Etûm ágbán~í jisos, echî Achî nchot mma á rî ka Nwet i Ntûm Ágbán í Jisos
Achî nchot mma á rî ka Nwet i Ntûm Ágbán í Jisos
Luk nâ a séŋe nwet nnyí a kpê na ntûm ágbán í Jisos Krayis. A râŋ kpá mbá a sêŋ Otîp Ogyebhá-ḿbə́ŋé mbi Luk. Nwet nnyí mfá-mfá a kí səre ekpak Ebhare Ntʉgantʉ Obhasi á tʉk ágbán í Jisos mbá, a yimá otîp ogyebhá-ḿbə́ŋé Obhasi ó jabhá ngûm. Ó jábhe ka Jerusarem, ka Judiya ndə́m, ka Samariya, na ka ngun ndə́m ta o sî ntə̂m. Luk a wóme se ane mba á kí bhiŋ nwet eye á mə́ŋe ekpin okot nji atem-abhon-í-nnyen á fóne na atem. Se á mə́ŋe sê ane á kí yam ḿbə́ŋé na ntûm ágbán í Jisos ka ngun. Se á mə́ŋe fə́ne sê ḿbə́ŋé nnyi ágbán í Jisos á kíi a yîm achot Obhasi á jóe noŋ á fóne ka ejóóm.
Nwet nnyí kə́n a jóe ka ńkímí ésá a tóŋe noŋ otîp ogyebhá-ḿbə́ŋé mbi ó kpée na Jisos Krayis ó fáŋa ó jak na ekpak nji nchot echəme atóbhá Jisos é róghe ka ndaŋa-mbá. Eróghá-ndə́p echəme atem-abhon-í-nnyen a ri ka Jerusarem ka ebhú nji Jisos a gyʉ́ri ka ósô. Enyeré a ri ekpak echəme njí é síi nték i Parestayin. Osúí ésá a ri ekpak é jábhe é sî ngun i Mediteraniyan ta o sî Rom.
Mfoné nchot ka nwet nnyí a ri etûm nji Obhasi Ebhare Ntʉgantʉ a yimî. Obhasi Ebhare Ntʉgantʉ a bháe na ekpatə́m ikom mbâ ane mba á kíi ḿbə́ŋé na Jisos Krayis ka Jerusarem. A bháe ka ofú erom í Jus nji á fik ka osúí agəm anígisá nji Jisos a nyəmê ka ekʉ̂. Ebhare Ntʉgantʉ Obhasi nâ a kə́re a bhábhá ane echəme atóbhá Jisos na ane-echî ábho, a kará ábho ikom. Achot fə́ne mma á séŋe ka nwet nnyí á kí toŋe ka ikom otîp mbí. Ikom mfí í rî ka ekpin ane mba á kíi ḿbə́ŋé na Jisos. Í rî fə́ne ka ochəma-biji mbi ó rî ka bichəme atóbhá Jisos.
Nji é rî ka etím í Nwet i Ntûm Ágbán í Jisos
1. Ágbán í Jisos á kí tʉrí biji á jí chot noŋ atî-isê Jisos 1.1-5
2. Ntə́ma-ndə́p ejûm nji Jisos a wóme ágbán abhê á yîm, na nji a chimî ábho. 1.6-11
3. Nne nnyo a kóe eji Judas 1.12-26
4. Ágbán í Jisos á kí chot noŋ atî-isê Jisos Krayis ka Jerusarem 2.1—8.3
5. Ágbán í Jisos á kí chot noŋ atî-isê Jisos Krayis ka Judiya na Samariya 8.4—12.25
6. Etûm i Pol 13.1—28.31
a. Ndaŋa-mbá ejen í Pol noŋ ntem-nne Krayis 13.1—14.28
b. Ekumi nji á fíi ka Jerusarem 15.1-35
c. Osúí ntə̂m ejen ébháe nnyi Pol noŋ ntem-nne Krayis 15.36—18.22
d. Osúí ntə̂m ejen ésá noŋ ntem-nne Krayis 18.23—21.16
e. Pol noŋ nne ókúmí ka Jerusarem, Sesariya na Rom 21.17—28.31
Highlight
Share
Copy
Want to have your highlights saved across all your devices? Sign up or sign in
Ejagham New Testament © Bible Society of Nigeria and Bible Society of Cameroon, 1996.