LUKASI 1
1
Mthə́ nwə
1Pa' pɔ jɔmyɔ̌m lə to' nə və mnwə myə a lə cyə cəcɑ̌ pɑ a, 2bvə ywə yə pyə lə yu' bi pɔ pyə wap lə́ bɑ́ si tə fɑ cwə nə to', jɔ nwə bɔ, shʉ' mghɛ ŋkwinthɛ̌ nə́, bɑwə dɑ mghɔm bɔ sa dzʉ á, 3a lə́ puŋ gɑ́ ŋ de mnwə nə́ pa' a pɑ nyənyɔ tə fɑ nə zhitə a, tə́ bvə bu nə ŋkhɛ dəŋdəŋ, wə tá Teofilə, 4tə o nə jyə́ nyənyɔ nə mnwə myə pu siŋ o gɑ o zhyə a.
Aŋgəle siŋ gɑ́ pu gɔ tsə Yohane gɛ nu' pɔ shyə
5A lə pɑ̌ nə́ cwə yə Herode lə́ bɑ́ fo pɑ Yudea á, mu' ŋkhamsi pɑ wə tso tsyə pɑ́ Sakaria, e pɑ́ nə kam Abia. Jwi é lə́ bɑ́ gwya mo Aaron, tso tsyə pɑ Elisapet. 6Wap lə́ bɑ́ pɔ dəŋdəŋ dzə̌ Si, bɑ giŋ nə mco' Cyəpɔ nyənyɔ bɑ́ gə pa' Si shəŋ a. 7Wap lə́ bɑ wap ka wim mú, nə pa' Elisapet lə́ bɑ́ ŋkhíŋ, bɑ wap vò.
8A lə kəm nə cwə yə yə́ kam pɔ Sakaria lə́ bɑ́ gɔ fa' fà' Si a, 9nthuŋ tsʉ́ e pa' mà mkamsi lə́ bɑ́ cwə o bɔ a, gɑ́ yʉ́ nə gɔ ko nə tsʉ' yə pu ntho phə̀ damnyəlamnyə nə shwyɛ'nyə Si dyə Cyəpɔ a. 10Guŋ pɔ awɛ lə́ bɑ́ dzʉ cwə nə to ywə nə shwyɛ'nyə Si bɑwə shwyɛ'nyə Si. 11Aŋgəle cyəpɔ lə ŋwak dzə̌ Sakaria, nthiŋnyə nə́ ghəŋ pu tʉ̀ɔ, bəŋ tuŋmɔk nə ntho ywə damnyəlamnyə. 12Sakaria lə nə yɔ e, lam tsyə sɔ, e pwɔk.
13Aŋgəle ghɔm bi é gɑ: Kɑ́ pwɔk m Sakaria, Si bɑ ě yu' mcwyɛ'nyə mǔ; jwi o Elisapet gɔ sɔ' tsə ta' mu mbɛ bu, o ke tso tsyə gɑ́ Yohane. 14O gɔ sɔ' ŋwɛnyə nə é te', ba bo'gwyə pɔ ŋwɛnyə yap nə cwə yə pu tsə é a. 15E gɔ sɔ' pɑ́ mo gwyə́ dzə̌ Cyəpɔ. E tə gɔ sɔ' pɑ́ nwə mlu' pɑ, kɑ bǎ kɑ́ ywə́ nwə yə a fɛnyə mo a lə, é lə nwə́. Pu gɔ sɔ' nə tsə é bɑ Zhwenyə Dɔlɔ̌ lo nə é. 16E gɔ piŋ sɔ' lɑ bo'gwyə pɑ Israɛl nə sɔ' dzə̌ Cyəpɔ Si yap. 17E gɔ sɔ' pɑ ghiŋ nə zhwenyə, ba gʉ' Elia, dzə̌ Si, yáp kwishwə cəcɑ̌ mtǎ pu a po pap; ghə pɑ tə yu'shwə ghə́ zhyənwə pɔ nyənyɔ. Po'o gɑ́ wap cʉ' pɔ pyə pu nyaptə wap bi Cyəpɔ a. 18Sakaria ghɔm bi aŋgəle gɑ: Gɑ̌ gɔ lɑ kɑ́ zhyə gɑ́ nwə yə o gɔm a, ǎ nyənyɔ? Gɑ̌ bɑ gɑ̌ vo, mgu'dzʉ jwi a piŋ bɑ́ bɑ ǎ ghɔ dzə. 19Aŋgəle pa' bi e gɑ: Gɑ̌ bɑ́ Gapriya, gɑ̌ shwə bəŋ Si. E nthəm a gɑ sɔ' gɔm bu po'o, siŋ o yəŋ cuŋ pɑpúŋ. 20Cwəlɔ o gɔ zhi tə ghɔ̀m, o lə piŋ gɔm tə kəm tyɛ'dzʉ́ yə yəŋ nwə pəmtə a. Nə pa' ǒ tédʉ' nə ghɔm tsɑ̌ tsyə a gɔ sɔ' pəmtə a.
