MATIO 8

Yeso yɛ mú' gɛ̀ ka'pap

(Mk 1.40-45; Lk 5.12-16)

1Yeso lə nə tsə̌ŋ fɑ dəm kuŋgǒ, vəŋ pɔ pɑ́ jʉm e. 2Po'o tə mu' gɛ ka'pap sɔ' ŋkham mkwi'tə myə́ dzə e bɑ́ gɔm gɑ: Cyəpɔ, o kuŋ bɑ o gɔ lɔnyə a. 3Yeso nya pu é, ŋkwak nə é gɔm gɑ: Gɑ̌ kùŋ, lɔ́! E wuŋ dɔ pɑ cwəocwəo nə́ ka' pap. 4Tɑ́ Yeso piŋ gɔm bi e gɑ: Pɔm tə siŋ sɔmmo; da' gɑ́ ghɔ da'tə nɑ o bi ŋkhamsi, biŋ hɑ́ ywə hɑhɑ̌ yə Mosɛ lə́ yap a: a pɑ́ mkwinthɛ́ bi pu.

Nwə tadyə msə́ŋwi pɔ ŋkhə́

(Lk 7.1-10; Yhn 4.43-54)

5Yeso lə́ pɑ̌ ŋkho Kapɛrnaum, mu' tadyə msəŋwi pɔ ŋkhə sɔ' bəŋ é, səso é, 6gɔm gɑ: Cyəpɔ gɛfa' a dyə bɑ e nùŋ bɑ po'tə nɑ kó nə é, é pɑwə jɔgo' te'te'. 7Yeso ghɔm bi e gɑ: Gɑ̌ gɔ ghɔ yɛ é. 8Da' gɑ́ tádyə msəŋwi ŋkhə́ piŋ gɔm gɑ: Cyəpɔ ŋ kha ku'nyə nə pa' bi a pɑ́ o ko dyə m̀ a: Ghɔm da' shwəghɔm a gɛfa' a yɛ́. 9Nə pa' gɑ̌ ju' shwə pɔ pyə wap sa'a biŋ bɑ sa' shɑ́ msəŋwi. Biŋ bɑ gɔm bi mu' nə pyə gɑ̌ sa' wap a gɑ: Ghɔ̌ e ghɔ, gɔm bi mu' gɑ sɔ̌' e sɔ', biŋ gɔm bi ŋkwɔ a gɑ: Ghə gɑ, e ghə. 10Yeso lə nə́ yu' pa' tádyə msəŋwi ŋkhə bɔ gɔm po'o a, go' e, biŋ gɔm bi pɔ pyə wap lə́ bɑ́ jʉm e a gɑ: Kwa' nyənyɔ gɑ̌ siŋ wɔ gɑ́ Ŋ kha yɔ yəŋ gɑ nthi piŋnthʉm bi sɔmmo Israɛl. 11A po'o tə bɑ siŋ wɔ gɑ́ pɔ jɔmyɔ̌m gɔ sɔ' fɑ ghəŋ nthəmnam ba m ghəŋ binam pu a Abraham, ba Isak ba Yakop tsʉ́ la'nwə nthʉm Nəfo kɛ́bəŋ. 12Da' gɑ́ kwa' pɔ nəfo bɔ̌, pu ma' wap dzʉ́ nthʉm jʉ́m; a pɑ́ tsʉ'u bɔ pú pɑ́ dɔ̌ biŋ bɑ pfɑ msuŋ.

13Yeso lə pǐŋ gɔm bi tadyə msəŋwi pɔ ŋkhə́ gɑ: Pɑnyə la' o! A ghə nə o pa' o nə bìŋ a. Gɛ́ fa' e lə wuŋ jɛ́ pɑ́ cwə o bɔ.

Yeso yɛ mghɛ ghɔ́ jɔmyɔ̌m

(Mk 1.29-34; Lk 4.38-41)

14Yeso lə nə kodyə Pɛtrɔ, jɔ gám Pɛtrɔ bɑ e nuŋ kodyə mhwi pɑwə səŋ e. 15Yeso lə kwak pú nə e, mhwi təm nə é, e lúsi biŋ ntho' nə fa' bi e.

16A lə pɑ́ bwadzʉ̌, pu lɑ mghɛ gho pyə zhwenyə cwəpuŋ lə bɑ nə pu a nə sɔ' bi e, e pɑ́ jəŋ mzhwenyə pɑ ta' shwə ghɔm biŋ bɑ jɛ́ guŋ mghɛ ghɔ awɛ. 17Po'o gɑ ywə yə gɔ́m ghɔm Si Esaya lə ghɔm a, a pəmtə́ gɑ: E lə ŋkwi mkhʉ́m mɔk pɑ, biŋ ŋa' bɑ mgho mɔk pɑ.

