Luˉka‸ li‸ 19

Yeˍsuˆ leh Saˍkehˇ awˬ lawn

1Oˇ htaˇ, Yeˍsuˆ lehˬ, Yeˍriˆhkoˇ venˇ hkʼaw lo‸-e leh hpanˍ kʼai chehˇ ve yoˬ. 2Oˇ kaˬ lo Saˍkehˇ meh ve chaw teˇ gʼaˇ cawˬ ve yoˬ. Yawˇ lehˬ, awˬ hkawnˍ shaw paˍ awˬ hoˉ teˇ gʼaˇ hpeh‸ leh paw sha jaˇ ve chaw teˇ gʼaˇ hpeh‸ ve yoˬ. 3Yeˍsuˆ a shu leh naˍ teh‸ yawˇ mawˬ gaˇ leh ca nyi ve htawˇ, chaw awˬ moˍ lonˉ chehˇ taˍ leh, yawˇ maˇ mvuh ve pa taw maˇ gʼa mawˬ. 4Hkʼe te leh, Yeˍsuˆ hta‸ gʼa mawˬ tuˬ yawˇ awˬ gʼuˇ suhˍ lo gʼuiˇ kʼai leh, Yeˍsuˆ laˬ tuˬ ve ya‸ kʼaw paˇ lo cawˬ ve hpaˉ leuˍ cehˬ teˇ cehˬ hta‸ taˆ-e ve yoˬ. 5Yeˍsuˆ oˇ kaˬ lo gaˬ la htaˇ yawˇ hta‸ chiˇ nyi leh kʼoˆ ve, Saˍkehˇ-oˬ, haˆ haˆ ya‸ la-o. Ya‸ nyi ngaˬ nawˬ ve aˉ hkʼaw lo gʼa haˉ la tuˬ yoˬ teh‸, yawˇ hta‸ kʼoˆ piˇ ve yoˬ.

6Oˇ htaˇ, Saˍkehˇ haˆ haˆ ya‸ la leh, ha lehˬ ha kʼa yawˇ hta‸ ha‸ yuˬ ve yoˬ. 7Chaw hkʼa peu-eˬ oˇ ve hta‸ gʼa mawˬ ve teˇ yanˇ, Yawˇ lehˬ venˇbaˆ yaˇ teˇ gʼaˇ geh ca haˉ ve law teh‸ kʼoˆ leh, ca beu ca hkʼaiˉ ve yoˬ.

8Saˍkehˇ huˉ taˍ leh kʼoˆ ve, Jawˇmawˇ-oˬ, ngaˬ ve mawˇ jeˬ teˇ hkoˇ hkʼa gaˬ haˍ yaˇ gʼawˇ yaˇ hui hta‸ pehˬ piˇ tuˬ yoˬ. Chaw teˇ gʼaˇ gʼaˇ ve mawˇ jeˬ hta‸ ngaˬ heˍ caˇ taˍ peuˬ ve kʼo, awˇ pun ngaˬ kʼaw‸ piˇ tuˬ yoˬ teh‸, Jawˇmawˇ Yeˍsuˆ hta‸ kʼoˆ piˇ ve yoˬ.

9Yeˍsuˆ kʼaw‸ kʼoˆ piˇ ve, Yehˬ chi teˇ yehˬ awˬ hkʼaw lo ya‸ nyi htaiˍ hkʼaw‸ ve teˇ ceuˬ gaˬ la peuˬ. Awˬ lawn kʼo, yawˇ htawˇ Aˍbraˍhanˍ ve yaˇ teˇ gʼaˇ hpeh‸ ve yoˬ. 10Chaw yaˇ ve Yaˇ hpu lehˬ, mehˉ kʼai ve chaw hui hta‸ ca leh htaiˍ hkʼaw‸ yuˬ tuˬ laˬ ve yoˬ teh‸ Saˍkehˇ hta‸ kʼoˆ piˇ ve yoˬ.

