Awˬ hkuiˉ puiˍ ve li‸ 35

Yaˍkoˆ Beˍteˍlaˆ lo ca chehˇ ve

1Oˇ ve hkʼaw‸ nawˉ Gʼuiˬsha Yaˍkoˆ hta‸ kʼoˆ piˇ ve, Nawˬ tu leh Beˍteˍlaˆ lo ca chehˇ-oˆ. Nawˬ viˉ paˍ Iˉsawˇ geh nawˬ hpaw tawˆ la chehˇ htaˇ, nawˬ geh laˬ ve Gʼuiˬsha awˬ pon oˇ kaˬ lo tuˉ tanˇ kuiˬ teˇ maˬ ca te-o, teh‸ kʼoˆ piˇ ve yoˬ.

2Oˇ htaˇ, Yaˍkoˆ lehˬ yawˇ ve yehˬ yaˇ kʼa yaˇ leh yawˇ geh chehˇ taˍ ve chaw teˇ hpaˍ hta‸ chi hkʼe kʼoˆ piˇ ve yoˬ. Nawˬ hui geh cawˬ ve shaˉ ho‸ teˇ hpaˍ hta‸ yuˬ baˬ-oˬ. Nawˬ hui a shu yawˇ ve awˬ to hta‸ da‸ tuˬ kehˬ tuˬ te leh, veu‸ kʼaˇ awˬ suhˉ kʼaw‸ htaiˍ-o‸. 3Ngaˬ tu‸ chehˇ hkanˍ chehˇ htaˇ ngaˬ hta‸ ga laˇ leh, ngaˬ geh hkʼaˬ htaˆ ka‸ chehˇ taˍ ve Gʼuiˬsha awˬ pon tuˉ tanˇ kuiˬ teˇ maˬ ca te tuˬ, Beˍteˍlaˆ lo ngaˬ hui gʼa kʼai tuˬ yoˬ, teh‸ kʼoˆ piˇ ve yoˬ. 4Hkʼe te leh, yawˇ hui lehˬ a shu yawˇ geh cawˬ taˍ ve shaˉ ho‸ leh naˍ vawˇ teˇ hpaˍ hta‸ yuˬ leh Yaˍkoˆ hta‸ piˇ ve yoˬ. Yaˍkoˆ lehˬ mawˇ oˇ ve teˇ hpaˍ hta‸ Sheˍhkenˍ venˇ awˬ paˇ lo cawˬ ve maˉ kuˇ cehˬ hawˉ lo duˇ tuˍ ve yoˬ.

5Oˇ ve hkʼaw‸ nawˉ, yawˇ hui oˇ kaˬ lo tawˆ kʼai ve yoˬ. Yawˇ hui awˬ paˇ awˬ kui lo chehˇ ve venˇ yaˇ teˇ hpaˍ kawˆ jaˇ leh, yawˇ hui hkʼaˇ suh gʼa‸ yuˬ maˇ haˆ. 6Yaˍkoˆ leh yawˇ ve chaw teˇ hpaˍ, Hkaˍnanˍ mvuhˇmiˬ hkʼaw cawˬ ve Luˇzaˆ teh‸ kʼoˆ ve Beˍteˍlaˆ venˇ lo gaˬ la ve yoˬ. 7Oˇ kaˬ lo yawˇ Gʼuiˬsha hta‸ tuˉ tanˇ kuiˬ teˇ maˬ te leh, chehˇ kuiˬ oˇ ve hta‸ Beˍteˍlaˆ ve Gʼuiˬsha, teh‸ meh piˇ ve yoˬ. Awˬ lawn kʼo, yawˇ awˬ viˉ paˍ geh hpaw tawˆ la chehˇ htaˇ, oˇ kaˬ lo Gʼuiˬsha yawˇ geh laˬ leh yawˇ hta‸ tawˇ yaw piˇ ve pa taw yoˬ. 8Raˍhkeˍlaˆ ve awˬ ceˬ ma Diˍboˇraˍ suh-e leh Beˍteˍlaˆ venˇ awˬ hawˉ paˉ maˉkuˇ cehˬ hawˉ tuˍ piˇ ve yoˬ. Hkʼe te leh, chehˇ kuiˬ oˇ ve hta‸ Paˆ hawˬ kuiˬ maˉkuˇ cehˬ teh‸ meh ve yoˬ.

