Tawˆ kʼai ve li‸ 39
39
Paw hkuˇ ve veu‸ kʼaˇ
1Gʼuiˬsha Moˉseˍ hta‸ kʼoˆ piˇ taˍ ve hkʼe, aˉ po kʼo bon yehˬ hkʼaw kanˉ ca te htaˇ Aˍronˍ veu‸ tuˬ ve veu‸ kʼaˇ teˇ hpaˍ hta‸ awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve gʼo‸ hkeh yuˬ leh te taˍ ve yoˬ.
2Awˬ sheuˉ laiˉ ceuˬ cawˬ ve gʼo‸ hkeh leh shi hkeh yuˬ leh aˉ po‸ zuhˬ ma hta‸ te chiˇ taˍ ve yoˬ. 3Yawˇ hui lehˬ, shi gʼo‸ hkeh te peuˬ hkʼaw‸ nawˉ, awˬ sheuˉ laiˉ ceuˬ cawˬ ve gʼo‸ hkeh geh teˇ geh keu chiˇ ve yoˬ. 4La‸ hpeh kʼaˉ hkʼoˆ lo hpeh tuˬ ve aˉ caˆ hkeh hta‸ te leh, gʼuˇ suhˍ hkʼaw‸ nawˉ ve aˉ po‸ hta‸ hpeh tsuh‸ taˍ ve yoˬ. 5Gʼuiˬsha Moˉseˍ hta‸ kʼoˆ piˇ taˍ ve hkʼe, aˉ po‸ zuhˬ ma awˬ hkʼoˆ lo nyi ma pui beh tuˬ ve hta‸ awˬ sheuˉ laiˉ cawˬ cawˬ ve gʼo‸ hkeh, shi hkeh yuˬ leh te chiˇ taˍ ve yoˬ. 6Shehnˉ shiˍ teˇ hpaˍ hta‸ yuˬ leh, Yaˍkoˆ ve yaˇ teˇ hpaˍ ve awˬ meh htawˆ bvuh‸ taˍ ve yoˬ. 7Gʼuiˬsha Moˉseˍ hta‸ kʼoˆ piˇ taˍ ve hkʼe, Iˉsaˍreˍlaˆ chaw teˇ chi nyiˇ ceuˬ cawˬ ve hta‸ dawˇ nawˇ tuˬ awˬ pon aˉ po‸ caˆ teˇ hpaˍ awˬ hkʼoˆ lo, oˇ ve teˇ hpaˍ hta‸ hpeh chiˇ taˍ ve yoˬ.
Nyi ma pui beh tuˬ ve hta‸ te ve
8Awˬ sheuˉ nawˉ-ehˍ, nyiˉ-ehˍ, nyi naˆ meuˉ-ehˍ cawˬ ve gʼo‸ hkeh, shi hkeh hta‸ yuˬ leh aˉ po‸ zuhˬ ma hta‸ te ve hkʼa shuˍ, nyi ma pui beh tuˬ ve hta‸ htawˇ te taˍ ve yoˬ. 9Nyiˇ kʼaw‸ teh te taˍ ve nyi ma pui beh tuˬ oˇ ve lehˬ, zuhˬ hpawˇ teˇ htu, kʼehˬ hpawˇ teˇ htu cawˬ leh awˇ ceˍ awˇ hpawˇ hkʼa shuˍ hpeh‸ ve yoˬ. 10Nyi ma pui beh tuˬ oˇ ve awˬ hkʼoˆ lo, shehnˉ shiˍ awˇ cawˆ tawˉ keu taˍ ve yoˬ. Awˬ hkuiˉ puiˍ ve teˇ cawˆ lehˬ, awˬ gʼeuˆ laiˉ ceuˬ cawˬ ve shehnˉ, naw hpui ve shehnˉ leh hpuˉ-ehˍ ve shehnˉ teˇ hpaˍ, 11nyiˇ cawˆ teˇ cawˆ lehˬ, naw naˆ ve shehnˉ, ga‸-ehˍ ve shehnˉ leh nyiˉ-ehˍ ve shehnˉ teˇ hpaˍ, 12shehˆ cawˆ teˇ cawˆ lehˬ, shi nyi ve shehnˉ, naw shi ve shehnˉ, shiˉ-ehˍ ve shehnˉ teˇ hpaˍ, 13awˇ cawˆ teˇ cawˆ lehˬ, shi naw ve shehnˉ, nyi hpui ve shehnˉ leh nyi naˆ ve shehnˉ chi teˇ hpaˍ, shi mu‸ hkʼu teˇ hpaˍ hkʼaw keu taˍ ve yoˬ. 14Iˉsaˍreˍlaˆ chaw teˇ chi nyiˇ ceuˬ ve awˬ meh shehnˉ shiˍ teˇ chi nyiˇ shiˍ awˬ hkʼoˆ htawˆ bvuh‸ taˍ ve yoˬ. 15Yawˇ hui lehˬ, nyi ma pui beh tuˬ awˬ pon shi caˆ teˇ hpaˍ hta‸ yuˬ leh hkʼa deh‸ te taˍ ve yoˬ. 16Oˇ ve hkʼaw‸ nawˉ, yawˇ hui shi mu‸ hkʼu nyiˇ maˬ leh shi la‸ kawˬ nyiˇ maˬ te leh, la‸ kawˬ oˇ ve nyiˇ maˬ hta‸ nyi ma pui beh tuˬ awˬ na paˉ awˬ ceˍ meuˇ nyiˇ hpawˇ lo tawˉ keu taˍ ve yoˬ. 17Yawˇ hui lehˬ, shi caˆ nyiˇ caˆ yuˬ leh la‸ kawˬ oˇ ve nyiˇ maˬ hta‸ hpeh taˍ ve yoˬ. 18Shi caˆ oˇ ve awˬ meuˇ nyiˇ hpawˇ lo shi mu‸ hkʼu nyiˇ maˬ hta‸ hpeh taˍ ve yoˬ. Hkʼe te leh, oˇ ve teˇ hpaˍ hta‸ aˉ po‸ zuhˬ ma gʼuˇ suhˍ hpawˇ lo cawˬ ve la‸ hpeh kʼaˉ hpeh tuˬ ve awˬ caˆ hta‸ hpeh tsuh‸ piˇ taˍ ve yoˬ. 19Yawˇ hui shi la‸ kawˬ nyiˇ maˬ kʼaw‸ te leh, nyi ma pui beh tuˬ awˬ hawˉ hpawˇ awˬ ceˍ meuˇ nyiˇ hpawˇ lo tawˉ keu taˍ ve yoˬ. 20Awˬ nu ve shi la‸ kawˬ nyiˇ maˬ kʼaw‸ te leh, nyi ma pui beh tuˬ awˬ paˇ cawˬ ve la‸ hpeh kʼaˉ lo hpeh taˍ ve hpa caˆ teˇ hpawˇ teˇ maˬ tawˉ keu taˍ ve yoˬ. 21Nyi ma pui beh tuˬ hta‸ tawˉ keu taˍ ve la‸ kawˬ oˇ ve teˇ hpaˍ leh, aˉ po‸ zuhˬ ma hta‸ tawˉ keu taˍ ve la‸ kawˬ oˇ ve teˇ hpaˍ hta‸ nawˉ-ehˍ ve hpa caˆ yuˬ hpeh taˍ ve yoˬ. Gʼuiˬsha Moˉseˍ hta‸ kʼoˆ piˇ taˍ ve hkʼe, nyi ma pui beh tuˬ oˇ ve lehˬ nyi ma pui hkʼoˆ lo hkʼaˬ htaˆ ka‸ cawˬ taˍ ve yoˬ.
Paw hkuˇ ve veu‸ kʼaˇ laiˉ ceuˬ te ve
22Aˉ po‸ zuhˬ ma hkʼa peu-eˬ hta‸ nawˉ-ehˍ ve hpa ceh tiˉ yuˬ tawˉ taˍ ve yoˬ. 23Aˉ po‸ oˇ ve lehˬ oˉ kʼoˍ shi keu gʼa tuˬ hkoˇ hpe‸ taˍ leh, maˇ gʼa tzuh‸ kʼai tuˬ yeˬ chaweh tawˉ keu taˍ ve yoˬ. 24Awˬ sheuˉ laiˉ ceuˬ cawˬ ve gʼo‸ hkeh hta‸ yuˬ leh, aˉ ci ku shiˍ teˇ hpaˍ hta‸ te leh aˉ po‸ awˬ meuˇ lo tawˉ keu taˍ ve yoˬ. 25Shi ju lu ehˉ teˇ hpaˍ hta‸ htawˇ kʼaw‸ te leh, aˉ ci ku shiˍ teˇ maˬ kaˍ teˇ maˬ tawˉ keu taˍ ve yoˬ. 26Oˇ hkʼe te leh, Gʼuiˬsha Moˉseˍ hta‸ kʼoˆ piˇ taˍ ve hkʼe, yawˇ hui lehˬ paw hkuˇ veu‸ deh tuˬ ve veu‸ kʼaˇ hta‸ te taˍ ve yoˬ.
27Yawˇ hui lehˬ, Aˍronˍ leh yawˇ ve yaˇ teˇ hpaˍ deh tuˬ ve aˉ po‸ leh uˉ nyiˉ hta‸ maˇ kʼoˆ, 28uˉ tcuhˍ leh haˍ tawehˇ teˇ hpaˍ hta‸ maˇ kʼoˆ, 29awˬ sheuˉ laiˉ ceuˬ cawˬ ve gʼo‸ hkeh yuˬ leh caw‸ cehˍ nyi lo hpeh tuˬ ve hpaˉ ce‸ hta‸ maˇ kʼoˆ, Gʼuiˬsha Moˉseˍ hta‸ kʼoˆ piˇ taˍ ve hkʼe, hkʼa deh‸ te taˍ ve yoˬ. 30Yawˇ hui lehˬ, shi baˉ ehˉ teˇ maˬ te leh, oˇ ve awˬ hkʼoˆ lo Gʼuiˬsha hta‸ chiˇ a‸ piˇ taˍ ve, teh‸ kʼoˆ ve li‸ mehˆ htawˆ bvuh‸ taˍ ve yoˬ. 31Gʼuiˬsha Moˉseˍ hta‸ kʼoˆ piˇ taˍ ve hkʼe, yawˇ hui lehˬ shi baˉ ehˉ oˇ ve hta‸ yuˬ leh nawˉ-ehˍ ve hpa caˆ yuˬ hpeh peuˬ hkʼaw‸ nawˉ uˉ nyiˉ hta‸ hpeh chiˇ taˍ ve yoˬ.