Hpu teˇ chi cawehˬ awˬ lawn tawˇ pa haˉ te maˍ ve

11Tawˇ hkawˇ oˇ ve teˇ hpaˍ hta‸ yawˇ hui na chehˇ ve teˇ yanˇ, Yeˍsuˆ lehˬ yawˇ hui hta‸ tawˇ pa haˉ kʼaw‸ te maˍ piˇ ve yoˬ. Awˬ lawn kʼo, yawˇ Yeˍruˆsaˍlehnˍ venˇ awˬ paˇ lo gaˬ la leh, Gʼuiˬsha ve mvuhˇ miˬ teˇ cawˬ haˉ tawˆ la tuˬ yoˬ teh‸ yawˇ hui dawˇ ve hta‸ pa taw yoˬ. 12Hkʼe te leh yawˇ kʼoˆ ve, Awˬ me‸ awˬ hponˇ cawˬ ve chaw teˇ gʼaˇ lehˬ, hkunˉ hawˉ hkanˇ ve aˉ yaˇ hta‸ ca yuˬ leh kʼaw‸ la tuˬ, vuiˇ ve mvuhˇmiˬ lo yawˇ kʼai ve yoˬ. 13Yawˇ maˇ kʼai sheˍ awˬ gʼuˇ suhˍ yawˇ ve awˬ ceˬ teˇ chi gʼaˇ hta‸ kuˬ yuˬ leh, yawˇ hui hta‸ hpu teˇ gʼaˇ teˇ cawehˬ piˇ leh, Ngaˬ kʼaw‸ gaˬ la htaˇ hkʼa gaˬ hpu chi hta‸ yuˬ leh ca kaˬ-o‸ teh‸, yawˇ hui hta‸ kʼoˆ piˇ taˉ ve yoˬ. 14Ya‸ hkʼaˇ, yawˇ ve mvuhˇmiˬ yaˇ teˇ hpaˍ lehˬ yawˇ hta‸ canˇ leh, yawˇ hui ve awˬ tan te shehˍ hpaˇ teˇ hpaˍ hta‸ yawˇ awˬ hkʼaˇ suh kʼai tcuh leh, Yawˇ ngaˬ hui awˬ hkʼoˆ hta‸ uˉ peunˍ tuˬ ngaˬ hui maˇ heuˆ gaˇ teh‸ ca kʼoˆ piˇ tcuh ve yoˬ.

15Yawˇ lehˬ hkunˉ hawˉ hkanˇ ve aˉ yaˇ hta‸ gʼa peuˬ leh kʼaw‸ la ve teˇ yanˇ, hpu piˇ taˉ ve awˬ ceˬ teˇ hpaˍ ca kaˬ ve awˬ hkʼaw lo awˬ yawˬ hkʼaˬ ma gʼa ve hta‸ gʼa shiˍ tuˬ, Yawˇ hui hta‸ ca kuˬ-o‸ teh‸, yawˇ tawˇ piˇ ve yoˬ. 16Awˉ lawˉ teˇ gʼaˇ yawˇ geh laˬ leh, Jawˇmawˇ-oˬ, nawˬ ve hpu teˇ cawehˬ hta‸ ngaˬ ca kaˬ leh, teˇ chi cawehˬ kʼaw‸ gʼa ve yoˬ teh‸ kʼoˆ piˇ ve yoˬ. 17Awˬ jawˇmawˇ kʼaw‸ kʼoˆ ve, Da‸ ve awˬ ceˬ-oˬ, nawˬ te ve lehˬ da‸ ve yoˬ. I ve teˇ ceuˬ awˬ hkʼaw lo nawˬ na yuˬ puiˉ ve pa taw, venˇ teˇ chi venˇ hta‸ uˉ peunˍ-o‸ teh‸ yawˇ hta‸ kʼoˆ piˇ ve yoˬ. 18Nyiˇ gʼaˇ teˇ gʼaˇ laˬ leh, Jawˇmawˇ-oˬ, nawˬ ve hpu teˇ cawehˬ hta‸ ngaˬ ca kaˬ leh, ngaˇ cawehˬ kʼaw‸ gʼa ve yoˬ teh‸ kʼoˆ piˇ ve yoˬ. 19Awˬ jawˇmawˇ kʼaw‸ kʼoˆ ve, Venˇ ngaˇ venˇ hta‸ nawˬ uˉ peunˍ-o‸ teh‸ yawˇ hta‸ kʼoˆ piˇ ve yoˬ.

