Suhˉ jehˬ ve li‸ 7
7
GiˉdonˍMeˇdiˍanˍ chaw hta‸ ma‸ bawˆ gʼaˇ ve
1Giˉdonˍ leh yawˇ ve chaw teˇ hpaˍ mvuhˇ shawˉ teˇ na‸ tu leh, Haˍroˆ teh‸ kʼoˆ ve iˉ kaˆ tawˆkuiˬ lo ca deh taˍ ve yoˬ. Meˇdiˍanˍ chaw hui lehˬ, Mawˇreˍ hkʼaw awˬ na hpawˇ lo cawˬ ve lawˬ hkʼo‸ hkʼaw deh chehˇ taˍ ve yoˬ.
2Oˇ htaˇ Gʼuiˬsha Giˉdonˍ hta‸ kʼoˆ piˇ ve, Meˇdiˍanˍ chaw hui hta‸ ca bawˆ tuˬ, nawˬ geh chehˇ taˍ ve chaw maˇ jaˇ ve yoˬ. Yawˇ hui chaw maˇ ve pa taw ma‸ bawˆ gʼaˇ ve yoˬ, teh‸ dawˇ leh ngaˬ hta‸ leunˇ kʼai tuˬ yoˬ. 3Chi hta‸ pa taw, kawˆ ve chaw teˇ hpaˍ hta‸ kʼo‸-e tcuh-o, teh‸ Giˉdonˍ hta‸ kʼoˆ piˇ ve yoˬ. Hkʼe te leh chaw 22,000 gʼaˇ tu kʼo‸-e leh, chaw 10,000 gʼaˇ ceh tiˉ chehˇ taˉ ve yoˬ.
4Oˇ ve hkʼaw‸ nawˉ Gʼuiˬsha Giˉdonˍ hta‸ kʼoˆ piˇ ve, Nawˬ geh lo chaw maˇ jaˇ chehˇ sheˍ. Chi hta‸ pa taw, yawˇ hui hta‸ iˉ kaˆ lawˬ lo shiˍ kʼai-o. Oˇ kaˬ lo ngaˬ nawˬ awˬ pon chaw leuˆ laˇ tuˬ yoˬ. Nawˬ geh kʼai cawˇ ve chaw ngaˬ leuˆ laˇ ve kʼo, chaw oˇ ve nawˬ geh gʼa kʼai tuˬ yoˬ. Nawˬ geh maˇ kʼai cawˇ ve chaw hta‸ ngaˬ leuˆ tawˆ ve kʼo, chaw oˇ ve nawˬ geh maˇ gʼa kʼai, teh‸ kʼoˆ piˇ ve yoˬ. 5Hkʼe te leh, Giˉdonˍ lehˬ yawˇ ve chaw teˇ hpaˍ hta‸ iˉ ka‸ lawˬ lo shiˍ kʼai ve yoˬ. Oˇ htaˇ Gʼuiˬsha lehˬ, Hpuiˇ hkʼa shuˍ iˉ kaˆ leh‸ dawˬ ve chaw hui hta‸ teˇ kaˬ lo fuiˍ teh taˍ-o‸. Hkui tcuhˉ teh leh iˉ kaˆ boˆ dawˬ ve chaw hui hta‸ htawˇ, teˇ kaˬ lo fuiˍ teh taˍ-o‸, teh‸ Giˉdonˍ hta‸ kʼoˆ piˇ ve yoˬ. 6Hkʼe te leh la‸ sheh hkʼaw iˉ kaˆ toˆ yuˬ leh, hpuiˇ hkʼa shuˍ iˉ kaˆ leh‸ dawˬ ve 300 gʼaˇ cawˬ ve yoˬ. Awˬ nu ve chaw hkʼa peu-eˬ lehˬ, hkui tcuhˉ teh taˍ leh iˉ kaˆ boˆ dawˬ ve yoˬ. 7Oˇ htaˇ Gʼuiˬsha Giˉdonˍ hta‸ kʼoˆ piˇ ve, Iˉ kaˆ leh‸ dawˬ ve chaw chi