Maˍkuˆ li‸ 15

Jawˇmawˇ Piˉla‸ Yeˍsuˆ hta‸ na nyi ve

1Mvuhˇ htiˇ la ve teˇ yanˇ, teˇ cawˬ haˉ paw hkuˇ lonˉ hui lehˬ, awˬ hoˉ chaw mawˇ teˇ hpaˍ, li‸ bvuh‸ paˍ teˇ hpaˍ leh jehˬ shehˍ hpaˇ awˬ moˍ hkʼa peu-eˬ geh jehˬ da‸ ve yoˬ. Yawˇ hui Yeˍsuˆ hta‸ hpeh peuˬ hkʼaw‸ nawˉ sheh veu leh, jawˇmawˇ Piˉla‸ ve la‸ hkʼaw lo yawˇ hta‸ chiˇ a‸ piˇ ve yoˬ. 2Oˇ htaˇ jawˇmawˇ Piˉla‸ kʼoˆ ve, Nawˬ lehˬ Yuˇda‸ chaw hui ve Hkunˉ hawˉ hkanˇ yoˬ laˇ teh‸, yawˇ hta‸ na nyi ve yoˬ.

Yoˬ, nawˬ kʼoˆ ve hkʼe yoˬ teh‸, Yeˍsuˆ yawˇ hta‸ kʼaw‸ kʼoˆ piˇ ve yoˬ.

3Paw hkuˇ lonˉ teˇ hpaˍ lehˬ, yawˇ awˬ hkʼoˆ hta‸ venˇbaˆ maˇ maˇ taˍ ve yoˬ. 4Hkʼe te leh, jawˇmawˇ Piˉla‸ kʼoˆ ve, Nawˬ te‸ chiˉ ka‸ maˇ kʼaw‸ kʼoˆ ve laˇ. Yawˇ hui nawˬ awˬ hkʼoˆ hta‸ venˇbaˆ hkʼaˬ ma taˍ ve hta‸ nyi sheˍ teh‸ kʼoˆ piˇ ve yoˬ.

5Ya‸ hkʼaˇ, Yeˍsuˆ tawˇ teˇ peu-eˬ ka‸ maˇ yaw hkʼaw‸ ve pa taw jawˇmawˇ Piˉla‸ anˇ ve yoˬ.

Yeˍsuˆ hta‸ maˇ heˆ kʼo Baˍraˍbaˆ hta‸ gʼa hpehˇ ve awˬ lawn na nyi ve

6Pawehˇ oˇ ve hta‸ te ve teˇ yanˇ, htawnˍ hkʼaw chehˇ ve chaw teˇ hpaˍ awˬ hkʼaw lo, mvuhˇmiˬ yaˇ hui lawˬ ve teˇ gʼaˇ hta‸ jawˇmawˇ Piˉla‸ hpehˇ piˇ ve awˬ liˇ cawˬ ve yoˬ. 7Oˇ htaˇ, mvuhˇmiˬ hta‸ hpfuhˆ kʼai leh chaw hta‸ tiˇ pehˍ ve Baˍraˍbaˆ meh ve chaw teˇ gʼaˇ cawˬ ve yoˬ. Yawˇ lehˬ, hpfuhˆ kʼai ve awˬ chawˇ teˇ hpaˍ geh teˇ geh htawnˍ hkʼaw hpeh keu taˍ ve yoˬ. 8Oˇ htaˇ, chaw awˬ moˍ lonˉ jawˇmawˇ Piˉla‸ geh kʼai leh awˬ liˇ cawˬ ve hkʼe te laˇ tuˬ yawˇ hui lawˬ ve yoˬ. 9Jawˇmawˇ Piˉla‸ lehˬ, Nawˬ hui awˬ pon Yuˇda‸ chaw hui ve Hkunˉ hawˉ hkanˇ hta‸ hpehˇ laˇ tcuh gaˇ ve laˇ teh‸, yawˇ hui hta‸ na nyi ve yoˬ. 10Awˬ lawn kʼo, paw hkuˇ lonˉ teˇ hpaˍ Yeˍsuˆ hta‸ hkawehˉ ve nyi ma cawˬ ve pa taw, yawˇ hta‸ chiˇ a‸ laˇ ve hta‸ jawˇmawˇ Piˉla‸ shiˍ ve yoˬ.

