MFA' MGHƐ NTHƏM 5

Nwə Ananias pu Safira

1Mu' mbɛ tso tsyə pɑ Ananias pu jwi e Safira lə pɑ̌ kwishwə, fiŋ ca' tsap. 2Pu e piŋ bɑ́ kwishwə e lwɔ' mu' nə ŋkhap pě, tə dɑ bvʉ' nə gɔ jap dzə mghɛ nthəm. 3Da' gɑ́ Pɛtrɔ ghɔm bi é gɑ: Ananias, nwə kɑ́ bɑ Sata lo nə tʉm tsǔ po'o? Ǒ cwanwə bi Zhwenyə Dɔlɔ̌ biŋ dwɔ' mu' nə ŋkhap pě. 4O kě tə zhyə nə tak pě nəŋ tə fiŋ a? Kɑ nə fiŋ gə nə ŋkhap e pa' o kuŋ a? Nwəkɑ bɑ yəŋ nthi ŋkwɛnyə sɔ' nthʉm tʉm tsǔ? O tə shwanwə m bi pɔmnəŋ pɑ, o shwanwə m bi Si. 5Ananias lə nə yu' mghɔm mɔ gɑ, bvʉ̌si pfʉ. Mɑ pwɔk ko nə guŋ pɔ awɛ pyə wap lə yu' yəŋ nwə a. 6Ŋkhɛ́ mo lə sɔ' dzʉmtə é ŋkwa é nə gɔ nthəŋ.

7A lə cyə gwɛ́ a m nam tá, jwi é kodyə tə zhyə ywə yə a nthəm a. 8Pɛtrɔ həŋtə é gɑ: Siŋ a! Yəŋ kwa' dəŋ yə po fiŋ pé a lə? E ghɔm gɑ əŋ a dəŋ é. 9A pɑ̀ po'o Pɛtrɔ piŋ gɔm bi e gɑ: Nwə kɑ bɑ po tɛ bɑ ŋkwishwə ŋkham Zhwenyə Cyəpɔ? Yu', mkwə pɔ pyə wap fɑ m nə təŋ dhə o a mɑ jyədyə̌. Wap gɔ kwa ba wə yǔ. 10E lə wuŋ bvʉ dzə Pɛtrɔ npfʉ́. Ŋkhɛ mo lə nə kodyə jɔ e, bɑ ě pfʉ, wap kwa e nə gɔ nthəŋ é bəŋ dhə e. 11Pwɔk gwyə ko nə guŋ cu'tə pɑ piŋ ba m nə guŋ pɔ awɛ pyə wap lə yu' yəŋ nwə a.

Msya mghɛ nthəm

12Mtiŋ jɔmyɔm pu a msya lə bɑ nthəm cəcɑ̌ pɔmnəŋ shyə m nə bu mghɛ nthəm. Guŋ pɑ piŋ awɛ pɑ́ shwə nthʉm pə́ŋ Salomoŋ, bɑ ŋkwishwə. 13Da' gɑ́ la' sɔmmo dyɛ' kuŋ nə tamtə nə pu, da' gɑ pɔmnəŋ pɑ go'tə wap. 14Vəŋ pɔ jɔmyɔ̌m pɑ bɛ ba pɑ jwǐ pɑ shyə m nə piŋnthʉm jap jʉ̌m Cyəpɔ lɑ di lə kwi'. 15Lɑ pu pɑ dɑ mghɛ gho sɔ' məjyə bɑ pu kwa wap nə mkodyə ba m nə pɛtə̀ po'o gɑ Pɛtrɔ nə cyə̌ cyə̀ŋnyə̀ e kwak mu' mo nə pu. 16Pɔ tə jɔm lə nthəm jyə jyə gəŋnyə Yerusalɛm sɔ' bɑ wap kwa mghɛ gho ba pɔ pyə zhwenyə cwəpuŋ lə bɑwə baknyə wap a, a wap pɑ jɛtə gùŋ yap awɛ.

Nə ghəm mghɛ nthəm

17A lə pá po'o luŋ ŋkhamsi gwyə pu a pɔ pyə pu a pu bɑ a: Pɑ Sadukai yɛ. 18Wap ghə pú ghəm mghɛ nthəm nyə̀ŋ wap cɛ́ pɑ sɔsɔ̌. 19Da' gɑ a pɑ mtsʉ́' aŋgəle Cyəpɔ cwɔ' mjyədyə̌ cɛ̌ gə wap tə́m, e ghɔm bi pu gɑ: 20Po ghɔ nthiŋnyə Dyə Si siŋ ghɔm vɔk tsɔ gɑ bi pɔmnəŋ. 21Wap lə yu' ywə yə e gɔm a, dzʉ̌ nə lɔ wap wuŋ gɔ Dyə Si, bɑ ji'tə pɔmnəŋ. Ŋkhamsi gwyə pu a pɔ pyə́ lə sɔ', e ké Sanedrɛŋ, guŋ pɑ ya' shɛ pɑ Israɛl, biŋ nthəm gɑ pu ghɔ dyəcɛ̌ shəŋ mghɛ nthəm.

