MFA' MGHƐ NTHƏM 6

Nə ci pɔ sɔmbʉə

1A lə pɑ́ cwə o bɔ, dəŋ pɑkhʉ̌ pɑ ŋkwi'. Pɑ Elenistə to' nə ghɔmtə nə́ pɑ Ebraika nə pa' pu lə bɑ dʉɔnyə mpfɔk pap nə cwə nə ghap ywətsʉ nə tyɛ'dzʉ. 2Mghɛ nthəm shwɔppʉə mgham ke guŋ pɑkhʉ̌ awɛ nə mɑ cu'tə gwyə gɔm gɑ: A ka puŋ gɑ pyə tak fa' Si nəŋ nə fa' ywətsʉ. 3Mfɑ̌mfɑ́ po ghɔ pɑ cəcɑ̌ po shəŋ pɔ sɔmbʉə, pɔ dəŋdəŋ pyə Zhwenyə ba zhyənwə lo nə pu a, pyə yap wap nə fa' mfa' bɔ. 4Tə̀ sɔ' m nə pyə, pyə gɔ pɑ lɑ nə cwyɛ'nyə Si ba fa' Ghɔm nə ghɔ dzə. 5Guŋ cu'tə awɛ lə piŋ mkwɛnyə bɔ: Pu cwɔ' Etiennə, ta' mbɛ bɑ piŋnthʉm ba Zhwenyə Dɔlɔ̌ lo nə e, shwɔ' Filipo, ba Prokor ba Nikanor pu Timon ba Parməna biŋ gə Nikola yə Antiokia yə e lə kǒ nə mà pɑ Yudea tə biŋ a. 6Pu lə la'tə wap bi mghɛ nthəm, shwyɛ'nyə Si, jap bu thə pu.

7Ghɔm Si lə bɑ ŋkwyə, dəŋ pɑkhʉ̌ pɑ ŋkwi' té' o Yerusalɛm, kwa' vəŋ mkamsi pɑ ju'nyə nə piŋnthʉm.

Nwə Etiennə

8Gho' ba tʉɔ lə lo nə Etiennə, e pɑ́ nthé msya, ba mtiŋ gwyə́ cəcɑ̌ pɔmnəŋ. 9Da' gɑ a lə cyə m nə mnwə bɔ, pɔ pyə wap lə bɑ nə Sinagogə pɑ təm ŋkwɔ, pu a pɔ nə guŋ Kirena, ba Aleksandria, pɑ kilikia ba pɑ Azia to' fəŋnyə pu a Etiennə. 10Tə wap yɔ gɑ bi a pɑ wap lə tsɔp zhyənwə pu a Zhwenyə yə a lə bɑ nə mghɔm myə́ a. 11Wap thənyə pɑ bɛ gɑ wap ghɔm gɑ: Pyə yu' e ghɔm ghɔ̀m nə́ jəmtə́ nə Mosɛ ba m nə Si. 12Wap lə cu'tə pɔ, mghətsó ba pɑ zhyə mco'. Gəm Etiennə tə e jyə, dɑ e nə gɔ Sanedrɛŋ 13ŋkho tsʉ̌', gə́ mghɛ kwinthɛ cwanwə. Wap ghɔm gɑ: Bɛ yəŋ gɑ bɑ̀wə gɔm bɔkbɔk mghɔ̀m nə tsʉ' dɔlɔ̌ ba nə mco'. 14Nə pa' pyə yu' pa' e gɔm gɑ yəŋ Yeso yə Nazarɛt gɔ sa'tə tsɔ' gɑ, piŋ kwyəpnyə mkhɛ mnwə myə Mosɛ lə hɑ bi pyə a. 15Guŋ pɔ awɛ pyə wap lə bɑ wap cwə dyə Sanedrɛŋ a lə bɑ wap tʉ mnyə map nə Etiennə wap lə yɔ sə e a pɑwə hwə pa' sə aŋgəle.

Currently Selected:

MFA' MGHƐ NTHƏM 6: NTGomala

Highlight

Copy