Yoˇhanˬ li‸ 3

Yeˍsuˆ leh Niˆkawˇdeˍ na‸ uˉ te da‸ ve

1Oˇ htaˇ, Yuˇda‸ chaw hui awˬ hkʼaw lo jawˇmawˇ te ve, Niˆkawˇdeˍ meh ve Hpaˍriˍsehˇ teˇ gʼaˇ cawˬ ve yoˬ. 2Yawˇ lehˬ, mvuhˇ hpeu‸ haˉ htaˇ Yeˍsuˆ geh laˬ leh kʼoˆ ve, Raˍbiˆ-oˬ, nawˬ lehˬ Gʼuiˬsha lo laˬ ve saˍ la‸ teˇ gʼaˇ hpeh‸ ve hta‸ ngaˬ hui shiˍ ve yoˬ. Awˬ lawn kʼo, nawˬ te maˍ ve awˬ heˆ teˇ hpaˍ lehˬ, Gʼuiˬsha yawˇ awˬ hkʼaw lo chehˇ ve chaw maˇ heˆ kʼo, chaw teˇ gʼaˇ ka‸ te maˇ gʼa teh‸, yawˇ hta‸ kʼoˆ piˇ ve yoˬ.

3Yeˍsuˆ kʼaw‸ kʼoˆ ve, Ngaˬ nawˬ hta‸ awˬ tehˬ awˬ na kʼoˆ laˇ ve, chaw teˇ gʼaˇ lehˬ awˬ suhˉ teˇ pawˆ maˇ kʼaw‸ paw la ve kʼo, Gʼuiˬsha ve mvuhˇmiˬ hta‸ maˇ gʼa mawˬ teh‸, yawˇ hta‸ kʼoˆ piˇ ve yoˬ.

4Niˆkawˇdeˍ kʼaw‸ kʼoˆ ve, Mawˇ peuˬ ve chaw teˇ gʼaˇ lehˬ, hkʼaˬ hkʼe te kʼaw‸ paw la hpeh‸ tuˬ le. Yawˇ ve awˬ e gʼoˇ peˬ hkʼaw yawˇ kʼaw‸ lo‸-e leh teˇ pawˆ kʼaw‸ paw la hpeh‸ tuˬ laˇ teh‸ yawˇ hta‸ na nyi htaˇ,

5Yeˍsuˆ kʼaw‸ kʼoˆ ve, Ngaˬ nawˬ hta‸ awˬ tehˬ awˬ na kʼoˆ laˇ ve, chaw teˇ gʼaˇ lehˬ, iˉ kaˆ leh Awˬ ha hpu awˬ hkʼaw lo maˇ paw la ve kʼo, Gʼuiˬsha ve mvuhˇmiˬ awˬ hkʼaw lo maˇ gʼa lo‸-e. 6Awˬ suhˍ awˬ shaˍ lo paw la ve teˇ ceuˬ lehˬ, awˬ suhˍ awˬ shaˍ hpeh‸ ve yoˬ. Awˬ ha hpu lo paw la ve teˇ ceuˬ lehˬ, awˬ ha hpeh‸ ve yoˬ. 7Nawˬ hui awˬ suhˉ teˇ pawˆ gʼa kʼaw‸ paw la ve yoˬ teh‸ ngaˬ nawˬ hta‸ kʼoˆ laˇ ve hta‸ taˇ anˇ. 8Mvuhˇ haw lehˬ, hkʼaˬ lo meuˆ kʼai gaˇ ve ka‸ meuˆ kʼai leh, awˬ hkawˇ oˇ ve hta‸ nawˬ gʼa kaˇ ve yoˬ. Ya‸ hkʼaˇ, hkʼaˬ lo meuˆ laˬ leh naˍ, hkʼaˬ lo meuˆ kʼai tuˬ leh naˍ, nawˬ maˇ shiˍ. Awˬ ha hpu awˬ hkʼaw lo paw la ve chaw teˇ gʼaˇ le le lehˬ, oˇ ve hkʼa shuˍ shuˍ hpeh‸ ve yoˬ teh‸ yawˇ hta‸ kʼoˆ piˇ ve yoˬ.

