Mak, echî 3

Jisos a yîm nne nnyo á maŋá ékpoê-obhô a sôn

(Mat 12.9-14; Luk 6.6-11)

1Jisos a mághe mân áfo a jî gyê ka óchâm Obhasi ane Jus. Nne yót nnyo obhô ó kpóe yê a ri áfo. 2Ane mba tat á rî áfo mba á wóma á nyére Jisos nchot sê a yîm ejûm ebhí. Á kîk amə̂t á kebha yê nyamḿ ájoé tîk a yîm nne nnyó a sôn ka ofú oyoá-biji. 3Jisos a bhîŋ nne emaŋé nnyó se a fáp a bhá. 4A bhə̂p mân ane mbá se, “Ebhín ejə́ré é tóe se é yîm jen ka ofú oyoá-biji? É yîm ono kən obhí, é nyáŋé ekpin í nne kən é bhíbhí obhíbhí?”

Ane mbá á ká tame yê kpe nchot. 5É yâm Jisos ka ḿbə́ŋé kpe-eji. A yûŋ amə̂t a kêp ábho a fáre, kən nsôn a yîm yê kpe-eji na ekpatə́m osoná-echî ábho. A kpíghi mân achot mbâ nne-emaŋé nnyó se, “Nyabhê obhô obhâ.” A nyábhe fə́ne, obhô ó sôn.

6Ebhú a yimî nne nnyó a sôn, ane echəme Farasi mbá á mághe á jî bhôp ekubhi ka ngyím ányi na etʉ̂ ane Erot ekpak á kí yui yê.

Ekam ane é tôp Jisos

7Jisos na atóbhá abhê a mághe áfo á jak ka mkpe aya Gariri. Ane etî-etî á tôp yê á jak. Mba tat á dʉ̂ ka ebhat í Gariri, 8etʉ̂ ebhat í Judiya. Ane eték í Jerusarem na ebhat Idomeya á rî ka ekam áji. Ane ebhat í njəm aya, ngûm i Jodan, na Taya na Sidon á rî eróŋ. Ane mbá fép á bhâk áno mbâ Jisos, ka á yuk iyîm mbi Jisos á yimá. 9Ekam ane é kpô tí é chîŋ ta Jisos a sə́re atóbhá abhê se á wóm mmon okpi yê a gyé, ane á kâ yúi yê. 10Ta a yîm kpá ane emaŋé etî-etî á son. Ka obhô mbí, ane emaŋé á kə̂t á choa, á wóm mbá á sí á kə́me yê.#Mak 4.1; Luk 5.1-3. 11Kpe fan a jiî, ane mba ojê ó kára oseŋe, á yen yê á kí gbo yê ka akát, á kugha sê, “We a ri Mmon Obhasi.” 12Kən Jisos a kí tʉ ábho obhô ka otûŋ se á kâ yîm ane á mə́ŋe ekpak í nne nnyo yê a ri.

Jisos a sâŋ ágbán abhê ófó na ábháe

(Mat 10.1-4; Luk 6.12-16)

13Jisos a jak a jî gyʉ̂t ka ósô egúí, a bhîŋ ane mba yê a wóme. Nji a bhiŋî ane á bhak, 14a sâŋ ábho ófó na ábháe, se ágbán abhê. A sə́re ábho se, “Ń saŋ ên bəre ó kúmi ên na mme. Tîk n túmá ên ka esə́rə́m otîp ogyebhá-ḿbə́ŋé Obhasi. 15Tîk n káre ên ikom mfi o kí bhim ên ojê mbi ó kára ane oseŋe.”

16Ḿfa nâ obhiŋ ágbán mba yê a sáŋe: Simun nnyo Jisos a karê mbiŋ se Pita, 17abhon í Sebedi ábháe mba á káma sê Jems na Jon. A bhîŋ ábho se Boyanejes, nâ é fap se Abhon í Nsân. 18Mba ngá a ri, Andru na Firip na Batromiyu na Matiyu na Tomas na Jems nnyo mmon Afiyus na Dadiyus na Simun etat fə́ne nnyo kpe ekʉ̂ a kâm ka okot eték ejê, 19na Juda Iskariyot nnyo a gurî Jisos.

Obhasi Ebhare Ntʉgantʉ nâ a karê Jisos ikom, Besebup asík

(Mat 12.22-32; Luk 11.14-23; Luk 12.10)

20Nji a sáŋe ágbán abhê a kʉ́rá, ekam ane é bhak é bhâ chúi kpe ekpak nji yê na ane abhê á kí di iyîm cháŋ ocháŋ. 21Ane ndə́p-i-njû abhê á yúgha achot mma ane á chóra na yê, á jak sê á jí kó yê a bhá ka njû, ka ane á kí chot sê Jisos a kí gbe ekí.

22Etʉ̂ atóŋá-ebhín mba á dʉ̂ Jerusarem sê a ri Satan nnyo á bhíŋa sê Besebup nâ á noghá yê a karê yê ikom kən a kí yighí ojê ka ḿbə́ŋé ane.#Mat 9.34; 10.25.

23Nji Jisos a yúghi achot mmá, a bhîŋ ábho a chôt ka ngan. A bhə̂p ábho se, “Ta ó kam ên sê Satan kə́n a bê Satan a? 24Eték nji é joé ka áfírí, ebhat jə́t é noghá na nji tat, eték áji é kí chat. 25Ndə́p-i-njû nnyi á joé ka áfírí, á noghá na atem, a kí chat. 26Ka ekpak njí, ájoé otúi Satan ó kirí ka ngûm ka ngûm, otúi ábhi ó kí chat, ó mân fə́ne.

27“Nâ məŋê ên mân sê, kpe nne yót cháŋ nnyo a kí wa njû mgban a gyê a jʉ̂ iyîm ibhê nji á ka raŋ mbá kpá a fi yê a bhóp.

28“Deê ń sə́ré ên mân bəre ka égyé sê tîk Obhasi a rî nsôn a sû chénchén obhí ane ka echoróm na eyimím, 29kən kpe énê nnyo á chot ejûm ebhí a kpê na Obhasi Ebhare Ntʉgantʉ, a yîm obhí mbi ta na nyâ na nyâ. Obhasi á bhó ri nne nsôn na ntʉ́ghi obhí mbí.”#Luk 12.10. 30Jisos a chôt áno ka etʉ̂ ábho ta á kí səre sê ojê ó kí karé yê oseŋe.

Nnyen na abhon-í-nnyen í Jisos

(Mat 12.46-50; Luk 8.19-21)

31Mkpât ebhú, nnyen i Jisos na abhon-í-nnyen abhê á bhak áfo, á gyími ka éré, á tûm nne a bhiŋ Jisos a karé ábho. 32Ane etî-etî mba á kûn áfo na Jisos sê, “Kép nnyen owa na abhon-í-nnyen abhâ, á kí not wâ ka éré.”

33Kən yê a bhə̂p se, “Nnyón nâ ó bhiŋá ên sê nnyen omé, abhon-í-nnyen abhámé nâ mbán.” 34A kêp mân ane mba á kûn áfo a fáre, a chôt se, “Yên ên ane mba á rî anyen abhámé na abhon-í-nnyen abhámé. 35Nne kpe nnyón nnyo á yimá ka ekpak nji Obhasi á woma, ntʉ́ghi nne ányo a ri mmon-i-nnyen omé na nnyen.”

Currently Selected:

Mak, echî 3: ETUNT

Highlight

Copy