Máàrk 11
11
Yésù léé Yèrúsàlèm
(Góòmɓwê Mt 21.1-11; Lk 19.28-40; Jŋ 12.12-19)
1Ɓwâ ŋgáb ya ŋgóble féínnɨ Yèrúsàlèèm, ŋgáb á cɨ̀ gín Bètfàjê ɓe Bètàníì, wɨ́índóŋnɨ gín ɓe Òlìvíyéè rɨ. Yésù ɨ́ tómsòyàyè nɨ̀fuùb noò bɨrɨ́b tíí, 2Ŋgə́ ɨ́ tà: «Gɨnáam kwɨ́í tíí hò̧ rè no, lə́sònɨ kwé, nyí ɓa kwànɨ mwin tɨ́ha̧ní nò kù du yá wɨ́íkɨ́yèwáá lí̧í̧ súuŋ á. Pàrɨ̀wònàná mɨ ŋgə́. 3Nò kù ɨ́ fɔ̂ nyí: ‹nyí parɨge ŋgə́ ŋga?›, tananáam nò kɨ́: ‹Kéké ɨ́ du ɗúnɨ ru. Ŋgə́ á ŋgə́ tómcùwònɨ ɗàrò ɗàrò.› »
4Ŋgáb ɨ́ gɨ̀hácè, ŋgáb ɨ́ kwà mwin tɨ́ha̧ní súuŋ gín jɨ̀rì, ɓavɨ̀r kù ya. Ŋgáb ɨ́ pàrè. 5Nùb kù mvókín nùb ya du ɓèé ɨ́ fɔ̂ ŋgáb: «Nyí ndɨŋ ɓè ní? Nyí parɨge mwin tɨ́ha̧ní kɨ́ ŋga?» 6Ŋgáb ɨ́ tànà nùb kɨ́ hȩ Yésù ya taré, kí á nùb kɨ́ ya mbɨ́k ŋgáb gìnɨ. 7Ŋgáb ɨ́ gènà Yésù mwin tɨ́ha̧ní kɨ́, ŋgáb ɨ́ àìwû júúb ŋgábè no njumí ɗà Yésù ɨ́ dùrê ya. 8Nɨ̀vɨ́tɨ̀b ví̧i̧ ɨ́ àìtèèsòɓà júúb ŋgábè jȩ̀ȩ̀, nùb kù jùúb yɔ̀ɔ ŋgáb ya weeteewo mwaibɨnne. 9Nùb yi du gìnɨ tíí ɓe nùb yi du gònɨ cùrìì ɨ́ yà gbə̀mnɨ ɨnè: «Hòsánà, mgbíí dù ɓe Mèín, Mèín nò du Kékéé fàm nò ŋgə́ tómwo ɗàrɨ́! 10Mɨ yóóŋ Mèín ŋgə́ fàm ŋgɔ̧́ɔ̧̀ du gònɨ kɨ́, ŋgɔ̧́ɔ̧̀ tá nɨ́mè Dàvît á. Hòsánà, mgbíí dù ɓe Mèín há̧á̧ ɓɨllin còóm cóo!» 11Yésù ɨ́ lê Yèrúsàlèm, ŋgə́ ɨ́ gì Dúú Jíri Mèèín. Ɓwâ ŋgə́ yi góomcáŋhȩ nɨ́ɨ́b yó kwe, á ŋgə́ fó̧ gìnɨ Bètànî, ŋgə́ ɓe nɨ̀fuùb noò, ɓetí mvii yaá cɨ̀ nɨ gi̧í̧.
