Haˍbaˍkuˆ li‸ 2
2
Haˍbaˍkuˆ hta‸ Gʼuiˬsha kʼaw‸ yaw hkʼaw‸ piˇ ve tawˇ
1Ngaˬ lehˬ ta‸ yehˬ hkʼoˆ taˆ-e leh, yawˇ ngaˬ hta‸ kʼaw‸ yaw hkʼaw‸ laˇ tuˬ ve tawˇ teˇ hpaˍ hta‸ ca law na taˍ tuˬ yoˬ.
2Gʼuiˬsha ngaˬ hta‸ kʼaw‸ yaw hkʼaw‸ leh kʼoˆ laˇ ve, Ngaˬ nawˬ hta‸ hpeu‸ maˍ laˇ ve awˬ ceuˬ chi teˇ hpaˍ hta‸ nawˬ hkʼa deh‸ gʼaw gʼa tuˬ, haˉ pui baˉ hkʼoˆ lo bvuh‸ keu taˍ-o‸. 3Awˬ lawn chi ve chi beu‸ la‸ haˉ hpeh‸ la tuˬ ve maˇ heˆ sheˍ ve pa taw, nawˬ hkʼa deh‸ bvuh‸ keu taˍ-o‸. Ya‸ hkʼaˇ, awˬ yanˇ haˆ haˆ gaˬ la chehˇ leh, ngaˬ nawˬ hta‸ maˍ piˇ taˍ ve awˬ ceuˬ oˇ ve awˬ tehˬ awˬ na hpeh‸ la tuˬ yoˬ. Ngaˬ tinˍ taˍ ve awˬ yanˇ gaˬ la ve kʼo, awˬ ceuˬ oˇ ve awˬ tehˬ awˬ na hpeh‸ la tuˬ yoˬ. 4Nawˬ gʼa bvuh‸ taˍ tuˬ ve tawˇ lehˬ chi hkʼe yoˬ. Haiˬ ve chaw teˇ hpaˍ gʼa te‸ chehˇ tuˬ ve maˇ heˆ. Ya‸ hkʼaˇ, hteˇ ve cawˇ ve chaw lehˬ Gʼuiˬsha hta‸ ka ti‸ yeˬ chehˇ ve pa taw gʼa te‸ chehˇ tuˬ yoˬ, teh‸ kʼoˆ ve tawˇ hkawˇ yoˬ, teh‸ Gʼuiˬsha kʼoˆ ve yoˬ.
Maˇ hteˇ maˇ cawˇ ve chaw gʼa luˬ gʼa sheˆ ve
5Hpu shi mawˇ jeˬ teˇ ceuˬ lehˬ chaw yaˇ hta‸ heˍ puiˉ ve yoˬ. Tuˬ ve chaw teˇ hpaˍ lehˬ caˆ muiˬ puiˉ leh, suh ve teˇ ceuˬ hkʼa shuˍ hkʼaˬ htaˆ ka‸ nyi hkʼaˇ maˇ suh puiˉ. Chi hta‸ pa taw, yawˇ hui lehˬ mvuhˇmiˬ teˇ maˬ peuˬ teˇ maˬ hta‸ bawˆ yuˬ chehˇ ve yoˬ. 6Bawˆ yuˬ ve hta‸ gʼa hkanˍ ve chaw teˇ hpaˍ lehˬ, bawˆ yuˬ shehˍ hpaˇ teˇ hpaˍ hta‸ deˇ leh hkʼa mvuhˇ hkʼa na kʼoˆ chehˇ ve yoˬ. Nawˬ hui lehˬ, nawˬ hui ve mawˇ maˇ heˆ ve teˇ hpaˍ hta‸ hiˉ yuˬ ve pa taw, gʼa luˬ gʼa sheˆ tuˬ yoˬ. Nawˬ hui lehˬ, hkʼaˬ maw maw nawˬ hui geh jeˬ cha taˍ ve chaw hui hta‸ nyiˉ caˇ chehˇ tuˬ sheˍ ve le, teh‸ yawˇ hui kʼoˆ tuˬ yoˬ.
