Suhˉ jehˬ ve li‸ 6
6
Giˉdonˍ
1Iˉsaˍreˍlaˆ chaw hui Gʼuiˬsha hta‸ kʼaw‸ te ya‸ ve yoˬ. Hkʼe te leh, Gʼuiˬsha lehˬ suhˍ hkʼaw‸ hkʼa gaˬ yawˇ hui hta‸ Meˇdiˍanˍ chaw hui ve la‸ sheh hkʼaw chiˇ a‸ piˇ ve yoˬ. 2Meˇdiˍanˍ chaw hui lehˬ, Iˉsaˍreˍlaˆ chaw a‸ kehˉ awˬ gʼaˇ uiˍ ve pa taw, Iˉsaˍreˍlaˆ chaw hui lehˬ haˉ kʼoˍ teˇ hpaˍ hkʼaw ca hpaw va‸ toˇ ve yoˬ. 3Iˉsaˍreˍlaˆ chaw hui caˬ ti ve teˇ yanˇ, Meˇdiˍanˍ chaw, Aˍmaˍlehˆ chaw leh heh puiˉ hkʼaw lo chehˇ ve chaw teˇ hpaˍ laˬ leh yawˇ hui hta‸ ca bawˆ la ve yoˬ. 4Yawˇ hui lehˬ mvuhˇmiˬ hkʼaw haˉ kuiˬ fa la teˇ hpaˍ te leh, Gaˍsaˍ venˇ lo hkʼa gaˬ Iˉsaˍreˍlaˆ chaw hui ti taˍ ve awˬ shiˍ awˬ nu teˇ hpaˍ hta‸ te luˬ piˇ ve yoˬ. Nuˇ, yawˬ, piˉ laˬ teˇ hkeh hta‸ ka‸ maˇ teh taˉ piˇ. 5Yawˇ hui lehˬ paˉ ce‸ hkʼa shuˍ maˇ jaˇ ve ceˇ caˬ leh, aˉ po kʼo teˇ hpaˍ yuˬ veu laˇ ve yoˬ. Yawˇ hui ve kaˍlaˍoˆ teˇ hpaˍ htawˇ, gʼaw maˇ peuˬ htaˇ hkʼa gaˬ maˇ jaˇ ve yoˬ. Yawˇ hui lehˬ mvuhˇmiˬ hta‸ te luˬ tuˬ laˬ ve yoˬ. 6Oˇ htaˇ, Iˉsaˍreˍlaˆ chaw teˇ hpaˍ dawˇ maˇ tawˆ leh Gʼuiˬsha hta‸ kuˬ ve yoˬ.
7Meˇdiˍanˍ chaw teˇ hpaˍ hta‸ pa taw, Iˉsaˍreˍlaˆ chaw hui kuˬ ve awˬ hkawˇ hta‸ Gʼuiˬsha gʼa kaˇ ve teˇ yanˇ, 8Gʼuiˬsha lehˬ yawˇ hui geh tcuh kaˍ paˍ teˇ gʼaˇ peu laˇ piˇ ve yoˬ. Yawˇ lehˬ Gʼuiˬsha ve tawˇ yuˬ laˬ leh kʼoˆ ve, Eˇjiˇtu‸ mvuhˇmiˬ shu ceˬ te chehˇ kuiˬ lo, ngaˬ nawˬ hui hta‸ shiˍ tawˆ laˇ taˍ ve yoˬ. 9Eˇjiˇtu‸ chaw hui leh, choˬ kaˬ nawˬ hui hta‸ ca bawˆ la ve chaw hui ve la‸ sheh hkʼaw lo, ngaˬ nawˬ hui hta‸ htaiˍ hkʼaw‸ laˇ taˍ ve yoˬ. Chaw chi teˇ hpaˍ hta‸ nawˬ hui gʼuˇ suhˍ lo ngaˬ gʼa‸ kʼoˬ leh, yawˇ hui ve mvuhˇmiˬ ngaˬ nawˬ hui hta‸ piˇ laˇ taˍ ve yoˬ. 10Ngaˬ lehˬ nawˬ hui ve Jawˇmawˇ Gʼuiˬsha hpeh‸ leh, chi beu‸ nawˬ hui chehˇ taˍ ve Aˍmawˇriˆ chaw hui ve gʼuiˬsha teˇ hpaˍ hta‸ oˉ kʼoˍ maˇ gʼa pui, teh‸ nawˬ hui hta‸ kʼoˆ piˇ taˍ peuˬ. Ya‸ hkʼaˇ, nawˬ hui lehˬ ngaˬ ve tawˇ hta‸ maˇ na yuˬ, teh‸ yawˇ hui hta‸ kʼoˆ piˇ ve yoˬ.