22Mghɛ fa' pyə pu lə təm wap a, lə ko dyəcɛ̌ la' wap yɔ wap. Wap lə pɑnyə gɔm gɑ: 23Pyə ko jɔ dyəcɛ̌ bɑ pu cəŋtə jo', ba pɑ pyap pɑ́ pɑ jyədyə̌; da' gɑ pyə cwɔ' jyədyə̌ ŋkho dyə̀ pyə lə yɔ́ sɔmmo dyə́. 24Tadyə̀ byap Dyə Si ba mkamsi gwyəgwyə lə nə yu' mcuŋ mɔ gɑ, nwə cyə wáp nə mghɛ nthəm, wap lə zhyə pa' a nə shyə a. 25Da' gɑ́ mu' mo sɔ' siŋ wap gɑ: Yɔ́ pɔ pyə po kɑ nyə̌ŋ wap dyəcɛ̌ a pɔ thə Dyə Si bɑ́wə ji'tə pɔmnəŋ. 26A lə pɑ po'o tadyə byap Dyə Si lɑ mghɛ fa' pu a pu ghɔ Dyə si dɑ mghɛ nthəm pɑ̀ gɑ zhyə̀ nə sɔ', nə pa' wap lə bɑwə bwɔk gɑ pɔmnəŋ kɑ lɑ mwɔ' nthamtə wap a.

27Wap lə lɑ̌ wap sɔ' Sanedrɛŋ; ŋkhamsi gwyə təŋtə wap gɑ: 28Pyə kɑ cəŋtə sho' bi po gɑ ka po kwi' ji'tə tsǒ bǎ? A yəŋ bɑ po lɑ mzhi' nwə mɔ sa Yerusalɛm; po bɑ́wə shəŋ gɑ mcyə bɛ̀ bǎ ko nə pyə! 29Da' gɑ̀ Pɛtrɔ pu a mghɛ nthəm ghɔm gɑ: Mo gɔ yu'nyə m bi Si, tə m bi pɔmnəŋ pɑ̀. 30Si mta pɔk pɑ bɑ ě yám Yeso yə po kɑ cəŋ e nə́ thə jwə e a. 31Si bɑ e lɑ pu tʉɔ e ŋa' e pa' Mu Fò, biŋ bɑ gɛvɔk pɔ a. Po' gɑ Israɛl kwyəpnyə, pu lə mhɔ̀ myə́ shwyɛ' e. 32Pyə bɑ mghɛ kwinthɛ nə mnwə bɔ̌, wɔk, ba Zhwenyə Dɔlɔ̌ yə Si hɑ́ bi pɔ pyə wap ju'nyə e a.

33Wap lə yu' ghɔm tsɔ gɑ, luŋ yap sə̀, wap piŋ sɛ nə zhwə mghɛ nthəm. 34Da' gɑ mu' mo lusi Sanedrɛŋ bɑ̀ mo nə pɑ Farisai, tso tsyə pɑ́ Gamaliɛl bɑ́ Tádyə nə́ mco', bɑ guŋ pɔ awɛ kùŋ e; gɔm gɑ pu na' dɑ mghɛ cɛ́ nthəm mu ywə, 35biŋ gɔm gɑ: Pɑ Israɛl, po pɔmtə nə ywə yə po gɔ ghə nə pɔ pɔŋ gɑ a. 36Nə cwə dzʉ̌ yəŋ gɑ, pu kɑ yɔ Teʉdas təm, bɑ gɔm gɑ e bɑ kwa' Mo, gwɛ a pɔ ŋkhəpfʉə cʉ́m jʉ̀m ě; pu kě jwə é guŋ pɔ pyə wap kɑ tam jʉ̀m é a sɛ́tə. 37Pu piŋ jɔ Yuda yə Galilea təm yə cwə yə pu lə bɑwə sɛ́ pɔ a. Fəŋtə vəŋ pɔ jʉ̀m é; ba yʉ́ yə kě npfʉ, guŋ pɔ pyə wap kɑ tam jʉ̀m é a sɛtə. 38A po'o tə gɑ gɔm bi po gɑ ka po kwi' jap jʉ̀m pɔ pɑ̌, pɑ tak wap nəŋ wap ghɔ. A pɑ gɑ́ mkwɛnyə map kɑ mfa' map lə fɑ m bi pɔmnəŋ bɑ a gɔ mi pɑ dǒ e, 39nəŋ bɑ gɑ́ a fɑ m bi Si, bɑ bi a pɑ po lə ghə tə a mi pɑ̀. Po pɔmtə gɑ ka po à Si lo' shù!

Wap lə piŋ ywə yə e gɔm a, 40ŋkhe mghɛ nthəm gə pu lɑ nthé nə shwɔ wap, biŋ sho' bi pu gɑ ka wap kwi' ŋkhe tso Yeso nə́ŋ wap. 41Mghɛ nthəm lə nə təm Sanedrɛŋ bɑ ŋwɛnyə̀ pa' Si yɔ gɑ wap ku' pa' bi a pɑ wap yɔgǒ' nə tso Yeso a. 42Wap lə bɑ nə gùŋ mtyɛ' dzʉ awɛ Dyə Si, pa' mdyə map a, wap lə pɑ bwa nə zhi'tə ba nə ghɔm mcuŋ Yeso Kristo.

Currently Selected:

MFA' MGHƐ NTHƏM 5: NTGomala

Highlight

Copy