Máàrk 2
2
Yésù ɓátií kɨ̀ɓók kù
(Góòmɓwê Mt 9.1-8; Lk 5.17-26)
1Jíìb yi ndóóŋ ŋgób, á Yésù cuwo nɨ́ Kàpèrnàwûm, nɨ̀vɨ́tɨ̀b ɨ́ ô ŋgə́ á yó. 2Ŋgáb ɨ́ yúksò yó ku ɗéé há̧á̧hó̧ lúu, yɨ́ ɗəllé gurubi ɗàà. Yésù ɨ́ yà ŋgáb tɔ̀ɔ̀nànɨ Àm Mèèín. 3Nùb kù ɨ́ féínsò ɓe kɨ̀ɓók nɨ̀vɨ́tɨ̀b nààsɨ̀b yi hainsona ŋgéé. 4Ɨ́dù víì nɨ̀vɨ́tɨ̀bì yi nɨ́ ŋgáb nàwá mvókín ŋgáb hanndéndóŋ ŋgéé. Á ŋgáb ya wúí wèìɗóòrénɨ ŋgwé dúhéé yɨ́ Yésù yi duré, ŋgáb ɨ́ ndə̀ə̀mndésò pààm kɨ̀ɓók ya du yá gwîn ndè há̧á̧ Yésùù tíí. 5Hȩ Yésù pénɨ ə́ə́m ŋgábè sumíì, ŋgə́ ɨ́ tà: «Mwin móò, cuum wóò á tɨ́in.» 6Nɨ̀gááŋ káàtàbì kù yaá ɓè du̧ú̧, ŋgáb ɨ́ yà lə́ə̀mnɨ ɓo sumí ɨnè: 7«Àm níì á nò rè du nyìnɓáàŋnɨ ɓe ɨ́r Mèèín ɨnè? Na ɨ́ fɨ́tɨce tɨ́nnɨ cum, ɓè du nɨ́ Mèín ŋgə́ mwi̧ séé!» 8Ɓè mu̧u̧ á Yésù yi ɗəŋhȩ mɨ̀lə́m ŋgábè, ŋgə́ ɨ́ fɔ̂ ŋgáb: «Àm níì á nyí du ɓe kúúŋ mɨ̀lə́m kíì? 9Kɨ́ ŋge ma ɨ́ dubɨ́ɨŋ kə́sə́k tànànɨ nɨ̀ŋgwá rè: ‹Cuum wóò á tɨ́in›, kèè ‹Éíwúum còóm, fain pààm woò wu a gì gùr?› 10Ɨ́dù mɨ ɗú nyí ɗə̀ŋhɨ̀ ɨnayâna Mwin Nɨ̀rì á ɓe nyòm tɨ́í cuum ɗàá hò̧neè.» Á ŋgə́ tanagi kɨ̀ɓók kɨ́: 11«Mɨ taá wu éíwú còóm, fain pààm woò, wu a gì wo yó!» 12Ɓè mu̧u̧, nɨ̀vɨ́tɨ̀bì tíí ɓè, kɨ̀ɓók lè ɨ́ éíwû còóm, ŋgə́ ɨ́ fàì pààm noò, ŋgə́ ɨ́ gì. Nɨ̀vɨ́tɨ̀b lâs yi gbɨɨŋtɨ́, ŋgáb ɨ́ mgbíìɓà Mèín cei, ŋgáb ɨ́ tà: «Nɨ́m pə́kɨ́yèwá nɨ́m kù ɨnè!»
Yésù ɓétɨ́ Lèvî
(Góòmɓwê Mt 9.9-13; Lk 5.27-32)
13Yésù yaá gɨ̀cùnɨ gín ɓáí Gàlìléè. Kùŋkùŋ nɨ̀vɨ́tɨ̀bì ɨ́ yà gáísònɨ ŋgə́, ŋgə́ a tɔɔce ŋgáb. 14Ɓwâ ŋgə́ yi du ndóŋniì, ŋgə́ ɨ́ pê Lèvî mwin Àlféè á du̧ú̧ yá kùb njáblɨ làmpóò. Yésù ɨ́ tàndóŋnà ŋgə́ ɨnè: «Tuwom mɨ!» Lèvî ɨ́ éíwû còóm, ŋgə́ ɨ́ tù Yésù. 15Kí á Yésù ɓe nɨ̀fuùb noò yi lə́ tàŋnɨ cɔŋ Lèvî kíì yó. Ɓwâ ŋgáb yi du cɔŋ tàŋniì, nùb ɓáhɨ làmpóò ɓe nùb ɓáŋhɨ́b kù yaá tàŋɓwênɨ cɔŋ ɓe ŋgə́. Ɓetí ví̧i̧, kúúŋ nùb kíì á yi tukom bɨ́ ŋgə́ ru. 16Nɨ̀gááŋ káàtàbì duɓwée Fàrísàbì, ɓwâ ŋgáb yi pə́ Yésù tàŋɓáànɨ cɔŋ ɓe nùb kíì, á ŋgáb yi fɔ́ nɨ̀fuùb Yésùù ɨnè: «Àm níì á tá tɔ̀hí nyínè du tàŋɓáànɨ cɔŋ ɓe nùb ɓáhɨ làmpóò ɨ́ nùb ɓáŋhɨ́b?» 17Ɨ́dù hȩ Yésù yi ók nɨ́ nɨ́m ŋgáb yi nyinndé rèé, ŋgə́ ɨ́ tànà ŋgáb: «Nùb du síí wááŋ bɨ tɨ́ŋgar gáínɨ ɗàà, nɨ̀yáàb ɨ́ du bɨ́ tɨ́ŋgar gáínɨ ru. Mɨ yi mɨ́ gònàwá nùb ɗɨ́ɗɨ̧́, mɨ yi go mɨ ɓe ɨ́r nùb ɓáŋhɨ́bí á.»
