Matayo 21

Jeso Mbwaakanjila mu Jelusalemu

(Maako 11:1-11; Luka 12:12-19)

1Inzho nibakaswena afwaafwi ku Jelusalemu bakashika ku Betefage ku lupili lwa masamu ama Oliva. Jeso wakatuma ba shiciiya bobile, 2wabaambila ati, “Kamuya ku munzhi welya mulakayana imbongolo ilyaanjilwe u mwanayo. Mukashaangulule mushilete kwangu. 3Kuti naa umwi muntu akamubuzhe ati mutola kwi, mukaambe ati Mwami ulashizanda. Ngoonaawo ulakashituma. 4Aza akacitwa kwaamba azuzucizhiwe akaamba mushinshimi aakuti,

5 # Zaka 9:9 “Baambile bana bashimbi ba mu munzhi wa Ziyoni ati,

‘Kamulanga Mwami wenu uleza kwenu,

uleza cakulibonzha, ulilizile ambongolo,

cini cini ulilizile a mwana wa mbongolo.’ ”

6Ngoonaawo ba shiciiya bakaya u kucita umbona mbwaakabalailila Jeso. 7Bakeeleta imbongolo u mwanayo, bakabika shikobelo shabo ambongolo, amane Jeso wakaliza wakala ali nshisho. 8Bantu banji banji bakazala shikobelo shabo mu mukwakwa, ulimwi bamwi bakakombaula tutabi twashisamu batuzala mu mukwakwa. 9#Inte 118:25, 26Inzho makamu akaakweendela kumbele aazo akaakuli munshi akapozomoka ati, “Hosana ku Mwanaa Devidi! Walongelwa wezo uzhiza mwizhina lya Mwami! Hosana nubakwizeulu lyamazeulu!” 10Jeso naakanjila mu Jelusalemu boonse bantu bakazhingwa u kwaamba ati, “Anu nguni wezu?” 11Inzho makamu a bantu akaamba ati, “Wezu ngu Jeso mushinshimi uuhwa ku Nanzaleta waku Galilaya.”

Jeso waya Muŋanda ya Leza

(Maako 11:15-17; Luka 19:45-48; Johani 2:13-22)

12Inzho Jeso wakanjila muŋanda ya Leza u kutanda bantu boonse bakaakuuzha u kuula muŋanda ya Leza. Wakapinuna matebulu a bashikucinca mali, ushuuna shabo babo bakaakuuzha inkwilimba. 13#Aiz 56:7; Jele 7:11Wakabaambila ati, “Kulilembelwe ati, ‘Iŋanda yangu ilakaakutewa ati iŋanda yakukombela,’ pele umwe mweecita ati cibe cizubilo ca batewu.” 14Boofwu u balema bakeza kwa Jeso, wakabaponya. 15Pele bapaizhi bakando ubalembi nibakabona shintu shizhinga nshaakacita u kuteelelela bana bakaakupozomoka ati, “Hosana ku Mwana Devidi!” Bakalemana. 16#Inte 8:2Bakamubuzha ati, “Sa uliciteelele ncibaamba?” Jeso wakabaingula ati, “Ee, sa tamunabalile ati, ‘Wakatambula mantembu kuhwa mukanwa kabalubembe u bana banonka.’” 17Amane kubashiya Jeso wakaya ku munzhi wa Betani nkwaakoona.

Jeso Walishinganya Ikuzu

(Maako 11:12-14, 20-24)

18Inzho cifwumo fwumo Jeso naakaakupiluka ku Jelusalemu wakafwa inzala. 19Ubobo naakabona ikuzu kumbali kunzhila, wakaya kwaamba alye inkuzu. Pele kalitazhele kakushuukile bulyo matuhwu. Ngoonaawo wakalyaambila ikuzu lelyo ati, “Utakazhali linji micelo.” Awo ngoonaawo ikuzu lyakazuma. 20Ba shiciiya nibakacibona ceco, bakazhingwa u kwaamba ati, “Anu leli ikuzu lyafwamba buti kuzuma?” 21#Mat 17:20; 1 Bako 13:2Jeso wakabaingula ati, “Cini cini ndamushimwina ati, kuti kamushoma cakutazuluzha tamukaciti bulyo ceci cacitika kwikuzu leli, pele nikuba kuti mwalwaambila lupili lolu ati, ‘Zhuka uliwaale mu lwaatele,’ cilakacitika. 22Kufwumbwa ncimukaakumbila kwiita mu kukomba mulakapewa mwaakukwete lushomo.”