Yésù káttɨ́ mɨ́cin fìgìyéè
(Góòmɓwê Mt 21.18-19)
12Hȩ ye yi sallé, ŋgáb éícùwònɨ Bètànî, cɨ̧̀ yaá Yésù nómnɨ. 13Á ŋgə́ pə́so mɨ́cin fìgìyéè kù, ŋgə́ ɨ́ gì góòmnɨ, ní yè ɓa kwànɨ gum ya kè; ɨ́dù ŋgə́ ɨ́ dù nɨ́ nɨ́m kù ya kwàwá, sé kehɨ́b kɨ́ kehɨ́b, ɓetí ɓwâ yɔ̀ kɨ́ gomndé yi nɨ́ ɗóòyèwá. 14Kí á Yésù ta ɓe mɨ́cin kɨ́: «Nò kù kwá nɨ gum woò tàŋcɨ̀r!» Nɨ̀fuùb noò a ókkɨ́ce.
Yésù á Dúú Jíri Mèèín no
(Góòmɓwê Mt 21.12-17; Lk 19.45-48; Jŋ 2.13-22)
15Ŋgáb ɨ́ féíncù Yèrúsàlèm, Yésù ɨ́ lê Dúú Jíri Mèèín, ɗà ŋgə́ ɨ́ yà jùhó̧kɨ́nɨ nùb yi du sə́rɨ̀nɨ nɨ́ɨ́b yó kwe ɓe nùb yi du gwɨ̀ìnɨ nɨ́ɨ́b kíì. Ŋgə́ ɨ́ yà njóklèèsékɨ́nɨ tə́bə̀rɨ̀b nùb cə́ndɨ mònéè ɓe síyààb nùb sə́rɨ mɨ̀lúbì lâs ɗàá, 16ŋgə́ ɨ́ kàŋhȩ̀ ŋgáb hà̧à̧nɨ nɨ́ɨ́b Dúú Jíri Mèèín no, fó̧ndóŋnɨ ɓe kí péín kù. 17Ɗà ŋgə́ ɨ́ yà ŋgáb tɔ̀ɔ̀nɨ ɨnè: «Mèín tahaá káàtà noò no: ‹dúú móò nɨ dúú mɨ̀yú̧ú̧ nùb ɗàá hò̧neè lâs á.› Ye? Ɨ́dù kɨ́ nyínè, nyí settɨkíí dúú kɨ́ dù mgbààŋ ŋgàyíbì!»
18Ɓwâ mvènnɨ́b nùb na satɨgàà, ɓe nɨ̀gááŋ káàtàbì yi ók u̧nèé, ŋgáb ɨ́ yà mánɨ kɨ̀cáàb ŋgáb ndɨŋ kùb kwíhɨ̀ Yésùù. Ɓetí ŋgáb yi óó vùù hȩ nɨ̀vɨ́tɨ̀b yi gbɨɨŋɓa ɓe tɔ̀ɔ́ Yésù yi du tɔ̀ɔ̀niì rè.
19Ɓwâ lɨ́tɔ̧ yi kerɨré, Yésù ɓe nɨ̀fuùb noò ɨ́ éíhó̧kî bɨ́ kwé ku.