9Niˆkawˇdeˍ kʼaw‸ kʼoˆ ve, Chi teˇ hpaˍ hkʼaˬ hkʼe te hpeh‸ gʼa tuˬ le teh‸ yawˇ hta‸ na nyi htaˇ,

10Yeˍsuˆ kʼaw‸ kʼoˆ ve, Nawˬ lehˬ Iˉsaˍreˍlaˆ chaw hui awˬ hkʼaw lo saˍ la‸ teˇ gʼaˇ hpeh‸ ve ka‸, awˬ lawn chi teˇ hpaˍ hta‸ nawˬ maˇ shiˍ laˇ. 11Ngaˬ nawˬ hta‸ awˬ tehˬ awˬ na kʼoˆ laˇ ve, ngaˬ hui shiˍ ve awˬ ceuˬ awˬ lawn hta‸ ngaˬ hui kʼoˆ leh, ngaˬ hui mawˬ ve awˬ ceuˬ awˬ lawn hta‸ ngaˬ hui shaˉ hkiˆ hkanˍ ve yoˬ. Ya‸ hkʼaˇ, ngaˬ hui shaˉ hkiˆ hkanˍ ve hta‸ nawˬ hui maˇ ha‸ yuˬ. 12Miˬguiˬ hta‸ caˉ da‸ ve awˬ ceuˬ teˇ hpaˍ awˬ lawn ngaˬ kʼoˆ ve ka‸ nawˬ hui maˇ yonˍ ve kʼo, mvuhˇ naw ma hta‸ caˉ da‸ ve awˬ ceuˬ awˬ lawn ngaˬ nawˬ hui hta‸ kʼoˆ laˇ ve htawˇ, nawˬ hui hkʼaˬ hkʼe te yonˍ tuˬ le. 13Mvuhˇ naw ma lo ya‸ la ve chaw yaˇ ve Yaˇ hpu maˇ heˆ kʼo, chaw teˇ gʼaˇ ka‸ mvuhˇ naw ma hkʼoˆ lo maˇ taˆ-e jaw.

14Heh puiˉ hkʼaw lo Moˉseˍ vuiˬ hta‸ chiˇ taˆ-e ve hkʼe, chaw yaˇ ve Yaˇ hpu htawˇ chiˇ taˆ-e ve hta‸ gʼa hkanˍ tuˬ yoˬ. 15Yawˇ hta‸ hkʼa yonˍ ve chaw hkʼa peu-eˬ co ti‸ ha ti‸ gʼa tuˬ, yawˇ chiˇ taˆ-e ve hta‸ gʼa hkanˍ tuˬ yoˬ.

Gʼuiˬsha miˬguiˬ yaˇ hta‸ ha‸ jaˇ ve

16Awˬ lawn kʼo, Gʼuiˬsha miˬguiˬ yaˇ hta‸ ha‸ jaˇ ve pa taw, yawˇ ve Yaˇ hpu tiˍ piˇ laˇ ve yoˬ. Hkʼe te leh, Yaˇ hpu hta‸ hkʼa yonˍ ve chaw hkʼa peu-eˬ maˇ gʼa luˬ maˇ gʼa sheˆ ve awˬ hkʼoˆ ka‸, co ti‸ ha ti‸ hta‸ gʼa ve yoˬ. 17Awˬ lawn kʼo, miˬguiˬ yaˇ hta‸ suhˉ jehˬ tuˬ, Gʼuiˬsha yawˇ ve Yaˇ hpu hta‸ miˬguiˬ hkʼoˆ lo peu laˇ ve maˇ heˆ. Ya‸ hkʼaˇ, yawˇ hta‸ pa taw miˬguiˬ yaˇ htaiˍ hkʼaw‸ ve hta‸ gʼa tuˬ yawˇ peu laˇ ve yoˬ.

