Markus 10

Ekkitinol Yeesu dow ceergal

(Matta 19:1-12; Luka 16:18)

1Yeesu ummi nokkuure man, dilli lesdi Yahudiya, nden o eeri maayo Urdun. Fahin yimɓe mooɓti haa maako. O ekkitini ɓe bana ko woowa.

2Farisa'en woɗɓe ngari haa maako ngam jarribaago mo. Ɓe ƴami mo: “Tawreeta duŋanake gorko seera debbo mum na?” 3Yeesu jaabori ɓe bee ƴamol ngol: “Ɗume Muusa umri on?” 4Ɓe njaabi: “Muusa duŋani gorko winnda ɗereewol ceergal, nden o seera debbo maako#TT 24:1-4; Mat 5:31..” 5Yeesu wi'i ɓe: “Ngam caatal ko'e mooɗon Muusa winndani on umroore nde'e. 6Ammaa haa fuɗɗam, Allah tagi gorko e debbo#Laat 1:27; 5:2.. 7Ngam maajum gorko accan baaba muuɗum e daada muuɗum, ɗakkotiran bee debbo muuɗum. 8Ɓe ɗiɗo fuu ɓe laatoto ɓanndu wooru. Bana non ɓe laatataako yimɓe ɗiɗo ɓaawoɗon, ammaa ɓanndu wooru#Laat 2:24.. 9Ngam maajum taa neɗɗo fiista ko Allah haɓɓi.”

10Nde ɓe nasti saare, pukara'en maako ƴamti mo haala man. 11Yeesu faamtini ɓe, wi'i: “Koo moy seeri debbo muuɗum, te'i debbo feere, o waɗi njeenu dow debbo arano. 12Non boo to debbo acci gorko muuɗum, te'ri bee gorko feere, o waɗi njeenu#Mat 5:32; 1 Kor 7:10-11..”

Yeesu barkiɗini ɓikkoy pamaroy

(Matta 19:13-15; Luka 18:15-17)

13Yimɓe ngaddi ɓikkoy pamaroy haa Yeesu ngam o meema koy. Ammaa pukara'en caatani yimɓe ɓe. 14Nde Yeesu yi'i ɗum, o ɓerni, o wi'i pukara'en maako: “Acce ɓikkoy pamaroy ngara haa am. Taa kaɗe koy, ngam laamu Allah woodani irin maakoy. 15Mi ɗon wi'a on, mo jaɓaay laamu Allah bana ɓiŋngel pamarel, fakat o nastataa ngu sam#Mat 18:3..” 16Nden o huufi ɓikkoy go, o wallini juuɗe maako dow maakoy, o barkiɗini koy.

Risku e laamu Allah

(Matta 19:16-30; Luka 18:18-30)

17Nde Yeesu ɗon yaha dow laawol, goɗɗo doggoy wari, tuggi koppi yeeso maako, ƴami mo: “Moodibbo booɗɗo, ɗume mi waɗata haa mi heɓa ngeendam nduumiiɗam?” 18Yeesu wi'i mo: “Ngam ɗume a wi'ata yam mi booɗɗo? Sey Allah gooto tan woni booɗɗo. 19A anndi umrooje: Taa mbar-hoore, taa waɗ njeenu, taa wujju, taa seeda fewre, taa waɗ rikici, teddin baaba ma e daada ma#Gurt 20:12-16; TT 5:16-20..” 20Goɗɗo oo wi'i: “Moodibbo, mi ɗowtani umrooje ɗe'e fuu diga mi derkeejo tawon.” 21Yeesu suti mo bee yiide, wi'i mo: “Luttani ma huunde woore: Yah soorru ko a mari fuu, hokku talaka'en ceede man, nden a heɓoyan ndesaari haa asama, ɓaawoɗon, war tokkam.” 22Ammaa nde goɗɗo oo nani bolle ɗe'e, yeeso maako nyiɓɓi, ɓernde maako metti, o dilli, ngam o diskuɗo masin.

23Yeesu laari pukara'en muuɗum, o wi'i ɓe: “Ɗum saɗani riskuɓe nastugo laamu Allah.” 24Bolle ɗe'e kayɗini pukara'en masin. Ammaa Yeesu wi'i ɓe fahin: “Ɓikkoy am, nastugo laamu Allah saɗi masin! 25Ngeelooba saalo nder wurdere baatal ɓuri hoyugo dow diskuɗo nasta laamu Allah.” 26Pukara'en ɓesdi hayɗingo masin, ɓe ƴamƴamtiri, ɓe mbi'i: “To non kam, moy waawata hisugo?” 27Yeesu suti ɓe, wi'i: “Haa yimɓe, ɗum waɗataako, ammaa haa Allah ɗum waɗoto, ngam haa Allah, koo ɗume fuu waɗoto.”

