Maˍkuˆ li‸ 3

La‸ sheh suh ve chaw awˬ lawn

1Yawˇ bon yehˬ hkʼaw kʼaw‸ lo‸-e htaˇ, oˇ kaˬ lo la‸ sheh teˇ paˉ suh ve chaw teˇ gʼaˇ chehˇ taˍ ve yoˬ. 2Yeˍsuˆ hta‸ venˇbaˆ taˍ gʼa tuˬ, shinˉ nyi htaˇ chaw naˬ oˇ ve hta‸ yawˇ gu na-e piˇ tuˬ leh naˍ, yawˇ hui yawˇ hta‸ hkʼa deh‸ nyi taˍ ve yoˬ. 3Yawˇ lehˬ, la‸ sheh teˇ paˉ suh ve chaw hta‸, Nawˬ tu leh awˬ kʼaw ji ca huˉ la-o teh‸ kʼoˆ piˇ ve yoˬ. 4Peuˬ leh yawˇ yawˇ hui hta‸ kʼoˆ piˇ ve, Shinˉ nyi htaˇ da‸ tuˬ te cawˇ laˇ, maˇ heˆ kʼo luˬ tuˬ te cawˇ laˇ. Shu ve a sha‸ hta‸ ponˬ piˇ cawˇ laˇ, maˇ heˆ kʼo tiˇ pehˍ cawˇ laˇ teh‸ na nyi ve yoˬ.

Ya‸ hkʼaˇ, yawˇ hui ta‸ iˉ gawˬ lehˍ chehˇ taˍ ve yoˬ. 5Yeˍsuˆ nyi ma zuhˆ leh yawˇ hui hta‸ hkʼa caw zuhˇ nyi ve yoˬ. Yawˇ hui nyi ma heh ve pa taw yawˇ dawˇ haˍ leh, chaw oˇ ve hta‸, Nawˬ ve la‸ sheh che-o teh‸ kʼoˆ piˇ ve yoˬ. Oˇ htaˇ, yawˇ la‸ sheh che leh na-e la ve yoˬ. 6Hkʼe te leh, Hpaˍriˍsehˇ hui tawˆ kʼai leh, Yeˍsuˆ hta‸ hkʼaˬ hkʼe te leh gʼa tiˇ pehˍ tuˬ, teˇ cawˬ haˉ Heˍroˆ ve chaw teˇ hpaˍ geh ca jehˬ da‸ ve yoˬ.

Gʼuiˬ pfuhˍ paˇ lo chaw awˬ moˍ lonˉ hpawnˬ la ve

7Yeˍsuˆ yawˇ ve awˬ la‸ gʼawˇ hui geh gʼuiˬ po hpawˇ lo kʼaw‸ kʼai leh, Gaˍliˍlehˇ mvuhˇmiˬ hkʼaw chehˇ ve chaw awˬ moˍ lonˉ yawˇ awˬ hkʼaˇ suh gʼa‸ ve yoˬ. 8Chi hkʼoˆ ka‸, Yuˇda‸ mvuhˇmiˬ, Yeˍruˆsaˍlehnˍ venˇ, Iˇduˇmehˇ mvuhˇmiˬ, Yawˇdanˍ gʼuiˬ ma coˇ paˉ leh, Tuˇruˆ venˇ leh Siˉdonˍ venˇ lo chehˇ ve chaw hui lehˬ, yawˇ te ve kanˉ teˇ hpaˍ awˬ lawn gʼa kaˇ ve pa taw, awˬ moˍ lonˉ te leh yawˇ geh laˬ ve yoˬ. 9Chaw awˬ moˍ lonˉ yawˇ hta‸ maˇ gʼa buiˆ tuˬ, Haw lo‸ kʼoˍ ehˉ teˇ maˬ hta‸ gu taˍ-o‸ teh‸, awˬ la‸ gʼawˇ hui hta‸ yawˇ kʼoˆ piˇ ve yoˬ. 10Awˬ lawn kʼo, chaw naˬ maˇ maˇ hta‸ yawˇ gu na-e piˇ ve pa taw, naˬ ve gawˬ ve chaw hui hkʼa peu-eˬ yawˇ hta‸ gʼa htawˇ tuˬ, yawˇ geh gʼaˇ hte‸ buiˆ lo‸ la chehˇ ve yoˬ. 11Neˇ cha‸ chiˆ teˇ hpaˍ htawˇ, yawˇ hta‸ gʼa mawˬ ve teˇ yanˇ, yawˇ mehˆ gʼuˇ suhˍ boˆ sheˬ leh, Nawˬ lehˬ Gʼuiˬsha ve Yaˇ hpu yoˬ teh‸ kuˬ ve yoˬ.