18Yawˇ hta‸ yonˍ ve chaw lehˬ, suhˉ jehˬ ve hta‸ maˇ gʼa hkanˍ. Maˇ yonˍ ve chaw lehˬ, Gʼuiˬsha ve Yaˇ hpu tiˍ ve awˬ meh hta‸ maˇ yonˍ ve hta‸ pa taw, chi beu‸ ka‸ suhˉ taˆ ve hta‸ gʼa hkanˍ peuˬ. 19Suhˉ taˆ ve chi lehˬ miˬguiˬ hkʼoˆ lo awˬ gʼeuˆ lo‸ la htawˇ, miˬguiˬ yaˇ hui awˬ haiˬ hta‸ te ve pa taw, awˬ gʼeuˆ hta‸ a‸ kehˉ yawˇ hui naˆ ho‸ ve hta‸ ha‸ ve yoˬ. 20Awˬ lawn kʼo, awˬ haiˬ hta‸ te ve chaw lehˬ, awˬ gʼeuˆ hta‸ nyi bawˬ leh, yawˇ te ve teˇ hpaˍ maˇ gʼa tawˆ la tuˬ, awˬ gʼeuˆ ba kuiˬ lo yawˇ maˇ laˬ. 21Ya‸ hkʼaˇ, hteˇ ve cawˇ ve hta‸ te ve chaw lehˬ, yawˇ te ve teˇ hpaˍ Gʼuiˬsha hta‸ cuˇ leh te ve teh‸ tawˆ la tuˬ, awˬ gʼeuˆ geh yawˇ laˬ ve yoˬ.

Awˬ miˇ ma heuˆ shehˍ hpaˇ ve awˬ chawˇ awˬ lawn

22Oˇ ve awˬ hkʼaw‸ nawˉ Yeˍsuˆ leh yawˇ ve awˬ la‸ gʼawˇ teˇ hpaˍ Yuˇda‸ mvuhˇmiˬ lo kʼai ve yoˬ. Yawˇ yawˇ hui geh oˇ kaˬ lo chehˇ leh, shu hta‸ baˆtiˆsaˬ piˇ ve yoˬ. 23Saˍlenˍ venˇ awˬ paˇ neˇ Ehˉnonˍ teh‸ kʼoˆ ve teˇ kaˬ lo iˉ kaˆ cawˬ maˇ ve pa taw, Yoˇhanˬ htawˇ oˇ kaˬ lo shu hta‸ baˆtiˆsaˬ piˇ chehˇ ve yoˬ. Chaw teˇ hpaˍ oˇ kaˬ lo kʼai leh baˆtiˆsaˬ hkanˍ yuˬ ve yoˬ. 24Awˬ lawn kʼo, Yoˇhanˬ lehˬ htawnˍ hkʼaw lo maˇ gʼa geh sheˍ.

25Oˇ htaˇ, Yoˇhanˬ ve awˬ la‸ gʼawˇ teˇ hpaˍ lehˬ, da‸ tuˬ kehˬ tuˬ te ve awˬ liˇ awˬ lawn Yuˇda‸ chaw teˇ gʼaˇ geh tawˇ gʼawˬ da‸ chehˇ ve yoˬ. 26Yawˇ hui Yoˇhanˬ geh laˬ leh kʼoˆ ve, Raˍbiˆ-oˬ, nawˬ Yawˇdanˍ gʼuiˬ ma coˇ paˉ lo chehˇ htaˇ nawˬ geh chehˇ jaw leh, nawˬ yawˇ awˬ lawn shaˉ hkiˆ hkanˍ ve teˇ gʼaˇ lehˬ, shu hta‸ baˆtiˆsaˬ piˇ chehˇ leh chaw hkʼa peu-eˬ yawˇ geh kʼai chehˇ ve yoˬ teh‸, yawˇ hta‸ kʼoˆ piˇ ve yoˬ.

