Awˬ hkuiˉ puiˍ ve li‸ 41

Jawˇmawˇ zuh‸ maˆ mawˬ ve

1Oˇ ve hkʼaw‸ nawˉ nyiˇ hkʼaw‸ hkʼe ponˬ peuˬ ve teˇ yanˇ, Eˇjiˇtu‸ jawˇmawˇ lehˬ zuh‸ maˆ teˇ maˬ gʼa mawˬ ve yoˬ. Yawˇ lehˬ Niˍlaˆ iˉ kaˆ lawˬ paˇ lo huˉ chehˇ ve yoˬ. 2Oˇ htaˇ, iˉ kaˆ lawˬ oˇ ve hkʼaw da‸ jaˇ chu jaˇ ve nuˇ ma peuˍ suhˍ hkeh tawˆ la leh, gʼuiˬ pfuhˍ paˇ lo kʼaˆ caˇ chehˇ ve yoˬ. 3Oˇ ve hkʼaw‸ nawˉ, cawˉ jaˇ leh a ciˉ ka‸ nyi maˇ sha ve nuˇ ma peuˍ suhˍ hkeh kʼaw‸ tawˆ la leh, 4awˉ lawˉ peuˇ tawˆ la taˍ ve nuˇ ma peuˍ oˇ ve suhˍ hkeh hta‸ hehˆ dawˬ sheˬ ve yoˬ. Oˇ ve hkʼaw‸ nawˉ yawˇ nawˇ la ve yoˬ. 5Yawˇ teˇ pawˆ kʼaw‸ zuh‸-e leh, awˬ nu ve zuh‸ maˆ teˇ maˬ hta‸ kʼaw‸ mawˬ ve yoˬ. Awˬ shiˍ uiˍ leh da‸ ve caˬ nu suhˍ nu lehˬ, caˬ cehˬ teˇ cehˬ tiˉ hkʼaw tawˆ la ve yoˬ. 6Oˇ ve hkʼaw‸ nawˉ, chiˆ jaˇ ve mvuhˇ haw hta‸ pa taw, luˬ kʼai leh maˇ maˬ ve caˬ nu suhˍ nu kʼaw‸ tawˆ la ve yoˬ. 7Maˇ maˬ ve caˬ nu oˇ ve teˇ hpaˍ lehˬ, maˬ da‸ jaˇ ve caˬ nu oˇ ve suhˍ nu hta‸ hehˆ dawˬ sheˬ ve yoˬ. Jawˇmawˇ teˇ pawˆ kʼaw‸ nawˇ la leh, yawˇ zuh‸ maˆ chehˇ ve hta‸ shiˍ la ve yoˬ. 8Mvuhˇ htiˇ la htaˇ jawˇmawˇ lehˬ nyi ma sho‸ sha‸ jaˇ ve yoˬ. Hkʼe te leh, Eˇjiˇtu‸ mvuhˇmiˬ hkʼaw hkʼa chehˇ ve cuˇ yiˍ cawˬ paˍ leh mawˉ paˍ hkʼa peu-eˬ ve hta‸ yawˇ geh kuˬ yuˬ leh, yawˇ gʼa mawˬ ve zuh‸ maˆ oˇ ve teˇ hpaˍ yawˇ hui hta‸ kʼoˆ maˍ piˇ ve yoˬ. Ya‸ hkʼaˇ, chaw teˇ gʼaˇ ka‸ zuh‸ maˆ ve tcuhˉ kuiˬ hta‸ yuˬ tawˆ maˇ gʼa.

