Máàrk 4
4
Sà̧à̧ gɨ̀gàìnbì Yésù ya átɨré
(Góòmɓwê Mt 13.1-9, Lk 8.4-8)
1Yésù yi yacuréé tɔ̀ɔ̀nɨ àm Mèèín gín ɓáí Gàlìléè. Ŋgə́ ɨ́ lê nɨ́ dùrénɨ kwáìn, ɓetí kùŋkùŋ nɨ̀vɨ́tɨ̀bì yi ɓáawotɨ́ gín nóò. Kwáí kɨ́ yaá ɓárín, nɨ̀vɨ́tɨ̀b á cè ɗàá gín mvúmí. 2Ŋgə́ yaá ŋgáb tɔ̀ɔ̀nànɨ nɨ́ɨ́b ví̧i̧ ɓe gɨ̀gàìn, ŋgə́ ɨ́ tànà ŋgáb: 3«Óknáye, nɨ̀ŋgwá kù ya fó̧ó̧ gìnɨ àànɨ ɓwàá no mwa̧á̧. 4Hȩ ŋgə́ ya du ɓwàá ààniì, íìb kù ɨ́ ɗìtèè bɨ́ jȩ̀ȩ̀, gààì ɨ́ gò kòrɨ̀kɨ́nɨ kí. 5Íìb kù ɨ́ ɗìtèèsê ɓéhí, yá ɗɔ̀ɔ́b ya du jəə́m ɗàwáá; ɗà ŋgáb ɨ́ súnyàŋɓàhâ wòòm, ɓetí ɗɔ̀ɔ́b ya nɨ́ jəə́m ɗàà. 6Ɓwâ mvii ya gbáklé, ŋgáb ɨ́ cə́ŋcùkî lâs, ɓetí gwàáŋ ŋgábè ya bɨ́ ɗàá lȩ́ȩ ɗàà. 7Íìb kù ɨ́ ɗìtèèrê lúŋbín, lúúŋ ɨ́ hàmkɔ́hè, ɗà ŋgáb ɨ́ lámkî íìb kɨ́, íìb kɨ́ ɨ́ dù bɨ́ nɨ́m kù njáàbwá. 8Ɨ́dù íìb kù ya ɗiséé ɗɔ̀ɔ́b nyɔ̧né, ŋgáb ɨ́ sû, ŋgáb ɨ́ hààmè, ɗà ŋgáb ɨ́ pá̧à̧ɓà. Ɓáám kù yi natɨ́ íìb vɨríí ɨ́ cóóŋ, kɨ́b kù íì vii taarɨ́b, kɨ́b kù cè íìb təmərì mwi̧.» 9Yésù ɨ́ tàgì: «Nò du ɓe tó ók àmnì, óktɨ!»
Àm níì á Yésù du átɨ̀nɨ sà̧à̧, gà̧à̧nɨ gɨ̀gàìn no
(Góòmɓwê Mt 13.10-27; Lk 8.9-10)
10Hȩ Yésù ya ŋgɨɨhó̧ gə́nȩ̀né, nùb yi du ŋgéé gín síhé ɓe nɨ̀fuùb cóóŋ ɨ́ bɨrɨ́b lè ɨ́ tà ŋgə́ tànà vúm njàb gɨ̀gàìnbì yáá. 11Kí á Yésù tana ŋgáb ɨnè: «Kɨ́ nyínè Mèín túumnatɨ́ nyí nɨ́m yi du yo̧ó̧ ɓe ɨ́r Ŋgɔ̧́ɔ̧̀ Mèèín. Nɨ́m kɨ́ yaá nɨ yo̧ó̧ ɓwâ yi tíí. Kɨ́ nùb lúu kù, ŋgáb á bɨ ónɨ nɨ́ɨ́b kɨ́ ɓe gɨ̀gàìn. 12Àm:
‹Ŋgáb tií ŋgerɨgi, ŋgáb a dù bɨ́ pə́re.
Ŋgáb tií ókgi, ŋgáb a dù bɨ́ njàb kɨ́ ô á.
