Yoˇhanˬ li‸ 2

Kaˍnaˆ hkʼaˆ awˬ hkʼaw lo hkehˉ caˇ ve

1Oˇ ve awˬ hkʼaw‸ nawˉ, shehˆ nyi teˇ nyi gaˬ htaˇ, Gaˍliˍlehˇ mvuhˇmiˬ Kaˍnaˆ hkʼaˆ awˬ hkʼaw lo shu hkehˉ caˇ chehˇ leh, Yeˍsuˆ ve awˬ e oˇ kaˬ lo chehˇ taˍ ve yoˬ. 2Yeˍsuˆ leh yawˇ ve awˬ la‸ gʼawˇ teˇ hpaˍ hta‸ htawˇ, hkehˉ caˇ kuiˬ lo laˬ tuˬ shu kuˬ ve yoˬ. 3A pehˉ meuˇ gʼuiˬ peuˬ ve teˇ yanˇ, Yeˍsuˆ ve awˬ e lehˬ, Yawˇ hui a pehˉ meuˇ gʼuiˬ maˇ cawˬ-oˬ teh‸ yawˇ hta‸ kʼoˆ piˇ ve yoˬ.

4Yeˍsuˆ kʼaw‸ kʼoˆ ve, Yaˇ miˇ-oˬ, nawˬ ngaˬ hta‸ hkʼaˬ hkʼe caˉ da‸ le. Ngaˬ ve awˬ yanˇ maˇ gaˬ sheˍ teh‸ yawˇ hta‸ kʼoˆ piˇ ve yoˬ.

5Yeˍsuˆ ve awˬ e lehˬ, awˬ ceˬ teˇ hpaˍ hta‸ kʼoˆ piˇ ve, Yawˇ nawˬ hui hta‸ tcuh laˇ ve hkʼe te-o teh‸ kʼoˆ ve yoˬ.

6Yuˇda‸ chaw hui ve awˬ liˇ cawˬ ve hkʼe, da‸ piˇ kehˬ piˇ tuˬ ve awˬ pon yehˇ tuˬ, oˇ kaˬ lo haˉ pui iˉ mvuhˇ kʼoˍ hkaw‸ shiˍ cawˬ taˍ ve yoˬ. Iˉ mvuhˇ kʼoˍ teˇ shiˍ ve hta‸, iˉ kaˆ nyiˇ taˆ shehˆ taˆ hkʼe keu daw ve yoˬ. 7Yeˍsuˆ lehˬ, Iˉ mvuhˇ kʼoˍ chi teˇ hpaˍ hta‸ iˉ kaˆ hkʼa biˇ hkʼo keu-o teh‸, awˬ ceˬ teˇ hpaˍ hta‸ kʼoˆ piˇ ve yoˬ. Hkʼe te leh, yawˇ hui iˉ kaˆ hkʼa biˇ keu ve yoˬ. 8Oˇ htaˇ Yeˍsuˆ yawˇ hui hta‸ kʼoˆ piˇ ve, Chi beu‸ nyiˉ veu leh, hkehˉ caˇ ve awˬ hoˉ hta‸ ca yuˬ piˇ-oˆ teh‸ kʼoˆ ve teˇ yanˇ, yawˇ hui ca yuˬ piˇ ve yoˬ. 9Hkehˉ caˇ ve awˬ hoˉ lehˬ, iˉ kaˆ a pehˉ meuˇ gʼuiˬ hpeh‸ la peuˬ ve hta‸ a ciˉ dawˬ nyi ve yoˬ. A pehˉ meuˇ gʼuiˬ chi hkʼaˬ lo gʼa ve leh naˍ yawˇ maˇ shiˍ. (Ya‸ hkʼaˇ, iˉ kaˆ hkʼo keu ve awˬ ceˬ teˇ hpaˍ lehˬ shiˍ taˍ ve yoˬ.) Oˇ htaˇ hkehˉ caˇ ve awˬ hoˉ lehˬ, awˬ miˇ ma heuˆ shehˍ hpaˇ hta‸ kuˬ yuˬ leh kʼoˆ piˇ ve, 10Chaw teˇ gʼaˇ le le lehˬ, da‸ ve a pehˉ meuˇ gʼuiˬ hta‸ awˉ lawˉ taw piˇ leh, shu hkʼa bvuhˆ dawˬ peuˬ htaˇ heh‸, maˇ da‸ ve a pehˉ meuˇ gʼuiˬ taw piˇ ve awˬ liˇ cawˬ ve yoˬ. Ya‸ hkʼaˇ nawˬ lehˬ, da‸ ve a pehˉ meuˇ gʼuiˬ hta‸ chi beu‸ hkʼa gaˬ ha‸ shaˉ taˍ ve law teh‸ kʼoˆ ve yoˬ.