27Yoˇhanˬ kʼaw‸ kʼoˆ ve, Mvuhˇ naw ma lo yawˇ hta‸ piˇ ve teˇ ceuˬ maˇ heˆ kʼo, chaw yaˇ lehˬ teˇ ceuˬ ka‸ gʼa maˇ hpeh‸. 28Ngaˬ Hkri‸ maˇ heˆ. Ngaˬ lehˬ yawˇ awˬ gʼuˇ suhˍ peu laˇ ve chaw teˇ gʼaˇ hpeh‸ ve yoˬ teh‸ ngaˬ kʼoˆ ve hta‸ nawˬ hui awˬ to ngaˬ awˬ pon shaˉ hkiˆ hkanˍ hpeh‸ ve yoˬ. 29Awˬ hpawˇ heuˆ tuˬ ve yaˇ miˇ haˉ hta‸ gʼa ve teˇ gʼaˇ lehˬ, awˬ miˇ ma heuˆ shehˍ hpaˇ hpeh‸ ve yoˬ. Awˬ paˇ lo huˉ taˍ leh awˬ miˇ ma heuˆ shehˍ hpaˇ ve awˬ hkawˇ hta‸ gʼa kaˇ ve awˬ chawˇ teˇ gʼaˇ lehˬ, awˬ miˇ ma heuˆ shehˍ hpaˇ ve tawˇ hkawˇ hta‸ gʼa kaˇ ve pa taw ha lehˬ jaˇ ve yoˬ. Oˇ ve hkʼa shuˍ shuˍ, ha lehˬ ve teˇ ceuˬ ngaˬ awˬ hkʼaw lo biˇ la peuˬ. 30Yawˇ lehˬ, gʼa uiˍ kʼai mvuh kʼai tuˬ yoˬ. Ya‸ hkʼaˇ ngaˬ lehˬ, gʼa i kʼai yawnˇ kʼai tuˬ yoˬ teh‸ kʼoˆ ve yoˬ.

Mvuhˇ naw ma hkʼoˆ lo ya‸ la ve teˇ gʼaˇ

31Mvuhˇ naw ma hkʼoˆ lo ya‸ la ve teˇ gʼaˇ lehˬ, hkʼa peu-eˬ awˬ hkʼoˆ uiˍ shehˍ hpaˇ hpeh‸ ve yoˬ. Miˬguiˬ hkʼoˆ ve chaw teˇ gʼaˇ lehˬ, miˬguiˬ hta‸ caˉ da‸ leh, miˬguiˬ ve awˬ lawn ceh kʼoˆ ve yoˬ. Mvuhˇ naw ma hkʼoˆ lo ya‸ la ve teˇ gʼaˇ lehˬ, hkʼa peu-eˬ awˬ hkʼoˆ uiˍ shehˍ hpaˇ hpeh‸ ve yoˬ. 32Yawˇ gʼa mawˬ gʼa kaˇ ve awˬ ceuˬ teˇ hpaˍ awˬ lawn shaˉ hkiˆ hkanˍ ve yoˬ. Ya‸ hkʼaˇ, yawˇ shaˉ hkiˆ hkanˍ ve hta‸ chaw teˇ gʼaˇ ka‸ maˇ ha‸ yuˬ. 33Yawˇ shaˉ hkiˆ hkanˍ ve hta‸ ha‸ yuˬ ve chaw teˇ gʼaˇ lehˬ, Gʼuiˬsha lehˬ hteˇ ve cawˇ ve yoˬ teh‸ yinˉ tcuhˉ taˍ ve yoˬ. 34Gʼuiˬsha peu laˇ ve teˇ gʼaˇ lehˬ, Gʼuiˬsha ve tawˇ hkawˇ hta‸ yaw ve yoˬ. Awˬ lawn kʼo, Gʼuiˬsha lehˬ Awˬ ha hpu piˇ ve teˇ yanˇ, maˇ kawˬ maˇ tehˆ nyi leh piˇ ve yoˬ. 35Awˬ pa lehˬ, Yaˇ hpu hta‸ ha‸ leh, awˬ ceuˬ hkʼa peu-eˬ yawˇ la‸ hkʼaw lo chiˇ a‸ piˇ peuˬ. 36Yaˇ hpu hta‸ yonˍ ve chaw lehˬ, co ti‸ ha ti‸ cawˬ ve yoˬ. Yaˇ hpu hta‸ maˇ ha‸ yuˬ ve chaw lehˬ, co ti‸ ha ti‸ hta‸ maˇ gʼa mawˬ. Yawˇ awˬ hkʼoˆ hta‸ Gʼuiˬsha nyi ma zuhˆ ve teˇ ceuˬ cawˬ taˍ ve yoˬ.

Currently Selected:

Yoˇhanˬ li‸ 3: LHBE

Highlight

Copy