MFA' MGHƐ NTHƏM 16

Polo pu Silas nyəŋ Timotio nə pú

1Polo lə ghɔ tə ŋkhəm Dɛrbe ba m Listra. Mu' gɛ zhi'nwə lə bɑ̀ wə tso tsyə pɑ Timotio, mú mu' mjwǐ Yudea, gɛ piŋ tap e pɑ yə Grikia. 2Mfɑ̌mfɑ́ pyə wap lə bɑ Listra ba m Ikonya á lə́ gɔm nwə nə é pɑ̀ pɑpuŋ. 3Polo lə pɑ shəŋ nə lɑ e pu e ghɔ, bvo é, bɑ bwɔk pɑ Yudea pyə wap lə bɑ tsʉ' u a. Nə pa' a lə bɑ̀ guŋ yap awɛ zhyə́ gɑ́ tap e lə bɑ yə Grikia. 4Nə guŋ mtisuŋ awɛ myə Polo pu Silas lə shyə nə a, wap lə siŋ wap ywə yə mghɛ nthəm pu a mghətso Yerusalɛm lə yap a, biŋ bɑ həŋtə gɑ pu ghiŋ pɑ́ po'o. 5Mcu'tə pɑ piŋ lə bɑ ŋkwyə nə piŋnthʉm. Də̀ŋ e pɑ ŋkwi' mtyɛ́'mtyɛ̌'.

Pu ke Polo Makedonya

6Polo pu Silas lə ghɔ̌ Frugia ba m Galata, bɑ Zhwenyə Dɔlɔ̌ kɔ́ gɑ ka wap siŋ Ghɔm Azia. 7Wap lə ŋwak dhənyə pɑ Misia, dəŋtə nə ghɔ m Bitinya, da' gɑ Zhwenyə Yeso lə piŋ. 8A lə pɑ po'o wap cyə Misia, dzə́ŋ gɔ Troas. 9A lə pɑ̀ mu' mtsʉ', Polo yɔ nə yɔ m nthʉ̌m zhwenyə, jɔ yə Makedonya bɑ e tiŋnyə thə bɑwə shwyɛ'nyə e gɑ: Cyə m Makedonya sɔ' ŋkwitə wɔk. 10A lə cyə m nə yɔ m nthʉm zhwenyə yə Polo lə yɔ a, pyə wuŋ shəŋ nə ghɔ Makedonya nə pa' pyə lə zhyə̀ nyənyɔ gɑ Si ke wɔk gɑ pyə ghɔ wə́ siŋ cuŋ pɑpuŋ.

Lidia pʉɔ tʉ́m tsyə́

11Pyə lə ko kənu' gwyə Troas, dɑ̀ m nə ghə̌ŋ Samotrake, dzʉ̀ lɔ́, pyə kəm Neapolis, 12dù wə̀ gɔ guŋ Filipo yə a lə bɑ tisuŋ gwyə̀ nə pfəla' Makedonya a, bɑ ntho' bi pɑ Roma a. Pyə lə na' shwə nthʉm tisuŋ bɔ. 13A lə pɑ̌ tyɛ' Sabat, pyə təm tisuŋ bɔ, giŋ geŋnyə mu' shyə́, tsʉ' yə pyə bɑwə sɛ gɑ pyə gɔ yɔ tsʉ' mcwyɛ'nyə tsʉ'u a; pyə lə ko tsʉ'u shwəsi cwəlɔ, gɔm nwə bi pɑjwǐ pyə wap lə bɑ wap cu'tə tsʉ'u a. 14Mu' nə pɑjwǐ bɔ, tso tsyə pɑ Lidia, e pɑ nthɛ́ dzə nə̌m, bɑ yə Tiatira bɑ biŋ Si; e lə těŋ mtə̌ŋ nə pyə, nə pa' a lə bɑ Cyəpɔ ghyɛ' tʉm tsyə nə ghɔm Polo. 15E lə cwə tə ŋkwishyə pu a guŋ dyə e awɛ, nə ké wɔk gɑ pyə sɔ' dyə e gɔm gɑ: Pa' po yɔ gɑ gɑ piŋ Cyəpɔ a, po sɔ' shwə̀ la' m̀. E lə thənyə wɔk, pyə piŋ.