9Oˇ htaˇ, jawˇmawˇ hta‸ a pehˉ meuˇ gʼuiˬ keu taw piˇ shehˍ hpaˇ kʼoˆ ve, Ngaˬ ve venˇbaˆ hta‸ ya‸ nyi ngaˬ kʼaw‸ dawˇ nawˇ ve yoˬ. 10Teˇ pawˆ htaˇ, jawˇmawˇ nawˬ lehˬ nawˬ hta‸ caˇ tuˬ te caˍ shehˍ hpaˇ ngaˬ huiˉ maˬ hta‸ nyi ma zuhˆ leh htawnˍ hkʼaw yuˬ keu laˇ ve yoˬ. 11Teˇ haˉ htaˇ, ngaˬ huiˉ maˬ zuh‸ maˆ teˇ gʼaˇ teˇ maˬ gʼa mawˬ ve yoˬ. 12Oˇ kaˬ lo ngaˬ hui geh ma‸ poˍ lonˉ ve awˬ ceˬ paˍ Heˍbrehˇ chaw teˇ gʼaˇ chehˇ taˍ ve yoˬ. Ngaˬ huiˉ maˬ gʼa mawˬ ve zuh‸ maˆ oˇ ve yawˇ hta‸ hto maˍ piˇ leh, yawˇ ngaˬ huiˉ maˬ hta‸ tcuhˉ kuiˬ yuˬ tawˆ laˇ ve yoˬ. 13Yawˇ kʼoˆ ve hkʼe awˬ tehˬ awˬ na hpeh‸ la ve yoˬ. Ngaˬ lehˬ, ngaˬ te chehˇ ve kanˉ awˬ piˍ hta‸ kʼaw‸ gʼa leh, yawˇ lehˬ suhˆ hkuiˉ daw hkʼoˆ hpeh chiˇ ve hta‸ gʼa hkanˍ ve yoˬ, teh‸ jawˇmawˇ hta‸ kʼoˆ piˇ ve yoˬ.

14Oˇ htaˇ, jawˇmawˇ lehˬ teˇ cawˬ haˉ Yoˇseh‸ hta‸ ca kuˬ tcuh leh, yawˇ hta‸ htawnˍ hkʼaw shiˍ tawˆ la ve yoˬ. Yawˇ paˇ tcuhˆ chiˇ baˬ leh veu‸ kʼaˇ htaiˍ peuˬ hkʼaw‸ nawˉ jawˇmawˇ geh laˬ ve yoˬ. 15Jawˇmawˇ yawˇ hta‸ kʼoˆ piˇ ve, Ngaˬ zuh‸ maˆ teˇ maˬ mawˬ ve yoˬ. Ya‸ hkʼaˇ, chaw teˇ gʼaˇ ka‸ zuh‸ maˆ oˇ ve tcuhˉ kuiˬ yuˬ tawˆ laˇ maˇ gʼa. Nawˬ zuh‸ maˆ tcuhˉ kuiˬ yuˬ tawˆ puiˉ ve awˬ lawn ngaˬ gʼa kaˇ ve yoˬ, teh‸ yawˇ hta‸ kʼoˆ piˇ ve yoˬ.

16Yoˇseh‸ kʼoˆ ve, Ngaˬ lehˬ zuh‸ maˆ ve tcuhˉ kuiˬ hta‸ maˇ shiˍ. Ya‸ hkʼaˇ, Gʼuiˬsha lehˬ jawˇmawˇ nawˬ zuh‸ maˆ ve tcuhˉ kuiˬ hta‸ hpeu‸ maˍ laˇ tuˬ yoˬ, teh‸ kʼoˆ piˇ ve yoˬ.

