Awˬ hkuiˉ puiˍ ve li‸ 23
23
Saˍraˇ suh-e ve
1Saˍraˇ a sha‸ 127 hkʼaw‸ gaˬ leh, 2Hkaˍnanˍ mvuhˇmiˬ Heˍbronˍ venˇ hkʼaw suh-e ve yoˬ. Hkʼe te leh Aˍbraˍhanˍ dawˇ haˍ leh hawˬ ve yoˬ.
3Oˇ htaˇ yawˇ tu leh, Hiˇtiˆ chaw hui geh kʼai ve yoˬ. 4Yawˇ kʼoˆ ve, Ngaˬ lehˬ nawˬ hui geh ca chehˇ la ve hkehˉ chaw hpeh‸ ve yoˬ. Chi hta‸ pa taw, ngaˬ miˇ ma hta‸ tuˍ piˇ tuˬ miˬguiˬ teˇ peˆ hawˇ laˇ-oˆ, teh‸ kʼoˆ piˇ ve yoˬ.
5Oˇ htaˇ, Hiˇtiˆ chaw teˇ hpaˍ kʼaw‸ yaw hkʼaw‸ leh kʼoˆ ve, 6Jawˇmawˇ-oˬ, ngaˬ hui ve tawˇ hta‸ a ciˉ na sheˬ. Nawˬ lehˬ awˬ meh bvuhˬ ve jawˇmawˇ teˇ gʼaˇ hpeh‸ ve yoˬ. Ngaˬ hui ve chaw tuˍ kuiˬ teˇ hpaˍ hta‸ nawˬ ca leuˆ nyi leh, da‸ jaˇ ve chehˇ kuiˬ teˇ kaˬ lo, nawˬ miˇ ma hta‸ ca tuˍ piˇ-oˆ. Ngaˬ hui ha lehˬ ha kʼa piˇ laˇ ve yoˬ, teh‸ kʼoˆ piˇ ve yoˬ.
7Aˍbraˍhanˍ yawˇ hui gʼuˇ suhˍ boˆ taˍ leh kʼoˆ ve, 8Nawˬ hui ngaˬ miˇ ma hta‸ choˬ kaˬ lo tuˍ piˇ tcuh gaˇ ve kʼo, 9Zawˇhaˍ ve yaˇ Eˇhpaˍronˍ ve miˬguiˬ awˬ paˇ lo cawˬ ve Maˆpeˍlaˆ haˉ kʼoˍ oˇ ve ngaˬ hta‸ hawˇ laˇ tuˬ, yawˇ hta‸ ca kʼoˆ piˇ-oˆ. Nawˬ hui ve mvuhˇmiˬ hkʼaw ngaˬ chaw tuˍ kuiˬ teˇ kaˬ gʼa tuˬ, keunˍ da‸ cawˇ da‸ ve awˬ hpfuhˇ piˇ laˇ tuˬ yoˬ, teh‸ kʼoˆ ve yoˬ.
10Eˇhpaˍronˍ lehˬ, awˬ nu ve Hiˇtiˆ chaw teˇ hpaˍ geh teˇ geh venˇ taˍ meu‸ hpe‸ lo mui taˍ ve yoˬ. Yawˇ Aˍbraˍhanˍ hta‸ kʼoˆ piˇ ve, 11Jawˇmawˇ-oˬ, miˬguiˬ oˇ ve teˇ peˆ leh haˉ kʼoˍ oˇ ve ngaˬ nawˬ hta‸ piˇ laˇ tuˬ yoˬ. Ngaˬ ve awˬ chawˇ awˬ paˆ chi ma ve mehˆ gʼuˇ suhˍ, miˬguiˬ oˇ ve ngaˬ nawˬ hta‸ pe‸ laˇ ve yoˬ. Nawˬ ve awˬ miˇ ma hta‸ oˇ kaˬ lo ca tuˍ piˇ-oˆ, teh‸ kʼoˆ piˇ ve yoˬ.
12Aˍbraˍhanˍ yawˇ hui gʼuˇ suhˍ boˆ taˍ leh Eˇhpaˍronˍ hta‸ kʼoˆ piˇ ve, 13Ngaˬ kʼoˆ ve tawˇ hta‸ a ciˉ na sheˬ. Ngaˬ nawˬ hta‸ miˬguiˬ oˇ ve awˬ hpfuhˇ piˇ laˇ tuˬ yoˬ. Ngaˬ miˇ ma hta‸ oˇ kaˬ lo ca tuˍ piˇ hpeh‸ tuˬ, ngaˬ piˇ laˇ ve hpu hta‸ ha‸ yuˬ laˇ-oˆ, teh‸ kʼoˆ piˇ ve yoˬ.
14Eˇhpaˍronˍ kʼaw‸ kʼoˆ ve, 15Jawˇmawˇ-oˬ, miˬguiˬ chi ve lehˬ awˇ ha hteh‸ ceh tiˉ hpfuhˇ ve yoˬ. Chi ve lehˬ, ngaˬ huiˉ maˬ awˬ kaˍ lo aˬ hto‸ ma kʼoˆ tuˬ cawˬ le. Nawˬ miˇ ma hta‸ oˇ kaˬ lo ca tuˍ piˇ-oˆ, teh‸ kʼoˆ piˇ ve yoˬ. 16Aˍbraˍhanˍ lehˬ yawˇ kʼoˆ ve hta‸ nyi hkʼaˇ suh leh, tanˇ kaˬ paˍ teˇ hpaˍ awˬ hkanˉ teh taˍ ve hkʼe, chaw chi ma ve mehˆ gʼuˇ suhˍ hpu 400 hteh‸ gʼaw leh Eˇhpaˍronˍ hta‸ piˇ ve yoˬ.
17Hkʼe te leh, Maˍreˍ venˇ mvuhˇ nyi tawˆ hpawˇ Maˆpeˍlaˆ teh‸ kʼoˆ ve chehˇ kuiˬ chi ve teˇ tawn hkʼaw cawˬ ve haˉ kʼoˍ leh suhˆ cehˬ hkʼa peu-eˬ, 18oˇ kaˬ lo hkʼa chehˇ taˍ ve Hiˇtiˆ chaw chi ma ve mehˆ gʼuˇ suhˍ, Aˍbraˍhanˍ ve miˬguiˬ hpeh‸ la ve yoˬ.
19Oˇ ve hkʼaw‸ nawˉ, Aˍbraˍhanˍ lehˬ Hkaˍnanˍ mvuhˇmiˬ hkʼaw cawˬ ve haˉ kʼoˍ oˇ ve hkʼaw, yawˇ ve awˬ miˇ ma Saˍraˇ hta‸ ca tuˍ piˇ ve yoˬ. 20Hkʼe te leh, miˬguiˬ leh haˉ kʼoˍ oˇ ve lehˬ, Hiˇtiˆ chaw geh vuiˬ taˍ ve Aˍbraˍhanˍ ve chaw tuˍ kuiˬ hpeh‸ la ve yoˬ.
Currently Selected:
Awˬ hkuiˉ puiˍ ve li‸ 23: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
