Etûm ágbán~í jisos, echî 4

Atáŋá-eték á fi Pita na Jon

1Pita na Jon á nyə́ne áfo á səra ane nchot i Jisos. Kən akará-agore Obhasi na nne-echî abhábhá-ókʉ́rí achot Obhasi na ane echəme Sadusi á fə̂n á bhak. 2É yáme ábho ka Pita na Jon á kí sərâ ane sê Jisos a nyə́me ka ekʉ̂. Nâ é toŋe sê nne á kpo, a kí nyəmé ka ekʉ̂. 3Á fî ábho á jî fîn ta ntem-ofú na egu. 4Kən ane etî-etî mba á yúghi okpígha-ejûm mbi Pita, á kâm na ḿbə́ne. Ka ekpak njí, ane mba á kíi ḿbə́ŋé, á chíŋi kpe ntem-esam ntə̂m-ntə̂m ófó na ébháe na ejûm (5,000).

5Ofú ó kpó che, ane-echî na ane-akúí eték na atóŋá-ebhín, á chə́me ka eték í Jerusarem. 6Á jî kpúghi Anas nnyo ntûfâm akará-agore Obhasi na Kayifas na Jon etat na Areksanda na ane mba tat mba ndə́p-i-njû Anas. 7Á kpó chəmé, á yíghi mba Pita á bhak ka ochî ábho. Á bhə̂p ábho sê, “Énê a karê ên ikom kən o yimá ên iyîm mbí? Ka mbiŋ énê nâ ó yimá ên ḿbə́ne?”

8Kən Obhasi Ebhare Ntʉgantʉ a súi Pita ka biji, Pita a táme ábho se, “Atúi-ofâm, ane-akúí ane, yûk ên. 9O kí bhəp ên êt bibhə̂p ka onobhá-eji mbi e yimî e káre mbə́né, ekpak e yimî kən a sôn a? 10Deê ên chénchén na Isrel ndə́m á mə́ŋe sê a ri ikom mfi í rî ka mbiŋ i Jisos Krayis nnyo nne Nasaret nâ í yími nne nnyó a sôn nnyen esonóm ta a gyím áno mfá égyé. A ri Jisos nchane nnyo o kúmi ên nná ka ego kən Obhasi a yîm yê a nyə́me ka ekʉ̂. 11Yê a ri

‘Isôk mfi ên agbeghá-ojû o bhumî ên

sê í ká nop njû egbeém,

ḿfə́ne nâ í bhâ chə́bhe mfoné-mfoné isôk

mfi í fíi njû.’#Nkôn 118.22.

12Məŋê ên sê kən nne a sém ka obhí, á chiŋa mbâ Jisos, mbá etat cháŋ. Ka ngun ndə́m, mbiŋ etat cháŋ nnyi Obhasi a karê se a yim ane á sém, é ká chiŋi ńnyə́ne.”

13Nji ane echəme Atáŋá-eték á yéne Pita na Jon á chorá na osoná-ḿbə́ŋé, kpe nwet á ká məŋé, kpe ejûm á ká fap, ókerê ó fî atáŋá-eték mbá. Á bhâ tît mân sê a ri ane mba á tóbha Jisos ebhú áji. 14Á kpó yen nne nnyo á yími nná a sôn a gyím áfo kpít na Pita na Jon, á ká kpo fon kpe jə́t nji á kí chot. 15Á sə́re mân ábho sê á mághe kpá óchâm esup. Á róghe echoróm ábho-ábhô sê, 16“E kí yim nan na ane mbá éé? Kpe énê ka Jerusarem a mə́ŋe se ábho nâ á yími ntʉ́ghi ekpatə́m ejûm okpógha-biji njí. Nne owəré nnyo a kí firi cháŋ. 17Kən é yîm nchot nnyí a kâ jábhe ngûm, deê é tʉ̂ ane mbá obhô ka otûŋ á kâ kpô kpí ane ka mbiŋ i Jisos Krayis.”

18Á bhîŋ mân Pita na Jon á tʉ̂ ábho obhô ka otûŋ sê á kâ kpô gaé sê á kpí nne kpe ejûm ka mbiŋ i Jisos. 19Kən mba Pita á táme sê, “Ên áfoné, sə́re kpá êt ejûm nji é rî nono ka ochî Obhasi: eyúghúm ên kən Obhasi. 20É ka yén ekpak nji êt e kí maghé echoróm ejûm nji e yúghi oyúk, e yên oyén.”