12Yawˇ ve awˬ lawn shu hta‸ maˇ gʼa shiˍ piˇ tuˬ, Yeˍsuˆ yawˇ hui hta‸ tawˇ hehnˇ chaweh piˇ ve yoˬ.

Tcuh yaˇ teˇ chi nyiˇ gʼaˇ hta‸ leuˆ yuˬ ve

13Peuˬ hkʼaw‸ nawˉ, Yeˍsuˆ hkʼaw pui hkʼoˆ lo taˆ-e ve yoˬ. Yawˇ nyi ma cawˇ ve chaw teˇ hpaˍ hta‸ kuˬ yuˬ leh, yawˇ hui yawˇ geh kʼai ve yoˬ. 14Yawˇ hui awˬ hkʼaw lo, yawˇ geh chehˇ tcuh tuˬ, yawˇ hui hta‸ ha lehˬ ve bon hkawˇ ca maˍ tcuh tuˬ, 15neˇ teˇ hpaˍ hta‸ gʼa‸ kʼoˬ hpeh‸ ve kanˇ paˆ piˇ tuˬ, Yeˍsuˆ chaw teˇ chi nyiˇ gʼaˇ hta‸ leuˆ yuˬ ve yoˬ.

16Chaw oˇ ve teˇ hpaˍ lehˬ, awˬ meh awˬ suhˉ Peˍtruˆ teh‸ kʼoˆ ve Siˉmonˍ, 17Zeˍbeˍdehˇ ve awˬ yaˇ paˍ Yaˍkoˆ, Yaˍkoˆ ve awˬ nyi paˍ Yoˇhanˬ, (yawˇ huiˉ maˬ hta‸ awˬ meh awˬ suhˉ Bawˇneˍgehˆ meh piˇ ve, tcuhˉ kuiˬ lehˬ, mvuhˇ tawˍ yaˇ teh‸ kʼoˆ gaˇ ve yoˬ), 18Anˍdrehˍ, Hpiˇliˇpuˆ, Baˍhtawˇlaˬmehˇ, Ma‸htehˍ, Htoˉma‸, Aˍlaˍhpehˇ ve awˬ yaˇ paˍ Yaˍkoˆ, Htaˍdehˇ, Hkaˍnaˍniˆ awˬ moˍ hta‸ caˉ da‸ ve chaw Siˉmonˍ leh, 19Yeˍsuˆ hta‸ chiˇ a‸ piˇ shehˍ hpaˇ Yuˇda‸ Iˉsaˍkaˍriˍoˆ hui yoˬ.

Da‸ ve kehˬ ve Awˬ ha hpu hta‸ shu maˇ shawˍ maˇ caˆ kʼoˆ ve

20Oˇ htaˇ, yawˇ yehˬ hkʼaw lo‸-e ve yoˬ. Chaw awˬ moˍ lonˉ teˇ pawˆ kʼaw‸ hpawnˬ la ve pa taw, yawˇ hui awˍ ka‸ caˇ maˇ tanˇ ve yoˬ. 21Awˬ lawn oˇ ve hta‸ yawˇ ve awˬ ceuˬ awˬ hkʼaˇ teˇ hpaˍ gʼa kaˇ htaˇ, Yawˇ gʼuˇ kʼai peuˬ teh‸ yawˇ hui kʼoˆ leh, yawˇ hta‸ ca hpeh kʼai ve yoˬ.

22Yeˍruˆsaˍlehnˍ venˇ lo ya‸ la ve li‸ bvuh‸ paˍ teˇ hpaˍ kʼoˆ ve, Yawˇ lehˬ Beˍsaˍbuˇlaˆ geh taˍ ve chaw hpeh‸ ve yoˬ. Neˇ jawˇ mawˇ hta‸ gʼaˇ va leh neˇ teˇ hpaˍ hta‸ yawˇ gʼa‸ kʼoˬ ve yoˬ teh‸ yawˇ hui kʼoˆ ve yoˬ.

