Luka 4
4
Kutepaulwa kwa Jeso
(Matayo 4:1-11; Maako 1:12-13)
1Inzho Jeso wakahwa ku lweenje lwa Joodani, ulizwile Moza Usalala, ulimwi wakasololelwa u Moza Usalala kuya mulukula. 2Momo mwaakatepaulwa u Shaatani kwa mazuba ali makumi one. Coonse ciindi ceco kwiina ncaakaakulya, ubobo wakafwa inzala.
3Inzho Shaatani wakaambila Jeso ati, “Waakuli Mwana Leza, ambila ibwe leli libe cinkwa.”
4 #
Ciz 8:3
Pele Jeso wakamwiingula ati, Kulilembelwe mu maŋwalu ati, “Muntu taponi kucinkwa caloolona.”
5Ulimwi Shaatani wakamutola abusena buli ezeulu wamutondezha shishi shaanshi ku ciindi cishoonto bulyo u kumwaambila ati, 6“Bwami bwashishi shoonse sheshi ndakupa antoomwi u bulelo u bulemu bwasho, kaambo ndakapewa, ndikwete insana shakubupa ku muntu oonse ngundazanda. 7Kuti uwe wanfwukamina u kunkomba, bulelo bobu boonse ndakupa.”
8 #
Ciz 6:13
Jeso wakamwiingula ati, “Kulilembelwe mu maŋwalu ati, ‘Ukombe Mwami Leza wako, walo ice nana nguuyelele kumanina milimo.’”
9Inzho Shaatani wakamutola ku Jelusalemu wamulizika a cisunswa ca ŋanda ya Leza, amane wamulailila ati, “Waakuli Mwana Leza liwaale anshi. 10#Inte 91:11, 12Nkaambo kulilembelwe mu maŋwalu ati, ‘Leza ulakalailila baanjelo bakwe kwaamba bakakukape.’ 11Ulimwi kulilembelwe mu maŋwalu ati, ‘Balakakuzemuna mu matashi abo kwaamba utakalifwumpuli kwibwe.’”
12 #
Ciz 6:16
Jeso wakamwaambila ati, “Ulimwi kulilembelwe mu maŋwalu ati, ‘Utasukusha Mwami Leza wako.’”
13Inzho Shaatani naakamana kumutepaula mu shiyanza shoonse wakamushiya kwa ciindi cishoonto bulyo.
Jeso Wakanka Mulimo Wakwe mu Galilaya
(Matayo 4:12-17; Maako 1:14-15)
14Inzho Jeso wakabweela ku Galilaya, kakwete insana sha Moza Usalala. Impuwo yakwe yakazuwa mucishi coonse. 15Kayiisha mu shikombelo shaba Juda, ulimwi bantu boonse bakamulemeka.
Jeso Wakakwa mu Nanzaleta
(Matayo 13:53-58; Maako 6:1-6)
16Jeso wakashika ku Nanzaleta koko nkwaakakomenena, inzho mu buzuba bwa kulyoocezha bwa Sabata, wakaya ku cikombelo caba Juda umbona mbwakaakucita lyoonse, wakazhima kwaamba abale maŋwalu. 17Inzho bakamutambika ibuka lya mushinshimi Aizaya. Wakalihungulula wayana a cibalo aalembelwe ati,
18 #
Aiz 61:1, 2 “Moza wa Mwami uli mulyuume,
nkaambo wananika kwaamba, nkambaukile bapushi makani mabotu.
Wakantuma kwaamba baanjilwe baangululwe,
Boofwu babone, bapenzhewa bahunwe.
19Wakantuma kwaambilizha ati ciindi cibotu ca Mwami cashika.”
20Amane Jeso wakalihunga ibuka wakamutambika mubanzhi wa cikombelo caba Juda amane wakala. Bantu boonse bakaakuli mucikombelo bakamulanjilila. 21Inzho wakabaamba ati, “Ubwasunu cibalo ceci cazuzucizhiwa umbona mbumwateelela nicaakubalwa.”
22Bakamulumbaizha bantu boonse, ulimwi bakazoowa mbwakaakubandika ca busongo. Bakaamba ati, “Sa wezu muntu ingwe mwanakwe Jozefu?”