17Oˇ htaˇ jawˇmawˇ kʼoˆ ve, Zuh‸ maˆ ve hkʼaw ngaˬ lehˬ Niˍlaˆ iˉ kaˆ lawˬ paˇ lo huˉ chehˇ taˍ ve yoˬ. 18Oˇ htaˇ, chu jaˇ leh nyi sha jaˇ ve nuˇ ma peuˍ suhˍ hkeh iˉ kaˆ lawˬ hkʼaw tawˆ la leh, gʼuiˬ pfuhˍ paˇ lo kʼaˆ caˇ chehˇ taˍ ve yoˬ. 19Oˇ ve hkʼaw‸ nawˉ, cawˉ jaˇ leh a ciˉ ka‸ nyi maˇ sha ve nuˇ ma peuˍ suhˍ hkeh kʼaw‸ tawˆ la ve yoˬ. Eˇjiˇtu‸ mvuhˇmiˬ hkʼaw chi taw taw cawˉ ve nuˇ hta‸ ngaˬ teˇ pawˆ ka‸ maˇ mawˬ jaw. 20Cawˉ jaˇ ve nuˇ ma peuˍ oˇ ve teˇ hpaˍ lehˬ, chu jaˇ ve nuˇ ma peuˍ teˇ hpaˍ hta‸ hehˆ dawˬ sheˬ ve yoˬ. 21Chi hkʼe hehˆ dawˬ taˍ peuˬ ve ka‸, nuˇ ma peuˍ oˇ ve teˇ hpaˍ lehˬ cawˉ jaˇ chehˇ sheˬ ve yoˬ. Hkʼaˬ hkʼe hpeh‸ ve hta‸ chaw teˇ gʼaˇ ka‸ shiˍ tuˬ ve maˇ heˆ. Oˇ ve hkʼaw‸ nawˉ, ngaˬ nawˇ la ve yoˬ. 22Ngaˬ teˇ pawˆ kʼaw‸ zuh‸-e leh, awˬ shiˍ uiˍ leh da‸ jaˇ ve caˬ nu suhˍ nu caˬ cehˬ teˇ cehˬ tiˉ hkʼaw tawˆ la taˍ ve hta‸ ngaˬ gʼa kʼaw‸ mawˬ ve yoˬ. 23Oˇ ve hkʼaw‸ nawˉ, chiˆ jaˇ ve mvuhˇ haw hta‸ pa taw, luˬ kʼai leh maˇ maˬ ve caˬ nu suhˍ nu kʼaw‸ tawˆ la ve yoˬ. 24Maˇ maˬ ve caˬ nu oˇ ve teˇ hpaˍ lehˬ, maˬ da‸ jaˇ ve caˬ nu oˇ ve suhˍ nu hta‸ hehˆ dawˬ sheˬ ve yoˬ. Awˬ lawn chi teˇ hpaˍ mawˉ paˍ hui hta‸ hto maˍ piˇ ve htawˇ, yawˇ hui teˇ gʼaˇ ka‸ ngaˬ hta‸ tcuhˉ kuiˬ yuˬ tawˆ laˇ maˇ gʼa, teh‸ yawˇ hta‸ kʼoˆ piˇ ve yoˬ.

25Yoˇseh‸ kʼoˆ ve, Nawˬ gʼa mawˬ ve zuh‸ maˆ chi ve nyiˇ maˬ lehˬ, tcuhˉ kuiˬ teˇ ceuˬ ceh tiˉ yoˬ. Gʼuiˬsha yawˇ te tuˬ ve kanˉ nawˬ hta‸ hpeu‸ maˍ laˇ chehˇ ve yoˬ. 26Chu jaˇ ve nuˇ ma suhˍ hkeh lehˬ, suhˍ hkʼaw‸ hta‸ kʼoˆ gaˇ leh, maˬ da‸ jaˇ ve caˬ nu oˇ ve suhˍ nu htawˇ, suhˍ hkʼaw‸ hta‸ kʼoˆ gaˇ ve yoˬ. 27Awˬ hkʼaw‸ nawˉ kʼaw‸ tawˆ la ve cawˉ jaˇ ve nuˇ ma peuˍ oˇ ve suhˍ hkeh leh, chiˆ jaˇ ve mvuhˇ haw hta‸ pa taw luˬ kʼai taˍ ve caˬ nu oˇ ve suhˍ nu lehˬ, suhˍ hkʼaw‸ ve meu‸ lonˉ kaˆ lonˉ hta‸ kʼoˆ gaˇ ve yoˬ. 28Chi lehˬ, ngaˬ nawˬ hta‸ kʼoˆ piˇ taˍ peuˬ ve hkʼe, Gʼuiˬsha lehˬ yawˇ te tuˬ ve kanˉ nawˬ hta‸ hpeu‸ maˍ laˇ chehˇ ve yoˬ. 29Eˇjiˆtu‸ mvuhˇmiˬ chi hkʼaw, suhˍ hkʼaw‸ hkʼa gaˬ caˇ leuˉ dawˬ leuˉ hkʼa biˇ cawˬ tuˬ yoˬ. 30Oˇ ve hkʼaw‸ nawˉ, suhˍ hkʼaw‸ hkʼa gaˬ meu‸ lonˉ kaˆ lonˉ gaˬ la tuˬ yoˬ. Meu‸ lonˉ kaˆ lonˉ gaˬ la ve pa taw, mvuhˇmiˬ chi ve luˬ kʼai tuˬ yoˬ. 31Hkʼe te leh, chaw teˇ gʼaˇ ka‸ da‸ jaˇ ve awˬ hkʼaw‸ oˇ ve teˇ hpaˍ hta‸ kʼaw‸ dawˇ nawˇ tuˬ ve maˇ heˆ. 32Nawˬ lehˬ, awˬ lawn chi teˇ ceuˬ hta‸ ceh tiˉ zuh‸ maˆ nyiˇ pawˆ maˆ ve tcuhˉ kuiˬ lehˬ, Gʼuiˬsha kanˉ chi hta‸ te tuˬ dawˇ cheˆ taˍ peuˬ leh, maˇ maw maw mvuhˇmiˬ chi ve hkʼoˆ lo awˬ ceuˬ oˇ ve teˇ hpaˍ gaˬ la piˇ tuˬ yoˬ.

