Máàrk Yààr Kìn Nyɔ̧ɔ̧́ Máàrk yi tɨnndé
Yààr Kìn Nyɔ̧ɔ̧́ Máàrk yi tɨnndé
Máàrk yi tɨnna Kìn Nyɔ̧ɔ̧́ noò ví̧i̧ nùb yi du bɨ́ Jwîf séé á. Mvókín káàtààb kìn nyɔ̧né kùb ti̧nɨré lâs no, kɨ́ ŋgéé kɨ́ ɨ́ du mbɨ̀m ndu. Káàtà kɨ́ no ŋgə́ nɨ átɨ̀nɨ sà̧à̧ fin Yésùù ɓe mutɨɨr ŋgèè ɗàà. Vùùm sà̧à̧ Yésù yi átɨteekomɓa ŋgo̧ó̧ rɨ, ŋgə́ nɨ no kɨ́kléwa, ɨ́dù ŋgə́ á nɨ́m átɨ̀nànɨ nɨ́ɨ́b Yésù yi ndɨŋndé, hȩ ŋgə́ ya wáaŋtee nɨ̀vɨ́tɨ̀bì, hȩ ŋgə́ ɓe nɨ̀vɨ́tɨ̀b yi ndáŋteekomndé. Máàrk tɨinɓwéetɨ́ nɨ́ɨ́b nùb tɨin kìn nyɔ̧né kù du bɨ́ tɨ̀ìnwáá.
Káàtà Máàrk yi tɨnndé no, ŋgə́ á átɨ̀nɨ àám Yésùù kàk kàk kàk. Yàrénɨ ya̧á̧ ŋgə́ ta Yésù Mwin Mèèín á (gɔ̀ 1.1). Péín cáŋhɨ̀r kìn no kíì, ŋgə́ ta Mwin Mèèín kúú bɨ̧̀ɨ̧́ kpáŋhîn (gɔ̀ 15.39). Yàrénɨ gɔ̀ 1 há̧á̧ gɔ̀ 8.26: gbɨ́ktèìn yàyɨ̀rí káàtà kíì á kí. Máàrk á tànɨ gbɨ́ktèìn kɨ́ no hȩ Yésù du ɗúwa kùb ɗə̀ə̀ŋkɔ́ɔ̀ na á ní du. Ŋgə́ á wáàŋnɨ nɨ̀yáàb, ŋgə́ á jùkɨ́nànɨ nɨ̀vɨ́tɨ̀b nɨ̀wàtɨ̀b só, ŋgə́ á nyìnnɨ ɓe sɨr cúk. Nɨ̀vɨ́tɨ̀b á fɔ́nɨ ɨnè: «Nɨ̀ŋgwá rè mayè na?» Ɨ́dù nùb du lə́ə̀mnɨ vúm ɗəəŋtɨ́ Yésù rɨ, ŋgə́ á ŋgáb tànànɨ ɨnè: «Kpáb, nyí tànàwá nò kù na á mɨ du.» Yàrénɨ gɔ̀ 8.27 há̧á̧ gɔ̀ 16: gbɨ́ktèìn bɨrɨ́bí káàtà kíì á kí. Gbɨ́ktèìn bɨrɨ́bí kɨ́ no, Máàrk á ɗúnɨ kùb ɗə̀ŋhɨ̀ i̧ á Yésù du mwin Mèèín.
Nùb ti Róòm yi du mɨ̀yú̧ú̧ bɨ noò yaá ɗúɓànɨ nùb jííb yi du hȩ mèín bɨ rɨ. Nùb ŋgáb yi du pénɨ hȩ mèín bɨ kɨ́ yaá ndɨ̀ŋtèènɨ nɨ́ɨ́b sɨ̀sɨ̀rí. Nɨ́ɨ́b ŋgáb yi du ndɨ̀ŋtèènɨ kɨ́ yaá ŋgáb gɨ̀nàɓànɨ tíí, ŋgáb yaá ɓáítèèhó̧nɨ jábɨ́r bɨ lâs no.
Nɨ́m mwi̧ Yésù du mwin Mèèín á, ɨ́dù ŋgə́ ə́əmtɨ́ ní nɨ̀vɨ́tè á, ŋgə́ á cè jə̀ŋnɨ Mèín. Kí ɨ́ ndɨŋ ŋgə́ pə́ jábɨ́r há̧á̧ ŋgə́ ɨ́ kû ru. Dugɨ nɨ́ nɨ̀fuùb Yésùù, ŋgáb bɨ ókwa njàb kɨ́ kə́sə́k. Mvókín kùb yi ɓa Yésù bìnɨ àm kwíhe ŋgéé á ŋgáb lumbɨ́kkɨ́so ŋgə́. Sójà Róòm kù yi ɨ́ wáaɓagɨ nɨ́ ɨnè, ɓwâ ŋgə́ yi pə́ Yésù kúniì: «Nɨ̀ŋgwá rè yɨɨ́mmèɓà mwin Mèèín á!»
Ɓwâ Yésù du nyìnnɨ àm ŋgə́ nɨ̀mɨrí sóò, ŋgə́ a ɓécù síí «Mwin Nɨ̀rì». Njàb ɨ́r kíì du «Nò Mèín ya na nyòm ŋgwin nɨ̀vɨ́tɨ̀bì ɓe nyòm tɨ́llí» á. Njàb ɨ́r kíì taɓwée ɨnayâna Yésù yɨɨ́mmèɓà nɨ̀vɨ́tè yáá na á. Njàb ɨ́r kíì á túùmnɨ nɨ́m yoó du Yésù sóò ɓe ə́r ŋgə́ yi go ə́nniì.
Kìn nyɔ̧ɔ̧́ Máàrk yi tɨnndé no fɔ́ á ɨnè: «Yésù macè na?» Sàmàìn nò kù na pìí fɔ́ kíì mu̧u̧ ɗàà. Nɨ́m du káàtà Máàrk yi tɨnndé noò á ndɨ̀ŋnɨ kùb ɗə̀ŋhɨ̀ i̧ á Yésù yi du. Káàtà kɨ́ á ndɨ̀ŋnɨ kùb ɗə̀ŋhɨ̀ na á du Yésù.
Currently Selected:
Máàrk Yààr Kìn Nyɔ̧ɔ̧́ Máàrk yi tɨnndé: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon