Awˬ hkuiˉ puiˍ ve li‸ 49

Yaˍkoˆ yawˇ ve yaˇ teˇ hpaˍ hta‸ bon na‸ piˇ ve

1Yaˍkoˆ lehˬ, yawˇ ve yaˇ teˇ hpaˍ hta‸ kuˬ hpawnˬ leh kʼoˆ ve, Nawˬ hui ngaˬ paˇ lo jiˆ laˬ-o‸. Laˬ tuˬ ve awˬ yanˇ hkʼaw nawˬ hui hkʼaˬ hkʼe hpeh‸ la tuˬ ve awˬ lawn ngaˬ hto maˍ laˇ shaˍ.

2Yaˍkoˆ ve yaˇ teˇ hpaˍ-oˬ, ngaˬ paˇ lo chehˇ taˍ leh,

nawˬ hui ve awˬ pa Iˉsaˍreˍlaˆ kʼoˆ chehˇ ve tawˇ teˇ hpaˍ hta‸ hkʼa deh‸ na taˍ-o‸.

3Ruˇbenˍ-oˬ, nawˬ lehˬ ngaˬ ve yaˇ paˍ uiˍ hpeh‸ leh,

ngaˬ ve awˬ gʼaˇ awˬ shaˉ,

ngaˬ ve yaˇ paˍ uiˍ,

ngaˬ ve awˬ me‸ awˬ hponˇ leh

ngaˬ ve kanˇ paˆ hpeh‸ ve yoˬ.

4Nawˬ lehˬ uiˍ taˆ la chehˇ ve iˉ kaˆ hkʼa shuˍ hpeh‸ ve yoˬ.

Ya‸ hkʼaˇ, uiˍ jaˇ ve chaw hpeh‸ la tuˬ ve maˇ heˆ.

Awˬ lawn kʼo, nawˬ lehˬ ngaˬ miˇ ma geh ca lo‸ zuh‸ leh,

nawˬ pa ve zuh‸ hpui hta‸ maˇ shawˍ maˇ caˆ te ve pa taw yoˬ.

5Suˉmonˍ leh Leˍviˆ lehˬ, awˬ viˉ awˬ nyi hpeh‸ ve yoˬ.

Yawˇ huiˉ maˬ la‸ caˉ yuˬ leh haiˬ ve kanˉ hta‸ te taˍ peuˬ ve yoˬ.

6Ngaˬ lehˬ, yawˇ huiˉ maˬ jehˬ da‸ kuiˬ lo kʼai tuˬ ve maˇ heˆ.

Awˬ lawn kʼo, yawˇ huiˉ maˬ nyi ma zuhˆ jaˇ ve hkʼaw, chaw yaˇ teˇ hpaˍ hta‸ tiˇ pehˍ leh,

nuˇ paˍ teˇ hpaˍ ve hkui kuˇ caˆ hta‸ tawˆ cheˆ piˇ ve yoˬ.

7Yawˇ huiˉ maˬ nyi ma zuhˆ ve lehˬ kawˆ tuˬ uiˍ jaˇ ve pa taw,

hkeu ve teˇ ceuˬ yawˇ huiˉ maˬ awˬ hkʼoˆ gaˬ la tuˬ yoˬ.

Ngaˬ lehˬ, yawˇ huiˉ maˬ hta‸ Iˉsaˍreˍlaˆ mvuhˇmiˬ hkʼaw yuˬ baˬ leh,

Iˉsaˍreˍlaˆ ve awˬ ceuˬ awˬ hkʼaˇ teˇ hpaˍ hkʼaw,

yawˇ huiˉ maˬ hta‸ hpaˆ da‸ kʼai piˇ lawˬ tuˬ yoˬ.

8Yuˇda‸-oˬ, nawˬ viˉ nawˬ nyi teˇ hpaˍ nawˬ hta‸ chiˇ mvuh tuˬ yoˬ.

Nawˬ lehˬ, canˇ paˍ teˇ hpaˍ ve kʼawˍ peˍ hta‸ yuˬ tiˍ taˍ ve yoˬ.

Nawˬ viˉ nawˬ nyi teˇ hpaˍ nawˬ mehˆ gʼuˇ suhˍ lo hkui tcuhˉ teh tuˬ yoˬ.

9Yuˇda‸ lehˬ, laˇ caˬ shiˉ hkʼe hpeh‸ leh shaˍ ca che‸ caˇ taˉ peuˬ hkʼaw‸ nawˉ,

haˉ kʼoˍ lo gʼuiˇ kʼaw‸ la leh zuh‸ taˍ ve yoˬ.

Chaw teˇ gʼaˇ ka‸ yawˇ hta‸ ca nawˍ piˇ maˇ haˆ ve yoˬ.

