GENESIS 16

Si Hagar asin si Ismael

1Dai nagkaaki si Abram ki Sarai na saiyang agom. Alagad igwa si Sarai nin sarong babaeng oripon na taga Egipto na an ngaran Hagar. 2Kaya sinabihan ni Sarai si Abram, “Dai itinugot nin Kagurangnan na mag-aki ako, alagad uya an sakong babaeng oripon; dorogan mo siya asin tibaad magkaigwa ako nin aki huli saiya.” Nag-oyon si Abram sa sinabi ni Sarai. 3Kaya itinao ni Sarai si Hagar ki Abram bilang kasaroan. (Sampolong taon nang nag-erok si Abram sa Canaan kan nangyari ini.) 4Dinorogan ni Abram si Hagar asin nagbados ini. Kan maaraman niyang bados siya, ipinaghambog niya ini asin pinag-olog-olog niya si Sarai.

5Huli kaini, sinabihan ni Sarai si Abram, “Sala mo kun tano ta pinag-oolog-olog ako ni Hagar.#5 Sala mo…Hagar; o Magtios ka logod huli kan sala na ginibo sako. Itinao ko siya saimo, alagad poon kan maaraman niyang bados siya, pinag-olog-olog na niya ako. Hukoman logod nin Kagurangnan kun siisay sato an tama, ika o ako!”

6Nagsimbag si Abram, “Sakop mo an saimong oripon; giboha saiya an gusto mo.” Dangan pinasakitan ni Sarai an saiyang oripon kaya nagdulag ini.

7Sinabat si Hagar kan anghel nin Kagurangnan sa may burabod sa kalangtadan, sa dalan pasiring sa Sur. 8Hinapot siya kan anghel, “Hagar, oripon ni Sarai, saen ka hale asin saen ka maduman?”

Nagsimbag siya, “Nagdudulag ako ki Sarai na sakong kagurangnan.”

9“Bumalik ka,” an sabi kan anghel, “asin paglingkodan mo siya.” 10Nagsabi pa an anghel, “Papadakulon ko nin marahay an saimong mga kapagarakian kaya mayo nin makakabilang sainda. 11Bados ka, asin mangangaki nin lalaki; aapodon mo siyang Ismael,#11 ISMAEL: Sa Hebreyo, an ngaran na ini nangangahulogan Nagdadangog an Dios. huli ta dinangog nin Kagurangnan an saimong agrangay. 12Alagad mamumuhay siya siring sa sarong lalaw na asno; magigin kalaban niya an gabos asin an gabos magigin kalaban siya. Mag-eerok siyang harayo sa saiyang mga kadugo.”

13Nagsaboot si Hagar, “Totoo daw na nahiling ko an Dios asin nabuhay pa ako pakatapos?” Kaya an Kagurangnan na nagtaram saiya inapod niyang, “Sarong Dios na Naghihiling.” 14Kaya poon kaidto, an bubon duman sa pagultanan kan Kades asin Bered inapod, “Beer-lahai-roi.”#14 BEER-LAHAI-ROI: An tataramon na ini nangangahulogan An Bubon kan Buhay na Dios na Naghihiling Sako.

15Nangaki si Hagar nin sarong lalaki asin Ismael an inginaran saiya ni Abram na saiyang ama. 16Otsenta y seis na an edad ni Abram kan ipangaki ni Hagar si Ismael.

Currently Selected:

GENESIS 16: BPV

Highlight

Copy