11Yeˍsuˆ lehˬ, awˉ lawˉ peuˇ ve awˬ heˆ chi teˇ maˬ hta‸ Gaˍliˍlehˇ mvuhˇmiˬ Kaˍnaˆ hkʼaˆ hkʼaw te maˍ piˇ leh, yawˇ ve awˬ me‸ awˬ hponˇ tawˆ la piˇ lawˬ ve yoˬ. Yawˇ ve awˬ la‸ gʼawˇ teˇ hpaˍ yawˇ hta‸ yonˍ ve yoˬ.

12Oˇ ve awˬ hkʼaw‸ nawˉ yawˇ lehˬ, yawˇ ve awˬ e, yawˇ ve awˬ nyi paˍ teˇ hpaˍ leh yawˇ ve awˬ la‸ gʼawˇ hui geh Kaˍpeˍneˍonˍ venˇ lo ya‸-e ve yoˬ. Yawˇ hui oˇ kaˬ lo hkʼa‸ maw maw maˇ chehˇ.

Bon yehˬ lonˉ hta‸ da‸ piˇ kehˬ piˇ ve

13Yuˇda‸ chaw hui ve Paˍsaˍhkaˍ pawehˇ te ve awˬ yanˇ gaˬ la paˇ neˇ htaˇ, Yeˍsuˆ lehˬ Yeˍruˆsaˍlehnˍ venˇ lo taˆ-e ve yoˬ. 14Oˇ htaˇ bon yehˬ lonˉ awˬ hkaw lo, yawˬ, nuˇ, aˉ pui kʼaˍ teˇ hpaˍ hawˇ chehˇ ve chaw teˇ hpaˍ hta‸ maˇ kʼoˆ, hpu pa shehˍ hpaˇ teˇ hpaˍ oˇ kaˬ lo mui chehˇ ve hta‸ maˇ kʼoˆ, yawˇ gʼa mawˬ ve yoˬ. 15Yawˇ lehˬ, aˉ caˆ hkeh hta‸ yuˬ leh jaw‸ tuˬ te peuˬ hkʼaw‸ nawˉ, yawˇ hui hkʼa peu-eˬ hta‸ maˇ kʼoˆ, yawˬ leh nuˇ teˇ hpaˍ hta‸ maˇ kʼoˆ, bon yehˬ lonˉ awˬ hkʼaw lo gʼa‸ tawˆ ve yoˬ. Hpu pa shehˍ hpaˇ teˇ hpaˍ ve hpu hta‸ ngeuˍ baˬ leh, yawˇ hui ve hpui lawˇ teˇ hpaˍ hta‸ hpfuhˆ baˬ ve yoˬ. 16Aˉ pui kʼaˍ hawˇ ve chaw teˇ hpaˍ hta‸ htawˇ, Mawˇ chi teˇ hpaˍ hta‸ yuˬ kʼai-o. Ngaˬ Awˬ pa ve yehˬ hta‸ mawˇ hawˇ mawˇ vuiˬ kuiˬ yehˬ taˇ te teh‸, yawˇ hui hta‸ kʼoˆ piˇ ve yoˬ. 17Nawˬ ve yehˬ awˬ pon ngaˬ nyi ma pfuhˇ jaˇ ve teˇ ceuˬ lehˬ, ngaˬ awˬ hkʼaw hkʼa biˇ biˇ cawˬ ve yoˬ #2:17 Heˍlaˍsaˆ li‸ awˬ hkʼaw lo lehˬ, Ngaˬ hta‸ caˇ peuˬ tuˬ yoˬ teh‸ bvuh‸ taˍ ve yoˬ. teh‸ Li‸ hpu hkʼaw bvuh‸ taˍ ve hta‸ yawˇ ve awˬ la‸ gʼawˇ teˇ hpaˍ dawˇ nawˇ ve yoˬ.#Chi 69:9

