Matiyu, echî 27

Á ko Jisos á bha ka ochî Piratus

(Mak 15.1; Luk 23.1-2; Jon 18.28-32)

1Na ofú-ofú, chénchén ane-echî akará-agore Obhasi na ane-akúí eték, á kúbhi sê á yúí Jisos. 2Á bhôp yê na mkpokobhé, á kô á jak mbâ Piratus. Piratus a ri ntûfâm eték.

Juda a kpô

(Etûm 1.18-19)

3Kən nji Juda nnyo a gurî Jisos a kpô yén se á kam sê á yúí Jisos, nsôn a fî yê ka obhí obhê. A kô abhon iyîm mbá esam njəm ófó nâ ntí mmi á káre yê ka echî Jisos, a jí chəbhé njəm a karé mbâ ntûfâm akará-agore Obhasi na ane-akúí eték. A sə́re ábho se, 4“Ń yim obhí nji n kamê n gúri nne nnyo kpe ejûm á ka yim ta á kam sê á yúí yê.”#Etûm 1.18-19.

Kən á táme yê sê, “Ágo nâ achot amâ, nji é fóghe êt cháŋ.”

5Juda a kô ntí mmí a jî tûp áfo ka nsi ka etím ókʉ́rí achot Obhasi a mághe a jak a jî súni. 6Ane-echî akará-agore Obhasi á bhâ bhûp ntí mmí sê, “Ḿfa a ri ntí agyʉ́ŋ, ebhín ejə́ré é chóre sê ntí agyʉ́ŋ á kâ kâk ka eji ntí achot Obhasi.” 7Á kúbhi á kâm, á kô ntí mmí á nâm eji nsi ka eji nne nnyo a kí tʉrí abhí sê á kə́na ajéné mba á kpo. 8Nâ ńjə́ne ta é si égyé, eji nsi áji á kət á bhiŋá sê nsi agyʉ́ŋ. 9É fap fə́ne ka ekpak nji nkara-otîp Obhasi nnyo á kamá se Jeremaya a chorê se, “Á kô abhon iyîm esam njəm ófó nâ ntí mmi ane Isrel á káme ka echî ejê, 10á nâm eji nsi ka eji ntʉra-abhí ka ekpak nji Ńtâ Obhasi a sə́re ə̂m.”#Sak 11.12-13.

Piratus a kí gbəné Jisos bibhə̂p

(Mak 15.2-5; Luk 23.3-5; Jon 18.33-38)

11Nji á kóe Jisos á bhak ka ochî ntûfâm nnyo a fiî ikom eték, ntûfâm nnyó a bhə̂p yê se, “We nâ o ri ntûfâm ane Jus a?”

Jisos se, “Nn̂, é rî ka ekpak o chorê.” 12Kən kpe ejûm Jisos á ka támé ka achot mma ane-echî akará-agore Obhasi na ane-akúí eték á nyéra yê.

13Piratus a kpô chot na yê se, “O yúghá achot fép mma á chóra áno sê ó yim a?”

14Kən Jisos á ka támé kpe nchot. É mân kpá ntûfâm nnyó biji kpe-eji.

Piratus a nyáŋe Jisos a káre se á yúí

(Mak 15.6-15; Luk 23.13-25; Jon 18.39—19.16)

15Eyâ kpe njə́n ka ebhú Erom í Ntə̂m Osʉ́ŋ, ntûfâm eték a kí yighí nne yót ka ókúmí nnyo ane eték á wóme. 16Nne yót a ri ka ókúmí ebhú áji, a kamá se Barabas, nnyo kpe énê a mə́ŋe se á yimá obhí.

17Ebhú ane á chə́me, Piratus a bhə̂p ábho se, “Barabas kən Jisos nâ o wóme ên se ń yíghi ka ókúmí? Jisos nnyó á kamá se Krayis, nne nnyo Obhasi a túmi se a yim ngun á sém.” 18Ntûfâm ngá a mə́ŋe se Jisos kpe ejûm á ka yim. Á fíi yê ka é kí yam ábho nji ane etî-etî á tóbha yê.

19Nji ntûfâm i Piratus á taŋá nchot nnyí, nkáé owe a tûm ane na otîp se, “Sə́re ên ndûm omé a yighí obhô ka nchot ányi, ka nne ányo á ka mom. Nan? Ń yen oseŋe kpe-eji ḿ kpe na nne ányo ka ndem na atʉ́.”

20Ane-echî akará-agore Obhasi na ane-akúí eték á chóe ekam ane nji é rî nná áfo á bhə́p Piratus a yighí Barabas ka ókúmí a karé ikom á yúí Jisos.

21Kən Piratus a bhə̂p ábho se, “Ka ane mbá ábháe, ó woma ên sê ń yíghi nnyón?”

Á táme sê, “Barabas.”

