Luka 7
7
Jeso Waponya Muzhice wa Mukando wa Bashikalumamba
(Matayo 8:5-13)
1Jeso naakamana kwaamba aza makani oonse ku bantu, wakanjila mu Kapenaumi. 2Inzho mukando wa bashikalumamba bali mwaanda, kakwete muzhice ngwaakaakufwini cini cini wakaakuli mulwazhi ca lufwu. 3Mukando wa bashikalumamba bali mwaanda, naakateelela aka Jeso, wakatuma bamwi bakando baba Juda kwaamba bakamulombe ezhize kumuponya musebezhi wakwe. 4Nibakashika kwa Jeso bakamupumpa cini cini ati, “Ulyeelele kumuyohwa muntu wezu, 5kaambo ulyuufwini mushobo wesu ulimwi nguwakatuzakila cikombelo caba Juda.”
6Jeso wakayaabo. Naakashika afwaafwi iiŋanda, mukando wa bashikalumamba bali mwaanda wakatuma beenzhiina kwa Jeso kuya kumwaambila ati, “Mwami, utalipenzha bulyo kwiza kaambo ndiina ceelelo cakukunjizha muŋanda yangu. 7Nciceco ncindatezhila ndimwini kukwita. Amba bulyo mazwi musebezhi wangu ulapona. 8Nkaambo ame ndatambula malailile kuhwa kubakando bali kumbele kwangu, ulimwi ndikwete bashikalumamba bali munshi lyangu. Kuti ndamwaambila umwi ati, Koya! Ulaya, ulimwi kuli umwi ati, Kweza! Uleza, ukumuzhice wangu ati, Cita ceci! Ulacicita.”
9Jeso wakazoowa nakateelela mazwi aza, amane wakacindulucila kunkamu ya bantu bakaakumucilile wabaambila ati, “Nshinalubwene lushomo luli bolya, nimuba mu Izilaili.”
10Inzho babo bakaakutuminwe nibakazhoka kuŋanda, bakayana muzhice waba kabotu, wapona.
Jeso Wabusha Mwanakwe Mukamufwu
11Nikwakaita ciindi Jeso wakaya ku munzhi uutewa ati Naini antoomwi u ba shiciiya bakwe, inkamu inkando ya bantu yakamucilila. 12Inzho naakashika kumanjililo aamunzhi, wakaswaanganya bantu bakaakuzemwine mutunta. Mutunta wezu kooli wa mulombwana wakaakuli ngu mwana ice nana kwa baina. Bantu banji banji ba mu munzhi bakeza kumulizha mukamufwu. 13Inzho Mwami Jeso, naakabona mukamufwu wezo ulalila, wakamufwila intenda, wakamwaambila ati, “Soola! Utalila linji.” 14Jeso wakaswena afwaafwi wakalyaampa ikwati, ngoonaawo bakaakulizemwine bakazhima. Amane waamba ati, “Mulombwana ndakwaambila, buka!” 15Ngoonaawo mufwu wakabuka wakala wakanka kwaamba. Amane Jeso wakamupa baina.
16Bantu boonse bakazoowa cini cini, bakakanka kutembaula Leza ati, “Mushinshimi mukando washika akati kesu! Leza weza kufwutula bantu bakwe.”
17Impuwo yaka Jeso yakazuwa mucishi coonse ca Judiya ushishi shoonse shizhingulukile.
Batumwa Bahwa kwa Johani Mupapatizhi
(Matayo 11:2-19)
18Inzho Johani bakamwaambila ba shiciiya bakwe shoonse sheshi shakacitika. 19Ngoonaawo wakoompolola ba shiciiya bakwe bobile, wabatuma kwa Jeso kwaamba bakamubuzhe ati, “Sa ndiwe wezo uzhiza, naa tulanjile unji?”
20Inzho babo bakatumwa bakeza kwa Jeso bamwaambila ati, “Johani Mupapatizhi watutuma kwako ati, ‘Sa ndiwe wezo uuzhiza na tuukucilangila unji?’”
21Ku ciindi ceco ncicona, Jeso wakaponya bantu banji banji bakaakusata malwazhi u shicisa, kubicilizha u babo bakaakunjililwe myoza mibiyabi. Ulimwi wakaponya boofwu banji banji. 22#Aiz 35:5, 6; Aiz 61:1Ngoonaawo wakabaingula ba shiciiya baka Johani ati, “Kamuya mukamukananine Johani shoonse nshimwabona u kuteelela. Mukamwaambile ati boofwu balabona, balema baleenda, bashicinsenda balasalazhiwa, bacimpama balateelela, bafwu balabushiwa, bapushi balakambaucilwa Makani Mabotu. 23Ulikwete coolwe muntu uutalifwumpulili kukaambo kangu.”