18Oˇ htaˇ Yuˇda‸ chaw teˇ hpaˍ kʼoˆ ve, Nawˬ chi hkʼe te ve lehˬ, aˬ hto‸ ma awˬ heˆ teˇ ceuˬ ngaˬ hui hta‸ te maˍ laˇ tuˬ le teh‸, yawˇ hta‸ kʼoˆ piˇ ve yoˬ.

19Yeˍsuˆ kʼaw‸ kʼoˆ ve, Bon yehˬ lonˉ chi hta‸ te luˬ-o‸. Shehˆ nyi awˬ hkʼaw lo ngaˬ kʼaw‸ te peuˬ tuˬ yoˬ teh‸, yawˇ hui hta‸ kʼoˆ piˇ ve yoˬ.

20Oˇ htaˇ Yuˇda‸ chaw hui kʼoˆ ve, Bon yehˬ lonˉ chi hta‸ awˇ chi hkaw‸ hkʼaw‸ gʼa te ve yoˬ. Nawˬ lehˬ shehˆ nyi awˬ hkʼaw lo ceh tiˉ kʼaw‸ te peuˬ tuˬ laˇ teh‸ kʼoˆ piˇ ve yoˬ.

21Ya‸ hkʼaˇ Yeˍsuˆ oˇ hkʼe kʼoˆ ve lehˬ, bon yehˬ lonˉ hpeh‸ ve yawˇ ve awˬ to hta‸ kʼoˆ gaˇ ve yoˬ. 22Hkʼe te leh, suh kuiˬ lo yawˇ kʼaw‸ te‸ tu la ve teˇ yanˇ, yawˇ ve awˬ la‸ gʼawˇ teˇ hpaˍ lehˬ yawˇ kʼoˆ taˍ ve tawˇ hkawˇ hta‸ dawˇ nawˇ leh, Li‸ hpu hta‸ maˇ kʼoˆ, Yeˍsuˆ kʼoˆ taˍ ve tawˇ hkawˇ hta‸ maˇ kʼoˆ, yawˇ hui yonˍ ve yoˬ.

Chaw yaˇ ve nyi ma hkʼaw hkʼaˬ hkʼe cawˬ ve hta‸ Yeˍsuˆ shiˍ ve

23Paˍsaˍhkaˍ pawehˇ te chehˇ ve awˬ yanˇ awˬ hkʼaw lo, yawˇ Yeˍruˆsaˍlehnˍ venˇ hkʼaw chehˇ taˍ ve teˇ yanˇ, yawˇ te maˍ ve awˬ heˆ teˇ hpaˍ hta‸ shu gʼa mawˬ ve pa taw, chaw maˇ maˇ yawˇ hta‸ yonˍ ve yoˬ. 24Ya‸ hkʼaˇ Yeˍsuˆ lehˬ chaw oˇ ve teˇ hpaˍ hta‸ yawˇ ve awˬ to maˇ a‸ piˇ. Awˬ lawn kʼo, chaw hkʼa peu-eˬ hta‸ yawˇ shiˍ taˍ ve yoˬ. 25Chaw yaˇ ve nyi ma awˬ hkʼaw lo hkʼaˬ hkʼe cawˬ ve hta‸ yawˇ shiˍ taˍ ve pa taw, chaw yaˇ ve awˬ lawn chaw teˇ gʼaˇ ka‸ shaˉ hkiˆ hkanˍ tuˬ ve hta‸ yawˇ maˇ loˍ.

Currently Selected:

Yoˇhanˬ li‸ 2: LHBE

Highlight

Copy