22A kpô bhə́p ábho se, “O kí wom ên mân sê ń yîm nan na Jisos nnyo á kamá se Krayis, nne nnyo Obhasi a túmi se a yim ngun á sém?”

Á táme chénchén sê, “Kûm yê ka ego.”

23Kən Piratus a kpô bhə́p ábho se, “Nne nnyó a yimî bhaghé obhí?”

Kən ekam ane njí á róghe ekughúm na ikom-ikom sê, “Kûm yê ka ego.”

24Piratus a kpô yén se yê á noghá chichi, ebhú tat onyʉk tîk ó gbô. A kô ayép, a sû abhô ka ochî ane chénchén, a sə́re ábho se, “Mme obhô obhámé cháŋ ka ekʉ̂ nne nnyó, a ri ên nâ o məŋê ên.”#Otira 21.6-9.

25Kən ekam ane njí ndə́m á táme sê, “Á yui yê, deê agyʉ́ŋ amê á jóe êt na abhon abhə́ré ka echî.”

26Piratus a bhâ yíghi Barabas ka ókúmí. A káre ikom se á tə̂m Jisos á kó á jí kúm ka ego.

Ane-enok á kí kak Jisos ntuŋ

(Mak 15.16-20; Jon 19.2-3)

27Ane-enok í Piratus á kô mân Jisos á gyê óchâm etat ka ókʉ́rí mbí, á fáre yê á kâk. Nsam ábho a chíŋi kpe érôn. 28Á jûk ḿfô eye ka biji, á kâk yê nnyi tat noŋ nnyi ntûfâm. 29Á tʉ́ri itam ajoŋe-ájóŋe á kə́bhe yê, á káre yê esáŋ a fî ka obhô-orûm. Á tə̂m mân arúŋ ka ochî obhê, á róghe yê ntuŋ ekaghám sê, “E kí kup wâ, Ntûfâm ane Jus!” 30Á chôk yê na ason ka biji, á tábhe ítí mfi á káre yê nná á bhúra yê ka echî. 31Á kpó to á mân yê ntuŋ ekaghám, á yíghi énoê ḿfô nnyi á kághe nná yê á chə́bhe njəm á kâk yê eye. Á kô yê mân á kí ji á jí kúm ka ego.

Á kum Jisos ka ego

(Mak 15.21-32; Luk 23.26-43; Jon 19.17-27)

32Nji á kí jen á jak, á kpúghi nne Sirin yót ka mbá nnyo á kamá se Simun. Á fî yê ka ikom, á tábhe ego njí mbâ Jisos, á káre yê sê a kə́n. 33Á jên ta á sî eji etat nji á bhíŋa sê Gogota, nâ se Ékə́p-Echî. 34Á káre Jisos aməm mma á nyóbhe ejûm etat é yua chík sê a gwó. A kô a yúŋi, kən á ka kam egwóóm.#Nkôn 69.22.

35Á kûm yê ka ego. Á kô ḿfô eye á tûp ebháŋé sê á mə́ŋe ekpak nji á kí kirí ńnyə́ne.#Nkôn 22.19. 36Nji á kíri ḿfô eye nnyí, á kúmi mân áfo á bhabha yê. 37Njəm-ósô ego nji á kúmi yê, á sêŋ ejûm nji a yimî kən á kûm yê. Á séŋe sê, “Ḿfa a ri Jisos, ntûfâm ane Jus.” 38Á kûm fə́ne anyághá-ajʉ̂ ábháe ka mbi ábho bigo. Yót á tə̂p mkpe obhô-orûm í Jisos, nnyo tat mkpe obhô-okáé.

39Achíŋá-mbá mba á síi áfo, á mêk ka echî, á kí tu Jisos sê,#Nkôn 22.8; 109.25. 40“O sə́re se we o kí bhibhi ókʉ́rí achot Obhasi, o gbê mbi fê ka mfín ésá, sém máná ájoé we a ri Mmon Obhasi ka etʉri. Bhət ka ego áji, sî nsi.”#Mat 26.61; Jon 2.19.

41Ane-echî akará-agore Obhasi na atóŋá-ebhín na ane-akúí eték á gyê yê fə́ne ntuŋ ekaghám sê, 42“A yîm ane etat á sem, kən biji ibhê á ká bhik oyim. To yê a ri ntûfâm ane Isrel. Deê a bhət a sí nsi nnyí, tîk e kâm mân na yê. 43Yê a kíi ḿbə́ŋé na Obhasi, a sə́rá se yê a ri Mmon Obhasi, é yén kpá ájoé Obhasi tîk a yíghi yê ka ego njí.”#Nkôn 22.9.

44Kpe anyághá-ajʉ̂ mba á kúmi nná fə́ne, á gyê yê etúúm eróŋ.