33Chi hta‸ pa taw, nawˬ lehˬ chi beu‸ dawˇ hkʼaˇ cawˬ leh cuˇ yiˍ cawˬ ve chaw hta‸ ca leh, mvuhˇmiˬ chi ve awˬ hkʼoˆ lo awˬ hoˉ te tcuh-o. 34Awˬ nu ve a ma‸ lonˉ teˇ hpaˍ hta‸ htawˇ leuˆ yuˬ leh, caˇ leuˉ dawˬ leuˉ cawˬ ve suhˍ hkʼaw‸ ve awˬ yanˇ chi hkʼaw, Eˇjiˇtu‸ mvuhˇmiˬ hkʼaw tawˆ ve awˬ shiˍ awˬ nu ngaˇ pun teˇ pun hta‸ shaw hpoˆ leh ha‸ shaˉ tcuh taˍ-o‸. 35Yawˇ hui hta‸ tawˇ piˇ leh caˇ leuˉ dawˬ leuˉ cawˬ ve awˬ yanˇ oˇ ve teˇ hpaˍ hkʼaw, awˬ shiˍ awˬ nu teˇ hpaˍ hta‸ shaw hpoˆ leh, venˇ teˇ hpaˍ hkʼaw hkʼa deh‸ ha‸ shaˉ tcuh taˍ-o‸. 36Awˬ shiˍ awˬ nu chi teˇ hpaˍ lehˬ, awˬ hkʼaw‸ nawˉ suhˍ hkʼaw‸ ve awˬ yanˇ hkʼaw Eˇjiˇtu‸ mvuhˇmiˬ hkʼaw gaˬ la tuˬ ve meu‸ lonˉ kaˆ lonˉ awˬ pon hpeh‸ ve yoˬ. Oˇ hkʼe te taˍ ve kʼo, chaw yaˇ teˇ hpaˍ gʼa meu‸ suh-e tuˬ ve maˇ heˆ, teh‸ kʼoˆ piˇ ve yoˬ.

