Matayo 20
20
Cikozhano Cabashimilimo
1Nkaambo bwami bwa kwizeulu bulikozhene umuntu wakafwuma cifwumo fwumo kwaamba anjizhe bashimilimo ku muunda wakwe wa masaansa. 2Inzho nibakamana kuteelezhanya kuhola idinali lyomwi a buzuba wakabatuma ku muunda wakwe wa masaansa. 3Wakeendeenda ulimwi ku cisambalilo ikasaalizhi amane wakayana bamwi bantu balizhimine bulyo bayina ncibacita. 4Wakabaambila ati, “Kamuya amwe ku muunda wangu wa masaansa ndamuhozha bululeme.” 5Ubobo bakaya. Wezo muntu wakacita mbubona bobo kuli mbaakayana cifwumo umbaakayana ilyakumbo. 6Nikwakaba kumangolezha wakaya ulimwi wayana ubamwi balizhimine, amane wababuzha ati, “Nkamboonzhi mulizhimine bulyo buzuba boonse?” 7Balo bakaingula ati, “Nkaambo kwiina muntu watunjizha mulimo.” Ngoonaawo wakabaambila ati, “Amwe kamuya mukasebeze mu muunda wangu wa masaansa.”
8 #
Bale 19:13; Ciz 24:15 Inzho kumabililo eezuba, mukamwini muunda wa masaansa wakamwaambila mubanzhi wakwe ati, “Boompolole basebezhi ubahozhe, utalicile ku bashaalizhi wamana uye kubataanzhi.” 9Ubobo babo bakashika ilyakumbo bakahola idinali lyomwi. 10Inzho Bataanzhi nibakashika, bakaakutelaika ati balahola cibaala pele bakahola idinali lyomwi ndilyona, 11ubobo bakamutongaucila mukamwini muunda, 12baamba ati, “Baba bashaalizhi basebeza bulyo iwoola lyomwi, nikuba bobo wabapa umbona mbuwatupa aswe nitwasebeza buzuba boonse mulumwi.” 13Walo wakamwiingula umwi wabo ati, “Mweenzuma ndiina indakubishizha pe, nkaambo twateelezhanya idinali lyomwi. 14Bweza bulyo shako uukuya. Ndasala kumupa wezu mushaalizhi mbubona mundakupa aze, 15Sa nshihuminyiwa kucita mwiinzanda ku shintu shangu? Naa wafwa munyono ukaambo ka bubotu bwangu?”
16 #
Mat 19:30; Mk 10:31; Lk 13:30 Jeso wakamaninzha u kwaamba ati, “Ubobo bashaalizhi balakaba bataanzhi, abo bataanzhi balakaba bashaalizhi.”
Jeso Wakanana Ulwatatu Makani Aalufwu Lwakwe
(Maako 10:32-34; Luka 18:31-34)
17Inzho Jeso naakaakuya ku Jelusalemu, wakabatola ba shiciiya bakwe bali ikumi ubatwesha bobile ambali wakabaambila ati, 18“Amubone tulaya ku Jelusalemu, ubobo Mwanaa Muntu ulakaabwa mu matashi a bapaizhi bakando u balembi. Ulimwi balakamupa mulandu wa lufwu, 19bamana bakamwaabe kuli bantu bakunze kwaamba bakamusampaule, bakamukwipaule u kumukankamina aciciinkano. Pele nikuba bobo mu buzuba bwatatu ulakabushiwa.”
Kulomba kwa Mutumbu
(Maako 10:35-45)
20Inzho muka Zebedi wakeza u banakwe balombwana bobile kwa Jeso u kulomba. Wakakotama kwaamba akumbile cimwi cintu. 21Jeso wakamubuzha ati, “Nciinzhi ncimuzanda?” Wakaingula ati, “nshomezha ati, banangu baba balombwana umwi ulakakala kucilyo umwi ulakakala kucimonsho mu bwami bwako.” 22Jeso wakaingula ati, “Tamucizhi ncimukumbila pe. Sa mulakonzha kunwina munkapu yamapenzhi njinkaanwina?” Bakaingula ati, “Tulakonzha.” 23Ubobo wakabaambila ati, “Ncibotu mulakanwina munkapu yezho, pele kukala kuluya lwakucimonsho naa kucilyo kwangu indime iimpa pe. Pele masena azo ngababo mbaakaabambila Taata.”
24Ba shiciiya bali ikumi nibakateelela bobo bakabalemanina ba bunina babo bobile. 25#Lk 22:25, 26Pele Jeso wakabeta wakabaambila ati, “Mulizhi ati beendelezhi ba bantu bakunze balalila a mitwi ya bantu, abo bami balabalela iinsana bantu babo. 26#Mat 23:11; Mk 9:35; Lk 22:26Pele akati kenu takweelele kuba bobo pe. Kufwumbwa wezo uuzanda kuba mukando akati kenu, ulyeelele kuba mutwanga wenu. 27Ulimwi kufwumbwa wezo uuzanda kuba mutaanzhi ulyeelele kuba muzhice wenu. 28Amube ukoya Mwanaa Muntu, walo watakezhila kusebezelwa pele kusebezela, ukwaaba bumi bwakwe kwaamba bube cinunuzho ca bantu banji banji.”
Jeso Waponya Boofwu Bobile
(Maako 10:46-52; Luka 18:35-43)
29Jeso u ba shiciiya bakwe nibakamuhwa mu Jeliko, ikamu lya bantu lyakabacilila. 30Ubobo balombwana bobile boofwu kabashite kumbali kunzhila, nibakateelela ati Jeso uleza bwiza bakapozomoka ati, “Tufwile inkumbu Mwanakwe Devidi!” 31Bantu bakabalemanina u kubaambila ati, baliinze. Pele balo bakapozomokesha ati, “Akaka Mwami tufwile inkumbu, Mwanakwe Devidi!” 32Ngoonaawo Jeso wakazhima wabeta, wakababuzha ati, “Mulazanda ati mucitile inzhi?” 33Balo bakaingula ati, “Mwami, ayalule menso esu.” 34Ubobo Jeso wakabafwila intenda, ngoonaawo wakaakwata menso abo, ndilyona bakabona u kumucilila.
Currently Selected:
Matayo 20: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.