10Yuˇda‸ geh lo uˉ peunˍ tuˬ ve juˇ fuiˍ taˬ cawˬ leh,

yawˇ ve awˬ ceuˬ awˬ hkʼaˇ teˇ hpaˍ hkʼaˬ htaˆ ka‸ gʼa uˉ peunˍ chehˇ tuˬ yoˬ.

Chaw yaˇ teˇ hpaˍ yawˇ geh la‸ shawnˍ yuˬ laˬ leh, yawˇ mehˆ gʼuˇ suhˍ boˆ chehˇ tuˬ yoˬ.

11Yawˇ ve piˉ laˬ hta‸ da‸ jaˇ ve a pehˉ meuˇ te hta‸ hpeh taˍ leh,

yawˇ ve aˉ po‸ hta‸ a pehˉ meuˇ gʼuiˬ hkʼaw tsuhˇ ve yoˬ.

12Yawˇ ve mehˆ shiˍ lehˬ, a pehˉ meuˇ gʼuiˬ hta‸ pa taw nyiˉ-ehˍ cawˬ leh,

yawˇ ve ciˬ lehˬ, nuˇ cuˉ gʼuiˬ hta‸ pa taw hpuˉ-ehˍ cawˬ ve yoˬ.

13Zaˍbuˆlonˍ lehˬ, laˇ tsuhˇ gʼuiˬ pfuhˍ lo gʼa chehˇ leh,

yawˇ ve chehˇ kuiˬ lehˬ haw lo‸ kʼoˍ jehˇ kuiˬ hpeh‸ tuˬ yoˬ.

Yawˇ ve miˬ tcuhˉ lehˬ, Siˉdonˍ mvuhˇmiˬ lo hkʼa gaˬ hpeh‸ tuˬ yoˬ.

14Iˉsaˍhkaˍ lehˬ, nuˇ lanˉ kaˍ lo zuh‸ chehˇ ve piˉ laˬ a‸ kehˉ da‸ leuˉ ve maˇ heˆ.

15Ya‸ hkʼaˇ, yawˇ chehˇ taˍ ve mvuhˇmiˬ hkʼaˬ ma da‸ leh,

hkʼaˬ ma gawˬ lehˍ cawˬ ve hta‸ yawˇ gʼa mawˬ ve yoˬ.

Yawˇ lehˬ, mawˇ gʼa taˆ leh awˬ ceˬ hkʼa shuˍ kanˉ gʼa te ve yoˬ.

16Danˍ lehˬ yawˇ ve chaw ceuˬ teˇ hpaˍ hta‸ gʼa uˉ peunˍ leh,

yawˇ lehˬ awˬ nu ve Iˉsaˍreˍlaˆ chaw hui hkʼe hpeh‸ tuˬ yoˬ.

17Danˍ lehˬ, iˉ mvuhˇ ciˇ toˇ ve chaw ce kʼai tuˬ ya‸ kʼaw hpuiˇ lo law taˍ leh,

iˉ mvuhˇ hkui sheh hta‸ htawˆ piˇ ve vuiˬ haiˬ hkʼa shuˍ hpeh‸ ve yoˬ.

18Gʼuiˬsha-oˬ, ngaˬlehˬ nawˬ htaiˍ hkʼaw‸ tuˬ ve hta‸ dawˇ law chehˇ ve yoˬ.

19Gaˆ lehˬ, chaw hkʼawˇ dawˆ ve hta‸ gʼa hkanˍ tuˬ yoˬ.

Yawˇ lehˬ, chaw hkʼawˇ oˇ ve teˇ hpaˍ hta‸ kʼaw‸ gʼa‸ yuˬ ve yoˬ.

20Aˍshaˍ ve mvuhˇmiˬ lehˬ caˇ tuˬ hkʼa biˇ cawˬ tuˬ yoˬ.

Yawˇ lehˬ jawˇmawˇ hta‸ caˇ tuˬ oˇ ve teˇ hpaˍ gʼa caˍ piˇ tuˬ yoˬ.

21Naˍtaˍliˆ lehˬ, nyi sha jaˇ ve hkuiˉ zuhˬ ehˉ hta‸ paw la piˇ ve

hkuiˉ zuhˬ awˬ ma peuˍ hpeh‸ ve yoˬ.

22Yoˇseh‸ lehˬ, iˉ kaˆ lawˬ paˇ lo chehˇ ve piˉ laˬ awˬ hteunˍ hkʼe hpeh‸ leh,

hkʼaw hkʼoˆ lo chehˇ ve iˉ mvuhˇ awˬ hteunˍ hkʼe hpeh‸ ve yoˬ.

23Canˇ paˍ teˇ hpaˍ yawˇ hta‸ ga hpoˆ bawˆ leh,

yawˇ hkʼaˇ suh gʼa‸ yuˬ ve yoˬ.