9Yaˍkoˆ lehˬ Meˍsoˇpoˇtaˍmiˆ mvuhˇmiˬ hkʼaw tawˆ la peuˬ hkʼaw‸ nawˉ, Gʼuiˬsha yawˇ geh teˇ pawˆ kʼaw‸ laˬ leh yawˇ hta‸ awˬ bon na‸ piˇ ve yoˬ. 10Gʼuiˬsha kʼoˆ ve, Nawˬ ve awˬ meh lehˬ Yaˍkoˆ yoˬ. Ya‸ hkʼaˇ, ya‸ nyi hkʼaw‸ nawˉ nawˬ hta‸ Yaˍkoˆ teh‸ maˇ gʼa kʼaw‸ kuˬ. Nawˬ ve awˬ meh lehˬ, Iˉsaˍreˍ laˆ hpeh‸ ve yoˬ, teh‸ kʼoˆ ve yoˬ. Hkʼe te leh, yawˇ hta‸ Iˉsaˍreˍlaˆ teh‸ meh piˇ ve yoˬ. 11Gʼuiˬsha kʼoˆ ve, Ngaˬ lehˬ kanˇ paˆ uiˍ ve Gʼuiˬsha hpeh‸ ve yoˬ. Nawˬ geh awˬ yaˇ awˬ duˬ maˇ maˇ cawˬ la piˇ-oˆ. Nawˬ geh lo awˬ ceuˬ awˬ hkʼaˇ maˇ maˇ cawˬ la leh, nawˬ awˬ hkʼaw lo jawˇmawˇ maˇ maˇ tawˆ la tuˬ yoˬ. 12Aˍbraˍhanˍ leh Iˉcaˆ hta‸ piˇ taˍ ve mvuhˇmiˬ chi, nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ piˇ laˇ tuˬ yoˬ, teh‸ yawˇ hta‸ kʼoˆ piˇ ve yoˬ. 13Peuˬ hkʼaw‸ nawˉ, Gʼuiˬsha yawˇ geh lo tawˆ kʼai ve yoˬ. 14Gʼuiˬsha yawˇ hta‸ tawˇ yaw piˇ ve chehˇ kuiˬ oˇ ve hkʼaw yawˇ haˉ pui shiˍ teˇ maˬ duˇ ti leh, oˇ ve awˬ hkʼoˆ lo naˍ manˇ ngeuˍ pfuhˍ piˇ ve yoˬ. 15Chehˇ kuiˬ oˇ ve hta‸ yawˇ Beˍteˍlaˆ teh‸ meh piˇ ve yoˬ.

Raˍhkeˍlaˆ suh-e ve

16Oˇ ve hkʼaw‸ nawˉ, yawˇ hui Beˍteˍlaˆ hkʼaw tawˆ kʼai ve yoˬ. Eˇhpaˍrenˍ venˇ hta‸ maˇ vuiˇ maˇ neˇ kuiˬ lo gaˬ htaˇ, Raˍhkeˍlaˆ lehˬ yaˇ paw tuˬ awˬ yanˇ gaˬ la leh gʼoˇ peˬ naˬ jaˇ la ve yoˬ. 17Oˇ htaˇ yawˇ ve awˬ ceˬ ma lehˬ, Taˇ kawˆ. Nawˬ yaˇ paˍ teˇ gʼaˇ kʼaw‸ paw la taˍ peuˬ, teh‸ yawˇ hta‸ kʼoˆ piˇ ve yoˬ. 18Raˍhkeˍlaˆ lehˬ suh la paˇ neˇ htaˇ, yaˇ paˍ oˇ ve hta‸ Beˍnawˇni #35:18 Chi lehˬ ngaˬ ve dawˇ haˍ tuˬ yaˇ teh‸ kʼoˆ gaˇ ve yoˬ teh‸ meh piˇ ve yoˬ. Ya‸ hkʼaˇ, yawˇ ve awˬ pa lehˬ yaˇ paˍ oˇ ve hta‸ Beˍyaˍmenˍ #35:18 Chi lehˬ awˬ bon da‸ ve yaˇ teh‸ kʼoˆ gaˇ ve yoˬ teh‸ kʼaw‸ meh piˇ ve yoˬ.

