MFA' MGHƐ NTHƏM 1

Mghɔm nə ntho'

1Teofilə, guŋ ywə awɛ yə Yeso lə ghə biŋ ji'tə tə fɑ nə́ nə ntho' 2tə gɔ́ ŋkhəm nə tyɛ'dzʉ yə e lə cyə m nə Zhwenyə Dɔlɔ̌ siŋ pɑkhʉ pyə pyə̀ e lə cwɔ' wap a ywə yə e shəŋ a, tə ŋkwɔ' kɛbəŋ a, dě bvə nthʉm dzə ŋwa'nyə a. 3Cwə yə e lə yɔgo' npfʉ́ biŋ jam nə vʉ̌ bɑ pɑ́ nthʉɔ a, e lə la'tə nɑ e pɑ bi pɑkhʉ pyə bɔ, da'tə nthinthi mtiŋ bi pu, gɑ wap nə jyə́ é; e lə la'tə nɑ e bi pu nə mtyɛ'dzʉ mghappfʉə, bɑ siŋ wap nwə nə Nəfo Si.

4Cwə yə pu a pú lə pɑwə dzʉywə a, e hɑ mco' bi pu gɑ ka wap təm Yerusalɛm, gɑ wap cwə pɑ wə́ byap ywə yə Ta lə ka'nyə bi pu a. Gɔm bi pu gɑ: mka'nyə myə po lə yu' bəm a, 5nə pa' Yohane lə nu' pɔ pɑ shyə, tə a cʉ' po mtyɛ'dzʉ pu nu' wɔ nthʉm Zhwenyə Dɔlɔ̌.

Nə kwɔ' kɛbə̀ŋ

6Wap lə cu'tə həŋtə e gɑ: Cyəpɔ, a bɑ cwəlɔ tə o gɔ piŋ tʉ Nəfo Israɛl a? 7E ghɔm bi pu gɑ: A tə yɔ shɛ nə zhyə cwə ba wɔ dzʉ yə Ta jap nə pa' e zhyə a pɑ̀. 8Da' gɑ po gɔ sɔ' kwi tʉɔ, a tʉɔ Zhwenyə Dɔlɔ̌ yə a gɔ sɔ' nə po á, po cʉ' mghɛ kwinthɛ pɑ̌ Yerusalɛm, ba m nthʉm guŋ Yudea awɛ, ba m Samaria, tə gɔ ŋkhəm nə dhə dzʉ́.

9E lə ghɔm po'o, wap yɔ pa' e ŋkwɔ' gɔ a, mlwa sɔ' sam e, nthé é nə mnyə map. 10Pa' wap lə pɑ nthʉ mnyə map nə dé kɛbəŋ pa' Yeso wə gɔ a, wap wuŋ jɔ pɔpʉə bəŋ pu bɑ wap kwa mfə dzə. 11Pɔ bɔ ghɔm bi pu gɑ: Pɑ Galilea, nwə kɑ po cwə tsa' a bɑ de kɛbəŋ? Yeso yɑ yə pu nthé e cəcɑ̌ po nə gɔ m kɛbəŋ a gɔ la' kwi' sɔ' pɑ pa' po jɔ e ghɔ m kɛbəŋ a.

Mghɛ nthəm

12Pɑkhʉ̌ pyə lə fɑ kuŋ mthə Olivə gɔ Yerusalɛm. Kuŋ bɔ bɑ nə nthə ghiŋ yə pu biŋ nə ghiŋ nə Sabat a. 13Wap lə pɑnyə, ŋkwɔ' mtwɔ'dyə̌ nə zhə̀ŋ dyə́ thə́, tsʉ' yə wap lə shu'tə nə a. Wap pyə wap lə bɑ tsʉ'u a lə bɑ Pɛtrɔ, gə Yohane, gə Yakop pu Andreya; Filipo pu Tomasi; Batəlemi pu Matio. Yakop mu Alfeo, Simon Zelot ba Yuda mu Yakop. 14Guŋ yap awɛ lə bɑ pɑ ŋkwishwə, bɑ nthamtə shwyɛ'nyə Si guŋ mcwə awɛ pu a shɑ pɑ jwǐ pa' Maria má Yeso a bɑ mfɑ̌ Yeso.

Pa' pu lə cwɔ' Matiasi nə gə gɛ nthəm

15A lə pɑ nə mtyɛ'dzʉ bɔ Pɛtrɔ lusi cəcɑ̌ mfɑ̌mfɑ bɑ wap cu'tə tə bɑ gwɛ a pɔ popʉə m ŋkhə gɔm gɑ: 16Mfɑmfɑ, a lə bɑ shəŋ gɑ ywə yə Zhwenyə Dɔlɔ̌ lə ghɔm nthʉm ŋwa'nyə shyə̀ m nə shwə David gɔm tə tyɛ' a pəmtə nə Yuda yə e kɑ cʉ' gɛ la'tə məjyə bi pɔ pyə wap kɑ ghəm Yeso a. 17Pɑ a pu lə́ nə́ bəmtə bɑ, bɑ ě kwi tsyə́ fa' nə fa' tsɔk pɑ. 18A bɑ bɛ bɔ lě dɑ ŋkhap mnwə cwəpuŋ jo ca'; biŋ dɑ thə e bvʉ̌ bvyə́, tsə vam tsyə sɛ pě. 19Guŋ pɑ Yerusalɛm lə zhyə́ awɛ, a cyə m po'o wap ke cǎ' bɔ nə ghɔm tsap gɑ Hakəldama, a la'tə gɑ cǎ' mcyə.

20A bɑ pu le shəŋtə bvə nthʉm ŋwa'nyə mzhwɔp gɑ:

La' tsyə cʉ' famla', sɔmmo kɑ

cwə nə.

Biŋ kwi' bvə gɑ:

Mu' mo kwi tsyə fa'.

21Shɑ pɔ sì pyə pa pú lə bəmtə bɑ̀ nə guŋ mcwə awɛ yə pa Cyəpɔ Yeso lə pɑ̌ e pɑ́ sa' wɔk pɑ a, 22tɑ fɑ nə kwishyə Yohane gɔ ŋkhəm nə tyɛ'dzʉ yə e lə tə̌m cəcɑ̌ pɑ a. A ta' mo nə pu cʉ' mu' gɛ kwinthɛ pa' wɔk pɑ a, nə nə́ yam nə vʉ̌ é.

23Pu lə la'tə pɔpʉə: Yosɛp yə pu ŋkhe e gɑ Barsabas ba m gɑ Yustos, biŋ gə Matiasi. 24Pu lə piŋ shwyɛ'nyə Si gɔm gɑ: Wə Cyəpɔ yə o bɑ o zhyə mtʉm guŋ pɔ awɛ a, la'tə yə mo yə o cwɔ' e nə pɔ pɔgɑ pɑpʉə a, 25po'o gɑ e ko nthʉm fa' mghɛ nthəm nə tsʉ' yə Yuda kɑ wa' a, gɔ m nə yə nthi tsʉ' a. 26Pu lə tǎmnthuŋ a tsʉ Matiasi; tə fɑ cwə bɔ pu nyəŋ e cəcɑ̌ mghɛ nthəm pɔ shwɔp a mu' mgham.

Currently Selected:

MFA' MGHƐ NTHƏM 1: NTGomala

Highlight

Copy