Mga Panultihon 20
20
1Ang sobra nga pag-inom sa ilimnong makahubog magpahimo sa tawo nga bastos.
Ang tawo nga maghubog-hubog dili maalamon.
2Makalilisang ang hari kon masuko murag nagangulob nga liyon.
Kon pasuk-on mo siya, patyon ka gayod niya.
3Dalaygon ang tawo nga maglikay sa kasamok;
ang buang-buang lang ang gustog gubot.
4Ang tapolan nga modaro sa panahon sa tingtanom walay anihon.
5Ang huna-huna sa tawo mahimong sama kalawom sa tubig,
apan kon maalamon ka, matugkad mo kini.
6Daghan ang moingon nga maayo silang tawo,
apan anaa ba kanilay masaligan?
7Ang matarong nga tawo dili salawayon.
Bulahan ang iyang mga anak nga nagsunod sa iyang pamatasan.
8Kon mohukom ang hari, sutaon gayod niya pag-ayo
kon kinsay naghimog daotan.
9Wala gayoy makaingon nga hinlo na gayod ang iyang kasing-kasing,
nga wala na gayod siyay sala.
10Ngil-aran ang Ginoo sa manglimbong
ug timbang o pagtakos.
11Ang mga binuhatan sa usa ka batan-on nagpadayag sa iyang pamatasan,
kon siya matarong o dili.
12Gihatagan kita sa Ginoo ug mata aron makakita
ug dalunggan aron makabati.
13Kon sige ka lang ug katulog, magutman ka.
Bangon ug pagtrabaho,
ug moabunda ang imong pagkaon.
14Sawayon sa mamalitay ang baligya aron makahangyo siya.
Apan kon mapalit na niya kini, ipasigarbo dayon niya kini.
15Daghang mga bulawan ug mahalong mga bato,
apan diyutay ra ang manulti nga adunay kaalam.
16Kon adunay tawo nga mosaad nga siyay mobayad kanimo
sa utang sa tawo nga dili niya kaila,#20:16 tawo nga dili niya kaila: o daotang babaye.
siguroha nga makakuha ka gikan kaniya ug garantiya,
aron masiguro mo nga mobayad siya.
17Ganahag kaon ang tawo sa iyang linimbongan,
apan sa ulihi, mahisama kini sa balas diha sa iyang baba.
18Pangayog tambag kabahin sa imong mga plano
o sa dili ka pa moadto sa gira.
19Ang libakira manabi ug mga sekreto,
busa likayi ang tawo nga sama niana.
20Ang anak nga manunglo ug ginikanan mamatay
sama sa suga nga napalong diha sa kangitngit.
21Ang panulondon nga sa sinugdan imong gikuha sa dili pa hustong panahon
dili makahatag kanimo ug kaayohan sa kaulahian.
22Ayaw panimalos. Salig lang sa Ginoo,
ug tabangan ka niya.
23Ginakangil-aran sa Ginoo ang mga tawong nanglimbong sa timbangan.
Dili kana maayo nga buhat.
24Ang Ginoo maoy nagbuot sa atong kinabuhi,
busa dili nato mahibaloan ang atong kapalaran.#20:24 dili nato mahibaloan ang atong kapalaran: o dili gayod nato matugkad ang mga nahitabo kanato.
25Makuyaw ang pagdali-dali ug saad nga imong ihalad ang usa ka butang ngadto sa Ginoo.
Kinahanglang huna-hunaon mo una kini sa dili ka pa mosaad.
26Kon mohukom ang maalamon nga hari,
sigurohon gayod niya kon kinsay naghimo ug daotan,
ug silotan niya kini.
27Ang atong konsensya o huna-huna#20:27 konsensya o huna-huna: o espiritu.
gamiton sa Ginoo sa paglamdag sa atong kinabuhi
aron masusi nato ang atong pagkatawo.
28Kon buotan ug matinud-anon ang usa ka hari,
walay daotang mahitabo kaniya ug molungtad ang iyang paghari.
29Garbo sa mga batan-on ang ilang kusog,
ug dungog sa mga tigulang ang ilang katigulangon.#20:29 katigulangon: sa literal, uban.
30Usahay maayo nga masilotan kita
aron magbag-o kita.
Currently Selected:
Mga Panultihon 20: APD
Highlight
Share
Copy
Want to have your highlights saved across all your devices? Sign up or sign in
Ang Pulong sa Dios™, APD™
Katungod sa pagmantala © 2009, 2010, 2014, 2024 Biblica, Inc.
Gigamit pinaagi sa pagtugot. Tanan nga mga katungod gitagana sa tibuok kalibotan.
Cebuano Contemporary Bible™, APD™
Copyright © 2009, 2010, 2014, 2024 by Biblica, Inc.
Used with permission. All rights reserved worldwide.