11Oˇ htaˇ Gʼuiˬsha ve mvuhˇ naw ma tcuh yaˇ lehˬ, Awˇhpaˍraˆ venˇ lo laˬ leh, Aˍbeˍsaˍ awˬ ceuˬ awˬ hkʼaˇ Yawˇshaˆ ve maˉ kuˇ cehˬ hawˉ lo mui taˍ ve yoˬ. Yawˇshaˆ ve yaˇ Giˉdonˍ lehˬ, yawˇ ve caˬ shiˍ hta‸ Meˇdiˍanˍ chaw hui maˇ gʼa mawˬ tuˬ, a pehˉ meuˇ gʼuiˬ nyiˉ kuiˬ hkʼaw ca hkʼawˇ jaw‸ chehˇ ve yoˬ. 12Oˇ htaˇ Gʼuiˬsha ve mvuhˇ naw ma tcuh yaˇ tawˆ la leh, Nawˬ lehˬ ha‸ hanˉ jaˇ ve chaw hpeh‸ leh, Gʼuiˬsha nawˬ geh chehˇ ve yoˬ, teh‸ yawˇ hta‸ kʼoˆ piˇ ve yoˬ.
13Oˇ htaˇ Giˉdonˍ kʼaw‸ yaw hkʼaw‸ leh kʼoˆ ve, Jawˇmawˇ-oˬ, Gʼuiˬsha ngaˬ hui geh chehˇ taˍ ve kʼo, aˬ hto‸ ma pa taw awˬ ceuˬ chi teˇ hpaˍ ngaˬ hui awˬ hkʼoˆ gaˬ la ve le. Ponˬ laˬ htaˇ ngaˬ hui ve awˬ puˍ awˬ pi teˇ hpaˍ hta‸ Gʼuiˬsha Eˇjiˇtu‸ mvuhˇmiˬ hkʼaw ponˬ piˇ ve awˬ lawn maˇ kʼoˆ, Yawˇ te taˍ ve uiˍ jaˇ ve kanˉ teˇ hpaˍ maˇ kʼoˆ, chi beu‸ hkʼaˬ hkʼe hpeh‸ kʼai peuˬ ve le. Gʼuiˬsha lehˬ ngaˬ hui hta‸ baˬ taˉ laˇ peuˬ. Yawˇ lehˬ ngaˬ hui hta‸ Meˇdiˍanˍ chaw hui ve la‸ sheh hkʼaw chiˇ a‸ taˍ peuˬ, teh‸ kʼoˆ piˇ ve yoˬ.
14Oˇ htaˇ Gʼuiˬsha kʼoˆ ve, Nawˬ hkʼa cawˬ ve awˬ gʼaˇ awˬ shaˉ hkʼa peu-eˬ yuˬ tawˆ leh, Iˉsaˍreˍlaˆ chaw hui hta‸ Meˇdiˍanˍ chaw hui ve la‸ sheh hkʼaw htaiˍ hkʼaw‸ piˇ-oˆ. Ngaˬ nawˬ hta‸ tcuh laˇ chehˇ ve yoˬ, teh‸ yawˇ hta‸ kʼoˆ piˇ ve yoˬ.