24Yaˍkoˆ ve Gʼuiˬsha leh, Iˉsaˍreˍlaˆ ve yawˬ hawˉ shehˍ hpaˇ ve kanˇ paˆ hta‸ pa taw,

yawˇ ve hkaˆ lehˬ hkʼaˬ htaˆ ka‸ yeˬ chehˇ leh,

yawˇ ve la‸ sheh awˬ gʼaˇ uiˍ jaˇ ve yoˬ.

25Nawˬ pa ve Gʼuiˬsha lehˬ nawˬ hta‸ awˬ bon na‸ laˇ chehˇ leh,

mvuhˇ naw ma ve mvuhˇ yeˬ gʼuiˬ, miˬguiˬ hkʼaw ve iˉ kaˆ, ceˇ caˬ leh awˬ yaˇ awˬ duˬ teˇ hpaˍ,

26awˬ shiˍ awˬ nu leh suhˉ veˆ teˇ hpaˍ, hkʼaw hkʼoˆ lo cawˬ ve da‸ ve awˬ bon teˇ hpaˍ,

Yoˇseh‸ ve oˉ kʼoˍ hkʼoˆ lo gaˬ la piˇ-oˆ. Awˬ lawn kʼo, nawˬ lehˬ nawˬ viˉ nawˬ nyi teˇ hpaˍ ve awˬ hoˉ hpeh‸ ve yoˬ.

27Beˍyaˍmenˍ lehˬ, haiˬ jaˇ ve heh hpuiˇ hkʼe hpeh‸ ve yoˬ.

Mvuhˇ shawˉ htaˇ maˇ kʼoˆ, mvuhˇ hpeu‸ htaˇ maˇ kʼoˆ, yawˇ lehˬ shu hta‸ che‸ caˇ chehˇ ve yoˬ, teh‸ kʼoˆ ve yoˬ.

28Chaw chi teˇ hpaˍ lehˬ, Iˉsaˍreˍlaˆ chaw teˇ chi nyiˇ ceuˬ hpeh‸ leh, chi ve lehˬ yawˇ hui teˇ gʼaˇ peuˬ teˇ gʼaˇ hta‸ yawˇ hui ve awˬ pa bon na‸ piˇ hkawˇ hpeh‸ ve yoˬ.

Yaˍkoˆ suh-e ve

29Oˇ ve hkʼaw‸ nawˉ, Yaˍkoˆ yawˇ ve yaˇ teˇ hpaˍ hta‸ kʼoˆ piˇ ve, Ngaˬ lehˬ chi beu‸ suh la paˇ neˇ ve yoˬ. Ngaˬ suh-e ve kʼo, ngaˬ hta‸ Hiˇtiˆ chaw Eˇhpaˍronˍ ve miˬguiˬ hkʼaw cawˬ ve haˉ kʼoˍ hkʼaw, ngaˬ puˍ ngaˬ pi hui geh ca tuˍ laˇ-oˆ. 30Haˉ kʼoˍ oˇ ve lehˬ, Maˆpeˍlaˆ teh‸ kʼoˆ ve chehˇ kuiˬ, Hkaˍnanˍ mvuhˇmiˬ Maˍreˍ mvuhˇ nyi tawˆ hpawˇ lo cawˬ ve yoˬ. Chehˇ kuiˬ oˇ ve lehˬ, Aˍbraˍhanˍ Hiˇtiˆ chaw Eˇhpaˍronˍ geh vuiˬ yuˬ taˍ ve chaw tuˍ kuiˬ hpeh‸ ve yoˬ. 31Aˍbraˍhanˍ leh yawˇ ve awˬ miˇ ma Saˍraˇ hta‸ maˇ kʼoˆ, Iˉcaˆ leh yawˇ ve awˬ miˇ ma Reˍbehˆka‸ hta‸ maˇ kʼoˆ, oˇ kaˬ lo tuˍ piˇ taˍ ve yoˬ. Leˉaˍ hta‸ htawˇ ngaˬ oˇ kaˬ lo tuˍ piˇ taˍ ve yoˬ. 32Miˬguiˬ oˇ ve leh haˉ kʼoˍ oˇ ve hta‸ Hiˇtiˆ chaw hui geh vuiˬ yuˬ taˍ ve yoˬ. Ngaˬ hta‸ htawˇ oˇ kaˬ lo ca tuˬ laˇ-oˆ, teh‸ yawˇ hui hta‸ kʼoˆ piˇ ve yoˬ. 33Yaˍkoˆ lehˬ tawˇ oˇ ve teˇ hpaˍ hta‸ awˬ leh meuˇ yaw taˉ peuˬ leh shaˉ leh kʼai ve yoˬ.

Currently Selected:

Awˬ hkuiˉ puiˍ ve li‸ 49: LHBE

Highlight

Copy