Yoˇseh‸ jawˇmawˇ hpeh‸ la ve

37Yoˇseh‸ kʼoˆ ve tawˇ oˇ ve teˇ hpaˍ hta‸ jawˇmawˇ leh yawˇ ve a ma‸ lonˉ hkʼa peu-eˬ nyi ma cawˇ ve yoˬ. 38Oˇ htaˇ, jawˇmawˇ yawˇ ve a ma‸ lonˉ teˇ hpaˍ hta‸ kʼoˆ piˇ ve, Gʼuiˬsha ve Awˬ ha hpu chehˇ ve chi hkʼe ve chaw hta‸ ngaˬ hui ca gʼa tuˬ ve maˇ heˆ, teh‸ yawˇ hui hta‸ kʼoˆ piˇ ve yoˬ. 39Peuˬ leh yawˇ Yoˇseh‸ hta‸ kʼoˆ piˇ ve, Gʼuiˬsha lehˬ awˬ lawn chi teˇ hpaˍ nawˬ hta‸ hpeu‸ maˍ piˇ taˍ ve pa taw, nawˬ hkʼe taw dawˇ hkʼaˇ cawˬ leh cuˇ yiˍ cawˬ ve chaw teˇ gʼaˇ ka‸ maˇ cawˬ. 40Nawˬ lehˬ, ngaˬ ve mvuhˇmiˬ chi hta‸ nyi ha‸ shaˉ shehˍ hpaˇ gʼa te leh, ngaˬ ve chaw hkʼa peu-eˬ nawˬ ve tawˇ hta‸ gʼa na yuˬ tuˬ yoˬ. Nawˬ a‸ kehˉ uiˍ ve chaw lehˬ, ngaˬ teˇ gʼaˇ tiˉ cawˬ ve yoˬ. 41Chi beu‸ Eˇjiˇtu‸ mvuhˇmiˬ hkʼa peu-eˬ awˬ hkʼoˆ, ngaˬ nawˬ hta‸ teh taˍ ve yoˬ, teh‸ yawˇ hta‸ kʼoˆ piˇ peuˬ hkʼaw‸ nawˉ, 42yawˇ ve la‸ peˍ kʼehˆ leh Yoˇseh‸ hta‸ tcuhˉ piˇ ve yoˬ. Da‸ jaˇ ve veu‸ kʼaˇ htawˇ yawˇ hta‸ feuˉ piˇ leh, yawˇ ve kʼawˍ peˍ hta‸ shi caˆ pfuhˍ piˇ ve yoˬ. 43Peuˬ hkʼaw‸ nawˉ, yawˇ hta‸ yawˇ ve iˉ mvuhˇ lawˬ hkʼoˆ ciˇ tcuh ve yoˬ. Ma‸ yaˇ teˇ hpaˍ yawˇ gʼuˇ suhˍ kʼai leh, Chaw hkʼa peu-eˬ boˆ taˍ-o‸, teh‸ kuˬ toˇ ve yoˬ. Hkʼe te leh, Yoˇseh‸ lehˬ Eˇjiˇtu‸ mvuhˇmiˬ hkʼa peu-eˬ hkʼoˆ jawˇmawˇ hpeh‸ la ve yoˬ. 44Jawˇmawˇ yawˇ hta‸ kʼoˆ piˇ ve, Ngaˬ lehˬ jawˇmawˇ hpeh‸ ve yoˬ. Nawˬ geh a hkaw-anˬ maˇ gʼa ve kʼo, chaw teˇ gʼaˇ ka‸ Eˇjiˇtu‸ mvuhˇmiˬ hkʼaw tawˆ tawˆ lo‸ lo‸ maˇ gʼa te, teh‸ yawˇ hta‸ kʼoˆ piˇ ve yoˬ. 45Jawˇmawˇ lehˬ, Yoˇseh‸ hta‸ awˬ meh suhˉ Zaˍhpaˍnaˍtaˍhpaˍnaˆ teh‸ kʼaw‸ meh piˇ ve yoˬ. Peuˬ hkʼaw‸ nawˉ, yawˇ hta‸ Heˍliˍpawˇliˆ venˇ yaˇ, Pawˇtiˆhpeˍ raˆ ve yaˇ miˇ Aˍtaˍnaˆ hta‸ ka piˇ ve yoˬ.

46Eˇjiˇtu‸ jawˇmawˇ ve kanˉ hta‸ ca tanˬ te htaˇ, Yoˇseh‸ lehˬ a sha‸ 30 hkʼaw‸ gaˬ peuˬ ve yoˬ. Yawˇ jawˇmawˇ geh tawˆ kʼai leh, Eˇjiˇtu‸ mvuhˇmiˬ hkʼaˬ ti chi ti lo ca toˇ nyi kʼai ve yoˬ. 47Caˇ leuˉ dawˬ leuˉ cawˬ ve suhˍ hkʼaw‸ ve awˬ yanˇ hkʼaw, awˬ shiˍ awˬ nu teˇ hpaˍ maˇ maˇ cawˬ la ve yoˬ. 48Hkʼe te leh, Yoˇseh‸ lehˬ awˬ shiˍ awˬ nu oˇ ve teˇ hpaˍ hta‸ venˇ teˇ hpaˍ hkʼaw hkʼa deh‸ shaw hpoˆ leh ha‸ shaˉ taˍ ve yoˬ. 49Yawˇ shaw hpoˆ taˍ ve awˬ shiˍ awˬ nu teˇ hpaˍ lehˬ, laˇ tsuhˇ gʼuiˬ pfuhˍ lo cawˬ ve shehˇ shiˍ hkʼa shuˍ maˇ jaˇ ve pa taw, ca kawˬ nyi maˇ gʼa ve yoˬ.

