Luka 13

Amusanduke Kwaamba Mutafwi

1Kakuli bantu bamwi ku ciindi ceco bakamwaambila Jeso makani abantu baku Galilaya babo mbakayaya Pilato. Wakabayaya ciindi nibakaakupa cipaizho Muŋanda ya Leza. 2Jeso wakabaambila ati, “Sa umwe mulatelaika ati bantu babo nibakayayiwa bobo kabali ba shishibi kubaala bantu boonse baku Galilaya? 3Ndamushimwina ati, Mwatabeba ukuleka inzhila shenu imbiyabi mulakafwa noonse. 4No bantu balya baku Siloamu ubali ikumi ubatwesha bali lusele babo bakafwa ciindi busanza nibwakabawila, sa mulatelaika ati bakabisha kubaala bantu boonse bakakukala mu Jelusalemu? 5Pe pe! Ndamushimwina ati, mwatabeba ukuleka inzhila shenu imbiyabi amwe mulakafwa mbubona mbubakafwa.”

Cikozhano ca Bukuzu Butazhali Micelo

6Ulimwi Jeso wakabaambila cikozhanyo caamba ati, “Kakuli muntu umwi wakaakukwete isamu ulya mukuzu mu muunda wakwe wa masaansa. Bumwi buzuba wakaya kwaamba akacele inkuzu, pele wiina njakayana. 7Inzho wakamwaambila shikulima muunda ati, ‘Bona, inzho yaba myaka yotatwe ndeza kulanga inkuzu mwikuzu leli, pele kwiina ncinjana. Liteme! No ndyaanzhi? Sa lyuukuzonauna bulyo bulongo?’ 8Pele mulimi wakamwiingula ati, ‘Mwami lileke kwamwaka weno nsoleke kulizailila. Nzepe mu mabali ndamana mbike imbolezhi. 9Kuti likeele inkuzu kumwaka uzhiza cilakaba kabotu, pele kuti litakeeli, ati ulakalitema.’”

Jeso Waponya Mukaintu Mulema mu Sabata

10Inzho Jeso kayiisha mucikombelo caba Juda mu buzuba bwa kulyoocezha bwa Sabata. 11Momo mu cikombelo caba Juda kamuli mukaintu wakaakupenzhewa u moza mubiyabi kwa myaka iili ikumi iitwesha ili lusele. Mukaintu wezu kakonkomene moongo katoongoloka. 12Jeso nakamubona wakamwaambila ati, “Baama, waangululwa kubulwazhi bwako!” 13Wakamwaampa matashi, ngoonaawo moongo wa mukaintu wezo wakoololoka, ubobo wakakanka kutembaula Leza.

14 # Kul 20:9, 10; Ciz 5:13, 14 Pele mukando wa cikombelo caba Juda wakalemana kaambo Jeso wakaponya muntu mu buzuba bwa Sabata. Inzho wakabaambila bantu ati, “Kuli mazuba ali cisambomwi ngutweelele kwiza kushilikwa, ubobo mulyeelele kwiza ku mazuba azo kushilikwa, mutaakwiza mu buzuba bwa Sabata pe!”

15Ngoonaawo Mwami wakamwaambila ati, “Umwe nubashikuupaupa amenso! Anu nguni akati kenu utayalulila basune na imbongolo, kushikusha mucimpati kuya kucela ukushinwisha meenzhi mu buzuba bwa Sabata? 16Sa wezu mukaintu wa luhubo lwaka Abulahamu wakaakwaanjilwe u Shatani kwa myaka iili ikumi u myaka lusele teelele kwaamba aangululwe kubuzuba bobu?” 17Koku kwiingula kwakabausha insoni ba shinkondonina Jeso, pele bantu bakabotelwa cini cini ku shintu shoonse shizoosha nshaakacita.