23Yawˇ yawˇ hui hta‸ kuˬ leh, tawˇ pa haˉ te maˍ leh kʼoˆ ve, Saˍtanˍ lehˬ Saˍtanˍ hta‸ hkʼaˬ hkʼe te gʼa‸ kʼoˬ hpeh‸ tuˬ le. 24Mvuhˇmiˬ teˇ peˆ, yawˇ hkʼaˇ yawˇ maˇ cawˇ maˇ hawˍ da‸ ve kʼo, mvuhˇmiˬ oˇ ve yeˬ maˇ hpeh‸. 25Yehˬ teˇ yehˬ htawˇ, yawˇ hkʼaˇ yawˇ maˇ cawˇ maˇ hawˍ da‸ ve kʼo, yehˬ oˇ ve yeˬ maˇ hpeh‸. 26Saˍtanˍ yawˇ awˬ to hta‸ yawˇ kʼaw‸ hpfuhˆ leh hpaˆ da‸ ve kʼo, yawˇ htawˇ yeˬ maˇ hpeh‸. Yawˇ luˬ kʼai sheˆ kʼai tu yoˬ.

27Awˬ gʼaˇ uiˍ ve chaw hta‸ awˉ lawˉ maˇ hpeh tiˍ taˍ kʼo, a shu htawˇ yawˇ ve yehˬ awˬ hkʼaw lo‸-e leh yawˇ ve mawˇ jeˬ hta‸ hiˉ yuˬ maˇ hpeh‸. Awˬ gʼaˇ uiˍ ve chaw hta‸ hpeh tiˍ taˍ peuˬ htaˇ heh‸, yawˇ ve aˉ hkʼaw lo lo‸-e leh mawˇ jeˬ hta‸ hiˉ yuˬ gʼa tuˬ yoˬ.

28Ngaˬ nawˬ hui hta‸ awˬ tehˬ awˬ na kʼoˆ laˇ ve, chaw yaˇ hui te ve venˇbaˆ hkʼa peu-eˬ leh Gʼuiˬsha hta‸ maˇ shawˍ maˇ caˆ hkʼa kʼoˆ hkʼa yaw ve hkʼa peu-eˬ hta‸ hpehˇ piˇ tuˬ yoˬ. 29Ya‸ hkʼaˇ, da‸ ve kehˬ ve Awˬ ha hpu hta‸ maˇ shawˍ maˇ caˆ kʼoˆ ve chaw hkʼaˬ ve teˇ gʼaˇ hta‸ maˇ kʼoˆ, hkʼaˬ htaˆ ka‸ venˇbaˆ maˇ hpehˇ piˇ taˬ. Yawˇ co co taiˍ taiˍ venˇbaˆ cawˬ taˍ ve chaw hpeh‸ ve yoˬ teh‸ Yeˍsuˆ kʼoˆ piˇ ve yoˬ. 30Yawˇ neˇ cha‸ chiˆ cawˬ ve teh‸ yawˇ hui kʼoˆ ve pa taw, Yeˍsuˆ chi hkʼe kʼoˆ ve yoˬ.

Yeˍsuˆ ve awˬ e leh awˬ nyi paˍ teˇ hpaˍ

31Oˇ htaˇ, Yeˍsuˆ ve awˬ e leh awˬ nyi paˍ teˇ hpaˍ laˬ ve yoˬ. Yawˇ hui awˬ baˬ hpawˇ huˉ taˍ leh Yeˍsuˆ hta‸ ca ku‸ tcuh ve yoˬ. 32Chaw awˬ moˍ lonˉ yawˇ hta‸ hkʼa caw zuhˇ mui chehˇ ve yoˬ. Yawˇ hui yawˇ hta‸ kʼoˆ piˇ ve, Nawˬ ve awˬ e leh nawˬ ve awˬ nyi paˍ teˇ hpaˍ nawˬ hta‸ ca leh awˬ baˬ hpawˇ lo chehˇ taˍ ve yoˬ teh‸ kʼoˆ piˇ ve yoˬ.

33Yeˍsuˆ kʼaw‸ kʼoˆ ve, Ngaˬ ve awˬ e leh ngaˬ ve awˬ nyi paˍ teˇ hpaˍ a shu le teh‸ na nyi ve yoˬ. 34Hkʼa caw zuhˇ mui chehˇ ve chaw hui hta‸ yawˇ caw nyi leh kʼoˆ ve, Ngaˬ ve awˬ e leh ngaˬ ve awˬ nyi paˍ teˇ hpaˍ hta‸ nyi loˬ. 35Gʼuiˬsha ve a loˍ hta‸ hkʼa te ve chaw lehˬ, ngaˬ ve awˬ nyi paˍ awˬ nyi ma leh ngaˬ ve awˬ e hpeh‸ ve yoˬ teh‸, Yeˍsuˆ kʼoˆ piˇ ve yoˬ.

Currently Selected:

Maˍkuˆ li‸ 3: LHBE

Highlight

Copy