20Teˇ gʼaˇ laˬ leh kʼoˆ ve, Jawˇmawˇ-oˬ, cho-e‸, nawˬ ve hpu teˇ cawehˬ hta‸ hpaˉ ce‸ awˬ hkʼaw lo ngaˬ htiˆ teh taˍ ve yoˬ. 21Nawˬ lehˬ te hehnˇ jaˇ ve chaw teˇ gʼaˇ hpeh‸ ve pa taw, ngaˬ nawˬ hta‸ kawˆ ve yoˬ. Nawˬ maˇ teh taˍ kuiˬ lo nawˬ gʼawˆ yuˬ leh, nawˬ maˇ sheˍ kuiˬ lo nawˬ gʼeu‸ yuˬ ve yoˬ teh‸ kʼoˆ piˇ ve yoˬ. 22Oˇ htaˇ awˬ jawˇmawˇ kʼaw‸ kʼoˆ piˇ ve, Haiˬ ve awˬ ceˬ-oˬ, nawˬ kʼoˆ taˍ ve tawˇ hkawˇ hta‸ ngaˬ yuˬ leh nawˬ hta‸ suhˉ taˆ laˇ tuˬ yoˬ. Ngaˬ lehˬ te hehnˇ jaˇ ve chaw hpeh‸ leh, ngaˬ maˇ teh taˍ kuiˬ lo gʼawˆ yuˬ leh, maˇ sheˍ kuiˬ lo gʼeu‸ yuˬ ve hta‸ nawˬ shiˍ ve kʼo, 23ngaˬ ve hpu chi hta‸ yuˬ leh hpu chiˇ piˇ shehˍ hpaˇ teˇ hpaˍ hta‸ aˬ hto‸ ma te maˇ piˇ le. Oˇ hkʼe te ve kʼo, ngaˬ kʼaw‸ la ve teˇ yanˇ, ngaˬ ve hpu chi hta‸ ka‸ awˬ yawˬ hta‸ ka‸ gʼa tuˬ yoˬ teh‸ kʼoˆ piˇ ve yoˬ.

24Awˬ paˇ lo huˉ taˍ ve chaw teˇ hpaˍ hta‸ yawˇ kʼoˆ piˇ ve, Hpu oˇ ve teˇ cawehˬ hta‸ yawˇ geh yuˬ hkʼaw‸ leh, hpu teˇ chi cawehˬ cawˬ ve chaw hta‸ piˇ-oˆ teh‸ kʼoˆ piˇ ve yoˬ. 25Chaw oˇ ve teˇ hpaˍ lehˬ, Jawˇmawˇ-oˬ, yawˇ hpu teˇ chi cawehˬ cawˬ peuˬ teh‸ yawˇ hta‸ kʼoˆ piˇ ve yoˬ. 26Ngaˬ nawˬ hui hta‸ kʼoˆ laˇ ve, cawˬ ve chaw teˇ gʼaˇ le le hta‸ kʼaw‸ htehˍ piˇ tuˬ yoˬ. Maˇ cawˬ chaw geh, yawˇ hkʼa cawˬ ve hta‸ ka‸ kʼaw‸ yuˬ tawˆ sheˬ tuˬ yoˬ. 27Chi hkʼoˆ ka‸, ngaˬ yawˇ hui awˬ hkʼoˆ hta‸ uˉ peunˍ tuˬ maˇ heuˆ gaˇ ve ngaˬ ve canˇ paˍ teˇ hpaˍ hta‸ choˬ kaˬ lo yuˬ laˬ leh, ngaˬ mehˆ gʼuˇ suhˍ tiˇ pehˍ loˬ teh‸ kʼoˆ piˇ tuˬ yoˬ.