Yésù ɓe mɨ́cin fìgìyéè yi cə́ŋndé
(Góòmɓwê Mt 21.20-22)
20Yekɨ́rɨ̀b, ɓwâ ŋgáb yi du ndóŋnɨ jȩ̀nè, á nɨ̀fuùb pə́so mɨ́cin fìgìyéè tɨ hwè cə́ŋkɨ́ɓatɨ́ ɓe gwàáŋ cúk. 21Hȩ Píyéèr lə́əmcu nɨ́m tɨ ndóŋ ɓe mɨ́cin yɔ̀ kíì, ŋgə́ ɨ́ tànà Yésù: «Tá, pə́soye mɨ́cin yɔ̀ wu tɨ káí hwè cə́ŋtɨ́ nɨ́.» 22Yésù ɨ́ tànà nɨ̀fuùb noò: «Ə́əmnáam Mèín. 23Mɨ tanaɓa nyí àmɨɨr wááŋ á: nò kù ɨ́ tànà ɓe rè, ‹éíkɨ́ ɓè, gɨm gùrénɨ mɨ̀kwehɨ̀rí› ŋgə́ ɨ́ dù ɓe mɨ̀sə́ndɨ̀r sumí ɗàà, ŋgə́ ɨ́ dùmèɓà ə́ə̀mnɨ nɨ́m ní ta kɨ́ ɓa ndɨ̀ŋnɨ á na rɨ, nɨ́m kɨ́ a ndɨ̀ŋmè u̧nè. 24Ɓe àm kɨ́ á mɨ tana nyí: Nɨ́m nyí du ɓwèìnɨ ɓwâ nyí du Mèín yóŋniì, sə̀ŋná gíí nyínè sumí, nyí kwacií nɨ́ nɨ́m kɨ́. Mèín ɓa nyí nàmènɨ á. 25Ɓwâ nyí du Mèín yóŋnɨ kɨ́, nyíne nò kù ɨ́ dù ɓe nyindí, tɨ́íná nò kɨ́, àm Tá nyínè du ɓɨllɨnne a tɨ́ínàɓwê nyí cum nyínè. 26[Ɨ́dù nyí ɨ́ dù nɨ́ nùb kù tɨ́íwa, Tá nyínè du ɓɨllɨnne tɨ̀ nɨ nyí tɨ́ícée.]»
Nyòm Yésùù goye ŋga?
(Góòmɓwê Mt 21.23-27; Lk 20.1-8)
27Ŋgáb ɨ́ féíncù Yèrúsàlèm. Yésù ɨ́ lê Dúú Jíri Mèèín, ŋgə́ ɨ́ yà yə̀ŋtèènɨ. Á mvènnɨ́b nùb na satɨgàà ɓe nɨ̀gááŋ káàtàbì ɨ́ kɨ̀jííb kù go gín nóò. 28Ŋgáb ɨ́ fɔ̂ ŋgə́: «Ɓe kúúŋ nyòm ŋge á wu duye nɨ́ɨ́b lè ndɨ̀ŋnɨ? Na ɨ́ naɓacéye wu nyòm wu ndɨŋ nɨ́ɨ́b kíì?»
29Kí á Yésù piina ŋgáb: «Mɨ á nyí fɔ́nɨ fɔ́ mwi̧ ɗóò, nyí ɨ́ pììnà mɨ, mɨ a tànàgì nyí nyòm mɨ du ndɨ̀ŋnɨ nɨ́ɨ́b kɨ́ ɓe kíí. 30Na á yi tómwo Jâŋ gò kɔ̀ɔ̀nɨ kùb kɔ ə́mní, Mèín kèè nɨ̀vɨ́tɨ̀b? Pììnàná mɨ.» 31Á ŋgáb yaré nyì̧ì̧nɨ mvókín ŋgábè no, ŋgáb ɨ́ tà: «Nɨ́m ɨ́ tà: ‹Mèín yi ɨ́ tómwo Jâŋ ndu›, ŋgə́ ɓa nɨ́m fɔ́nɨ: ‹àm níì á nɨ́m yi duce àm ŋgéé ɓɔ̧ne ə́ə̀mwá?› á. 32Nɨ́m ma ɓa tànɨ: ‹nɨ̀vɨ́tɨ̀b kèè›?» (Vùù yaá ŋgáb bìnɨ ɓe kùŋkùŋ nɨ̀vɨ́tɨ̀bì, ɓetí nùb lâs ya taá Jâŋ dumeɓa tɨ́kìn Mèèín á.) 33Á ŋgáb yi piina Yésù ɨnè: «Nɨ́m nɨ ɗə̀ə̀ŋwá.» Kí á Yésù yi tana ŋgáb: «Àà, mɨ ma mɨ nyí tànàɓwêcénɨ nyòm mɨ du ndɨ̀ŋnɨ nɨ́ɨ́b kɨ́ ɓe kíí ɗàà.»
Currently Selected:
Máàrk 11: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
