Luk, echî 4

Satan a bhâ gáe Jisos

(Mat 4.1-11; Mak 1.12-13)

1Nji Jisos a jiî ejen nnyi Jodan a kí kʉri, Obhasi Ebhare Ntʉgantʉ a súi yê biji, a kô yê a jak ka etə́m. 2Jisos a kâ ágo ka etə́m nsam i mfín ébháe, Satan a gaá yê. Jisos á ka dí kpe ejûm ka mfín nnyí fép. Kən ka ejeghé ofú, njaé a fî yê.

3Satan a sə́re yê se, “Ájoé we a ri Mmon Obhasi, yim ntáé nnyí a kpíghí édî, ó kó ó dí.”

4Kən Jisos a táme yê se, “Á séŋe sê, ‘Édî asík átíŋ nâ é kára nne ekpin.’ ”#Otira 8.3.

5Satan a kô mân yê a gyʉ̂t, a jî tóŋe yê nték i ngun chénchén ka ngyím ányi. 6A sə́re yê se, “Á kare otúi nték nnyí chénchén na ekpatə́m ono ábho ka obhô obhámé. Kə́n n káre kpe énê nnyo n korê. 7Ájoé ó təm arúŋ ka nsi o jíghi ə̂m, tîk n káre wâ.”

8Kən Jisos a táme yê se, “Á séŋe sê, ‘Jíghi Ńtâ Obhasi nnyo a fonê wâ. Tʉ̂k yê átíŋ.’ ”#Otira 6.13.

9Satan a kô mân yê a jak ka Jerusarem. Á gyʉ̂t á gyími ta ka ńchí ókʉ́rí achot Obhasi. A sə́re Jisos se, “Ájoé we a ri Mmon Obhasi, nyə̂p gbo ágo ka nsi, 10ka á séŋe sê,

‘Tîk Obhasi a káre wâ ka obhô baénjel abhê

á bhábhé wâ.#Nkôn 91.11.

11Á kí fi wâ ka abhô ka abhô

ó bhó kam kpe ekát ejâ é súm ka ntáé yə́t.’ ”#Nkôn 91.12.

12Jisos a táme se, “Á séŋe sê, ‘Deê o kâ gáe Ńtâ Obhasi nnyo a fonê wâ.’ ”#Otira 6.16.

13Nji Satan a gáe Jisos ka mkpak a mân á ka fi, a mághe yê kpá.

Jisos a róghe etûm ejê ka Gariri

(Mat 4.12-17; Mak 1.14-15)

14Jisos a chə́bhe mân njəm nnyi Gariri na ikom Obhasi Ebhare Ntʉgantʉ ka biji. Esə́re ejê é jên é jábhe nték chénchén ebhat áji. 15A jená ka nték ka nték a kpík ane ka óchâm Obhasi. Ane chénchén á kará yê nkat.

Á ká ko Jisos sê nâ nne ka eték ejê Nasaret

(Mat 13.53-58; Mak 6.1-6)

16Jisos a yə̂p a jak Nasaret, nâ eték nji á gyée yê. Ka ofú oyoá-biji, a jî gyê ka óchâm Obhasi. Nâ ekpin nji yê á yimá. A gyími se a bhiŋ esə́re Obhasi. 17Á káre yê nwet nnyi nkara-otîp nnyo á kamá se Asaya a séŋe. A rə́bhe ka eji nji á séŋe sê,

18“Ntʉgantʉ Ńtâ Obhasi a ri ə̂m ka biji,

ka a sáŋe ə̂m

se ń jên ń sə́ré otîp ogyebhá-ḿbə́ŋé

mbâ akpák ane.

A tûm ə̂m se ḿ bá sə́ré ane

mba á rî ka osʉ́ŋ kpe mbə́n

se tîk á yíghi ábho,

n sə́re fə́ne atáná-amə̂t

se tîk á kpô yén mbá.

A túmi ə̂m fə́ne se ḿ bá yíghi ane

mba atem-ane á kára oseŋe,

ka oseŋe mbí,

19ḿ bá yîm ane á mə́ŋe

sê eyâ nchane é si nji Ńtâ Obhasi

a kí toŋe onobhá-eji mbâ ane abhê.”#Asa 61.1-2.

20Nji Jisos a jeghê ebhiŋím nwet nnyí, a bhúi, a fê mbâ nne nnyo a karê yê a jî wôm eji a kúmi okumí. Ane chénchén mba á rî áfo á yûŋ amə̂t á kî yê ka biji. 21A róghe echoróm na ábho se, “Esə́re nji m biŋî mfá o yûk ên, yên ńjə́ne é fap fə́ne égyé ka ekpak á séŋe.”

22Kpe énê nnyo a ri áfo a kâm se Jisos a ri nne. É kpô ábho biji kpe-eji na ntʉ́ghi énoê nchot nnyi a fábhe yê ka nnyo. Á kí bhəp sê, “Mmon i Jusep nnyó nná asík a?”