21Pɔmnəŋ lə́ bɑ́ dzʉ́ byap Sakaria, nwə pɑwə shyə wap, nə tiŋ pa' e nə shwə tsʉ' to ywə a. 22E lə təm dyə, bi a pɑ́ é lə ghɔmnwə jyə. Pɔmnəŋ zhyə gɑ e kodyə nə yɔ m nthʉm zhwenyə. E cʉ' bɑ gə pɑ nthinthi mtìŋ, shwə pɑ tə ghɔm.
23Myə́ mtyɛ' fa' lə́ mǐ, e pɑnyə la' é. 24A nə cwə muywə, jwi e Elisapet fə̀ŋ. Dʉmnyə nə mŋwə nthɔkə, bɑ gɔm gɑ: 25Si bɑ ě lɑ mnyə cɔmmtso dé a, nthé kuso nə m̀ dzə pɔmnəŋ.
Aŋgəle siŋ gɑ pu gɔ tsə̀ Yeso
26A lə pɑ̌ nə́ mŋwə nthɔkə, Si tə́m aŋgəle Gapriya nthʉm mu' tisuŋ Galilea, tso tisuŋ bɔ pɑ́ Nazarɛt, 27bəŋ mu' mú gò, bɑ mǒ ko nə é, tso tsyə́ pɑ Yosɛp, mo nə́ tuŋdyə́ David. Tsǒ gò bɔ lə́ bɑ́ Maria. 28Aŋgəle kodyə é gɔm gɑ: Ŋwɛnyə! Wə yə Si jɔ o pɑpuŋ a, po Cyəpɔ nə bɑ. 29Ghɔm tsɔ gɑ lə sɔlam Maria, tɑ e pɑ həŋtə gɑ: Yəŋ nthi ca'tə po'o bɑ́ da'tə gɑ́ kɑ̀? 30Aŋgəle ghɔm bi e gɑ: Kɑ́ pwɔk m Maria. O bɑ Si gho' o. 31O gɔ pɑ tsʉ́m, tsə mú mbɛ, cwə̀ tso tsyə́ gɑ́ Yeso. 32E gɔ sɔ' zhi tə', pu pɑ ŋkhe e gɑ Mú Si tə́ thə́ kɛbəŋ. Cyəpɔ Si gɔ sɔ' hɑ Nəfo tap e David bi é. 33E gɔ sɔ' pɑ́ fo mama nə gwya Yakop, yə nə sa' tə́ gɔ la' mi pɑ.
34Maria ghɔm bi aŋgəle gɑ: Yəŋ nwə gɔ cyə m gɑ́ kɑ tə́ pəmtə̌, nə pa' ŋ kha zhyə mbɛ a?