Jisos a kpô ka ego

(Mak 15.33-41; Luk 23.44-49; Jon 19.28-30)

45Nji ńkánínká a síi ófó na ébháe nnyi nchên, njúí a tân. Ejírim é bhúi eték ndə́m tata a sî ésá nnyi egu. 46Ńkánínká ésá a kpo to a sí, Jisos a kûk káŋ káŋ káŋ se, “Erayi! Erayi! lámá sabatani?” Nâ é fap se, “Obhasi omé! Obhasi omé! O jiŋî ə̂m jen?”#Nkôn 22.2.

47Etʉ̂ ane mba á gyím áfo á kpó to á yúk, á kí səre sê, “Yûk nne nnyó a kí bhiŋ Erayija.” 48Ka ngyím ányi, nne yót a bhéne a jî kô égúsá a bhî ka ekâ aməm, a bhôp ka echî étí, a tóne ágo se Jisos a gwó.#Nkôn 69.22. 49Kən atem sê, “Chik kpá é yén ájoé Erayija a kə́ bha a bhá yim yê a sém.”

50Jisos a kpô kúk, a sére. 51Nji a sére, íkpéghé mfi á bhúi ka nnyo-mbá ókʉ́rí achot Obhasi í yâ mbat ébháe é róghé ka ósô ta o sî esə́n. Nsi a nyíŋi, akpatə́m atáé á jogha.#Ane 26.31-33. 52Ayəm á rə́bhe, ane Obhasi etî-etî mba á kpóe ta éməné, á chə́bhe njəm á nyə́me. 53Ebhú Jisos a kpô chəbhé njəm ka ekpin, ane Obhasi mbá á chə̂m á jak na yê ka eték achot Obhasi,#27.53 Eték achot Obhasi: A ri Jerusarem. ane á yên ábho.

54Ntûfâm ane-enok na ane abhê mba á rî áfo á bhabha Jisos, á kpó yen nsi a nyíŋi, a yên fə́ne iyîm mbi í fábhe, efup é gyê ábho á kâm mân sê, “Ka etʉri, ńgyê Mmon Obhasi.”

55Ane-akáé á rî etî-etî áfo á gyím nyáŋé-nyáŋé á yena achot mma á fábhe. Ane-akáé mba nâ mba á bháe na Jisos nnyi Gariri, á kaghá yê obhô. 56Ka ane-akáé mbá, Meri nnyo Madarin a ri, Meri nnyo nnyen i Jems na Jusep a ri, na nnyen abhon í Sebedi.#Luk 8.2-3.

Á kən Jisos

(Mak 15.42-47; Luk 23.50-56; Jon 19.38-42)

57Nji egu é síi, nne nyúp yót, a dʉ eték Aramatiya, a kamá se Jusep, a bhák. Nne nnyó ka biji ibhê a ri ntóbhá Jisos. 58A yə̂p a jak mbâ Piratus, a sə́re yê se a karé yê ékpoê biji Jisos yê a jí kən. Piratus fə́ne a káre ikom se á yíghi Jisos ka ego á káre mbâ Jusep. 59Jusep a kô Jisos a bhôp ka ébháré-éfô mfê-mfê, 60a jî núŋi yê ka oyəm mbi fê mbi yê a sə́me ka eránám. A chóe mân ekpatə́m í ntáé a bhúi ka nnyo oyəm, a jak. 61Meri Madarin na Meri nnyo tat á kûn áfo, á kébhe oyəm ábhi.

Á ki ane sê á bhábhé oyəm í Jisos

62Ntem-ofú, egu ofú oyoá-biji é chiŋ, ane-echî akará-agore Obhasi na ane Jus mbâ echəme Farasi á jak mbâ Piratus. 63Á sə́re yê sê, “Ntûfâm, é tit sê ebhú nne-áfúbhí ányo a nyə́ne ka ekpin, a sə́re ane se yê á kpo a kâ mfín ésá, yê a kí chəbhé njəm ka ekpin.#Mat 16.21; 17.23; 20.19; Mak 8.31; 9.31; 10.33-34; Luk 9.22; 18.31-33. 64E kí wom kə́n ó kâk ane á jí bhábhé oyəm obhê ta mfín ányi ésá a sí. Áno asík, tîk atóbhá abhê á bhâ chîŋ á jʉ̂ yê á yíghi, á sə́ré ane sê a chə́bhe njəm ka ekpin. Áfúbhí mmá tîk á bhîp mân á chíŋi mma ndaŋa-mbá.”

65Piratus a kâm na ábho a sə́re ábho se, “Kô ên ane, choŋ obhábhé ên oyəm obhê ka ekpak o kére ên.” 66Ane mbá á jak mân á jî kô ejûm á kûm ka ntáé nnyi a ri nná ka nnyo-mbá oyəm. Á mághe mân ane áfo sê á bhábhé ḿbə́ne.

Currently Selected:

Matiyu, echî 27: ETUNT

Highlight

Copy