23Jisos a táme ábho se, “Ḿ məŋe bəre tîk o chôt ên na mme ka ngan sê, ‘We nnyo ó yimá ane bimaŋé á soná, yim kpá biji ibhâ ó son.’ Tîk o sə́re ên ə̂m fə́ne sê, ‘Iyîm mbi e yúghi nná sê ó yimá ka Kapanom, yim fə́ne eróŋ mfá ka eték ejâ.’ ”

24A kpô kpe se, “Deê ń sə́ré ên bəre nkara-otîp Obhasi kpe yót nnyo ane abhê á jígha yê cháŋ.#Jon 4.44. 25Yûk ên nji n kí chot. Ka etʉri, ebhú nkara-otîp nnyo á kamá se Erayija a nyə́ne, ane-akáé ekə́t á tî kpe-eji ka eték Isrel. Ka ebhú njí fə́ne mbúta á ka na ka nyâ ésá na ebhát, njaé fə́ne a bhə̂t ka ebhat njí ndə́m.#1 Atúi 17.1. 26Kən kpe noŋ ane-akáé ekə́t á tíi ka Isrel, Obhasi á ka túm Erayija a bhá nyaŋe kpe yót, é ká chiŋi təm nnyo a ri ka eték í Serapat ka ebhat í Sidon.#1 Atúi 17.8-16. 27Ka ebhú nkara-otîp nnyo tat fə́ne nnyo á kamá se Erayisa a ri, amaŋá-ofunum á rî etî-etî ka eték Isrel. Kən kpe yót Erayisa á ka nyáŋé a chəbhé njəm a gyé ekam ane, é ká chiŋi nne eték í Siriya yót nnyo á kamá se Naman.”#2 Atúi 5.1-14.

28Nji Jisos a chorê nchot nnyí, ane mba á rî ka etím óchâm mbí á fôn ekpatə́m oyámá-ḿbə́ŋé na yê. 29Á fî yê á tʉ̂ á jak ta á mághe eték, á sî eji ókímánkí ka egúí nji á gbée eték ábho sê á fə̂m. 30Kən a jên a chîŋ ábho ka ekam a jak eye mbá, nne nnyo a kpô fon obhô a fi yê cháŋ.

Jisos a yíghi ojê ka ḿbə́ŋé nne

(Mak 1.21-28)

31Jisos a jak mân ka eték nji tat ebhat í Gariri nji á bhíŋa sê Kapanom. Ka ofú oyoá-biji, a jî gyê ka óchâm Obhasi, a róghe ane ekpíím. 32Biji í kpo ábho na okpígha-ejûm obhê, ka a kí kpi na onyen-ane.#Mat 7.28-29.

33Nne yót a ri ka etím óchâm mbí nnyo ojê ó kára yê oseŋe. Nne nnyó a kûk káŋ káŋ káŋ se, 34“Jisos, mmon i Nasaret, ó woma jen na êt eé! O bháe ó bhá yúí êt tîk. Ḿ məŋe nne nnyo we o ri. We a ri Obhô-orûm Obhasi.”

35Kən Jisos a nyân ojê mbí se, “Maghê ejok ejâ áfo! Fáp ka biji nne-ndûm ane!” Nji Jisos a nyáne áno, ojê mbí ó yîm nne nnyó a gbô áfo ka nsi ka ochî ábho. Ó fabha kpe énéme jə́t ó ká maghé ka biji nne-ndûm nnyó.

36É kpô ane biji kpe-eji, á kə̂t á bhəbha atem sê, “Bhaghé okpígha-ejûm nná? Nne nnyó a kô ikom í ńgyímí eye a kí nyan ojê ó fabha ane ka ḿbə́ŋé.” 37Esə́re Jisos é jên é jábhe chénchén ebhat áji.

Jisos a yîm ane etî-etî á son

(Mat 8.14-17; Mak 1.29-34)

38Jisos a mághe mân óchâm Obhasi mbí a jak ka njû Simun. Nji a síi njû, nnyen-i-nkáé Simun a nuŋ a maŋá omaŋé, mô egyʉk a ri yê ka biji. Ane á góre Jisos sê a nyáŋé nne-nkáé nnyó. 39Jisos a jak a jî gyími ka mkpe enuŋ nnyí a nyân egyʉk se é mân. Egyʉk njí fə́ne é mân. Nne-nkáé nnyó a rúi ngyím ntə̂m yə́t a jî kô édî a bhâ gyê ábho.

40Ebhú njúí a kí tan, ane á kô chénchén atem mba á máŋa bimaŋé ka mkpak ka mkpak, á bhak mbâ Jisos. Jisos a kí kuní obhô obhê ka biji kpe nnyón nne nnyo á maŋá, a yîm yê a sôn. 41Mba ojê ó kára ábho oseŋe, a bhîm a yíghi. A ri kən ó mághe, ó rî ó kúk ane á yúk sê Jisos a ri Mmon Obhasi.

Kən Jisos a kí nyan ojê mbí ó kâ kpô chot kpe ejûm, ka ó məŋe sê yê a ri Krayis, nne nnyo Obhasi a túmi se a bhá yim ngun á sém.#4.41 Ane Grik á bhíŋa nne nnyo Obhasi a túmi se a bhá yim ngun á sém sê Krayis. Ane Ibru á bhíŋa se Mesaya.

Jisos a kí jen a fará nték a sə́rá otîp ogyebhá-ḿbə́ŋé

(Mak 1.35-39)

42Nji ofú ó chée, Jisos a mághe eték, a jî wôm eji a jóe yê átíŋ, kən ane á gyê yê ewómóm. Nji á tíi yê, á ká kpo kam sê a maghé ábho. 43Kən a sə́re ane se, “N di ń sə́ré otîp ogyebhá-ḿbə́ŋé mbi otúi Obhasi ka nték etat eróŋ, ka nâ etûm nji Obhasi a túmi ə̂m se ḿ bá yîm.”

44A mághe mân a jená a fará nték i Judiya, a sə́rá ane otîp ogyebhá-ḿbə́ŋé ka óchâm Obhasi.

Currently Selected:

Luk, echî 4: ETUNT

Highlight

Copy