Cikozhano Cambuto ya Masitadi

(Matayo 13:31-33; Maako 4:30-32)

18Inzho Jeso wakabuzha ati, “No Bwami bwaka Leza buli buti? Ndabukozhanya ukoyaanzhi? 19Bulakozhana iimbuto ya masitadi#13:19 Masitadi: Insece ya masitadi ninsece inshoonto ili ukoya inseke yebondwe ilayanwa mucishi ca Izilaili njakabweza muntu kuya kushanga mu muunda wakwe, cishango cakakomena kuba isamu ikando, u bazuni bakeza kuzaka shitaanto shabo kumitabi yalyo.”

Cikozhano Cabumena

(Matayo 13:33)

20Ulimwi Jeso wakabuzha ati, “No nciinzhi ncinkabukozhanya aco Bwami bwa Leza? 21Buli ukoya bumena mukaintu mbwakahwela muntundu shotatwe shabufwu bwa maila, mpaka limwina bufwu boonse bwafwufwumuka.”

Mulyango Ushaankene

(Matayo 7:13-14, 21-23)

22Jeso kali amushinzo wakuya ku Jelusalemu, kaya bwiita mu minzhi mikando umishoonto. 23Umwi muntu wakamubuzha ati, “Mwami, sa bantu bakaafwutulwa mbashoonto bulyo?” Jeso wakaingula ati, 24“Amuzume kunjila mu mulyango ushaankene, nkaambo ndamwaambila ati, mbanji banji bantu bazanda kuya kunjila pele tabakalozha. 25Mukamwini iŋanda ulakazhimuka ukuyala mulyango, nimukaakanka kuzhima ukukonkomona ku mulyango ati, ‘Tuyalulile Mwami!’ Pele walo ulakaingula ati, ‘Nshikwizhi nkumwahwa.’ 26Inzho mulakaingula ati, ‘Twakaakulya u kunwa antoomwi, niwakaakuyiisha mu minzhi yesu.’ 27#Inte 6:8Pele walo ulakaamba ati, ‘Nshikwizhi nkumwahwa. Amwaahwe awa noonse, umwe numucita shitaluleme!’ 28#Mat 22:13; 25:30#Mat 8:11, 12Inzho mulakalila ukucecenana, mwakamubona Abulahamu, u Aizeki u Jakobo u bashinshimi boonse bali mu Bwami bwaka Leza, pele umwe muli batande muli ansengwe! 29Balakeza bantu kuhwa kwiwe u kumbo, kuhwa kumbala ukucibizhi, balakakala ukulya ipobwe mu Bwami bwaka Leza. 30#Mat 19:30; 20:16; Mk 10:31Nkubali babo bashaalizhi, uninzho balakaba bataanzhi, abo bataanzhi uninzho balakaba bashaalizhi.”

Jeso Woolilila Munzhi wa Jelusalemu

(Matayo 23:37-39)

31Ku ciindi ceco ncicona, ba Falisi bamwi bakeza kwa Jeso bamwaambila ati, “Kuhwe kono uye kumasena anji, nkaambo mwami Helodi ulazanda kwaamba akuyaye.”

32Pele Jeso wakabaingula ati, “Kamuya mukamwaambile wezo mwaaba ati ndakusha myoza mibiyabi ukushilika malwazhi ubwasunu ulya zona, ubwelimwi ndakamaninzha mulimo wangu. 33Pele nikuba bobo ndyeelele kuya kumbele mu mushinzo wangu bwasunu naaba zona na bwelimwi, kaambo taciluleme kwaamba mushinshimi afwile kunji kutali ku Jelusalemu.

34“Akaka Jelusalemu, Jelusalemu! Uwe nuyaya bashinshimi, ulauma mabwe babo Leza mbakutumina! Shiindi shinji shinji ndaakuzanda kubabunganya bantu bako antoomwi mu matashi angu, ukoya inkuku ifwukatila banayo, pele uwe wakakaka! 35#Inte 118:26Ubobo iŋanda yako lilakaba itongo. Ulimwi ndakwaambila ati, tukamboni linji mpaka cikashike ciindi ceco nuukakaamba ati, ‘Uli u coolwe uzhiza mwizhina lya Mwami.’”

Currently Selected:

Luka 13: ILL

Highlight

Copy