Luk, echî 21

Ekəp í ḿbə́ŋé nne-nkáé ekə́t

(Mak 12.41-44)

1Jisos a kêp a fáre a yên ekpak nji ane ayúp á kágha ntí ka nkop i ntí ka ókʉ́rí achot Obhasi. 2A yên fə́ne noŋ nne-nkáé ekə́t yót na okpák obhê a túbhi áfu ábháe. 3Nji nne-nkáé nnyó a túbhi ntí mmí, Jisos se, “Deê ń sə́ré ên bəre nne-nkáé ekə́t nnyó na okpák obhê, a tûp ntí ń ti ń chiŋi mmi ane chénchén á túbhi. 4Echî aŋ? Ntí mmi ane mba ngá á kághe ka nkop i ntí nnyí a ri mkpât ka mmi á fóne. Kən yê, ka okpák obhê, a kâk chénchén ntí mmi a fonê ka ekpin ejê.”

Jisos se tîk á bhíbhi ókʉ́rí achot Obhasi

(Mat 24.1-2; Mak 13.1-2)

5Etʉ̂ atóbhá abhê á rî á chorá á kpek na ókʉ́rí achot Obhasi sê énoê atáé na bikəp mbi á káre Obhasi í yim njû nchane a nôp a chíŋi ochíŋ. Kən Jisos se, 6“To ó yen ên iyîm mbí chénchén, ebhú é kə́ bha nji kpe ntáé yə́t á bhó kət mfá ngyím. Á kí rome chénchén á tûp ka nsi.”

Gyími ên akát á sí nsi, kpe ane chénchén á bháne ên

(Mat 24.3-14; Mak 13.3-13)

7Atóbhá Jisos á bhə̂p yê sê, “Ńsé, achot mmá á kí fap bhaghé ebhú? Bhaghé eriŋ nâ é kí yen kən é mə́ŋe sê ebhú é si?”

8Kən Jisos se, “Kó ên ebhú nne a kâ ríri ên. Ane etî-etî tîk á bhak ka mbiŋ amé á səra sê ábho a ri Krayis, nne nnyo Obhasi a túmi se a bhá yim ngun á sém. Sê, ebhú é si. Ka tóp ên ábho. 9Deê efup é kâ yîm ên nji ó yuk ên sê enok é gbo, onyʉk ó fap. Iyîm ábhi fép í fóne efábhám kpá, kən ntə̂m á bhó si ebhú jə́t.”

10A sə́re mân ábho se, “Nték tîk á yə̂m enok na atem, atúi tîk á nôk na atem-atúi. 11Ngun tîk a kə̂t a nyiŋá onyiŋí ka ngûm ka ngûm, njaé na emaŋé eyúp tîk í bhak fə́ne. Biriŋ mbi í chíŋi obhô na iyîm mbi í kára nne ekpatə́m efup tîk í bhak nnyi ósô. 12Kən iyîm mbí fép í bhá fap, tîk á tû ên kpe-eji, á taŋa achot amə́né ka áchâm Obhasi á kaghá ên ka ókúmí. Tîk á fî ên á bhak ka ochî atúi eték ka obhô obhámé. 13Á fi ên áno, nâ ebhú mân o fonê ên ka egyímím atî-isê abhámé. 14Kən nne a kâ fûp se yê á bhak ochot nan kən a sém, 15ka mme ḿfoné tîk n yîm nchot a fábhá ên ka nnyo wát wát. Tîk n káre ên aron mma á kí yim nne-ebhan owəné kpe yót á bhó bhik egyímím a taŋé ejûm nji o kí chot ên.#Luk 12.11-12. 16Ásé abhə́né na abhon-í-nnyen abhə́né na ane abhə́né na atem nâ á kí gbip ên á káre, á yúi etʉ̂. 17Ane chénchén tîk á bhân ên ka obhô obhámé. 18Chénchén mbi tîk í fâp, kən nne owəné á bhó tane kpe ekát í nnyʉ̂ ejê jə́t. 19Ebhú achot mmá á kí fap na ên, gyímí ên akát á sí nsi, ka nâ ekpak nji ó kí yim ên kən ó sém ên.”