28Nden Piyer wi'i mo: “Ndaa minin min acci kuuje fuu, min tokki ma.” 29Yeesu wi'i mo: “Gooŋga. Min boo mi ɗon wi'a on: Koo moy acci saare malla deerɗiraaɓe malla daada malla baaba malla ɓikkoy malla gese muuɗum ngam daliila am e ngam Linjiila, 30o heɓtan ɗum cowi teemerre nder ngeendam maako jonta: Calaaje e deerɗiraaɓe worɓe e rewɓe e daadiraaɓe e ɓikkoy e gese e bee toonyaaŋgeeji boo. Nder zamanuuru waranndu boo o heɓan ngeendam nduumiiɗam. 31Ɗuuɗɓe aartuɓe laatoto sakkitiiɓe, ɗuuɗɓe sakkitiiɓe boo laatoto aartuɓe#Mat 20:16; Lk 13:30..”

Yeesu anndini haala maayde e ummitineeki muuɗum tataɓre

(Matta 20:17-19; Luka 18:31-34)

32Ɓe ɗon dow laawol yahugo Urusaliima. Yeesu ɗon ardi pukara'en muuɗum, ɓe kayɗini, yimɓe tokkiiɓe ɓaawo maɓɓe ɗon kula boo. Fahin Yeesu ewni pukara'en muuɗum sappo e ɗiɗo feere maɓɓe, o anndini ɓe ko tammi waɗugo mo. 33O wi'i ɓe: “Nane, en ɗon njaha Urusaliima, ton ɓe ndokkan Ɓii-neɗɗo haa juuɗe mawɓe liman'en e moodiɓɓe tawreeta. Ɓe kiitoto mo kiita maayde, nden ɓe ndokka mo haa juuɗe heefeerɓe. 34Kamɓe boo ɓe njancan mo, ɓe tuutan mo tuuɗe, ɓe ɓoccan mo, ɓe mbaran mo. Ammaa ɓaawo nyalɗe tati o ummititto diga maayde.”

Tornde Yaakuba e Yuhanna

(Matta 20:20-28)

35Nden Yaakuba e Yuhanna ɓiɓɓe Zebede ɓaditi Yeesu, ɓe mbi'i mo: “Moodibbo, min ngiɗi a waɗana min ko min ƴamata ma.” 36Yeesu ƴami ɓe: “Ɗume on ngiɗi mi waɗana on?” 37Ɓe njaabi mo: “To a jooɗake dow leeso laamu ma nder tedduŋgal ma, nden kam min ngiɗi a jo'ina min gooto haa nyaamo ma e gooto haa nano ma.” 38Ammaa Yeesu wi'i ɓe: “On anndaa ko torotooɗon. On mbaawan yarugo jardugel bone ngel mi yarata na malla jaɓugo baptisma bone ɗe mi jaɓata na#Lk 12:50.?” 39Ɓe njaabi mo: “Min mbaawan.” Yeesu wi'i ɓe: “Gooŋga, on njaran jardugel bone bana am, on njaɓan boo baptisma ka mi jaɓata. 40Ammaa ko laarani jooɗaago haa nyaamo malla haa nano am, naa min hokkata ɗum, ɗum ɗon ngam yimɓe ɓe Allah taaskani.”

41Nde pukara'en sappo luttuɓe nani haala man, ɓe ɓernani Yaakuba e Yuhanna. 42Nden Yeesu ewni ɓe fuu, wi'i ɓe: “On anndi, yimɓe ɓe on ndaarata bana ardiiɓe ummaatooje, ɓe ɗon ndoola yimɓe maɓɓe, mawɓe boo ɗon kolla ɓe baawɗe. 43Ammaa taa ɗum wona non caka mooɗon. To gooto mooɗon yiɗi laataago mawɗo, sey o laato jaggiiɗo mooɗon#Lk 22:25-26.. 44Mo yiɗi ardaago caka mooɗon, sey o wona maccuɗo yimɓe fuu#Mat 23:11; Mk 9:35; Lk 22:26.. 45Ngam Ɓii-neɗɗo boo waraay ngam yimɓe kuuwana mo, ammaa ngam o huuwana yimɓe, o hokka yoŋki maako ngam soottugo ɗuuɗɓe.”

Yeesu wumtini Bartime bumɗo

(Matta 20:29-34; Luka 18:35-43)

46Ɓe njotti Yeriko. Nde Yeesu wurti wuro maajum bee pukara'en muuɗum e mooɓre ɗuuɗnde, bumɗo bi'eteeɗo Bartime ɓii Time ɗonno jooɗi sera laawol, o ɗonno rooko. 47Nde o nani Yeesu Nasaratuujo ɗon saalo, o fuɗɗi hoolugo: “Yeesu ɓii Daawuda, enɗam!” 48Ɗuuɗɓe telɓani mo, mbi'i mo o jeeɗo, ammaa o ɓurti hoolugo: “Ɓii Daawuda, enɗam!” 49Yeesu dari, wi'i: “Ewne mo.” Ɓe ewni bumɗo go, ɓe mbi'i mo: “Tiɗɗin ɓernde ma, umma, o ɗon ewne.” 50Nden o wudini alkibbaare maako, o ummi, o wari haa Yeesu. 51Yeesu ƴami mo: “Ɗume ngiɗɗa mi waɗane?” Bumɗo jaabi: “Moodibbo, wumtinam haa mi yi'a fahin.” 52Yeesu wi'i mo: “Yah, nuɗɗinki ma hisni ma.” Law o wumti o ɗon yi'a, nden o tokki Yeesu.

Currently Selected:

Markus 10: FBDC

Highlight

Copy