Nə ghiŋ jʉ̌m Yeso

(Lk 9.57-62)

18Yeso lə nə yɔ vəŋ pɔ bəŋ é, nyəŋ gɑ́ e gɔ ghɔ nə yə mu' jʉɔ shyə́. 19Mu' jyə́ mco' sɔ' gɔm bi e gɑ: Ta gɑ gɔ yap jʉ̌m o, tə ko bǎ hɑ́ lə yə o ghɔ a. 20Yeso ghɔm bi e gɑ: Msə́sʉ́m bɑ wap ghə mghʉ̌m map, bɑ pǒmsəŋ to kɛbəŋ piŋ gə mkɔ map. Tɑ́ sɔ' m nə Mú mo, a bɑ̀ e ká ghə tsʉ' yə e jap thə e nə a.

21Mu' mukhʉ́ e piŋ gɔm bi e gɑ: Cyəpɔ na' nthak a gɔ nthəŋ tá a tə́ sɔ̌'. 22Da' gɑ́ Yeso ghɔm bi e gɑ: Yap jʉ̌m m̀ biŋ nthak mpfə pɔ wap təŋ mpfə pɔ pap

Yeso ghə̀ fʉ́m lɛ́tə

(Mk 4.35-41; Lk 8.22-25)

23Yeso lə ko nthʉm kənu', pɑkhʉ̌ pyə yap jʉm e. 24Mu' mɑ fʉ́m wuŋ nthəm dəm shyə, ŋkwa shyə bɑ gɔ nə sə kənu'; Yeso lə bɑwə di. 25Pɑkhʉ pyə sɔ' bəŋ e, jam e gɔm gɑ: Cyəpɔ kwitə wɔk, pyə pfʉ́. 26E ghɔm bi pú gɑ, nwə kɑ po pwɔk? Pɑ ghə muywə piŋnthʉm. A lə pɑ́ po'o, e lusi baptə fəfa pu shyə lɑpʉə, tsʉ' wuŋ dɛtə gɑ kǎm. 27Nwə cyə pɔmnəŋ, wap piŋ bɑ gɔm gɑ: E bɑ m gɑkɑ tɑ́ ba fəfa pu shyə lɑpʉə yu' shwə è!

Yeso yɛ pɔ pɑpʉə bɑ zhwenyə cwəpuŋ ko nə pú

(Mk 5.1-20; Lk 8.26-39)

28Yeso lə ko nə yəmu' jʉ́ɔ, nthʉm guŋ pɑ Gadarɛno, shɑ́ pɔ pɑ́pʉə, nthəm m thəsì, zhwényə cwəpuŋ pɑ́ nə pú, bɑ wap cɔk tə la' sɔmmo pɑ bi a pɑ e cyə́ nə yə bɔ məjyə̀ sɔ' pu a pu yu'tə. 29Wap lə́ wuŋ ntho' nə cwé gɑ: O kwi kɑ́ bi pyə̌ Mù Si? Ǒ sɔ' m tsɔ'ɔ nə va' wɔk tɑ́ cwə gúŋ ŋkhu' a?

30A lə nə pɑ́ po'o mu' ka mgənɔm pɑ́ giŋnyə tsʉ'u bɑwə pfɑ mghé. 31Mzhwenyə cwəpuŋ cwyɛ'nyə é gɔm gɑ: O zhəŋ wɔk, o cya wɔk nə ka mgənɔm. 32Yeso ghɔm bi pu gɑ: Po ghɔ nə pú. Mzhwenyə cwəpuŋ bɔ lə təm gɔ ŋkho nə mgənɔm bɔ̌, guŋ ka mgənɔm fɑ kúŋ nə mkə́kə́ŋ cwəlɔ ŋkheŋnyə́ bvʉtə nthʉm shyə lɑpʉə, npfʉtə awɛ nthʉm shyə. 33Pɑ pyap mgənɔm bɔ lə ŋkhʉ̌ gɔ tisuŋ siŋ pɔmnəŋ guŋ mnwə awɛ, bɑ m nə mzhwenyə cwəpuŋ. 34A lə pɑ́ po'o guŋ tisuŋ awɛ təm nə ghɔ jɔ́ Yeso. Wap lə cwə tə jɔ e, shwyɛ'nyə e gɑ́ e tə́m nthʉm guŋ yap.

Currently Selected:

MATIO 8: NTGomala

Highlight

Copy