Kanˉ hkʼa peu-eˬ te peuˬ ve
32Iˉsaˍreˍlaˆ chaw teˇ hpaˍ lehˬ, Gʼuiˬsha Moˉseˍ hta‸ kʼoˆ piˇ taˍ ve hkʼa peu-eˬ hta‸ hkʼa deh‸ na yuˬ leh te ve pa taw, aˉ po kʼo bon yehˬ hta‸ caˉ da‸ ve kanˉ hkʼa peu-eˬ hta‸ te peuˬ sheˬ ve yoˬ. 33Yawˇ hui mawˇ oˇ ve teˇ hpaˍ hta‸ Moˉseˍ geh yuˬ laˬve yoˬ. Bon yehˬ hta‸ caˉ da‸ ve kʼuˉ kʼaweh‸, suhˆ baˉ, awˬ hkaˆ teˇ hpaˍ, yehˬ hkuiˉ daw leh la‸ kawˬ teˇ hpaˍ, 34nyiˉ-ehˍ haw taˍ ve yawˬ guiˬ kʼuˉ teˇ hpaˍ, beh tuˬ ve da‸ jaˇ ve shaˍ guiˬ kʼuˉ teˇ hpaˍ, ko tuˬ ve hpa teˇ hpaˍ, 35ka ti‸ shaˉ caˆ ta kʼoˍ, leh keu taˆ tuˬ ve suhˆ taˬ teˇ hpaˍ, ta kʼoˍ awˬ hoˆ, 36hpui lawˇ leh oˇ ve hta‸ caˉ da‸ ve awˬ hkʼeun teˇ hpaˍ, Gʼuiˬsha hta‸ tanˇ piˇ tuˬ hkaoˍmonˇ teˇ hpaˍ, 37shi te taˍ ve kawˆ faiˇ tuˉ teh kuiˬ leh kawˆ faiˇ teˇ hpaˍ, aˬ miˍ tuˉ teh kuiˬ hta‸ caˉ da‸ ve awˬ hkʼeun teˇ hpaˍ leh, kawˆ faiˇ awˬ pon naˍ manˇ, 38shi te taˍ ve sha hawnˉ tuˉ tanˇ kuiˬ, naˍ manˇ pfuhˍ piˇ htaˇ yehˇ tuˬ ve naˍ manˇ, sha hawnˉ, aˉ po kʼo yehˬmiˉhpe‸ hta‸ ko taˍ tuˬ ve hpa, 39kuiˇ te taˍ ve tuˉ tanˇ kuiˬ leh oˇ ve hta‸ caˉ da‸ ve awˬ hkʼeun teˇ hpaˍ, hkehˇ taˍ kuiˬ leh hkehˇ pe le teˇ hpaˍ, 40vanˇ hta‸ ko tuˬ ve hpa, yehˬ hkuiˉ daw teˇ hpaˍ leh, la‸ kawˬ teˇ hpaˍ, vanˇ taˍ meu‸ hpe‸ hta‸ ko tuˬve hpa leh aˉ caˆ hkeh teˇ hpaˍ, juˇ leh aˉ po kʼo bon yehˬ hkʼaw kanˉ te htaˇ loˍ cawˇ ve mawˇ teˇ hpaˍ, 41Aˍronˍ leh yawˇ ve yaˇ teˇ hpaˍ bon yehˬ hkʼaw paw hkuˇ te chehˇ htaˇ veu‸ deh tuˬ ve da‸ kehˬ ve veu‸ kʼaˇ teˇ hpaˍ Moˉseˍ geh yuˬ laˬ ve yoˬ. 42Gʼuiˬsha Moˉseˍ hta‸ kʼoˆ piˇ taˍ ve hkʼa peu-eˬ hta‸ Iˉsaˍreˍlaˆ chaw hui hkʼa deh‸ na yuˬ leh te ve yoˬ. 43Moˉseˍ lehˬ te taˍ ve kanˉ hkʼa peu-eˬ hta‸ chaˬ nyi leh, yawˇ hui lehˬ Gʼuiˬsha kʼoˆ taˍ ve hkʼe hkʼa deh‸ na yuˬ leh te taˍ ve hta‸ gʼa mawˬ ve pa taw, yawˇ hui hta‸ awˬ bon na‸ piˇ ve yoˬ.
Currently Selected:
Tawˆ kʼai ve li‸ 39: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.