15Oˇ htaˇ yawˇ lehˬ, Gʼuiˬsha-oˬ, Iˉsaˍreˍlaˆ chaw hui hta‸ ngaˬ hkʼaˬ hkʼe te htaiˍ hkʼaw‸ piˇ gʼa tuˬ le. Maˍnaˍseˍ awˬ ceuˬ awˬ hkʼaˇ awˬ hkʼaw lo, ngaˬ ve chaw teˇ hpaˍ lehˬ shu a‸ kehˉ i jaˇ ve yoˬ. Ngaˬ htawˇ ka‸, ngaˬ ve yehˬ hkʼaw lo shu a‸ kehˉ i jaˇ ve chaw teˇ gʼaˇ hpeh‸ ve yoˬ, teh‸ kʼoˆ piˇ ve yoˬ.
16Oˇ htaˇ Gʼuiˬsha lehˬ, Ngaˬ nawˬ hta‸ ga laˇ tuˬ ve pa taw, nawˬ te hpeh‸ tuˬ yoˬ. Meˇdiˍanˍ chaw hui hta‸ te luˬ te sheˆ piˇ ve lehˬ, nawˬ chaw teˇ gʼaˇ hta‸ te luˬ te sheˆ piˇ ve hkʼe ceh hpeh‸ tuˬ yoˬ, teh‸ yawˇ hta‸ kʼoˆ piˇ ve yoˬ.
17Oˇ htaˇ Giˉdonˍ lehˬ, Nawˬ ngaˬ hta‸ nyi ma cawˇ ve kʼo, nawˬ awˬ tehˬ awˬ na Gʼuiˬsha hpeh‸ ve hta‸ gʼa shiˍ tuˬ, ngaˬ hta‸ awˬ heˆ teˇ ceuˬ ceuˬ maˍ laˇ-oˆ. 18Ngaˬ nawˬ hta‸ caˇ tuˬ teˇ ceuˬ ceuˬ maˇ gʼa tanˇ laˇ sheˍ ve ceh ceh, ngaˬ geh taˇ tawˆ kʼai laˇ-oˆ, teh‸ kʼoˆ ve yoˬ.
Oˇ htaˇ Gʼuiˬsha lehˬ, Nawˬ kʼaw‸ la htaˇ hkʼa gaˬ ngaˬ chehˇ taˍ tuˬ yoˬ, teh‸ yawˇ hta‸ kʼoˆ piˇ ve yoˬ.
19Hkʼe te leh Giˉdonˍ aˉ hkʼaw kʼo‸-e leh, aˉ che‸ awˬ paˍ ehˉ teˇ hkeh tiˇ leh awˍ chiˇ te ve yoˬ. Peuˬ leh diˇ maˇ keu ve hkaoˍmonˇ teˇ diˬ te ve yoˬ. Oˇ hkʼe te peuˬ hkʼaw‸ nawˉ, shaˍ hta‸ hkʼawˍ lawˇ ehˉ hkʼaw keu leh, awˍ chiˇ gʼuiˬ hta‸ mu‸ hkʼu teˇ maˬ hkʼaw keu ve yoˬ. Yawˇ lehˬ caˇ tuˬ oˇ ve teˇ hpaˍ hta‸ maˉ kuˇ cehˬ lo yuˬ laˬ leh, mvuhˇ naw tcuh yaˇ hta‸ piˇ ve yoˬ. 20Oˇ htaˇ mvuhˇ naw tcuh yaˇ lehˬ, Shaˍ leh hkaoˍmonˇ chi ve hta‸ haˉ pui shiˍ hkʼoˆ teh taˍ leh, oˇ ve awˬ hkʼoˆ lo awˍ chiˇ gʼuiˬ hta‸ ngeuˍ pfuhˍ-o‸, teh‸ yawˇ hta‸ kʼoˆ piˇ ve yoˬ. Giˉdonˍ htawˇ yawˇ kʼoˆ ve hkʼe te ve yoˬ. 21Oˇ htaˇ mvuhˇ naw tcuh yaˇ lehˬ yawˇ ve juˇ fuiˍ hta‸ yuˬ leh, caˇ tuˬ oˇ ve hta‸ juˆ ve yoˬ. Oˇ htaˇ haˉ pui awˬ hkʼaw lo aˬ miˍ to‸ tawˆ la leh, caˇ tuˬ oˇ ve hkʼa peu-eˬ hta‸ to‸ baˬ sheˬ ve yoˬ. Oˇ hkʼe te peuˬ hkʼaw‸ nawˉ, mvuhˇ naw tcuh yaˇ mehˉ kʼai ve yoˬ.