23Jeso wakabaambila ati, “Cini cini kamweelela kashimi kakuti, ‘Mushilishi lishilice umwini.’ Shoonse nshitwakateelela shakacitwa mu Kapenaumi, shicite umono umbanamuzeenu.” 24#Joh 4:44Ulimwi wakabaambila ati, “Cini cini ndamushimwina ati, kwiina mushinshimi uutambulwa mucishi ca kwabo.”
25 #
1 Bami 17:1
“Pele cini cini ndamushimwina ati, ku mazuba a Elaija kakuli bamuka bafwu bapenzhi banji banji mucishi ca Izilaili, ciindi ceco kwakaba inzala mucishi coonse, kaambo inhula ina niyakawa kwa myaka yotatwe umyezhi iili cisambomwi. 26#1 Bami 17:8-16Pele Elaija takatuminwe kuli naaba womwi wabo, pele wakatumwa kumukamufwu waku Zelefati mucishi ca Sidoni. 27#2 Bami 5:1-14Ulimwi kamuli bashicinsenda banji banji mucishi ca Izilaili mu mazuba a mushinshimi Elisha, pele kwiina naaba womwi wabo ngwaakaponya, cita bulyo Namaani waku cishi ca Siliya.”
28Inzho nibakateelela bobo bantu boonse mucikombelo caba Juda bakalemana cini cini. 29Bakazhimuka bakamukusha mu munzhi Jeso bamukulaanya kutola alupili awo nguwaakuzacilwe munzhi wabo, kwaamba bakamuwaale ankomwenena. 30Pele walo wakaita akati kabo waya wabashiya.
Jeso Waponya Mulombwana Uukwete Moza Mubiyabi
(Maako 1:21-28)
31Inzho Jeso wakaya ku Kapenaumi, munzhi uuli mucishi ca Galilaya, koko wakayiisha bantu mu Sabata. 32#Mat 7:28, 29Bantu boonse bakazoowa kuyiisha kwakwe kaambo mazwi aakwe kakwete insana sha bwami. 33Mucikombelo caba Juda kamuli muntu wakaakunjililwe moza mubiyabi. Wezo muntu wakoompolola iizwi ikando ati, 34“No twakucitaanzhi u Jeso u Munanzaleta? Sa weza kutuzonauna? Ndikwizhi, ndiwe Usalala mutumwa wa Leza.”
35Ngoonaawo Jeso wakoolemanina moza mubiyabi ati, “Liinze! Hwa mu muntu wezu!” Inzho muntu wezo wakasuntuka wawila anshi, moza mubiyabi wakamuhwa wiina niwakamucisa pe.
36Bantu boonse bakazoowa ukubuzhanya ati, “Anu makaninzhi aza? Ulalailila myoza mibiyabi ca nsana u bwami, ayo ilamuteelela ulimwi ilahwa.” 37Inzho impuwo yaka Jeso yakazuwa moonse mucishi ceco.
Jeso Waponya Bantu Banji Banji
(Matayo 8:14-17; Maako 1:29-34)
38Inzho Jeso wakahwa mucikombelo caba Juda waya kunjila muŋanda yaka Saimoni. Bainazhala Saimoni kali mulwazhi mubili, inzho bakamulomba Jeso kwaamba amuponye. 39Ngoonaawo wakaya kuzhima afwaafwi ubulo wakaambila mubili ati upone. Ndilyona ndilyona mulwazhi wakapona, wazhimuka wakanka kubafwutaukila.
40Kumabililo ezuba, bantu boonse bakaakukwete balongwaabo basata malwazhi andeene andeene, bakabaleta kwa Jeso, aze wakababika matashi aakwe wakabaponya. 41Ulimwi wakakusha myoza mibiyabi mubantu banji banji. Kabaya bupozomoka ati, “Ndiwe Mwana Leza!” Pele wakabakasha ulimwi katabahuminya kwaamba, kaambo kabamwizhi ati ngu Kilisito.
Jeso Wakambauka mu Shikombelo shaba Juda
(Maako 1:35-39)
42Nibwakaca Jeso wakamuhwa mu Kapenaumi wakaya kubusena buliibile. Bantu bakakanka kumukapula. Nibakamuyana bakasoleka kumushinicizha ati atayi kunji. 43Pele walo wakabaambila ati, “Ndyeelele kukambauka Makani Mabotu aabwami bwa Leza u minzhi iinji, kaambo ceco ncaakantuma Leza kwiza kucita.”
44Ubobo wakakambauka mu shikombelo shaba Juda mucishi coonse.
Currently Selected:
Luka 4: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.