7Nawˬ hui maˇ jawˬ maˇ hkehˆ te chehˇ ve awˬ yanˇ hkʼaw, nawˬ hui lehˬ shu geh jeˬ kʼaw‸ cha leh, awˬ yawˬ htawˇ gʼa kʼaw‸ piˇ tuˬ yoˬ. Canˇ paˍ teˇ hpaˍ nawˬ hui geh gaˬ la leh, nawˬ hui hta‸ kawˆ cheˇ piˇ lawˬ tuˬ yoˬ. Yawˇ hui lehˬ nawˬ hui ve mawˇ jeˬ teˇ hpaˍ hta‸ hiˉ yuˬ kʼai tuˬ yoˬ. 8Nawˬ hui lehˬ mvuhˇmiˬ laiˉ peˆ hkʼaw chehˇ ve chaw hui hta‸ hiˉ yuˬ lu yuˬ peuˬ ve yoˬ. Nawˬ hui lehˬ chaw hta‸ tiˇ pehˍ leh, chaw yaˇ teˇ hpaˍ hta‸ maˇ shawˍ maˇ caˆ te piˇ ve pa taw, cawˬ taˉ sheˍ ve chaw oˇ ve teˇ hpaˍ chi beu‸ nawˬ hui ve mawˇ jeˬ hta‸ kʼaw‸ hiˉ yuˬ tuˬ yoˬ.
9Nawˬ hui gʼa luˬ gʼa sheˆ tuˬ yoˬ. Awˬ lawn kʼo, nawˬ hui shu ve mawˇ jeˬ hta‸ hiˉ yuˬ lu yuˬ leh, nawˬ hui ve yehˬ kʼa hta‸ paw sha la piˇ taˍ ve awˬ hkʼoˆ, nawˬ hui ve yehˬ kʼa maˇ gʼa luˬ tuˬ, hkʼa deh‸ te taˍ peuˬ ve pa taw yoˬ. 10Ya‸ hkʼaˇ, nawˬ hui ve dawˇ hkʼaˇ lehˬ nawˬ hui ve yehˬ kʼa awˬ hkʼoˆ lo ya‸ taw ve teˇ ceuˬ kʼaw‸ gaˬ la piˇ ve yoˬ. Nawˬ hui shu ve mvuhˇmiˬ hta‸ te luˬ te sheˆ piˇ ve pa taw, nawˬ hui gʼa luˬ gʼa sheˆ tuˬ yoˬ. 11Lanˇ venˇ kawˍ taˍ ve haˉ pui shiˍ teˇ hpaˍ, nawˬ hui hta‸ venˇbaˆ taˍ leh kuˬ tuˬ yoˬ. Yehˬ hkʼoˆ lo cawˬ ve toˉ la‸ teˇ hpaˍ htawˇ gʼaˇ hte‸ kuˬ tuˬ yoˬ.
12Nawˬ hui gʼa luˬ gʼa sheˆ tuˬ yoˬ. Awˬ lawn kʼo, nawˬ hui lehˬ shu hta‸ tiˇ pehˍ leh, maˇ hteˇ maˇ cawˇ ve hkʼaw venˇ hta‸ kawˍ chehˇ ve yoˬ. 13Nawˬ hui bawˆ yuˍ taˉ ve mvuhˇmiˬ teˇ hpaˍ hkʼaw chehˇ taˍ ve chaw teˇ hpaˍ, hkʼaˬ ma kanˉ te taˍ ve htawˇ te‸ chiˉ awˬ bon maˇ tawˆ la. Yawˇ hui te taˍ ve kanˉ hta‸ aˬ miˍ to‸ baˬ peuˬ ve yoˬ. Chi hkʼe hpeh‸ la tuˬ Gʼuiˬsha te taˍ ve yoˬ. 14Laˇ tsuhˇ gʼuiˬ hkʼaw lo iˉ kaˆ biˇ taˍ ve hkʼe, miˬguiˬ hkʼoˆ lo Gʼuiˬsha ve awˬ me‸ awˬ hponˇ hkʼa biˇ cawˬ taˍ tuˬ yoˬ.