50Meu‸ lonˉ kaˆ lonˉ maˇ gaˬ la sheˬ gʼuˇ suhˍ, Yoˇseh‸ lehˬ yaˇ paˍ nyiˇ gʼaˇ cawˬ taˍ peuˬ ve yoˬ. 51Yaˇ paˍ uiˍ teˇ gʼaˇ hta‸ Maˍnaˍseˍ #41:51 Chi lehˬ, leunˇ kʼai tuˬ te laˇ ve teh‸ kʼoˆ gaˇ ve yoˬ teh‸ meh piˇ ve yoˬ. Awˬ lawn kʼo yawˇ kʼoˆ ve, Gʼuiˬsha lehˬ ngaˬ ve tu‸ hkanˍ haˍ gʼawˇ ve leh, ngaˬ pa ve yehˬ yaˇ kʼa yaˇ teˇ hpaˍ hta‸ leunˇ kʼai tuˬ te laˇ peuˬ, teh‸ kʼoˆ ve yoˬ. 52Yaˇ paˍ nyiˇ gʼaˇ teˇ gʼaˇ hta‸ Eˇhpaˍrenˍ#41:52 Chi lehˬ, awˬ shiˍ teh‸ kʼoˆ gaˇ ve yoˬ teh‸ meh piˇ ve yoˬ. Awˬ lawn kʼo yawˇ kʼoˆ ve, Ngaˬ dawˇ haˍ chehˇ ve mvuhˇmiˬ chi hkʼaw Gʼuiˬsha ngaˬ hta‸ yaˇ teˇ hpaˍ piˇ laˇ peuˬ, teh‸ kʼoˆ ve yoˬ.

53Eˇjiˇtu‸ mvuhˇmiˬ hkʼaw lo caˇ leuˉ dawˬ leuˉ hkʼa biˇ cawˬ ve awˬ yanˇ oˇ ve suhˍ hkʼaw‸ ponˬ kʼai peuˬ ve teˇ yanˇ, 54Yoˇseh‸ kʼoˆ taˍ ve hkʼe, suhˍ hkʼaw‸ ve meu‸ lonˉ kaˆ lonˉ gaˬ la ve yoˬ. Ya‸ hkʼaˇ, Eˇjiˇtu‸ mvuhˇmiˬ hkʼaw lo lehˬ caˇ tuˬ dawˬ tuˬ hkʼa biˇ cawˬ taˍ ve yoˬ. 55Eˇjiˇtu‸ chaw teˇ hpaˍ awˍ meu‸ la ve teˇ yanˇ, jawˇmawˇ geh awˍ ca lawˬ ve yoˬ. Jawˇmawˇ yawˇ hui hta‸ Yoˇseh‸ geh kʼai tcuh leh, yawˇ kʼoˆ laˇ ve hkʼe te tuˬ kʼoˆ piˇ ve yoˬ. 56Teˇ kaˬ le le lo meu‸ ve kaˆ ve cawˬ la ve pa taw, Yoˇseh‸ lehˬ hkʼa gu taˍ ve caˬ ciˇ yehˬ teˇ maˬ le le ve hta‸ hpaw leh, Eˇjiˇtu‸ chaw hui hta‸ caˬ shiˍ hawˇ piˇ ve yoˬ. 57Mvuhˇmiˬ teˇ peˆ le le hkʼaw lo htawˇ meu‸ lonˉ kaˆ lonˉ gaˬ la ve pa taw, hkʼaˬ hpawˇ chi hpawˇ chehˇ ve chaw teˇ hpaˍ, Eˇjiˇtu‸ mvuhˇmiˬ lo laˬ leh Yoˇseh‸ geh caˬ shiˍ ca vuiˬ la ve yoˬ.

Currently Selected:

Awˬ hkuiˉ puiˍ ve li‸ 41: LHBE

Highlight

Copy