ve shehˆ ha gʼaˇ hta‸ cuˇ leh, Meˇdiˍanˍ chaw hui hta‸ ngaˬ nawˬ ve la‸ sheh hkʼaw chiˇ a‸ laˇ tuˬ yoˬ. Awˬ nu ve chaw hkʼa peu-eˬ hta‸ a shu yawˇ ve yehˬ lo kʼaw‸ kʼo‸-e tcuh-o, teh‸ yawˇ hta‸ kʼoˆ piˇ ve yoˬ. 8Hkʼe te leh, yawˇ lehˬ chaw oˇ ve 300 gʼaˇ hta‸ ceh teh taˉ leh, awˬ nu ve chaw hkʼa peu-eˬ hta‸ kʼaw‸ kʼo‸-e tcuh ve yoˬ. Chaw oˇ ve 300 gʼaˇ lehˬ, caˇ tuˬ dawˬ tuˬ leh behˬ heh ma hkʼa deh‸ pfuhˇ taˍ ve yoˬ. Meˇdiˍ anˍ chaw teˇ hpaˍ lehˬ, yawˇ hui awˬ hawˉ paˉ lawˬ hkʼo‸ hkʼaw deh chehˇ taˍ ve yoˬ.
9Oˇ ve teˇ haˉ Gʼuiˬsha Giˉdonˍ hta‸ kʼoˆ piˇ ve, Tu leh canˇ paˍ hta‸ ca bawˆ-e loˬ. Ngaˬ nawˬ hta‸ gʼaˇ shehˍ hpaˇ hpeh‸ la piˇ tuˬ yoˬ. 10Nawˬ canˇ paˍ hta‸ ca bawˆ tuˬ kawˆ ve kʼo, nawˬ ve awˬ ceˬ paˍ Hpuˇraˆ hta‸ shiˍ veu leh, Meˉdiˍanˍ chaw hui deh chehˇ taˍ kuiˬ lo kʼai-o. 11Oˇ kaˬ lo yawˇ hui hkʼaˬ hkʼe kʼoˆ da‸ chehˇ ve hta‸ nawˬ gʼa kaˇ tuˬ yoˬ. Oˇ htaˇ nawˬ ve nyi ma ha‸ hanˉ la tuˬ yoˬ, teh‸ kʼoˆ piˇ ve yoˬ. Hkʼe te leh, Giˉdonˍ leh yawˇ ve awˬ ceˬ paˍ Hpuˇraˆ yawˇ huiˉ maˬ, canˇ paˍ teˇ hpaˍ deh chehˇ taˍ kuiˬ lo ya‸-e ve yoˬ. 12Meˇdiˍanˍ chaw, Aˍmaˍlehˆ chaw hui lehˬ, paˉ ce‸ moˍ lonˉ hkʼa shuˍ lawˬ hkʼo‸ teˇ maˬ hkʼa biˇ chehˇ taˍ ve yoˬ. Yawˇ hui ve kaˍlaˍoˆ teˇ hpaˍ htawˇ, laˇ tsuhˇ gʼuiˬ pfuhˍ lo cawˬ ve shehˇ shiˍ hkʼa shuˍ maˇ jaˇ ve yoˬ.
13Giˉdonˍ gaˬ la ve teˇ yanˇ, chaw teˇ gʼaˇ lehˬ yawˇve awˬ chawˇ hta‸ yawˇ zuh‸ maˆ mawˬ ve awˬ lawn kʼoˆ maˍ piˇ chehˇ ve tawˇ hta‸ yawˇ gʼa kaˇ ve yoˬ. Yawˇ kʼoˆ ve, Ngaˬ zuh‸ maˆ teˇ maˬ mawˬ ve yoˬ. Hkaoˍmonˇ teˇ diˬ lehˬ, ngaˬ hui deh chehˇ taˍ kuiˬ lo pu ce la leh, aˉ po kʼo hta‸ htinˍ heuˆ ve pa taw, aˉ po kʼo oˇ ve miˬ chaˇ hkʼoˆ lo paiˍ ve yoˬ, teh‸ kʼoˆ ve yoˬ.