15Nawˬ hui gʼa luˬ gʼa sheˆ tuˬ yoˬ. Awˬ lawn kʼo, nawˬ hui nyi ma zuhˆ ve hkʼaw awˬ paˇ awˬ kui chehˇ ve chaw hui hta‸ nyiˉ ya‸ leh, awˬ me‸ awˬ hponˇ luˬ kʼai tuˬ te piˇ ve yoˬ. Nawˬ hui lehˬ yawˇ hui teˇ hpaˍ hta‸ tzuhˬ bvuhˆ paˍ hkʼa shuˍ ya‸ kʼaw hkʼa deh‸ juˇ kʼai maˇ gʼa tuˬ te piˇ ve yoˬ. 16Chi hta‸ pa taw, ya‸ taw tuˬ awˬ ceuˬ nawˬ hui awˬ hkʼoˆ lo kʼaw‸ gaˬ la tuˬ yoˬ. Nawˬ hui tzuhˬ dawˬ bvuhˆ leh ya‸ kʼaw hkʼa deh‸ juˇ kʼai gʼa tuˬ ve maˇ heˆ. Gʼuiˬsha lehˬ ciˍ yanˍ ve kawˆ nawˬ hui hta‸ taw laˇ leh, nawˬ hui ve awˬ me‸ awˬ hponˇ luˬ kʼai tuˬ yoˬ. 17Nawˬ hui lehˬ Leˍbaˍnonˍ hkʼaw hkʼoˆ lo cawˬ ve suhˆ tsuh de lonˉ hta‸ htu baˬ piˇ ve pa taw, nawˬ hui htawˇ chi beu‸ htu baˬ ve hta‸ gʼa hkanˍ tuˬ yoˬ. Nawˬ hui lehˬ oˇ kaˬ lo chehˇ taˍ ve to nuˇ to shaˆ teˇ hpaˍ hta‸ tiˇ pehˍ piˇ ve pa taw, to nuˇ to shaˆ teˇ hpaˍ chi beu‸ nawˬ hui hta‸ kʼaw‸ ho laˇ tuˬ yoˬ. Nawˬ hui lehˬ miˬguiˬ hkʼoˆ chehˇ ve awˬ nu ve chaw ceuˬ teˇ hpaˍ hta‸ tiˇ pehˍ leh, yawˇ hui hta‸ hkʼa mvuhˇ hkʼa na te piˇ ve pa taw, awˬ ceuˬ chi teˇ hpaˍ hpeh‸ la tuˬ yoˬ.
18Shaˉ ho‸ lehˬ aˬ hto‸ ma awˬ bon cawˬ le. Oˇ ve lehˬ chaw yaˇ la‸ sheh te taˍ ve awˬ ceuˬ hpeh‸ leh, nawˬ hta‸ tawˇ kʼaw‸ yaw laˇ puiˉ ve maˇ heˆ. Shaˉ ho‸ lehˬ yawˇ hta‸ te shehˍ hpaˇ yawˇ hta‸ yonˍ gʼa law‸ law‸ ve kanˉ hkʼaˬ hkʼe ve teˇ ceuˬ te gʼa ve le. Chi lehˬ, tawˇ yaw maˇ puiˉ ve gʼuiˬsha hpeh‸ ve yoˬ. 19Nawˬ hui gʼa luˬ gʼa sheˆ tuˬ yoˬ. Nawˬ hui lehˬ suhˆ baˉ, maˇ heˆ kʼo haˉ pui baˉ teˇ maˬ hta‸, Tu loˬ, teh‸ kʼoˆ piˇ chehˇ ve yoˬ. Shaˉ ho‸ lehˬ nawˬ hui hta‸ teˇ ceuˬ ceuˬ maˍ laˇ hto laˇ hpeh‸ aw laˇ. Shaˉ ho‸ hta‸ hpu, shi hkʼa deh‸ oˍ taˍ ve yoˬ. Ya‸ hkʼaˇ, yawˇ awˬ hkʼaw lo te‸ ve a sha‸ maˇ cawˬ.
20Gʼuiˬsha lehˬ yawˇ ve da‸ kehˬ ve bon yehˬ hkʼaw chehˇ taˍ ve yoˬ. Miˬguiˬ hkʼoˆ chehˇ ve chaw hkʼa peu-eˬ yawˇ mehˆ gʼuˇ suhˍ ta‸ iˉ gawˬ lehˍ chehˇ piˇ lawˬ-o‸.
Currently Selected:
Haˍbaˍkuˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
