇ hpaˍ lehˬ, awˬ na hpawˇ lo cawˬ ve Geˍbaˍ venˇ hta‸ te leh awˬ hawˉ hpawˇ lo cawˬ ve Riˇmonˍ venˇ lo hkʼa gaˬ, hpiˬ lehˍ cawˬ la tuˬ yoˬ. Yeˍruˆsaˍlehnˍ venˇ lehˬ, mvuhˇmiˬ oˇ ve teˇ hpaˍ awˬ hkʼaw lo shu a‸ kehˉ mvuh ve venˇ hpeh‸ la tuˬ yoˬ. Venˇ oˇ ve lehˬ, Beˍyaˍmenˍ taˍ meu‸ hpe‸ hta‸ te leh, ponˬ laˬ htaˇ cawˬ jaw ve awˬ ceˍ kʼaweh‸ ve taˍ meu‸ hpe‸ lo hkʼa gaˬ, Haˍnaˍneˍ ta‸ yehˬ hta‸ te leh jawˇmawˇ ve a pehˉ meuˇ gʼuiˬ nyiˉ kuiˬ lo hkʼa gaˬ, uiˍ kʼai tuˬ yoˬ. 11Chaw yaˇ teˇ hpaˍ lehˬ, venˇ oˇ ve hkʼaw gawˬ lehˍ gʼa chehˇ leh, luˬ ve sheˆ ve teˇ ceuˬ hta‸ gʼa kʼaw‸ hpuˇ tuˬ ve maˇ heˆ.
12Yeˍruˆsaˍlehnˍ venˇ hta‸ ca bawˆ la ve canˇ paˍ teˇ hpaˍ hkʼoˆ lo Gʼuiˬsha lehˬ kawˆ tuˬ uiˍ ve naˬ beuˬ gaˬ la piˇ tuˬ yoˬ. Yawˇ hui a sha‸ te‸ chehˇ sheˍ ve htawˇ, yawˇ hui ve awˬ shaˍ, mehˆ shiˍ leh ha tehˍ htawˇ kuiˇ kʼai tuˬ yoˬ.
13Oˇ htaˇ Gʼuiˬsha lehˬ, yawˇ hui hta‸ kawˆ jaˇ ve awˬ hkʼaw lo maˇ nawˇ maˇ hteh hpeh‸ la piˇ leh, yawˇ hui lehˬ teˇ gʼaˇ hta‸ teˇ gʼaˇ tiˇ pehˍ da‸ tuˬ yoˬ. 14Yuˇda‸ chaw teˇ hpaˍ lehˬ, Yeˍruˆsaˍlehnˍ venˇ maˇ gʼa luˬ kʼai tuˬ, ma‸ bawˆ tuˬ yoˬ. Yawˇ hui lehˬ awˬ nu ve chaw ceuˬ teˇ hpaˍ ve hpu shi leh veu‸ kʼaˇ teˇ hpaˍ hta‸ hiˉ yuˬ tuˬ yoˬ.
15Kawˆ tuˬ uiˍ ve naˬ beuˬ oˇ ve lehˬ, iˉ mvuhˇ, lawˍ, kaˍlaˍoˆ, piˉlaˬ leh canˇ paˍ teˇ hpaˍ ve ceˇ caˬ hkʼa peu-eˬ awˬ hkʼoˆ lo htawˇ gaˬ la tuˬ yoˬ.
16Yeˍruˆsaˍlehnˍ hta‸ ca bawˆ la ve canˇ paˍ teˇ hpaˍ shonˇ kʼai peuˬ hkʼaw‸ nawˉ, cawˬ taˍ sheˍ ve chaw teˇ hpaˍ lehˬ teˇ hkʼaw‸ teˇ pawˆ Yeˍruˆsaˍlehnˍ venˇ lo kʼai leh, Jawˇmawˇ Gʼuiˬsha hta‸ oˉ kʼoˍ ca pui leh aˉ po kʼo pawehˇ te tuˬ yoˬ. 17Chaw ceuˬ teˇ ceuˬ ceuˬ jawˇmawˇ Gʼuiˬsha hta‸ oˉ kʼoˍ maˇ ca pui ve kʼo, yawˇ hui ve mvuhˇmiˬ hkʼaw mvuhˇ yeˬ laˬ tuˬ ve maˇ heˆ. 18Eˇjiˇtu‸ chaw teˇ hpaˍ ka‸ aˉ po kʼo pawehˇ te kuiˬ lo maˇ kʼai ve kʼo, maˇ kʼai ve chaw ceuˬ teˇ hpaˍ awˬ hkʼoˆ gaˬ la piˇ ve naˬ beuˬ oˇ ve, yawˇ hui awˬ hkʼoˆ lo htawˇ gaˬ la tuˬ yoˬ. 19Chi lehˬ, aˉ po kʼo pawehˇ te kuiˬ lo maˇ kʼai ve Eˇjiˇtu‸ chaw leh awˬ nu ve chaw ceuˬ teˇ hpaˍ awˬ hkʼoˆ lo gaˬ la piˇ tuˬ ve ciˍ yanˍ tuˬ hpeh‸ ve yoˬ.
20Awˬ yanˇ oˇ ve awˬ hkʼaw lo, iˉ mvuhˇ teˇ hpaˍ hta‸ pfuhˍ piˇ taˍ ve ju lu caˆ hta‸ Gʼuiˬsha hta‸ chiˇ a‸ taˍ ve teh‸ kʼoˆ ve li‸ mehˆ htawˆ bvuh‸ taˍ tuˬ yoˬ. Bon yehˬ hkʼaw teh taˍ ve mu‸ hkʼu teˇ hpaˍ htawˇ, tuˉ tanˇ kuiˬ gʼuˇ suhˍ lo teh taˍ ve kawˆ hkʼa shuˍ, da‸ kehˬ la tuˬ yoˬ. 21Yeˍruˆsaˍlehnˍ leh Yuˇda‸ mvuhˇmiˬ hkʼaw hkʼa cawˬ ve muˬ hkʼu teˇ maˬ le le lehˬ, Gʼuiˬsha hta‸ oˉ kʼoˍ ca pui htaˇ yehˇ tuˬ awˬ pon hkʼa deh‸ fuiˍ teh taˍ tuˬ yoˬ. Gʼuiˬsha hta‸ ca tuˉ tanˇ la ve chaw teˇ hpaˍ lehˬ, mu‸ hkʼu oˇ ve teˇ hpaˍ hta‸ yuˬ leh tanˇ taˍ ve shaˍ keu caˉ tuˬ yoˬ. Awˬ yanˇ oˇ ve gaˬ la htaˇ, Gʼuiˬsha ve bon yehˬ hkʼaw lo tanˇ kaˬ paˍ teˇ gʼaˇ ka‸ cawˬ tuˬ ve maˇ heˆ.
Currently Selected:
Zaˍhkaˍriˆ li‸ 14: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