14Yawˇ ve awˬ chawˇ teˇ gʼaˇ zuh‸ maˆ oˇ ve tcuhˉ kuiˬ yuˬ tawˆ leh kʼoˆ ve, Oˇ ve lehˬ Iˉsaˍreˍlaˆ chaw Yawˇshaˆ ve yaˇ, Giˉdonˍ ve aˉhtaw hta‸ tcuhˉ taˍ ve yoˬ. Gʼuiˬsha lehˬ, Meˇdiˍanˍ chaw leh, ngaˬ hui ve ma‸ moˍ lonˉ awˬ hkʼoˆ yawˇ hta‸ gʼaˇ shehˍ hpaˇ hpeh‸ la piˇ taˍ peuˬ, teh‸ kʼoˆ ve yoˬ.
15Giˉdonˍ lehˬ, zuh‸ maˆ ve tcuhˉ kuiˬ yuˬ tawˆ ve tawˇ oˇ ve teˇ hpaˍ hta‸ gʼa kaˇ ve teˇ yanˇ, hkui tcuhˉ teh leh Gʼuiˬsha hta‸ oˉ kʼoˍ pui ve yoˬ. Oˇ ve hkʼaw‸ nawˉ, Iˉsaˍreˍlaˆ chaw hui deh chehˇ taˍ kuiˬ lo kʼaw‸ kʼo‸-e leh, Tu lo. Gʼuiˬsha lehˬ Meˉdiˍanˍ chaw hui hta‸ nawˬ hui ve la‸ sheh hkʼaw lo chiˇ a‸ laˇ taˍ peuˬ, teh‸ yawˇ hui hta‸ kʼoˆ piˇ ve yoˬ. 16Yawˇ lehˬ, yawˇ ve chaw 300 gʼaˇ hta‸ shehˆ moˍ pehˬ leh, ma‸ yaˇ teˇ gʼaˇ le le ve hta‸ behˬheh ma leh, aˬ miˍ tuˉ keu taˍ ve je‸ mu‸ hkʼu piˇ ve yoˬ. 17Peuˬ hkʼaw‸ nawˉ, yawˇ yawˇ hui hta‸ kʼoˆ piˇ ve, Ngaˬ hta‸ hkʼa deh‸ nyi taˍ leh, ngaˬ yawˇ hui deh chehˇ taˍ kuiˬ awˬ paˇ lo gaˬ ve teˇ yanˇ, ngaˬ te ve hkʼe te-o. 18Ngaˬ hui teˇ moˍ behˬheh ma meuˆ ve teˇ yanˇ, nawˬ hui htawˇ yawˇ hui hta‸ hkʼa caw zuhˇ lo chehˇ taˍ leh, nawˬ hui ve behˬ heh ma hta‸ meuˆ leh, Gʼuiˬsha leh Giˉdonˍ awˬ pon, teh‸ kuˬ-o‸, teh‸ yawˇ hui hta‸ kʼoˆ piˇ ve yoˬ.