35Aŋgəle pa' bi e gɑ: Zhwenyə Dɔlɔ̌ gɔ sɔ' pɑ́ nə́ o, gʉ' Si thə kɛbəŋ pɑ pfɔptə o. A shyə m po'o tə́ mu yə o gɔ sɔ' tsə e á pɑ Dɔlɔ̌, pu pɑ ŋkhe é gɑ Mú Si. 36Zhyə gɑ́ fɑ o Elisapet yə a bɑ e vo a kě fəŋ tə ǎ wə́ bɑ́ mŋwə nthɔkə pa' e pɑ tsʉm á, yʉ yə pu lə́ ŋkhe é gɑ ŋkhiŋ mjwǐ a, 37nə pa' sɔmywə yə a cyə Si a, a tə̌ wə pɑ́.
38Maria ghɔm gɑ; gɑ̌ bɑ́ ŋkwɔ Cyəpɔ. Ywə yə o gɔm nə m̀ a pəmtə! Aŋgəle ghɔ.
Maria ghɔ wə́ Elisapet
39Maria lə lǔ pɑ́ cwə o bɔ, bʉɔ m gʉ̌' gɔ nə mu' tisuŋ Yudea 40ŋkho dyə Sakaria; sha'tə Elisapet. 41Elisapet lə nə yu' ca'tə Maria, mú ŋaknyə vam é, e lonyə nə Zhwenyə Dɔlɔ̌. 42E cwe tə thə́ gɔm gɑ: O bɑ mjwǐ byanyə cəcɑ̌ pɑ jwǐ, Mu yə e vam o a, pɑ mu byanyə. 43A shyə m gɑ́ kɑ̀ tə́ má Cyəpɔ a piŋ nə́ sɔ' bəŋ m̀? 44Nə pa' gɑ̌ nə yu' gi ca'tə o, mú a ŋaknyə vam m̀, ŋwɛnyə́. 45Buŋtsě bɑ́ mjwǐ yə e piŋ a, nə pa' ywə yə Cyəpɔ gɔm bi a gɔ sɔ' pəmtə.
Zhwɔpshyə Maria
46Maria ghɔm gɑ:
Lam tsɑ ghamtə Cyəpɔ
47ba zhwenyə a ŋwɛnyə nə Si gɛvɔk a.
48E le ŋkwɔ e yə e fi' nɑ e hɑ si a;
tə fɑ́ cwəlɔ guŋ pɔ nə guŋ mwɔ dzʉ awɛ
gɔ ghɑ pɑ ke a gɑ buŋtse mjwǐ.
49Nə pa' Gʉ' gwyə bɑ e ghə msya nə m.
Tsó tsyə bɑ dɔlɔ̌.
50Puŋnthʉm e bɑ́ nə pɔ pyə wap bwɔk e a mzhəŋ mzhə̀ŋ.
51E lě dɑ gʉ' bu myə́ nə́ sa'tə mghɛ ŋa'nɑ.
52E lě ŋkwɔktə mfomfo nə́ mkwɔ' map,
ŋa' pɔ pyə wap fi' nɑ hɑ Si a hɑ thə́.
53E lě gə mghɛ jikǔ' cʉ́' pɑ ghə ywə,
mghɛ ywə pʉɔ shʉ' mpəŋ.
54E lě ŋkwitə Israɛl ŋkwɔ e.
E lě ŋkhamtə cɔmmtso e.
55Pa' e lə ka' bi mta pɔk pɑ
Abraham, ba gwya e nə guŋ mcwə awɛ.
56Maria pu Elisapet lə cwə gwɛ a mŋwə tá. E pɑnyə la' é.
Nə tsə́ Yohane nu'pɔ shyə
57Cwə yə Elisapet lə bɑwə gɔ tsə́ a lə kǔ', e tsə́ mú mbɛ. 58Mghɛ dhə dyə pu a mfɑ pyə lə nə yu' gɑ́ Cyəpɔ cɔmmtso myə́, pu a pu ŋwɛnyə. 59A lə nə́ kəm tyɛ'dzʉ hɔ̌m pu sɔ' m nə́ vo mú, pu pɑ́ gɔ ké tso tsyə́ gɑ Sakaria, nə tsǒ tap e 60map e ghɔm gɑ: Pu gɔ ke é gɑ Yohane. 61Pu ghɔm gɑ: Sɔmmo tə̌ nə́ tuŋdyə o tsó tsyə pɑ́ Yohane pɑ̀.
