Markus 4

Balndol dow demoowo

(Matta 13:1-9; Luka 8:4-8)

1Fahin Yeesu fuɗɗi ekkitingo yimɓe haa fomoonde weendu Galiili. Mooɓre ɗuuɗnde masin mooɓi haa maako. Ngam maajum o nasti koommbowal#4:1 Koommbowal malla laanawal., o jooɗi. Koommbowal ɗon nder weendu, mooɓre boo ɗon haa fomoonde#Lk 5:1-3.. 2O ekkitini ɓe kuuje ɗuuɗɗe bee balndi. Nder ekkitinol maako o wi'i ɓe: 3“Keɗite! Nyannde feere demoowo yehi ngesa ngam saakoygo. 4Nde o ɗon saaka, aawdi ngoɗndi soli dow laawol. Colli ngari, cuɓti ndi. 5Aawdi ngoɗndi soli haa korka'e, haa lesdi ɗuuɗaay. Law ndi fuɗi ngam lesdi ɗuuɗaay. 6Nde naaŋge ɓaŋgti, nge wuli puɗndi man, ndi yoori ngam ɗaɗi maari luggaay. 7Aawdi ngoɗndi boo soli caka gi'e. Gi'e mawni, ɓilli puɗndi man, ndi wurtinaay cammeeje. 8Ammaa aawdi ngoɗndi soli haa lesdi mboondi, ndi fuɗi, ndi mawni, ndi wurtini cammeeje, ndi ɓenndi. Goɗɗe ɗon bee gabbe cappanɗe tati, goɗɗe boo bee gabbe cappanɗe joweego e goɗɗe bee gabbe teemerre.” 9Nden Yeesu wi'i ɓe: “Mo woodi noppi ngam nanugo, nana!”

Daliila ka Yeesu huuwtiniri balndi

(Matta 13:10-17; Luka 8:9-10)

10Nde Yeesu jooɗi feere muuɗum, wondunooɓe bee muuɗum e pukara'en muuɗum sappo e ɗiɗo ƴami mo maana balndi go. 11O jaabi ɓe: “Onon, Allah anndini on sirri laamu muuɗum. Ammaa ngam woɗɓe, sey bee balndi. 12Ngam maajum

ɓe ɗon ndaara, ammaa ɓe ngi'ataa.

Ɓe ɗon nana, ammaa ɓe paamataa.

Ngam taa ɓe lorto haa Allah,

Allah boo yaafo ɓe#Esa 6:9-10..”

Yeesu faamtini balndol dow demoowo

(Matta 13:18-23; Luka 8:11-15)

13Nden Yeesu wi'i ɓe: “On paamaay balndol ngo'ol na? Nden kam noy on mbaawrata faamugo balndi goɗɗi? 14Demoowo ɗon saaka wolde Allah. 15Woɗɓe nanndi bee aawdi dow laawol, to ɓe nani wolde Allah, law Sayɗaanu wara, wifta wolde nde ɓe nani. 16Woɗɓe nanndi bee aawdi colndi haa korka'e. To ɓe nani wolde Allah, law ɓe njaɓa nde bee seyo. 17Ammaa nde waɗataa ɗaɗi nder maɓɓe, ɓe nuɗɗinan wakkati seɗɗa non. Nden, to ɓillaare malla toonyaare ummake ngam daliila wolde Allah, law ɓe accan nuɗɗinki. 18Woɗɓe boo nanndi bee aawdi caka gi'e. Ɓe nani wolde Allah, 19ammaa laruuraaji duniyaaru ndu e esto jawdi e suunooji feere feere nastan ɓerɗe maɓɓe, ɗi ɓillan wolde Allah e nde waɗataa nafuuda. 20Woɗɓe fahin, nanndi bee aawdi colndi haa lesdi mboondi. Ɓe ɗon nana wolde Allah, ɓe ɗon njaɓa nde, ɓe ɗon mbaŋgina ɓenndalooje, woɗɓe cowi cappanɗe tati, woɗɓe boo cowi cappanɗe joweego, woɗɓe feere cowi teemerre.”