19Giˉdonˍ leh yawˇ ve ma‸ yaˇ teˇ ha gʼaˇ lehˬ, shehˍ kʼaw hkui gaˬ leh, shaw shehˍ hpaˇ teˇ hpaˍ pa da‸ peuˬ hkʼaw‸ nawˉ, canˇ paˍ teˇ hpaˍ deh chehˇ taˍ kuiˬ lo ya‸-e ve yoˬ. Yawˇ hui behˬ heh ma meuˆ leh, yawˇ hui yuˬ taˍ ve je‸ mu‸ hkʼu hta‸ dawˆ hkoˇ ve yoˬ. 20Chaw oˇ ve shehˆ moˍ hkʼa peu-eˬ behˬ heh ma meuˆ leh, a shu yawˇ ve je‸ mu‸ hkʼu hta‸ dawˆ hkoˇ ve yoˬ. Yawˇ hui lehˬ, aˬ miˍ hta‸ la‸ mehˍ paˉ yuˬ taˍ leh, la‸ sha paˉ lo behˬ heh ma hta‸ yuˬ taˍ ve yoˬ. Oˇ hkʼe te peuˬ hkʼaw‸ nawˉ, Gʼuiˬsha leh Giˉdonˍ awˬ pon aˉhtaw, teh‸ kuˬ ve yoˬ. 21Yawˇ hui lehˬ canˇ paˍ deh chehˇ taˍ kuiˬ hkʼa caw zuhˇ lo huˉ taˍ ve yoˬ. Canˇ paˍ teˇ hpaˍ duiˆ-ehˍ shaˇ-ehˍ te gʼuiˇ hpaw-e ve yoˬ. 22Chaw oˇ ve shehˆ ha gʼaˇ behˬheh ma meuˆ chehˇ ve teˇ yanˇ, Gʼuiˬsha lehˬ canˇ paˍ teˇ hpaˍ teˇ gʼaˇ hta‸ teˇ gʼaˇ chaw pehˍ da‸ piˇ lawˬ ve yoˬ. Yawˇ hui leh, Zeˍreˍraˍ venˇ, Behˆshiˍtaˆ venˇ, Taˍboˆ venˇ awˬ paˇ lo cawˬ ve Meˍhawˇlaˆ i kaˆ lawˬ lo hkʼa gaˬ guiˇ hpaw-e ve yoˬ.
23Yawˇ hui lehˬ, Naˍtaˍliˆ chaw, Aˍshaˍ chaw, leh Maˍnaˍseˍ chaw hkʼa peu-eˬ hta‸ kuˬ yuˬ leh, Meˇdiˍanˍ chaw hkʼaˇ suh gʼa‸ yuˬ kʼai ve yoˬ. 24Giˉdonˍ lehˬ Eˇhpaˍrenˍ mvuhˇmiˬ lo chaw hta‸ hpehˇ peu leh, Meˇdiˍanˍ chaw hta‸ ga bawˆ la-o. Yawˇdanˍ iˉ kaˆ lawˬ leh awˬ nu ve iˉ kaˆ lawˬ teˇ hpaˍ hta‸ Meˇdiˍanˍ chaw hui maˇ gʼa hkanˍ tawˆ-e tuˬ, Behˆbaˍraˆ venˇ lo hkʼa gaˬ iˉ kaˆ lawˬ hkʼaˇ suh shaw taˍ-o‸, teh‸ tawˇ shanˍ feu piˇ ve yoˬ. Hkʼe te leh, Eˇhpaˍrenˍ chaw teˇ hpaˍ, Behˆbaˍraˆ venˇ lo hkʼa gaˬ, Yawˇ danˍ leh awˬ nu ve iˉ kaˆ lawˬ teˇ hpaˍ hta‸ shaw taˍ ve yoˬ. 25Yawˇ hui lehˬ, Awˇreˍbaˆleh Zeˍbaˆ teh‸ kʼoˆ ve Meˉdiˍanˍ ma‸ poˍ lonˉ nyiˇ gʼaˇ hta‸ hpeh gʼa leh, Awˇreˍbaˆ hta‸ Awˇreˬbaˆ teh‸ kʼoˆ ve haˉ hpawˇ awˬ paˇ lo tiˇ pehˍ piˇ leh, Zeˍbaˆ hta‸ Zeˍbaˆ teh‸ kʼoˆ ve a pehˉ meuˇ gʼuiˬ nyiˉ kuiˬ awˬ paˇ lo tiˇ pehˍ piˇ ve yoˬ. Yawˇ hui lehˬ, Meˇdiˍanˍ chaw hui hta‸ gʼa‸ yuˬ peuˬ hkʼaw‸ nawˉ, Awˇreˍbaˆ leh Zeˍbaˆ ve oˉ kʼoˍ hta‸, Yawˇdanˍ iˉ kaˆ lawˬ mvuhˇ nyi tawˆ hpawˇ lo chehˇ taˍ ve Giˉdonˍ geh yuˬ laˬ ve yoˬ.
Currently Selected:
Suhˉ jehˬ ve li‸ 7: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