Pu ghəm Polo biŋ nəŋ e

16A lə pɑ mu' tyɛ'dzʉ pyə pɑ gɔ m tsʉ' mcwyɛ'nyə, mu' mu go gɛfa', zhwenyə gɔ́m pɑ nə e, e sɔ' nthɑ wɔk. Mpǐŋ mghɔm gɔm myə é lə gɔm a lə gə ŋkhǎp pɑ ŋkho pʉə mtǎ fa' pyə tə jɔm. 17E lə bɑ pɑ jʉ̀m kwə pyə a Polo gùŋ mcwə awɛ bɑ shwè gɔm gɑ: Pɑ bɛ pɔ gɑ bɑ mghɛ fa' Si tɑ thə. Wap bɑwə siŋ məjyə nə gɛvɔk. 18E lə ghə pɑ po'o nə mtyɛ'dzʉ jɔmyɔm. A lə pɑ po'o, Polo yɔ kəkɔ fɛ nɑ e gɔm bi zhwenyə bɔ gɑ: Nə tso Yeso Kristo, gɑ̌ ghɔm bu gɑ́ o təm nə mjwǐ yɑ. Zhwenyə wuŋ nthəm nə e pɑ cwə o bɔ. 19Mta pyə lə nə yɔ pa' fʉ' yə wap kɑ bɑwə byap a mi a, gəm Polo pù Silas fəŋ wap nə gɔ nə tsʉ' yə pu fyɛ' shɛ́ nə dəm sim a, dzə pɑ ya' shɛ́. 20Wap lə la'tə wap bi pɑ ya'shɛ́ gɔm gɑ: Pɔ pɔ gɑ wə ma' paknyə nthʉm tisuŋ pyə. Wap bɑ pɑ Yudea. 21Bɑwə da'tə shɑ mkhɛ nwə myə bi a pɑ wɔk pɑ Roma lə piŋ kɑ biŋ giŋ nə a. 22A pɑ́ po'o, lǎ' ŋkheŋtə wap; pɑ ya'shɛ́ ghə̀ pu tɔk dzə nə pu, wap ghɔ̀m gɑ́ pu lɑ ka'cyə shwɔ wap. 23Wap cəŋtə shwɔ wap, ma' wap cɛ́. Gɔm bi byap dyəcɛ̌ gɑ e pyap wap kwa' pɑpuŋ. 24Pa' wap gɔm bi e po'o a, e lɑ mghɛ nthəm nə gɔ tɑ nə mu' túŋ tsʉ' dyə̀ cɛ̌ shəŋ wap nə mkəlo' nə mkwə map.

25A lə pɑ nə gwɛ a téŋ mtsʉ̌' Polo pu Silas pɑ shwyɛ'nyə Si, biŋ bɑ jwɔp ghamtə Si. Pyə shɑ̀ mghɛ cɛ́ pɑ ju' pa' wap wə jwɔp a. 26Pu lə wuŋ nə yu' cǎ' cʉ'nyə tɑ mto dyəcɛ̌ nəŋnyə. Guŋ jyədyə̌ awɛ wuŋ he pɑ cwə o bɔ, mgwɑ mghɛ cɛ́ cɑtə nə mkwə map. 27Byap cɛ́ lə vonyə, jɔ bɑ guŋ mjyədyə̌ cɛ́ awɛ ghyɛ́'; e lə kwɛ́ gɑ guŋ mghɛ cɛ́ khʉ̀, bé nyə e bɑ gɔ nə zhwə nɑ́ e. 28Tɑ́ Polo cwé tə thə gɑ: Kɑ ghə sɔm nwə cwəpuŋ nə nɑ o. Pyə̌ pɑ si awɛ. 29Byap cɛ́ lə həŋtə ŋkha', deŋ ntham dyə, nə vʉ nə mkwə Polo pu Silas bɑ səŋ. 30Biŋ nthé wap dyə cwəlɔ, gɔm bi pu gɑ: Mcyəpɔ gɑ̌ gɔ ghə gɑ kɑ̀ tə̀ vɔk? 31Wap ghɔm bi e gɑ piŋ Cyəpɔ Yeso, pu a tuŋdyə o sɔ' bvɔk. 32Polo pu Silas lə siŋ ghɔm Cyəpɔ bi byap cɛ̌ pu a pɑ dyə e. 33Byap cɛ́ lə lɑ́ wap gɔ pɑ mtsʉ' bɔ, sɔk mfiŋ map, guŋ ŋkwishyə pu a guŋ pɔ pyə awɛ tə piŋ byap sɔmywə. 34E lə lɑ Polo pu Silas bʉɔ cwəlɔ gɔ dyə e, ŋkhim wap, pu a pu ŋwɛnyə nthʉm tuŋdyə pa' wap piŋ Si a.

35Dzʉ lə nə́ lɔ, pɑ ya' shɛ́ təm mco' pap gɑ wap ghɔ gɔm bi byap cɛ́ gɑ: Nəŋ pɔ pɑ̌. 36Byap cɛ lə siŋ Polo cuŋ bɔ gɑ: pɑ ya'shɛ́ təm gɔm gɑ pu nəŋ wɔ. Pa' a pɑ po' a po təm gɔ nə hwitə! 37Da' gɑ Polo ghɔm gɑ: Wap ké gə pu cwɔ wɔk dəm sim tə fyɛ' wɔk wɔk pyə pyə̌ bɑ po pɑ Roma, biŋ nyəŋ wɔk cɛ. Wap bɑwə shəŋ nə nəŋ wɔk pɑ̀ m jʉ̀mjʉ̀m a? Bi a lə pɑ̀ pa'! Pɑ̀ kwa' wap nə sɔ' nəŋ wɔk. 38Mcò' pɑ ya'shɛ́ lə ghɔ siŋ pɑ ya'shɛ́ pa' Polo gɔm a. Wap nə yu' gɑ Polo bɑ mù e Roma bwɔk 39biŋ sɔ' dó gɑ wap wa' mhɔ map, biŋ nə nə̌ŋ wap gɔm gɑ wap fɑ nthʉm tisuŋ nthəm. 40Polo pu Silas lə cwə tə nthəm cɛ cwəlɔ, gɔ ywə Lidia, jɔ mfɑ̌mfɑ́, hɑ kaktʉɔ bi pu tə gɔ̌.

Currently Selected:

MFA' MGHƐ NTHƏM 16: NTGomala

Highlight

Copy