Piˉ laˬ ehˉ hta‸ ciˇ leh Yeˍruˆsaˍlehnˍ venˇ hkʼaw lo lo‸-e ve

28Yawˇ oˇ hkʼe kʼoˆ peuˬ hkʼaw‸ nawˉ yawˇ awˬ gʼuˇ suhˍ kʼai leh, Yeˍruˆsaˍlehnˍ venˇ lo taˆ-e ve yoˬ. 29Yawˇ lehˬ Shaˍlonˍ hkʼaw hta‸ neˇ ve, Behˆhpaˍgeˍ hkʼaˆ leh Beˍtaˍniˆ hkʼaˆ lo gaˬ la ve teˇ yanˇ, awˬ la‸ gʼawˇ nyiˇ gʼaˇ hta‸ kʼai tcuh leh kʼoˆ ve, 30Nawˬ huiˉ maˬ awˬ gʼuˇ suhˍ cawˬ ve hkʼaˆ hkʼaw lo kʼai-o. Oˇ kaˬ lo lo‸-e ve teˇ yanˇ, chaw teˇ gʼaˇ ka‸ maˇ ciˇ jaw sheˍ ve piˉ laˬ ehˉ hpeh taˍ ve hta‸ nawˬ huiˉ maˬ gʼa mawˬ tuˬ yoˬ. Hpui leh sheh veu laˇ-oˆ. 31Nawˬ huiˉ maˬ aˬ hto‸ ma pa taw hpui ve le teh‸ chaw teˇ gʼaˇ gʼaˇ na nyi laˇ ve kʼo, Jawˇmawˇ loˍ ve yoˬ teh‸ kʼaw‸ kʼoˆ piˇ-oˆ teh‸, yawˇ huiˉ maˬ hta‸ kʼoˆ piˇ ve yoˬ.

32Kʼai tcuh ve chaw nyiˇ gʼaˇ kʼai leh gaˬ ve teˇ yanˇ, yawˇ kʼoˆ laˇ ve hkʼe gʼa mawˬ ve yoˬ. 33Piˉ laˬ ehˉ hta‸ yawˇ huiˉ ma hpui chehˇ ve teˇ yanˇ, awˬ shehˍ hpaˇ teˇ hpaˍ lehˬ, Aˬ hto‸ ma hta‸ pa taw piˉ laˬ ehˉ hta‸ hpui ve le teh‸, yawˇ huiˉ maˬ hta‸ kʼoˆ piˇ ve yoˬ.

34Jawˇmawˇ loˍ ve yoˬ teh‸ yawˇ huiˉ maˬ kʼaw‸ kʼoˆ piˇ ve yoˬ. 35Oˇ htaˇ, yawˇ huiˉ maˬ piˉ laˬ ehˉ oˇ ve hta‸ Yeˍsuˆ geh sheh veu laˇ leh, piˉ laˬ ehˉ awˬ hkʼoˆ hta‸ yawˇ hui ve veu‸ kʼaˇ hkʼawˇ piˉ peuˬ hkʼaw‸ nawˉ, Yeˍsuˆ hta‸ ciˇ tcuh ve yoˬ. 36Yawˇ ciˇ kʼai chehˇ ve teˇ yanˇ, yawˇ hui lehˬ a shu yawˇ ve veu‸ kʼaˇ hta‸ ya‸ kʼaw hpuiˇ lo hkʼawˇ piˇ ve yoˬ.

37Venˇ awˬ paˇ lo yawˇ gaˬ la leh, Shaˍlonˍ hkʼaw gaˬ ya‸ teˇ kaˬ lo gaˬ ve teˇ yanˇ, awˬ la‸ gʼawˇ awˬ moˍ lonˉ hkʼa peu-eˬ lehˬ, yawˇ hui gʼa mawˬ jaw peuˬ ve kanˇ paˆ uiˍ ve kanˉ hkʼa peu-eˬ hta‸ pa taw, ha lehˬ ha kʼa awˬ hkawˇ bvuhˬ chaweh te leh Gʼuiˬsha hta‸ chiˇ mvuh ve yoˬ. 38Yawˇ hui kʼoˆ ve, Jawˇmawˇ Gʼuiˬsha ve awˬ meh awˬ hawˉ lo laˬ ve Hkunˉ hawˉ hkanˇ lehˬ, awˬ bon uiˍ piˇ-oˆ. Mvuhˇ naw ma hkʼoˆ lo dawˇ sha gaˇ sha tuˬ cawˬ piˇ-oˇ. Mvuh jaˇ kuiˬ lo awˬ me‸ awˬ hponˇ cawˬ piˇ-oˆ teh‸ kʼoˆ ve yoˬ. #Chi 118:25-26

39Chaw awˬ moˍ lonˉ oˇ ve awˬ hkʼaw lo chehˇ ve Hpaˍriˍsehˇ teˇ hpaˍ hpaˍ lehˬ, Saˍ la‸-oˬ, nawˬ ve awˬ la‸ gʼawˇ teˇ hpaˍ hta‸ deˇ piˇ-oˆ teh‸ yawˇ hta‸ kʼoˆ piˇ ve yoˬ.