Dù u̧ ɗàà ŋgáb yè ɓandɨcuréé Mèín no, ŋgə́ a tɨ́ì ŋgáb!› »
Yésù á nànɨ njàb gɨ̀gàìn du sà̧à̧ tɨ́ɗȩ̀hí̧ noò
(Góòmɓwê Mt 13.18-21; Lk 8.11-15)
13Kí á Yésù tana ŋgáb: «Hȩ nyí du gɨ̀gàìn ndè ókwaá, i̧ á cè nyí ɓa óknɨ kɨ́b meré lâs?» 14«Tɨ́ɗèìn ɗàrɨ́ ahɨ Kìn Mèèín á. 15Nùb kù á fɨ́tîn ɓe ɗɔ̀ɔ́b gín jɨ̀rì Kìn ya ɗisé yá kwe. Ɓwâ ŋgáb ók Kìn kíì, Sátàìn a gò Kìn ŋgábè njɔ̧̀ɔ̧ kɨ́ gàhó̧kɨ́nɨ ɓè mu̧u̧. 16U̧ á ɓwê nùb kù du fɨ́tîn ɓe ɗɔ̀ɔ́b ɓéhíì ɓwàá ɗisé yáà, ɓwâ ŋgáb ók Kìn kíì, ɓè mu̧u̧ ŋgáb a gàm ŋgə́ ɓe mɨ̀tù cúk. 17Ɨ́dù ŋgáb bɨ mbɨ́knɨ Kìn kɨ́ cɨ́ɨ̀mndé ŋgábè sumí ɗàà. Ŋgáb á bɨ ŋgə́ ə́ə̀mhó̧ɗóònɨ mvókín ti ŋgób. Ɓwâ àm yəréé féínna ŋgábè, kɨ́ kù jábɨ́r ɓe ɨ́r Kìn Mèèín ndɨ, ɓè mu̧u̧ ə́ə́m ŋgábè a gù. 18Nùb kù á fɨ́tîn ɓe lúúŋ ɓwàá ɗiré nóò. Ŋgáb yi óktɨ́ Kìn Mèèín, 19ɨ́dù mɨ̀lə́m ju nyɔ̧ɔ̧́ ɗàá hò̧neè ɓe njɔdì du ŋgáb mbáàŋniì, ɓe sunɨ̀b nɨ́ɨ́b kù á léɓwênɨ no, á lámkî Kìn kɨ́. Ŋgə́ a dù nɨ́ nɨ́m kù gòmcɨ̀r. 20Nùb kù á cè gàmnɨ ɓwàá ɗɔ̀ɔ́b nààmí. Ŋgáb á ónɨ Kìn Mèèín, ŋgáb a ə́mnè. Ŋgáb a pá̧à̧ɓà. Ɓáám bɨ kù a nà íìb vɨríí ɨ́ cóóŋ, ɓáám bɨ kù a nà íì vii taarɨ́b, kɨ́b kù a nàcè íì təmərì mwi̧.»
Yésù áá lámbà hȩ túúm, gà̧à̧nɨ gɨ̀gàìn ɓe kí
(Góòmɓwê Lk 8: 16-18)
21Yésù ɨ́ tànàgwà ŋgáb: «Kùb á bɨ́ tòŋnɨ lámbà kùb a dɨ̀ɨ̀rê ŋgə́ kòó siín kɨ́ kù kùb a fúùsê mɨ̀kə́ə̀ŋ ya à? Kùb toŋha ŋgə́ dɨ̀ɨ̀nɨ laŋtɨ̧ɨ̧́ á ye. 22Ɓetí nɨ́m du yo̧né ɓa fó̧nɨ laŋtɨ̧ɨ̧́ á, nɨ́m duce kúllí ɓa dùnɨ vihîn á. 23Nò du ɓe tó ók àmnì, óktɨ!» 24Yésù ɨ́ tànàgwà ŋgáb: «Gə́tɨ̀ná ɓe nɨ́m nyí du ókniì, jɨ̀ nyí na kùŋ nyínè nyər lɨ́, Mèín ɓa nyí nàɓwênɨ u̧ á, ŋgə́ a ɓààrénàkwà nyí kɨ́ kù. 25Ɓetí nò du ɓe nɨ́m kù, ɓa kwàɓààrénɨ á; nò duce ɓe kí ɗàwáá, dugɨ kɨ́ ti ŋgə́ tɨ du ɓe kíí, Mèín ɓa ákɨ́nɨ á.»
Yésù áá nɨ́m ɗo̧ó̧ hȩ túúm, gà̧à̧nɨ gɨ̀gàìn ɓe kí
26Yésù ɨ́ tànà ŋgáb ɨnè: «Ŋgɔ̧́ɔ̧̀ Mèèín á fɨ́tîn ɓe nɨ̀ŋgwá kù yi ahe àndí no mwa̧á̧. 27Cùr kɨ́ no, ŋgə́ gwíngɨ̀ wum cɨ́ɨ́m, ŋgə́ dùgɨ̀ jáŋ mvihin, àndí ŋgə́ ya ahe kɨ́ a súnɨ, a hamce, ŋgə́ nɨ ɗə̀ə̀ŋnɨ hȩ du ndóŋniì ɗàà. 28Ɗɔ̀ɔ́b nɨ̀mɨr á ndɨ̀ŋnɨ nɨ́m ɗo̧ó̧ súhó̧tɨ, ŋgə́ a hàm, ŋgə́ a fɨ̀tè, ŋgə́ a gòm ɗà gum kɨ́ a wàŋgì. 29Ɓwâ mvéín waŋndé, nɨ̀ŋgwá kɨ́ á ánɨ kundi ŋgə́ a téìn mvéín, ɓetí ɓwâ tɨ́ténneé ɗóotɨ́.»
Yésù áá gum mùtáàrdə̀ hȩ túúm, gà̧à̧nɨ gɨ̀gàìn ɓe kí
(Góòmɓwê Mt 13.31-32, 34; Lk 13.18-19)
30Yésù ɨ́ tànàkwà ŋgáb ɨnè: «Ɓe ní á nɨ́m fɨ́tɨ ɗóònɨ Ŋgɔ̧́ɔ̧̀ Mèèín? Gɨ̀gàìn ŋge á nɨ́m fɨ́tɨye gà̧à̧nɨ ɓe ɨ́r kíí? 31Ŋgɔ̧́ɔ̧̀ kɨ́ á fɨ́tîn ɓe íì Mùtáàrdə̀, íì ti kɨ́ á tɨ̀tîí ndóóŋ íìb lâs, 32ɨ́dù ɓwâ kùb ɗoŋndé ŋgə́ ɗàá, ŋgə́ á hàmɓànɨ; ŋgə́ a ndôŋ nɨ́ɨ́b ɗo̧ó̧ lâs du hàmnɨ dáín mwi̧í̧. Taàm noò á hààmɨ̀ɓànɨ ɗà gààì a yà óóŋ ɓoò ya óŋnɨ.»
33U̧ á Yésù yi du tɔ̀ɔ̀nɨ nɨ̀vɨ́tɨ̀b ví̧i̧ ɓe gɨ̀gààìn hȩ kɨ́b nɨ́m ók lè u̧, ŋgə́ yaá ŋgáb gà̧à̧nànɨ gɨ̀gàìn ŋgáb yi fɨ́tɨ ókniì. 34Nyindí kɨ́ lâs ŋgə́ ya nyinnaháce nɨ́ ŋgáb ɓe gɨ̀gààìn á, ɨ́dù ŋgə́ yaá ɓwê wáànànɨ nɨ̀fuùb* noò njàb gɨ̀gààìn kíì lâs, ɓwâ ŋgə́ ɓe ŋgáb meɓa meɓanné.
Yésù ndɨŋtɨ́ kəŋmbə́r ə́ə̀ŋtɨ
(Góòmɓwê Mt 8.23-27; Lk 8.22-25)
35Lɨ́tɔ̧ ye mwi̧ kíì, Yésù ɨ́ tànà nɨ̀fuùb noò ɨnè: «Nɨ́m pèná ɓáá cəə́r.» 36Ŋgáb ɨ́ éímbɨ́kkɨ́sò nɨ̀vɨ́tɨ̀b ɗà ŋgáb ɨ́ hàìngè Yésù kwáí ŋgə́ ya du nóò no. Kwááì kù ɨ́ tùgè ŋgə́ cùrì. 37Kəŋmbə́r tamnì ɨ́ yàrê lámwònɨ mvúúm ku, tɔɔ̀ mvúmí a laŋndéwoce kwáìn hȩ kór ɓa wúùbnɨ rɨ u̧. 38Yésù yaá nɨ wumí kwáìn péín cùrìì, ŋgwé kɨ́kɔ̧̂ ti kù ya kɨ̧́ɨ̧. Nɨ̀fuùb ŋgéé ɨ́ sə̀mnè ŋgə́, ŋgáb ɨ́ tà: «Tá, nɨ́m ɓa ndùknɨ á, nɨ wu só yínɨ ɗàwá à?» 39Yésù ɨ́ sə̀mnè, ŋgə́ ɨ́ pâm kəŋmbə́r, ɗà ŋgə́ ɨ́ tànà mvúm ɓárɨ́nné ɨnè: «Kí ɓè ndúk, dum nyɔ̧́ɔ̧̀!» Kí á kəŋmbə́r yi cɔ̧́, ɗà mvúm ɨ́ kèrɨ̀cù ɗóóŋ. 40Cùr kɨ́ no, Yésù ɨ́ fɔ̂ nɨ̀fuùb noò ɨnè: «Àm níì á nyí du óknɨ vùù? Nyí nɨ ɓe ə́ə́m ɗàyèwá ye!» 41Ɨ́dù ŋgáb yi gbɨɨŋɓatɨ́, ŋgáb ɨ́ yà nyì̧ì̧tèènɨ mvókín ŋgábè no, ŋgáb a tace: «Nɨ̀ŋgwá rè mayè na? Nò kəŋmbə́r ɓe mvúm ɓárɨ́nné duye bɨ́ jə̀ŋnɨ rè!»
Currently Selected:
Máàrk 4: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