Yésù á nyìnnɨ àm jìí ɓɔ̧ɔ̧
(Góòmɓwê Mt 9.14-17; Lk 5.33-39)
18Nɨ̀fuùb* Jâŋ nò kɔhɨ kùb kɔ ə́mní ɓe Fàrísààb yaá jìnɨ ɓɔ̧. Nùb kù ɨ́ gò fɔ́nɨ Yésù ɨnè: «Àm níì á cè nɨ̀fuùb woò du bɨ́ jìnɨ ɓɔ̧ ɗàà, nɨ̀fuùb Jáàŋ ɓe kɨ́b Fàrísàbì á jɨce bɨ́?» 19Yésù ɨ́ pììnà ŋgáb, ŋgə́ ɨ́ tà: «Nyí lə́mne ye gùmní, ɓwâ nɨ̀ŋgwá gùmní du ɓe ɓwàjììb noò ŋgə́ tɨ ɓéworé, ɓwàjììb no kɨ́ a jì ɓɔ̧ ɓwâ ŋgə́ duye ɓe ŋgábè à? Ŋgáb bɨ sàmàìn jɨré ɗàà. 20Ɨ́dù ye kù kwá sai, kùb a hàìnhó̧kî nɨ̀ŋgwá gùmní ŋgábè tɨŋtɨ̧̀ɨ̧́, ye kɨ́ á gɨ̀ ŋgáb ɓa jɨ̀gɨ̀nɨ ɓɔ̧.
21«Kùb bɨ lààmnɨ júk fìn ɓe pɨ́cî júk hehí ɗàà. Ɓetí óo kùb ndɨŋtɨ́ u̧, júk heé ɓa nɨ nyə́ə̀mcùnɨ, ɗà ŋgə́ a àmyátɨ̀kî nɨ́ kɨ́ fìn á. 22Kùb cè bɨ́ fòŋndénɨ súm heé sɨ̀ɓɨ̀ŋ fɨ̀nní ɗàà, ɓetí óo kùb ndɨŋtɨ́ u̧, súm a ɔ̀kkî nɨ́ sɨ̀ɓɨ̀ŋ kɨ́, kùb a mə̀mgì sɨ̀ɓɨ̀ŋ ɓe súm cúk. Ɗúhá nɨ́ kùb fòŋndé súm heé sɨ̀ɓɨ̀ŋ hehí á!»
Yésù á nyìnnɨ ɓe ɨ́r ye Sàbáà
(Góòmɓwê Mt 12.1-8; Lk 6.1-5)
23Ye Sàbáà, Yésù yaá ndóŋnɨ mwaai mɨ́ŋgòŋnì no, nɨ̀fuùb noò a weegece ɓáám mɨ́ŋgòŋnì yi dutee gín jɨ̀rì. 24Á Fàrísààb ya fɔ́ Yésù ɨnè: «Àm níì á nɨ̀fuùb woò duce ndɨ̀ŋnɨ nɨ́m ɓíì nɨ́mè du kààŋnɨ ye Sàbáà?» 25-26Yésù ɨ́ pììnà ŋgáb ɨnè: «Nyí ya fainhaá nɨ́m Dàvît yi ndɨŋ ɓwâ Àbìyàtáàr yi du kɨ̀jíri* na satɨgà dúú Mèèín ye? Cɨ̧̀ yi nóóm Dàvît ɓe nùb noò. Ŋgə́ ɨ́ lê dúú Mèèín no, ŋgə́ ɨ́ tàŋ bɨ̀rê múbí ɓíì yi ta nò kù tàŋwá, sé nò na satɨgà dúú Mèèín. Ɨ́dù Dàvît ɨ́ tàŋ, ŋgə́ ɨ́ nàɓwê nùb noò.» 27Yésù ɨ́ tànàkwà ŋgáb ɨnè: «Mèín yi na nɨ̀vɨ́tè ye Sàbáà ɓe ɨ́r dùnyàáŋ á, nɨ ye Sàbáà sé ɨ́ du kɨ́nɨ nɨ̀vɨ́tè. 28Àm kɨ́ á Mwin Nɨ̀rì du kɨ́ɨ́nɨ dùgɨ̀ ɓwê ye Sàbáà kɨ́ ru.»
Currently Selected:
Máàrk 2: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