40Oˇ htaˇ yawˇ kʼaw‸ kʼoˆ ve, Ngaˬ nawˬ hui hta‸ kʼoˆ laˇ ve, chaw chi teˇ hpaˍ ta‸ iˉ chehˇ ve kʼo, haˉ pui shiˍ teˇ hpaˍ kuˬ tuˬ yoˬ teh‸ kʼoˆ piˇ ve yoˬ.

41Venˇ awˬ paˇ lo yawˇ gaˬ la htaˇ, venˇ hta‸ gʼa mawˬ leh, yawˇ hawˬ leh kʼoˆ ve, 42Yeˍruˆsaˍlehnˍ venˇ-oˬ, hkʼaˬ hkʼe te leh nawˬ gawˬ lehˍ gʼa chehˇ tuˬ ya‸ nyi ka‸ nawˬ shiˍ ve hkʼe kʼo da‸ jaˇ ve yoˬ. Ya‸ hkʼaˇ, chi beu‸ lehˬ gawˬ lehˍ gʼa chehˇ tuˬ ve teˇ ceuˬ nawˬ mehˆ gʼuˇ suhˍ faˉ taˍ ve yoˬ. 43Awˬ lawn kʼo, Gʼuiˬsha nawˬ hta‸ ca nyi ca ha‸ shaˉ la ve awˬ yanˇ hta‸ nawˬ maˇ shiˍ ve pa taw, nawˬ ve canˇ paˍ teˇ hpaˍ lehˬ, nawˬ hta‸ hkʼa caw zuhˇ lo ta‸ duˇ taˍ leh, nawˬ hta‸ teˇ hpawˇ le le hoˆ taˍ tuˬ ve awˬ nyi awˬ haˉ gaˬ la tuˬ yoˬ. 44Oˇ htaˇ, nawˬ leh nawˬ awˬ hkʼaw lo chehˇ ve nawˬ ve awˬ yaˇ awˬ duˬ teˇ hpaˍ hta‸ shu miˬ chaˇ hkʼoˆ lo chiˇ baˬ laˇ tuˬ yoˬ. Nawˬ awˬ hkʼaw lo haˉ pui teˇ shiˍ awˬ hkʼoˆ teˇ shiˍ maˇ cawˬ htaˇ hkʼa gaˬ yawˇ hui te luˬ taˉ laˇ tuˬ yoˬ teh‸ kʼoˆ ve yoˬ.

Bon yehˬ lonˉ hta‸ da‸ piˇ kehˬ piˇ ve

45Oˇ htaˇ, yawˇ bon yehˬ lonˉ awˬ hkʼaw lo lo‸-e leh, mawˇ hawˇ ve chaw teˇ hpaˍ hta‸ gʼa‸ kʼoˬ ve yoˬ. 46Ngaˬ ve yehˬ hta‸ bon lawˬ kuiˬ yehˬ gʼa hpeh‸ tuˬ yoˬ teh‸ bvuh‸ taˍ ve htawˇ, nawˬ hui lehˬ yehˬ chi hta‸ chaw hkʼawˇ chehˇ kuiˬ hpeh‸ la piˇ peuˬ teh‸, yawˇ hui hta‸ kʼoˆ piˇ ve yoˬ. #Isy 56:7, Yrm 7:11

47Yawˇ lehˬ teˇ nyi le le bon yehˬ lonˉ awˬ hkʼaw lo maˍ piˇ chehˇ ve yoˬ. Paw hkuˇ lonˉ teˇ hpaˍ, li‸ bvuh‸ paˍ teˇ hpaˍ leh Yuˇda‸ chaw hui ve awˬ hoˉ awˬ naˬ teˇ hpaˍ yawˇ hta‸ tiˇ pehˍ tuˬ ca ve yoˬ. 48Ya‸ hkʼaˇ, hkʼaˬ hkʼe gʼa te tuˬ ve hta‸ yawˇ hui ca maˇ mawˬ. Awˬ lawn kʼo, chaw hkʼa peu-eˬ yawˇ maˍ piˇ ve tawˇ hkawˇ hta‸ hkʼa deh‸ na chehˇ ve pa taw yoˬ.

Currently Selected:

Luˉka‸ li‸ 19: LHBE

Highlight

Copy