11Ya‸ hkʼaˇ, Yeˍsuˆ hta‸ maˇ hpehˇ leh Baˍraˍbaˆ hta‸ hpehˇ laˇ tuˬ, paw hkuˇ lonˉteˇ hpaˍ lehˬ chaw awˬ moˍ lonˉ hta‸ ca juˆ piˇ ve yoˬ. 12Jawˇmawˇ Piˉla‸ lehˬ, Hkʼe te kʼo, Yuˇda‸ chaw hui ve Hkunˉ hawˉ hkanˇ teh‸ nawˬ hui kʼoˆ ve teˇ gʼaˇ hta‸ ngaˬ hkʼaˬ hkʼe gʼa te tuˬ le teh‸ yawˇ hui hta‸ kʼaw‸ na nyi htaˇ,

13Yawˇ hta‸ la‸ ka hkʼoˆ lo hta‸ pehˍ loˬ teh‸, yawˇ hui gʼaˇ hte‸ kʼaw‸ kuˬ ve yoˬ.

14Jawˇmawˇ Piˉla‸ yawˇ hui hta‸ kʼoˆ piˇ ve, Aˬ hto‸ ma pa taw le. Yawˇ haiˬ ve aˬ hto‸ ma teˇ ceuˬ hta‸ te ve le teh‸ na nyi htaˇ,

Yawˇ hta‸ la‸ ka hkʼoˆ lo hta‸ pehˍ loˬ teh‸, yawˇ hui leuˉ leh gʼaˇ hte‸ kʼaw‸ kuˬ ve yoˬ.

15Hkʼe te leh jawˇmawˇ Piˉla‸ lehˬ, chaw awˬ moˍ lonˉ nyi ma cawˇ tuˬ te gaˇ ve pa taw, yawˇ hui awˬ pon Baˍraˍbaˆ hta‸ hpehˇ piˇ leh, Yeˍsuˆ hta‸ jaw‸ peuˬ hkʼaw‸ nawˉ, la‸ ka hkʼoˆ lo hta‸ pehˍ tuˬ chiˇ a‸ piˇ ve yoˬ.

Ma‸ yaˇ teˇ hpaˍ Yeˍsuˆ hta‸ maˇ shawˍ maˇ caˆ te ve

16Oˇ htaˇ, ma‸ yaˇ teˇ hpaˍ lehˬ mvuhˇmiˬ jawˇmawˇ lonˉ ve hawˉ yehˬ hta‸ caˉ da‸ ve ko taˍ kuiˬ awˬ hkʼaw lo Yeˍsuˆ hta‸ shiˍ kʼai leh, ma‸ yaˇ teˇ ta‸ hkʼa peu-eˬ hta‸ kuˬ hpawnˬ ve yoˬ. 17Yawˇ hui lehˬ, hpa nyi naˆ meuˉ lehˍ ve aˉ po‸ zuhˬ ma yawˇ hta‸ deh piˇ ve yoˬ. Aˉ chuˇ te hta‸ htawˇ yuˬ leh, shi uˉ tcuhˍ hkʼe te gʼa‸ leh yawˇ hta‸ hkʼawˆ piˇ ve yoˬ. 18Yuˇda‸ ve hkunˉ hawˉ hkanˇ-oˬ, nawˬ awˬ bon uiˍ piˇ-oˆ teh‸, yawˇ hui yawˆ yan ve hkʼe te leh yawˇ hta‸ kʼoˆ guiˇ ve yoˬ. 19Peuˬ leh, yawˇ hui lo taˬ hta‸ yuˬ leh yawˇ ve oˉ kʼoˍ hta‸ dawˆ ve yoˬ. Yawˇ hta‸ ciˉ gʼuiˇ hpe‸ pfuhˍ leh, hkui tcuhˉ teh leh yawˇ hta‸ oˉ kʼoˍ pui ve yoˬ. 20Yawˇ hta‸ maˇ shawˍ maˇ caˆ te peuˬ hkʼaw‸ nawˉ, nyi naˆ meuˉ lehˍ ve aˉ po‸ zuhˬ ma hta‸ yawˇ hui kʼehˆ baˬ leh yawˇ ve veu‸ kʼaˇ hta‸ kʼaw‸ feuˉ piˇ ve yoˬ. Oˇ htaˇ la‸ ka hkʼoˆ lo hta‸ pehˍ tuˬ, yawˇ hui yawˇ hta‸ sheh tawˆ-e ve yoˬ.