24Inzho bakatumwa kwa Johani nibakaya, Jeso wakakanka kubuzha bantu banji banji bakaakubungene makani aka Johani ati, “Sa nimwakaya mulukula mwakaya kubonaanzhi? Sa mwaakuzunga ati Johani uli ukoya lubu lupeka u muuwo? 25Inzho mwakaakutelaika ati Johani ulalibonya buti? Sa mwakaakutelaika ati Johani muntu wakaakusama shakusama shibonhwu bonhwu? Pe pe, babo basama shisani sheebeshi balakala cakuliiba mu maanda aabwami. 26Sa mwakaakutelaika ati Johani mushinshimi? Ee, ndamushimwina ati, ulabaala a mushinshimi. 27#Mal 3:1Nkaambo Johani inguwe wakalembwa mu maŋwalu ati,
“Ndakatuma mutumwa wangu kumbele,
kwaamba akubambile inzhila yako.”
28“Ndamushimwina ati kuhwa liliye, kwiina nikwakaba muntu mukando kubaala Johani. Pele nikuba bobo, wezo mushoonto mu bwami bwaka Leza mukando kubaala Johani.”
29 #
Mat 21:32; Lk 3:12 Bantu boonse kubikilizha ubashimutelo, babo bakateelela kukambauka koku, bakamutembaula Leza kaambo kakupapatizwa ulupapatizo lwaka Johani. 30Pele ba Falisi ubashimilawo bakakaka kupapatizwa kwa Johani, bakalunyansha luzando lwa Leza.
31Jeso wakaamba ati, “Anu bantu baano mazuba ndabakozhanyaanzhi? No bali ukoyaanzhi?”
32Balakozhana u bana boompolozhanya mucisambalilo ati, “Twalizha ingoma pele umwe tamuzhana! Twamwiimbila inyimbo shelilwe, pele umwe tamulila! 33Nkaambo Johani Mupapatizhi wakeza ulaliimya kulya, ulimwi katanwi waini. Pele umwe mwakamwaamba ati, ‘Ulikwete myoza mibiyabi.’ 34Inzho Mwanaa a Muntu wakeza ulalya u kunwa, pele umwe mwakaamba ati, ‘Noomubone mulyato, cakolwa, mulongwaabo bashimutelo u bashishibi.’ 35Nikuba bobo busongo bwa Leza buliluleme kuli babo babutambula.”
Jeso Wananikwa Mafwuta
36Umwi mu Falisi wakamutamba Jeso kuya kulyaaze. Jeso wakaya kunjila muŋanda ya muntu wezo, wakakala kulya antoomwi. 37#Mat 26:7; Mk 14:3; Joh 12:3Inzho kakuli mukaintu umwi wa mu munzhi wezo, wakaakuli shishibi. Naakateelela ati Jeso uli muŋanda yamu Falisi. Wakaleta kapawo kamafwuta aanunka kalonze. 38Wakeza ulalila ashike wazhima kumbali kumatende aka Jeso, misozhi yakashilopya shifwumba sha Jeso, wakeekunkumuna misozhi iisusu lyoomutwi wakwe. Amane wakashishonta shifwumba uku shinanika mafwuta azo.
39Inzho mu Falisi wezo, shimeenzu aakwe Jeso abone bobo, wakatelaika u monzo ati, “Kuti wezu muntu naakuli mushinshimi mwini mwini, naazhiba kwaamba mukaintu umukwatakwata uli buti, nkaambo ngushishibi.”
40Jeso wakamwaambila ati, “Saimoni, kuli cintu ncinzanda kukwaambila.”
Saimoni wakaingula ati, “Caambe Mwiiyi.”
41Jeso wakamwaambila ati, “Kakuli bantu bobile bakakweleta mali ku muntu umwi. Umwi wakakweleta myaanda yosanwe yamali a muwaya waya, wezu umwi makumi osanwe. 42Nibakakacilwa kumuzholela mali wezo muntu wakabalekelela boonse bobile. Inzho nguuliye akati kabo uukaamufwunisha muntu wezo wakabalecelela?”
43Saimoni wakaingula ati, “Ndatelaika ati nguwezo ngwaakalekelela mali manji manji.”
Jeso wakamwaambila ati, “Waingula kabotu.” 44Amane wakacindulukila kwaakuli mukaintu, wamwaambila Saimoni ati, “Sa wamubona mukaintu wezu? Ndenjila muŋanda yako, wiina kumpa meenzhi aakusamba kumatende. Pele mukaintu wezu waalopya matende angu umisozhi yakwe ulimwi weeshuula umasusu aakwe. 45Uwe wiina kunshonta ciindi indenjila muŋanda yako, pele walo wiina kukacilwa kushonta matende angu. 46Uwe wiina kunanika mafwuta ku mutwi wangu, pele walo waananika mafwuta matende angu. 47Inzho ndakwaambila ati shibi shakwe nishiba shinji shinji shalekelelwa, nkaambo watondezha lufwuno lukando, pele wezo ulekelelwa shibi shishoonto u lufwuno lwakwe ndushoonto.”
48Ngoonaawo wakamwaambila mukaintu ati, “Shibi shako shalekelelwa.”
49Babo bakaakulya antoomwi u Jeso etebulu bakakanka kwaamba akati kabo ati, “No nguni wezu uulekelela shibi shabantu?”
50Inzho Jeso wakamwaambila mukaintu ati, “Lushomo lwako lwakufwutula, koya muluumuno.”
Currently Selected:
Luka 7: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.