22Oˇ htaˇ Giˉdonˍ lehˬ, yawˇ mvuhˇ naw tcuh yaˇ hta‸ gʼa mawˬ peuˬ ve hta‸ shiˍ la leh kawˆ jaˇ ve awˬ hkʼaw lo, Jawˇmawˇ Gʼuiˬsha-oˬ, nawˬ ve mvuhˇ naw tcuh yaˇ hta‸ ngaˬ gʼa mawˬ peuˬ, teh‸ kʼoˆ ve yoˬ.
23Gʼuiˬsha lehˬ, Taˇ kawˆ. Nawˬ gʼa suh tuˬ ve maˇ heˆ, teh‸ yawˇ hta‸ kʼoˆ piˇ ve yoˬ. 24Hkʼe te leh, Giˉdonˍ lehˬ oˇ kaˬ lo Gʼuiˬsha hta‸ tuˉ tanˇ kuiˬ teˇ maˬ te leh, Gʼuiˬsha lehˬ gawˬ lehˍ ve awˬ shehˍ hpaˇ, teh‸ meh piˇ ve yoˬ. (Tuˉ tanˇ kuiˬ chi ve ya‸ nyi hkʼa gaˬ, Awˇhpaˍraˆ venˇ, Aˍbeˍsaˍ awˬ ceuˬ awˬ hkʼaˇ ve miˬguiˬ hkʼaw cawˬ taˍ ve yoˬ.)
25Oˇ ve teˇ haˉ Gʼuiˬsha yawˇ hta‸ kʼoˆ piˇ ve, Nawˬ pa ve nuˇ paˍ lonˉ leh a sha‸ suhˍ hkʼaw‸ gaˬ peuˬ ve awˬ kaˍ awˬ nu nuˇ paˍ teˇ hkeh hta‸ ca taˍ-o‸. Nawˬ pa Baˍlaˆ gʼuiˬsha hta‸ tuˉ tanˇ kuiˬ te taˍ ve hta‸ dawˆ paˆ leh, tuˉ tanˇ kuiˬ oˇ ve awˬ paˇ lo cawˬ ve Aˍsheˍraˆ gʼuiˬsha ma ve shaˉ ho‸ hta‸ ka‸ dawˆ baˬ-o‸. 26Hkʼaw pui chi ve awˬ hkʼoˆ lo, nawˬ ve Jawˇmawˇ Gʼuiˬsha hta‸ tuˉ tanˇ kuiˬ teˇ maˬ te taˍ-o‸. Oˇ hkʼe te peuˬ hkʼaw‸ nawˉ, nuˇ paˍ nyiˇ hkeh teˇ hkeh hta‸, nawˬ dawˆ baˬ taˍ ve Aˍsheˍraˆ gʼuiˬsha ma ve shaˉ ho‸ hkʼoˆ hpoˆ leh, Gʼuiˬsha hta‸ aˬ miˍ tuˉ tanˇ piˇ-oˆ, teh‸ yawˇ hta‸ kʼoˆ piˇ ve yoˬ. 27Giˉdonˍ lehˬ yawˇ ve chaw teˇ chi gʼaˇ hta‸ shiˍ leh, Gʼuiˬsha kʼoˆ ve hkʼe te ve yoˬ. Yawˇ lehˬ shu hta‸ kawˆ ve pa taw, mvuhˇ law‸ kʼaw htaˇ kanˉ oˇ ve hta‸ te maˇ haˆ. Hkʼe te leh mvuhˇ hpeu‸ htaˇ te ve yoˬ.
