Romans 4

1Nga gèƌè kè a géƌ skwi man Abraham, bab nga, te verzi babab nga, a ngotso. 2Nga gèƌè aranta: Aman agassa Abraham n'nga a ndo nzura'a a sam di Zhiklè a géƌ skwi man a gau, ar a slaha a njégèr va. Aman a sam di Zhiklè a slaha ɓai. 3Ɗèlèwèr Zhiklè a gaƌ kè?

Abraham a nco Zhiklè a ndav na; a géƌ ncè-a-ndav nenga'a Zhiklè a nfu a ndo nzura'a.

4Aman ndo ngiƌè a gi mizlinè, sèi ta va na skwi ntul na, ta va na ambali ka ɓai. 5Aman ndo man a gi skwi ngiƌè azɓai, sèi a cè nenga'a a ndav man a ge ta ndohi nderƌe Zhiklè a ndohi nzura'a, Zhiklè a fi a ndo nzura'a, a gèƌ ncè-a-ndav nerga'a. 6Lèmèlèmè ara David a gaƋa: mwuffè a sam ndohi tèlèba, man Zhiklè a ge ta a ndohi nzura'a, a géƋ skwi ngiƋè ka ɓai, a gaƋa:

7Mwuffè a sam ndo man mali nenga'a mpra'a, man mphömè nenga'a mpizlèda pa. 8Mwuffè a sam ndo man Bi Zhiklè a ngér mali nenga'a asaɓai.

9Mwuffè haha a ndohi man ngwon n'ngela genè äè, Ƌè a ndohi man ngwon n'ngel ɓi ba Ƌè? Nga gaƋa: A sam Abraham, Zhiklè a nfu ncè-a-ndav nenga'a a ngizura'a nenga'a.

10Ara mè? A géƋ man a ngela ngwon Ƌè, Ƌè a géƋ man a ngela ngwon ɓi Ƌè? A vava: a géƋ man a ngela ngwon ka ɓai, te man a n'ngela ngwon di ɓai. 11Skwi malwuƋi te n'ngél ngwon nenga'a a n'ngotso sèi te deɓa, man Zhiklè a n'nga'a a ndo nzura'a man a nco a ndav ma, a n'ngotso man a ngela ngwon di ɓai. Arsa n'nga'a a bab ndohi tèlèba man ta cè a ndav, man ta ngél ngwon ka ɓai. Aman ncè-a-ndav tenga'a a nge ta a ndohi nzura'a.

12Lèmèlèmè n'nga'a a bab ndohi man ngwon n`ngela, ndohi man ta hér n'ngél ngwon genè ka ɓai, aman ta jèjèr ncè-a-ndav man a zhè hala'a te Abraham, bab nga, aman a ngela ngwon di ɓai. 13Abraham a ndohi te verzi nenga'a ta ngots mpèsl rai, aman ta ndi a ndohi n'ndi herkeda. Ta ngatsa te ma kita ɓai. Aman ta ngotso a géƋ ncè-a-ndav man a ge ta a ndohi nzura'a.

14Aman ndohi ngshè va a ma kita ta ngèce skwi Zhiklè, ar ncè-a-ndav skwi ambalai, ma mpèsl ri ba skwi ambalai. 15Aman ma kita Zhiklè a cka sèi ndzoan. Aman a sam man ma kita azɓai, ntèwèƋè ma kita ba, azɓai. 16Gar haha ngizura'a a shkè sèi a géƋ ncè-a-ndav. Arsa skwi man ta ngèce te pombai, a ma mpèsl ri da nza a sam ndohi nte verzi Abraham tèlèba, a sam ndohi nt'hwaƌ ma kita genè ka ɓai, aman a sam tenga'a ba, man ta co a ndav ara Abraham. Nenga'a bab nga tèlèba, ara man ta windo te ƌèlèwèr Zhiklè:

17I ge ka a bab ndohi herkeda kumba,

a sam di Bi Zhiklè, nenga'a man ka co a ndav, man a va ta nshèffè a ndohi m'metsa'a, a mbaba na skwi man azɓai, a zhè. 18A sam man skwi man a zhèrè te ndav azɓai, Abraham a nzhor te ndav genè. Ncè-a-ndav nenga'a arsa, a n'nga'a a bab ndohi herkeda kumba, ara man ta goƌ a sam na:

Ndohi nte verzi ngaya ta arsa.

19Wuƌi ncè-a-ndav nenga'a a zhè genè, ko a mpu di a va nenga'a man nhala ma (a slaha a nyi kra asaɓai, mvi nenga'a ndul ndul a gi 100; ko Sara ba nhala ma). 20A mpa gèƌ cèw ɓai, a nco ma mpèsl ri Zhiklè a ndav, a n'ngots wuƌai te ncè-a-ndav, a nsIubordo Zhiklè, 21a suna zura'a a vava: skwi man Zhiklè a posl ri a gèƌè'a, a slaha a ngia'a.

22Gar haha ncè-a-ndav nenga'a, Zhiklè a nfu a ngizura'a nenga'a. 23Ma haha ta windo a géƌ nenga'a genè ka ɓaî, aman a géƌ nga ba. 24Zhiklè a da rka nga arsa, aman nga co a ndav, a nslambaƌdekoƌa Yèsu, Bi nga, auda te ndev ndohi m'metsa'a. 25Nenga'a man Zhiklè a njèka na a ri a m'metsai a gèƌ malihi nga, a nslambaƌdekoƌauda, aman nga ndi a ndohi nzura'a a sam di Zhiklè.

Currently Selected:

Romans 4: MAFNT

Highlight

Copy