Markus 16

Ummitineeki Yeesu

(Matta 28:1-8; Luka 24:1-12; Yuhanna 20:1-10)

1Nde nyannde siwtorde saali, Mariyama mo Magdala e Mariyama daada Yaakuba e Salome coodi uurle ngam ɓe njaha, ɓe ndufa dow ɓanndu Yeesu. 2Alat, nyannde go'oore nder asaweere, ɓe ndawi cub yahugo yenaande, ɓe njotti ton saa'i puɗki naaŋge. 3Ɓe mbi'mbi'tiri hakkunde maɓɓe: “Moy sottinanta en hayre haa nastirde yenaande?” 4Ammaa nde ɓe ɓaŋgti gite, ɓe ngi'i hayre mawnde go sottinaama. 5Ɓe nasti nder yenaande. Ɓe ngi'i suka ɗon jooɗi ton haa wakeere nyaamre, o ɗon ɓorni toggoore raneere. Ɓe kultori. 6Ammaa o wi'i ɓe: “Taa kultore! On ɗon ɗaɓɓita Yeesu Nasaratuujo mo ɓe ɓilino haa leggal gaafaaŋgal. O walaaɗon haa ɗo, o ummitake. Ndaa haa ɓe mballinno mo. 7Jonta ndille, mbi'e pukara'en maako e Piyer kubaruwol ngo'ol: O aartan on yahugo Galiili, ton ngi'oton mo bana o wi'no on#Mat 26:32; Mk 14:28..” 8Rewɓe ngurti yenaande man, ɓe ndoggi, ɓe ndiwni ɓe kultori masin. Ɓe mbi'aay haala man koo moy, ngam ɓe kultori.

Yeesu waŋgani Mariyama mo Magdala

(Matta 28:9-10; Yuhanna 20:11-18)

9Ɓaawo Yeesu ummiti diga maayde, nyannde Alat fajiri cub, o aarti waŋgango Mariyama mo Magdala mo o riiwi ruuhuuji coɓɗi joweeɗiɗi haa maako. 10O yehi, o anndini ɗum hawtiɗiraaɓe Yeesu. Kamɓe ɓe ɗonno mboya, ɓerɗe maɓɓe ta'ino. 11Ɓe nani Mariyama ɗon wi'a: “Yeesu o geeto, mi yi'i mo!” Ammaa ɓe nuɗɗinaay ko o wi'i.

Yeesu waŋgani pukara'en ɗiɗo

(Luka 24:13-35)

12Ɓaawo maajum Yeesu waŋgani ɗiɗo maɓɓe bee jaati feere, nde ɓe ɗon njaha kawye. 13Ɓe lori, ɓe ngecci ɗum luttuɓe, ammaa kamɓe boo ɓe nuɗɗinaay ɗum.

Yeesu waŋgani pukara'en sappo e go'o

(Matta 28:16-20; Luka 24:36-49; Yuhanna 20:19-23; Kuuɗe Nelaaɓe 1:6-8)

[14Ɓaawoɗon Yeesu waŋgani pukara'en sappo e go'o saa'i ɓe ɗon nyaama. O feli ɓe ngam sooynde nuɗɗinki maɓɓe. O feli ɓe boo ngam caatal ɓerɗe maɓɓe, ngam ɓe nuɗɗinaay bolle yi'ɓe mo ɓaawo o ummiti. 15Nden o wi'i ɓe: “Njehe koo toy nder duniyaaru, ngaazine koo moy Linjiila#KN 1:8.. 16Koo moy nuɗɗini, jaɓi baptisma, hisan. Mo nuɗɗinaay, Allah hiitoto mo. 17Nuɗɗinɓe mbaŋginan alaamaaji ɗi'i: Ɓe ndiiwan ginnaaji bee innde am, ɓe mbolwan bee ɗemɗe kese. 18To ɓe naŋngi boɗɗe bee juuɗe malla to ɓe njari njaram mbaroojam, ɗum naawnataa ɓe sam. Ɓe njowan juuɗe maɓɓe dow nyawɓe, ɓe njamɗitan.”]

Yeesu eeŋgti

(Luka 24:50-53; Kuuɗe Nelaaɓe 1:9-11)

19Ɓaawo nde Jawmiraawo timmini wolwango pukara'en muuɗum, o eeŋgti haa asama, o jooɗi haa nyaamo Allah#KN 1:9-11.. 20Pukara'en kam ndilli, ngaazini Linjiila koo toy fuu. Jawmiraawo boo huuwdi bee maɓɓe, gooŋɗini waazu maɓɓe bee alaamaaji go.

Currently Selected:

Markus 16: FBDC

Highlight

Copy