28Shawˉ pawˍ mvuhˇ shawˉ teˇ na‸ venˇ hkʼaw chehˇ ve chaw teˇ hpaˍ tu la ve teˇ yanˇ, Baˍlaˆ gʼuiˬsha hta‸ tuˉ tanˇ kuiˬ leh Aˍsheˍraˆ gʼuiˬsha ma ve shaˉ ho‸ dawˆ paˆ taˍ ve hta‸ maˇ kʼoˆ, tuˉ tanˇ kuiˬ awˬ suhˉ teˇ maˬ hkʼoˆ lo chu jaˇ ve nuˇ paˍ teˇ hkeh tuˉ tanˇ taˍ peuˬ ve hta‸ maˇ kʼoˆ, yawˇ hui gʼa mawˬ ve yoˬ. 29Oˇ htaˇ yawˇ hui lehˬ, Chi hkʼe te ve chaw a shu le, teh‸ teˇ gʼaˇ hta‸ teˇ gʼaˇ na da‸ ve yoˬ. Yawˇ hui gʼa‸ chaˬ nyi leh, kanˉ chi hta‸ te shehˍ hpaˇ lehˬYawˇshaˆ ve yaˇ Giˉdonˍ hpeh‸ ve hta‸ gʼa shiˍ ve yoˬ. 30Hkʼe te leh yawˇ hui Yawˇshaˆ geh kʼai leh, Nawˬ ve yaˇ hta‸ gʼa tiˇ pehˍ tuˬ, yawˇ hta‸ choˬ kaˬ lo shiˍ veu laˇ-oˆ. Awˬ lawn kʼo, yawˇ lehˬ Baˍlaˆ gʼuiˬsha hta‸ tuˉ tanˇ kuiˬ leh, Aˍsheˍraˆ gʼuiˬsha ma ve shaˉ ho‸ hta‸ dawˆ baˬ peuˬ, teh‸ yawˇ hta‸ kʼoˆ piˇ ve yoˬ.
31Oˇ htaˇ, Yawˇshaˆ lehˬ yawˇ hta‸ ca deˇ la ve chaw oˇ ve teˇ hpaˍ hta‸ kʼaw‸ yaw hkʼaw‸ leh kʼoˆ piˇ ve, Nawˬ hui lehˬ Baˍlaˆ gʼuiˬsha hpawˇ chehˇ leh, ngaˬ hta‸ tawˇ ca gʼawˬ da‸ la ve laˇ. Nawˬ hui yawˇ hpawˇ chehˇ leh, yawˇ hta‸ ga piˇ chehˇ ve laˇ. Yawˇ hpawˇ chehˇ leh tawˇ yaw chehˇ ve chaw teˇ hpaˍ lehˬ, mvuhˇ maˇ htiˇ sheˍ htaˇ tiˇ pehˍve hta‸ gʼa hkanˍ tuˬ yoˬ. Baˍlaˆ lehˬ gʼuiˬsha hpeh‸ tehˬ ve kʼo, yawˇ awˬ to hta‸ yawˇ htaiˍ hkʼaw‸ piˇ-oˆ. Awˬ lawn kʼo, dawˆ paˆ ve hta‸ gʼa hkanˍ ve tuˉ tanˇ kuiˬ chi lehˬ, yawˇ ve tuˉ tanˇ kuiˬ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ. 32Oˇ ve teˇ nyi hta‸ te leh, Giˉdonˍ hta‸ Yeˍruˆbaˍlaˆ#6:32 Chi lehˬ Baˍlaˆ yawˇ awˬ to hta‸ yawˇ htaiˍ hkʼaw‸ piˇ-oˆ, teh‸ kʼoˆ gaˇ ve yoˬ. teh‸ meh piˇ ve yoˬ. Awˬ lawn kʼo, Dawˆ paˆ ve hta‸ gʼa hkanˍ ve tuˉ tanˇ kuiˬ lehˬ, yawˇ ve tuˉ tanˇ kuiˬ hpeh‸ ve yoˬ, teh‸ kʼoˆ ve pa taw yoˬ.