Yeˍsuˆ hta‸ la‸ ka hkʼoˆ lo hta‸ pehˍ ve

21Aˍleˍsaˍduˆ leh Ruˇhpuˆ awˬ pa, Siˉmonˍ meh ve Kuˇreˍneˍ venˇ yaˇ teˇ gʼaˇ, heh hkʼaw kʼai kʼaw‸ la ve hta‸ yawˇ hui gʼa mawˬ leh, yawˇ hta‸ nyiˉ leh Yeˍsuˆ ve la‸ ka hta‸ taˆ tcuh ve yoˬ. 22Gawˇlaˍgawˇtaˆ meh ve chehˇ kuiˬ lo yawˇ hui Yeˍsuˆ hta‸ yuˬ kʼai ve yoˬ. Awˬ meh oˇ ve tcuhˉ kuiˬ lehˬ, oˉ koˆ teh‸ kʼoˆ ve yoˬ. 23Muˇraˍ hkaw‸ taˍ ve a pehˉ meuˇ gʼuiˬ yawˇ hui yawˇ hta‸ taw piˇ ve htawˇ, yawˇ maˇ dawˬ. 24Yawˇ hui yawˇ hta‸ la‸ ka hkʼoˆ lo hta‸ keu peuˬ hkʼaw‸ nawˉ, yawˇ hui lehˬ veu‸ kʼaˇ hkʼaˬ ve teˇ hkʼoˆ hta‸ a shu gʼa cawˇ leh naˍ teh‸, yawˇ hui kuˇ da‸ leh yawˇ ve veu‸ kʼaˇ hta‸ pehˬ da‸ ve yoˬ. 25Yawˇ hui yawˇ hta‸ la‸ ka hkʼoˆ lo hta‸ keu taˍ ve lehˬ, mvuhˇ shawˉ kʼawˇ naˍ riˍ teˇ yanˇ yoˬ. 26Yuˇda‸ chaw hui ve Hkunˉ hawˉ hkanˇ yoˬ teh‸ yawˇ hta‸ venˇbaˆ taˍ ve li‸ yawˇ hui bvuh‸ nehˉ taˍ ve yoˬ. 27Peuˬ leh yawˇ geh teˇ geh chaw hkʼawˇ nyiˇ gʼaˇ hta‸ htawˇ, la‸ sha paˉ teˇ gʼaˇ, la‸ mehˍ paˉ teˇ gʼaˇ, la‸ ka hkʼoˆ lo hta‸ keu taˍ ve yoˬ.#15:27 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -28 Haiˬ ve chaw teˇ hpaˍ geh teˇ geh yawˇ hta‸ shawˍ taˍ ve yoˬ teh‸ kʼoˆ taˍ ve Li‸ hpu tawˇ hkawˇ biˇ la ve yoˬ.

29Kʼai kʼai laˬ laˬ ve chaw teˇ hpaˍ lehˬ, yawˇ hta‸ maˇ shawˍ maˇ caˆ kʼoˆ leh, a shu yawˇ ve oˉ kʼoˍ hiˆ leh kʼoˆ ve, Eˇ, bon yehˬ lonˉ hta‸ te luˬ leh shehˆ nyi awˬ hkʼaw lo kʼaw‸ te gʼa ve chaw-oˬ, 30nawˬ awˬ to hta‸ ponˬ piˇ leh la‸ ka hkʼoˆ lo ya‸ la-o teh‸ kʼoˆ piˇ ve yoˬ.

