1 Batesalonika 4
4
Kupona bumi bu Mubotela Leza
1Inzho ku mamanino nubakwesu, twakamushimwina kale mbuli mbumweelele kupona u kulilemeka kwaamba muboshezhe Leza, mbuli mbumucita. Inzho tulamulombesha cini cini mu Mwami Jeso kwaamba mutolelele kucita bobo ukubaala. 2Nkaambo mulyeezhi malailile ngutwakamupa kwiita munsana shihwa ku Mwami Jeso. 3Luzando lwa Leza ndwakuti musalale, mushileke shibi sha mamambe. 4Umwi uumwi wenu ulyeelele kuzhiba mbwaayelele kweendelezha mubili wakwe, munzhila isalala yabulemu. 5Mutafwi inyota ya shisushi sha mubili ukoya bantu bakunze. 6Inzho mukaambo kaka kwiina muntu uyelele kubishizha munina mu Mwami. Mbubona mbuli mbutwakamucenjezha kale, Mwami ulakabapa cibebyo boonse bacita shili bobo. 7Nkaambo Leza wakatwitila kusalala kutali kucita shisofweele. 8Ubobo wezo ukaka makani aza, tanyansha bulyo bantu ulanyansha Leza umupa Moza Usalala.
9Inzho kwaamba makani alufwuno akati ka bantu bashomi, tamweelele kulembelwa nkaambo Leza mukamwini wakamuyiisha mbumweelele kufwunana. 10Mu lushinizho mulifunene u bashomi boonse bali mu Masedoniya. Pele tulamuzumya zumya nubakwesu kwaamba mutolelele kucita bobo ukubaala. 11Amusoleke kukala mu luumuno. Muntu umwi uumwi aicizhe shakwe mwini, ulimwi amwaasebezhe matashi enu. Amucite mbubona mbutwakamulailila 12kwaamba bantu bakunze bamupe bulemu, u kwaamba ati mutabi batwanga ba muntu naabani.
Kwiza kwa Mwami
13Inzho bakwesu tulazanda ati mwaazhibe a babo bakafwa, kwaamba ati mutaakuusa ukoya bantu bayina bulanjizhi. 14Nkaambo tulashoma ati Jeso wakafwa ulimwi wakabuka, ubobo tulashoma ati babo bakafwa balashoma mwa Jeso, Leza ulakababusha antoomwi u Jeso. 15#1 Bako 15:51, 52Inzho kwiingaina u mazwi akwe mwini Mwami Jeso, tulamwaambila ati uswe intucipona, intusheele kuya kushika ciindi Mwami Jeso naakakezhiza, tatukababeeleli babo bakafwa kale. 16Nkaambo Mwami mwini lwakwe ulakeza anshi kuhwa mwizeulu. Ulakalailila ca kupozomoka, iizwi ikando lya anjelo, iizwi lya mpeta ya Leza. Babo bakafwa balashoma mwa Kilisito, balakaba bataanzhi kubuka. 17Inzho uswe intusheele intucipona ku ciindi ceco tulakasangana abo mu makumbi ukuswanganya Mwami mu mulenga lenga. Ubobo tulaakala u Mwami shikwense u shikwense. 18Kamulizumya zumya u mazwi aza.
Currently Selected:
1 Batesalonika 4: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.