Balndol pittirla les bokoti

(Luka 8:16-18)

21Nden Yeesu wi'i ɓe: “Goɗɗo jamnan pittirla ngam jo'ingo nga les bokoti malla les leeso na? Naa o jo'inan nga dow jo'inirɗum#Mat 5:15; Lk 11:33.? 22Ngam cuuɗiiɗum fuu waŋgan nyalaade woɗnde, sirriijum fuu anndititte#Mat 10:26; Lk 12:2.. 23Mo woodi noppi fuu nana!”

24Fahin Yeesu wi'i ɓe: “Kakkilane ko on nanata. Allah foondan ko o hokkata on bee poondirgol ngol on poondirta e o ɓesdan dow maajum fahin#Mat 7:2; Lk 6:38.. 25Ngam marɗo huunde, ɓe ɓesdanan mo, ammaa mo maraay koo ɗume, ɓe koocan koo peetum maako#Mat 13:12; 25:29; Lk 19:26..”

Balndol aawdi puɗanndi feere maari

26Fahin Yeesu wi'i: “Laamu Allah nanndi bee goɗɗo mo rufi aawdi haa lesdi. 27Nden o yaha o ɗaano jemma, o fina nde weeti fuu. Wakkati maajum aawdi ɗon fuɗa, ɗon mawna, kaŋko boo o anndaa no ndi mawnirta. 28Lesdi ndin ɗon fuɗna ko rufa: Aran fuɗŋgo, nden wurtina sammeere, ɓaawo man ɗum waɗa ɓikkoy nder sammeere. 29To alkamaari ɓenndi, o fuɗɗan wa'go, ngam saa'i waɗi#Yl 4:13..”

Balndol aawdi citta

(Matta 13:31-32,34; Luka 13:18-19)

30Fahin Yeesu wi'i: “Bee ɗume nanndinten laamu Allah? Bee balndol ngole en paamtinta haala maagu? 31Ngu nanndi bee gawel citta. Ndi ɓuri aawdi duniyaaru fuu famɗugo. 32Ammaa to ɓe aawi ndi, ndi fuɗan, ndi mawnan haa ɓura fuɗŋgooji fuu. Lice maaki mawnan haa colli mbaɗa caɓɓe haa ɗowdi maaki.”

33Yeesu waazini yimɓe Kubaruwol Belŋgol bee balndi ɗuuɗɗi bana ɗi'i, fodde ko ɓe mbaawi faamugo. 34O wolwani ɓe tum bee balndi. Ammaa nde o luttidi bee pukara'en maako kamɓe feere maɓɓe, o laɓɓinani ɓe koo ɗume fuu.

Yeesu de'itini henndu saatundu

(Matta 8:23-27; Luka 8:22-25)

35Nyannde maajum nde hiiri, Yeesu wi'i pukara'en muuɗum: “Sey en eero gaɗa weendu.” 36Nden ɓe acci mooɓre. Pukara'en nasti koommbowal#4:36 Koommbowal malla laanawal. ngal Yeesu nasti, nden ɓe ndilli. Koommbooje goɗɗe boo ɗonno kommbi maako. 37Henndu saatundu ummi, ƴuuge ukki dow koommbowal haa ngal heewi ndiyam. 38Yeesu ɗon haa sakkitorde koommbowal, o ɗon ɗaani, hoore maako ɗon dow waflaare. Pukara'en maako pindini mo, mbi'i: “Moodibbo, en ɗon kalka, walaa ko ɗum yaali ma na?” 39Nde o fini, o telɓani henndu, o wi'i weendu: “Sirwa!” Henndu de'iti, de'ere mawnde laati. 40Nden Yeesu wi'i pukara'en: “Ngam ɗume on kultori? Haa jonta on koolaaki yam na?” 41Ammaa ɓe kultorino masin, ɓe mbi'mbi'tiri: “Goɗɗo oo o moy? Koo henndu e weendu boo ɗon ɗowtano mo.”

Currently Selected:

Markus 4: FBDC

Highlight

Copy