62Wap lə lɑ mtiŋ həŋtə ta mú pa' pu gɔ ke tso mú a. 63Sakaria lə́ kwi tɑ̌fi ŋwa' nə gɑ: Tso tsyə bɑ Yohane. A zhʉ̌m pɔmnəŋ. 64Shwə é lə́ wuŋ gyɛ', tʉm é kyɛ' e to' nə ghɔmnwə, go'tə Si. 65Pɑ giŋnyə tsʉ'u pwɔk, pu pɑ shyanyə mnwə bɔ kuŋ Yudea awɛ. 66Bǎ wɑlə lə́ yu' nwə bɔ bɑ ŋkhamtə, lə́ bɑ gɔm gɑ: Yəŋ mú gɔ sɔ' pɑ́ m gɑ́ kɑ?
Mtʉɔ Si cəŋtə bɑ nə e.
Zhwɔpshyə Sakaria
67Zhwenyə Dɔlɔ̌ lə lo nə tap e Sakaria e ghɔm ghɔ̀m Si gɑ:
68Byǎnyə bi Cyəpɔ, Si pɑ Israɛl,
nə pa' e sɔ' ŋkwi pɔ pyə.
69E hɑ gɛvɔk pɔ bi pɑ,
shyə nə́ tuŋdyə́
fo David ŋkwɔ e.
70Ywə yə e lə la' shyə m nə shwə
mghɛ ghɔm ghɔ̀m tsyə́ cwə dzə̀ gɔm a,
71ywə vɔk yə a ŋkwi wɔk pɑ bi
mghɛ bo pɔk pɑ a.
72E la'tə cɔmmtso e bi mta pɔk pɑ, ŋkhamtə
kɔ tsyə pu a pu lə wɑ á, kɔ dɔlɔ̌,
73e ka' bi Abraham ta yɔk pɑ gɑ́
74cwə yə e gɔ sɔ' te wɔk pɑ dyə
mkwɔ a pɑ pɑ́ fá' bi e tə pwɔk.
75Bɑ giŋ dzə e, dɔlɔ̌, dəŋdəŋ, nə guŋ
mtyɛ'dzʉ vɔk mɔk pɑ awɛ.
76Sɔ' m nə wə mubwǎ, pu gɔ sɔ' ké o
gɑ gɔ̀m ghɔm Si tɑ́ thə́ kɛbəŋ.
Nə pa' o gɔ sɔ' pɑ ghiŋ dzə Cyəpɔ
nyaptə məjyə e.
77Ghə pɔ pyə́ zhyə́ ywə vɔk
shyə m nə́ nə lɑ mhɔ map shwyɛ' wap!
78A bɑ́ nwə cɔmmtso Si yɔk pɑ.
Tə́ nam fɑ thə́ ŋkhyɛ' wɔk pɑ.
79A ŋkhyɛ' pɔ pyə wap lə bɑ wap cwə nthʉm
jʉm vʉ a, da'tə wɔk pɑ məjyə hwitə
80Sɔ' m nə́ mú bɔ̌, é lə́ pɑ̌ kwyə, bɑ́ gə gʉ' nə zhwenyə e. E lə cwə̌ ghakgo tɑ́ ŋkhəm tyɛ'dzʉ yə e lə la'tə nɑ́ e bi Israɛl a.
Currently Selected:
LUKASI 1: NTGomala
Highlight
Share
Copy
Want to have your highlights saved across all your devices? Sign up or sign in
Nouveau Testament Ghomala © Bible Society of Cameroon, 2002.