Mubuzho Wansana Shaka Jeso

(Maako 11:27-33; Luka 20:1-8)

23Inzho Jeso naakanjila muŋanda ya Leza, bapaizhi bakando ubakando ba cishi bakashika kwa Jeso bamuyana ulayiisha bamubuzha ati, “Anu insana nshuucisha sheshi shintu shoonse wakashiyana kwi? Twaambile naa nguni wakakupa?” 24Jeso wakaingula ati, “Ame ndamubuzha mubuzho. Kuti munyingule ame ndamwiingula nkushihwa insana nshincisha sheshi shintu. 25Lupapatizo lwa Johani lwakahwa kwi. Sa lwakahwa kwa Leza, naa ku bantu?” Ubobo bakakazhanya mulwabo beni ati, “Kuti twaambe ati, ‘Lwakahwa kwizeulu,’ ulaamba ati, ‘Nkamboonzhi mwiina kumushoma?’ 26Ulimwi awo kuti twaambe ati, ‘Lwakahwa ku bantu,’ tulatiya nkaambo bantu boonse balizhi ati Johani kali mushinshimi.” 27Ubobo bakaingula ati, “Tatwizhi pe.” Amane aze wakabaambila ati, “Ame nshimwaambila nkunshiyana insana shakucisha sheshi shintu.”

Cikozhano Cabana Bobile

28Jeso wakababuzha ati, “Mutelaika buti? Muntu wakaakukwete bana bobile, wakaya kumutaanzhi wamwaambila ati, ‘Mwanangu koya ukasebeze mu muunda wamasaansa bwasunu.’ 29Mwana wakaingula ati, ‘Nshiyi koko ume.’ Pele kwiite ciindi wakalitelaisha wakaya ukusebeza. 30Ulimwi ushi wakaya kuli umwi wamwaambila umbona ati koya ukasebeze. Wezo wakaingula ati, ‘Ndaya taata,’ pele wiina naakaya. 31Inzho nguuliye wakacita luzando lwa ushi? Bakaingula ati, ‘Wakutaanguna.’ Jeso wakabaambila ati, cini cini ndamwaambila ati ba shimitelo u bahuule balakamutaangunina kunjila mu bwami bwaka Leza. 32#Lk 3:12; 7:29, 30Nkaambo Johani wakeza kwenu munzhila ya bululami, ulimwi mwiina kumushoma. Pele bashimitelo ubahuule bakamushoma. Pele u ciindi nimwakabona bobo mwiina nimwakaleka kucita shibi u kumushoma.”

Cikozhano ca Basebezhi

(Maako 12:1-12; Luka 20:9-19)

33 # Aiz 5:1, 2 “Amuteelele ucimwi cikozhano. Kakuli muntu umwi wakalima muunda wa masaansa. Wakoozacila lwiingo amane washa ilindi lyakushinina waini. Ulimwi wakazaka iŋanda ya mwizeulu yamulindizhi. Amane muunda wezo wakooshiila balimi waya kucishi cimwi. 34Inzho ciindi ca kutebula nicakaswena, wakatuma basebezhi bakwe ku balimi kwaamba bakalete micelo. 35Pele balimi bakabakwata basebezhi bakwe. Umwi bakamuuma, umwi bakamuyaya, wezu umwi bakamuuma mabwe. 36Ulimwi wakatuma banji basebezhi banji banji kubaala bataanzhi, abo babo bakabacita umbona bobo. 37Ku mamanino wakabatumina mwanakwe, kashoma ati, ‘Ambweni walo mwanangu balakamulemeka.’ 38Pele balimi nibakamubona wezo mwana bakalihwiya baamba ati, ‘Nguwezu shimulyazhina. Amweende tumuyaye tulubweze lukono lwakwe.’ 39Ubobo bakamukwata bamusowela ansengwe lya muunda wa masaansa bamane bamuyaya.

40“No ninzho mukamwini muunda wa masaansa akazhiza ulakabacita buti babo balimi?”

41Bakaingula ati, “Ulakabayaya babo babiyabi u lufwu luusha insoni, amana akoope wezo muunda wa masaansa ku balimi banji. Babo bakaamupa micelo muciindi ceelele.” 42#Inte 118:22, 23Jeso wakababuzha ati, “Sa mwiina nimwakabala mu Malembe aamba ati,

“Ibwe ndibakakaka bazashi ndilyaba ibwe lizandwa mucooko.”

Mwami nguwakacita sheshi

Ubobo shilazhinga cini cini kumenso esu.

43“Inzho ndamwaambila ati mulakanangwa bwami bwa Leza bulakapewa ku mishobo iinji ikaazhala micelo iiyelele. 44Ubobo kufwumbwa uuwila ebwe lelyo, ulakacoka, aze wezo ngulikaalokela lilakamushanauna.” 45Bapaizhi bakando uba Falisi nibakashiteelela sheshi shikozhano shakaakwaambwa, bakazhiba ati mbaakumbilizha. 46Bakaakuzanda ati bamukwate, pele kabatiya bantu kaambo balo kabahumina ati mushinshimi.

Currently Selected:

Matayo 21: ILL

Highlight

Copy