19Hkʼe te leh Raˍhkeˍlaˆ suh-e leh, yawˇ hta‸ chi beu‸ Behˍlehˍhehnˍ teh‸ kʼoˆ ve Eˇhpaˍraˆ venˇ lo kʼai ve ya‸ kʼaw hpuiˇ lo tuˍ piˇ ve yoˬ. 20Yaˬkoˆ lehˬ oˇ kaˬ lo haˉ pui shiˍ teˇ maˬ duˇ ti ve yoˬ. Ya‸ nyi hkʼa gaˬ Raˍhkeˍ laˆ ve tuˍ hpfuh cawˬ taˍ sheˬ ve yoˬ. 21Oˇ ve hkʼaw‸ nawˉ, Yaˍkoˆ awˬ gʼuˇ suhˍ kʼaw‸ kʼai leh Miˆdaˍlaˆ Eˍdaˍ coˇ paˇ hpawˇ lo deh chehˇ taˍ ve yoˬ.

Yaˍkoˆ ve yaˇ teˇ hpaˍ

22Yaˍkoˆ mvuhˇmiˬ oˇ ve hkʼaw chehˇ taˍ htaˇ, Ruˇbenˍ lehˬ yawˇ awˬ pa ve awˬ miˇ ma i Biˇlaˍhaˍ geh ca zuh‸ ve yoˬ. Awˬ lawn oˇ ve hta‸ Yaˍkoˆ gʼa kaˇ leh nyi ma zuhˆ jaˇ ve yoˬ.

23Yaˍkoˆ lehˬ yaˇ paˍ teˇ chi nyiˇ gʼaˇ cawˬ ve yoˬ. Leˉaˍ geh paw la taˍ ve yaˇ teˇ hpaˍ lehˬ, Ruˇbenˍ, Suˉmonˍ, Leˍviˆ, Iˉsaˍhkaˍ, leh Zaˍbuˆlonˍ hui hpeh‸ ve yoˬ. 24Raˍhkeˍlaˆ geh paw la taˍ ve yaˇ teˇ hpaˍ lehˬ, Yoˇseh‸ leh Beˍyaˍmenˍ hpeh‸ ve yoˬ. 25Raˍhkeˍlaˆ ve awˬ ceˬ ma Biˇlaˍhaˍ geh paw la taˍ ve yaˇ teˇ hpaˍ lehˬ, Danˍ leh Naˍtaˍliˆ hpeh‸ ve yoˬ. 26Leˉaˍ ve awˬ ceˬ ma Ziˆlaˍpaˆ geh paw la taˍ ve yaˇ teˇ hpaˍ lehˬ, Gaˆ leh Aˍshaˍ hpeh‸ ve yoˬ. Chi lehˬ, Meˍsoˇpoˇtaˍmiˆ mvuhˇmiˬ hkʼaw paw la taˍ ve Yaˍkoˆ ve yaˇ teˇ hpaˍ hpeh‸ ve yoˬ.

Iˉcaˆ suh-e ve

27Yaˍkoˆ lehˬ, Aˍbraˍhanˍ leh Iˉcaˆ hui ve chehˇ kuiˬ Heˍbronˍ venˇ paˇ lo cawˬ ve Maˍreˍ venˇ lo kʼaw‸ gaˬ la ve yoˬ. 28Iˉcaˆ lehˬ a sha‸ 180 hkʼaw‸ gaˬ htaˇ 29suh-e leh, yawˇ yaˇ paˍ Iˉsawˇ leh Yaˍkoˆ yawˇ hta‸ ca tuˍ piˇ ve yoˬ.

Currently Selected:

Awˬ hkuiˉ puiˍ ve li‸ 35: LHBE

Highlight

Copy