21Atáŋá-eték á bhâ tʉ̂ ábho obhô ka otûŋ kən á nyáŋe ábho obhô. Á ká yen kpe echî nji á kí kpəré ábho ka ane chénchén á kí karé nkat mbâ Obhasi ka ejûm nji é fábhe. 22Echî aŋ? Nne nnyo á yími nná yê etûm okpógha-biji njí ka biji kən a sôn, a chíŋi nsam i nyâ ébháe.

Ane Obhasi á kí goré sê á fôn osoná-ḿbə́ŋé

23Nji á nyáŋe Pita na Jon abhô, ka ngyím ányi á bhak á bhâ sə́re ane ekam ábho ejûm nji ane-echî akará-agore Obhasi na ane-akúí eték á chóre. 24Nji á yúghi nchot nnyí, ekam ábho njí ndə́m á chə́me, á góre Obhasi sê, “Ńtâ Obhasi, we nnyo o yimî ósô na nsi, o yîm aya na chénchén nji é rî ka etím.#Ane 20.11; Ney 9.6; Nkôn 146.6. 25Ka ikom Obhasi Ebhare Ntʉgantʉ, o chôt éməné ka nnyo nne-etûm owa Debhit se,

‘Ane mba á ká məŋé Obhasi á yáma kpá ḿbə́ŋé jen?

Á chəmá kpá á fígha achot í chichi jen?

26Atúi-ofâm í ngun á bhop ekubhi,

ane mba á fíi ikom eték á chəme achî

sê tîk á yîm Ńtâ Obhasi na Ntûfâm

nnyo Obhasi a sáŋe a káre otúi.’#Nkôn 2.1-2.

27Erot á chə́me achî mfá ka Jerusarem, yê na Pontus Piratus na ane Isrel é kpê na ane mba Jus asík. Á chə́me achî á fôn ekubhi ábho kən á yúí Jisos, ḿgbán owa nnyo á ka fon kpe akôp. Yê nnyo o sáŋe o káre otúi.#Mat 27.1-2; Mak 15.1; Luk 23.1,7-11; Jon 18.28-29. 28Kən ejûm nji á yími nná, a ri ka ekpak nji we ta ó kam se á yîm. O kamê ka ikom ifâ na okorá-ḿbə́ŋé obhâ. 29Ńtâ Obhasi, mfá-mfá mân kére efup nji á kágha êt nná ka ḿbə́ŋé. Nyáŋe êt ka ane etûm abhâ, é sə́ré otîp obhâ, efup e kâ fôn. 30Nyáŋe êt, tə́ne obhô obhâ o yimá ane á soná. Nyáŋe êt e yimá ntûm okpógha-biji na biriŋ ka mbiŋ i Jisos, ḿgbán owa nnyo á ka fon kpe akôp.”

31Nji á máne Obhasi egoróm, njû nnyi á chə́me nná a nyíŋi. A kpo to a nyiŋí, Obhasi Ebhare Ntʉgantʉ a súi chénchén ábho biji, á kə̂t á səra otîp Obhasi, efup á ro fon.

Ane Obhasi á fóne ḿbə́ŋé yə́t na atem

32Atóbhá Jisos chénchén ka ebhú áji, á fóne ḿbə́ŋé ábho yə́t na atem, kpe yót nnyo á səra se, “Ńgyê ejûm ejámé nná, ńgyê ejâ nná,” cháŋ. Á kíra chénchén iyîm ábho mbi á fóne na atem.#Etûm 2.44-45. 33Na ekpatə́m ikom, ágbán í Jisos á səra fə́ne noŋ atî-isê mba á yéne Ńtâ Jisos a nyə́me ka ekʉ̂. Obhasi a tóŋá fə́ne ekpatə́m onobhá-eji ka echəme ábho. 34Kpe nne ka ekam ábho nnyo a ri ka eket ejûm kpe jə́t cháŋ. Ka ebhú ka ebhú, mba á fóne mbin na kpe ojû, á kí gurí á kô ntí á bhak, 35á bhâ káre ágbán í Jisos. Ábho á kí ko fə́ne ntí mmí á kíri mbâ ane mba á rî ka eket iyîm.

36-37Ta nne ndə́p-i-njû Libhayi yót a jî gúri ebhin ejê a kô ntí a bhâ káre ágbán í Jisos. Á jíi nne nnyó ka Sayiprus, a kamá se Jusep. Ágbán í Jisos á bhíŋa nne nnyó sê Banabas, nâ se Nkagha-ntem Ikom.

Currently Selected:

Etûm ágbán~í jisos, echî 4: ETUNT

Highlight

Compare

Copy