Jisos se tîk á bhíbhi eték í Jerusarem

(Mat 24.15-22; Mak 13.14-20)

20“Ebhú ó yen ên ane-enok á fáre Jerusarem á kâk, məŋê ên sê ebhú é si nji á kə́ bha yê obhíbhí. 21Ka ebhú áji, deê ane mba á rî ka ebhat í Judiya á bé á jî ebhat agúí, mba á rî ka mbin, deê á kâ gyê eték. Ane mba á rî ka etím eték, deê á bé eróŋ. 22Echî aŋ? Obhasi a kí kpəré ngun ka mfín nnyí kən nchot nnyi á séŋe ka nwet a joé ka etʉri.#Ose 9.7. 23Tîk é bhîp é chîŋ ka mfín ányi na ane-akáé oya na mba á kí yabhe abhon. Ekpatə́m oseŋe tîk ó bhak ka ngun nnyí, Obhasi tîk a tóŋe oyámá-ḿbə́ŋé obhê mbâ ane mbá. 24Tîk á yúi etʉ̂ ábho na akparanja, á nyáne etʉ̂ ka ojû ókúmí ka nték i ngun chénchén. Ajéné tîk á jóghe Jerusarem, á sə́ne na akát ta ebhú ábho é chîŋ.”

Ebháám nji Mmon Obhasi

(Mat 24.29-31; Mak 13.24-27)

25“Biriŋ tîk í jóe ka njúí, í jóe ka nnyam-ósô na ka ńdʉnândʉ ósô. Ka ngun, chénchén nték tîk á yíghi ḿbə́ŋé á fôn efup na erəmə́m nji aya á kí rəm, na ébhúghí-aya nji é kí joé.#Asa 13.10; Ese 32.7; Jow 2.31; Ndem 6.12-13. 26Nji ane á kí joé á chighá ejûm nji é kí fap ka ngun ndə́m, efup tîk é kêt ábho akôn, ka nkom chénchén ka ósô ń kí yoŋe bibhə̂k ábho. 27Mmon-i-ntem-nne tîk a fâp mân ka ebhú njí, a bhərá a bhák ka átʉ́k í ngurobhú na ikom na ekpatə́m ejík.#Dan 7.13; Ndem 1.7. 28Ebhú iyîm mbí í roghe efábhám, deê ó yûŋ ên amə̂t ó kí sê ebhú é kpiri nji Obhasi a kí yim ên ó sém.”

Okpígha-ejûm ka étí-nkap

(Mat 24.32-35; Mak 13.28-31)

29Jisos a tûp mân egan se, “É kó egaé ka átí etə́m chénchén, títí noŋ kpe étí fîk. 30Ó yen ên ájé ka étí á roghe efə́mə́m, məŋê ên sê enae é kí si. 31Ka ekpak njí eróŋ, ó yen ên iyîm mbí í kí fap, məŋê ên sê ebhú é kpiri nji otúi Obhasi ó kə́ bha. 32Deê ń sə́ré ên bəre kən ane mba á rî nná ka ekpin mfá-mfá á kpó, iyîm mbí fép í fap. 33Ósô na nsi tîk í chîŋ, kən ejámé nji ń chot ka nnyo, é bhó chiŋ bhúghí-bhúghí.”

Joê ên ka ibhábhé

34“Fiî ên biji ibhə́né o kâ kâk ên echî kpe-eji ka íkíkéré ngun nnyí, na énə́mé aməm egwóóm na achot erom edíím. Ó kət ên o yimá ka ekpak njí, ofú ábhi tîk ó kpúghi ên gbantə́m noŋ ntam, 35ka ó bhâk mbâ ane chénchén ka ngun ndə́m. 36Kô ên ebhú, o gorá ên Obhasi chénchén ebhú sê a karé ên ikom, achot mmá á kâ fâp na ên kpát ta o gyími ên ka ochî Mmon-i-ntem-nne.”

37Ka mfín ányi, Jisos a kə̂t a kpík ane achot ka ókʉ́rí achot Obhasi. Na egu a kí maghé a jî kâ ka Egui Orif. 38Kən na ofú-ofú, ane chénchén á kí chəmé ka ókʉ́rí achot Obhasi, á yugha okpígha-ejûm obhê.

Currently Selected:

Luk, echî 21: ETUNT

Highlight

Copy