31Paw hkuˇ lonˉ hui htawˇ, li‸ bvuh‸ paˍ hui geh teˇ geh chi hka shuˍ shuˍ yawˇ hta‸ kʼoˆ guiˇ gʼuiˬ guiˇ leh kʼoˆ ve, Shu hta‸ yawˇ htaiˍ hkʼaw‸ gʼa ve yoˬ. Yawˇ awˬ to hta‸ yawˇ htaiˍ hkʼaw‸ maˇ gʼa. 32Ngaˬ hui gʼa mawˬ leh gʼa yonˍ tuˬ, Hkri‸ teh‸ kʼoˆ ve Iˉsaˍreˍlaˆ ve Hkunˉ hawˉ hkanˇ hta‸ la‸ ka hkʼoˆ lo ya‸ la piˇ-oˆ teh‸, teˇ gʼaˇ leh teˇ gʼaˇ kʼoˆ da‸ ve yoˬ.

Yawˇ geh teˇ geh la‸ ka hkʼoˆ lo hta‸ keu taˍ ve nyiˇ gʼaˇ htawˇ, yawˇ hta‸ maˇ shawˍ maˇ caˆ kʼoˆ ve yoˬ. 33Mvuhˇ law‸ kʼaw tcuhˆ htaˇ ka‸ tanˬ leh mvuhˇ hpeu‸ hpawˇ shehˆ naˍ riˍ hkʼa gaˬ, miˬguiˬ hkʼa peu-eˬ naˆ ho‸ lehˍ hpeh‸ sheˬ ve yoˬ. 34Mvuhˇ hpeu‸ hpawˇ shehˆ naˍ riˍ gaˬ ve teˇ yanˇ, Yeˍsuˆ awˬ hkawˇ bvuhˬ chaweh te leh, Eˇliˆ, Eˇliˆ, laˍmaˍsaˍbaˆtaˍniˍ teh‸ kuˬ ve yoˬ. Tcuhˉ kuiˬ lehˬ, Ngaˬ ve Gʼuiˬsha-oˬ, ngaˬ ve Gʼuiˬsha-oˬ, aˬ hto‸ ma te nawˬ ngaˬ hta‸ baˬ taˉ laˇ ve le teh‸ kʼoˆ ve yoˬ. #Chi 22:1

35Awˬ paˇ lo huˉ chehˇ ve chaw teˇ hpaˍ hpaˍ tawˇ oˇ ve hta‸ gʼa kaˇ htaˇ, Nyi loˬ, yawˇ Eˇliˇya‸ hta‸ kuˬ ve yoˬ teh‸ kʼoˆ ve yoˬ. 36Oˇ htaˇ, chaw teˇ gʼaˇ gʼuiˇ kʼai leh, laˇ tsuhˇ gʼuiˬ mvuhˬ teˇ maˬ hta‸ yuˬ leh ci ve awˬ gʼuiˬ awˬ hkʼaw lo tuˍ peuˬ hkʼaw‸ nawˉ, lo taˬ hta‸ choˆ leh yawˇ hta‸ taw piˇ ve yoˬ. Chaw oˇ ve teˇ gʼaˇ kʼoˆ ve, Law taˍ sheˍ. Eˇliˇya‸ yawˇ hta‸ ca yuˬ ya‸ la tuˬ leh naˍ, ngaˬ hui nyi taˍ shaˍ teh‸ kʼoˆ ve yoˬ.

37Yeˍsuˆ awˬ hkawˇ bvuhˬ chaweh kuˬ leh, shaˉ cheˆ ve yoˬ.

38Oˇ htaˇ, bon yehˬ lonˉ ve hpaˬ kaˍlehˬ, awˬ na te leh awˬ hawˉ lo hkʼa gaˬ nyiˇ hkoˇ tzuh‸ sheˬ ve yoˬ. 39Yawˇ chi hkʼe shaˉ cheˆ ve hta‸ yawˇ mehˆ gʼuˇ suhˍ huˉ chehˇ ve ma‸ poˍ teˇ gʼaˇ gʼa mawˬ htaˇ, Chaw chi lehˬ awˬ tehˬ awˬ na Gʼuiˬsha ve yaˇ hpu teˇ gʼaˇ hpeh‸ ve yoˬ teh‸ kʼoˆ ve yoˬ.