33Oˇ htaˇ Meˉdiˍanˍ chaw, Aˍmaˍlehˆ chaw leh heh puiˉ hkʼaw lo chehˇ ve chaw hkʼa peu-eˬ hpawnˬ laˬ leh, Yawˇdanˍ iˉ kaˆ lawˬ hta‸ hkanˍ peuˬ hkʼaw‸ nawˉ, Yeˍzaˍreˍlaˆ lawˬ hkʼo‸ hkʼaw deh chehˇ taˍ ve yoˬ. 34Gʼuiˬsha ve Awˬ ha hpu Giˉdonˍ awˬ hkʼoˆ ya‸ la ve yoˬ. Hkʼe te leh, Aˍbeˍsaˍ ve awˬ ceuˬ awˬ hkʼaˇ teˇ hpaˍ, yawˇ hkʼaˇ suh gʼa‸ laˬ tuˬ behˬheh ma meuˆ piˇ ve yoˬ. 35Maˍnaˍseˍ awˬ ceuˬ awˬ hkʼaˇ teˇ hpaˍ htawˇ, yawˇ hkʼaˇ suh laˬ tuˬ, yawˇ hui ve mvuhˇmiˬ lo chaw hta‸ hpehˇ leh ca kuˬ tcuh ve yoˬ. Aˍshaˍ, Zaˍbuˆlonˍ leh Naˍtaˍliˆ awˬ ceuˬ awˬ hkʼaˇ teˇ hpaˍ hta‸ htawˇ yawˇ ca kuˬ tcuh leh, yawˇ hui hkʼa peu-eˬ yawˇ geh hpawnˬ laˬ ve yoˬ.
36Oˇ htaˇ Giˉdonˍ Gʼuiˬsha hta‸ kʼoˆ piˇ ve, Iˉsaˍreˍlaˆ chaw hui hta‸ htaiˍ hkʼaw‸ piˇ tuˬ, nawˬ ngaˬ hta‸ yehˇ gaˇ ve yoˬ, teh‸ kʼoˆ laˇ taˍ ve yoˬ. 37Chi beu‸ caˬ jaw‸ kuiˬ lo ngaˬ yawˬ mvuh teˇ hpaˍ teh taˍ ve yoˬ. Shawˉ pawˍ mvuhˇ htiˇ la ve teˇ yanˇ, yawˬ mvuh hta‸ tiˉ ciˍ gʼuiˬ nehˆ leh, miˬguiˬ lehˬ goˇ lehˍ cawˬ chehˇ taˍ laˇ ve kʼo, nawˬ ngaˬ hta‸ yehˇ leh Iˉsaˍreˍlaˆ chaw hui hta‸ htaiˍ hkʼaw‸ piˇ gaˇ ve hta‸ ngaˬ awˬ tehˬ awˬ na gʼa shiˍ tuˬ yoˬ, teh‸ Gʼuiˬsha hta‸ kʼoˆ piˇ ve yoˬ. 38Yawˇ kʼoˆ ve hkʼe hpeh‸ la ve yoˬ. Shawˉ pawˍ teˇ na‸ Giˉdonˍ tu la leh, yawˬ mvuh hta‸ nehˆ taˍ ve ciˍ gʼuiˬ hta‸ hkehˇ teˇ maˬ hkʼaw suhˉ keu ve teˇ yanˇ, hkehˇ teˇ maˬ iˉ kaˆ hkʼa biˇ gʼa ve yoˬ. 39Oˇ htaˇ Giˉdonˍ lehˬ, Gʼuiˬsha-oˬ ngaˬ hta‸ nyi ma a ciˉ taˇ zuhˆ laˇ sheˍ. Ngaˬ nawˬ hta‸ tawˇ teˇ pawˆ ceh tawˇ kʼaw‸ yaw tcuh laˇ sheˍ. Yawˬ mvuh chi ve hta‸ ngaˬ teˇ pawˆ kʼaw‸ lawˇ nyi gaˇ sheˍ ve yoˬ. Yawˬ mvuh chi goˇ lehˍ cawˬ leh, miˬguiˬ hkʼoˆ ciˍ gʼuiˬ hkʼa biˇ cawˬ taˍ piˇ-oˆ, teh‸ Gʼuiˬsha hta‸ kʼoˆ piˇ ve yoˬ. 40Oˇ ve teˇ haˉ, Gʼuiˬsha oˇ hkʼe te piˇ ve yoˬ. Yawˬ mvuh lehˬ goˇ lehˍ cawˬ leh, miˬguiˬ hkʼoˆ ciˍ gʼuiˬ hkʼa biˇ cawˬ ve yoˬ.
Currently Selected:
Suhˉ jehˬ ve li‸ 6: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