40Oˇ kaˬ a ciˉ vuiˇ kuiˬ lo yaˇ miˇ teˇ hpaˍ htawˇ chehˇ leh nyi taˍ ve yoˬ. Yawˇ hui awˬ hkʼaw lo, Maˍriˆ Maˍgaˍdaˍlaˆ, a sha‸ i ve Yaˍkoˆ teˇ gʼaˇ leh Yoˇseˍ ve awˬ e Maˍriˆ leh, Saˍloˍmenˍ hui chehˇ taˍ ve yoˬ. 41Yawˇ hui lehˬ, Yeˍsuˆ Gaˍliˍlehˇ mvuhˇ miˬ awˬ hkʼaw lo chehˇ htaˇ, yawˇ awˬ hkʼaˇ suh kʼai leh yawˇ hta‸ te caˍ te taw piˇ ve yaˇ miˇ teˇ hpaˍ yoˬ. Yeˍruˆsaˍlehnˍ venˇ lo yawˇ geh teˇ geh taˆ la ve yaˇ miˇ laiˉ gʼaˇ htawˇ oˇ kaˬ lo chehˇ leh nyi taˍ ve yoˬ.

Yeˍsuˆ hta‸ tuˍ piˇ ve

42Shinˉ nyi maˇ gaˬ sheˍ awˬ gʼuˇ suhˍ teˇ nyi mvuhˇ hpeu‸ la htaˇ, gu ve awˬ nyi hpeh ve pa taw, 43Awˬ me‸ awˬ hponˇ cawˬ ve jehˬ da‸ shehˍ hpaˇ Aˍriˆma‸htehˍ venˇ yaˇ Yoˇseh‸ meh ve teˇ g’aˇ laˬ ve yoˬ. Yawˇ lehˬ, Gʼuiˬsha ve mvuhˇmiˬ hta‸ dawˇ law chehˇ ve chaw teˇ gʼaˇ hpeh‸ ve yoˬ. Yawˇ nyi ma ha‸ hanˉ te leh, jawˇmawˇ Piˉla‸ geh kʼai leh Yeˍsuˆ ve awˬ to hta‸ lawˬ yuˬ ve yoˬ. 44Awˬ yanˇ chi maw ceh tiˉ ka‸ suh peuˬ ve pa taw, jawˇmawˇ Piˉla‸ anˇ leh ma‸ poˍ hta‸ kuˬ yuˬ leh, Yawˇ suh peuˬ tehˬ ve yoˬ laˇ teh‸ na nyi ve yoˬ. 45Yeˍsuˆ suh peuˬ ve awˬ lawn ma‸ poˍ hto piˇ leh yawˇ gʼa shiˍ htaˇ, Yeˍsuˆ ve awˬ to Yoˇseh‸ hta‸ piˇ ve yoˬ. 46Hkʼe te leh, Yoˇseh‸ hpa hpu hta‸ vuiˬ yuˬ leh, Yeˍsuˆ ve awˬ to hta‸ yuˬ ya‸ peuˬ hkʼaw‸ nawˉ, hpa hpu yuˬ hawˆ htiˆ sheˬ leh, haˉ pui htawˆ taˍ ve tuˍ hpfuh awˬ hkʼaw lo keu taˍ ve yoˬ. Tuˍ hpfuh awˬ hkʼoˇ meuˇ lo haˉ pui hpfuhˆ tsuhˇ taˉ ve yoˬ. 47Maˍriˆ Maˍgaˍdaˍlaˆ leh Yoˇseˍ ve awˬ e Maˍriˆ lehˬ, yawˇ hta‸ teh taˍ kuiˬ hta‸ gʼa mawˬ ve yoˬ.

Currently Selected:

Maˍkuˆ li‸ 15: LHBE

Highlight

Copy