Lúkàs Yààr Kìn Nyɔ̧ɔ̧́ Lúkàs yi tɨnndé
Yààr Kìn Nyɔ̧ɔ̧́ Lúkàs yi tɨnndé
Nò tɨin káàtà rèè, ɨ́r noò á Lúkàs. Ŋgə́ tɨnntɨ́ káàtààb bɨrɨ́b. Ŋgə́ tɨín káàtà kìn nyɔ̧né, ŋgə́ ɨ́ tɨ̀ìnkwà káàtà ə́rɨ́b nùb tómé yi ə́llé. Káàtà yàyɨ̀rí, ŋgə́ tɨnna nùb du bɨ́ Jwîf séé du bɨ́ nyìnnɨ gɨrêk lɨ á. Ŋgə́ á ŋgáb tànànɨ njàb sɨ̀ɨ̀ŋ nyindíí bɨ du yɔ́klîn. Ŋgə́ á ŋgáb tànàkwànɨ ɗɨ́m Jwîf bɨ ŋgáb du bɨ́ ɗə̀ə̀ŋwáá. Hȩ dùnɨ u̧nèé, nùb ɗɔ̀ɔ́b lè no bɨ̂ŋ du bɨ́ Jwîf séé, dùgɨ̀ nùb ɗàròò, dùgɨ̀ nùb ɓwâ ŋgeè lâs, á sàmàìn ŋgáb ɗəŋhȩ ɨnayâna Yésù du tɨ́ɓə́r ŋgábè á.
Kìn nyɔ̧ɔ̧́ Lúkàs yi tɨnndé á ɓáàkɨ́nɨ njàb kìn nyɔ̧ɔ̧́ taarɨ́b yàyɨ̀rí rè. Ɨ́dù kɨ́ Lúkàs lè á nɨ nyìnhó̧ɗóònɨ gùr Yésù ya gɨ yàwònɨ Gàlìlê há̧á̧ Yèrúsàlèèm (Gɔ̀ 9.51 há̧á̧ 19.28). Sà̧à̧ gùr Yésù yi gɨ Yèrúsàlèm yɨ́ ŋgə́ yi ɓa kúniì kɨ́ no, Lúkàs á átɨ̀nɨ sà̧à̧ bɨ kù nùb taarɨ́b kù yi du bɨ́ átɨ̀wáá. Hȩ gùr Yésù yi gɨ yɨ́ Máártà ɓe Màríyà rè u̧ (Gɔ̀ 10.38-42), sà̧à̧ ya nɨ̀ŋgwá Sàmàríì rɨ (Gɔ̀ 10.29-37), kɨ́ nɨ̀ŋgwá ya kwacu mwin nóò yi gɨlɔ̧́ré ti̧í̧ rɨ (Gɔ̀ 15.11-32).
Lúkàs á tàɓwênɨ nɨ́m dunaɓa ŋgə́ tíí kìn Yésùù ɓe mè Yésùù noò:
Mèín ɗəəŋtɨ́ u̧: ní duú ɗàà, nùb lâs du bɨ lɔ̧́ɔ̧ á. Àm kɨ́ á ŋgə́ tómwo Yésù Krístù gò ɓátɨ̀nɨ nùb lâs ɓa ŋgə́ ə́ə̀mniì. Yésù góomɓa nɨ íí cei nùb kùb du njə́ə̀niì ya á: cɨcóòm, mucutɨ́b, nùb tiri, nɨ̀yáàb, nɨ̀gwííb.
Nùb ə́mní Lúkàs yi tɨnna káàtà rèè yaámèɓà ɓe njɔdì. Lúkàs á átɨ̀nɨ sà̧à̧ ví̧i̧ Yésù yi átɨ ɓe ɨ́r njɔdìì, hȩ kɨ́ ŋgə́ áte gɔ̀ 12.16-21 ɓe gɔ̀ 16 no rɨ u̧. Ŋgə́ á ɗúnɨ ɓè nɨ̀fuùb Yésùù tɨ fɨ́tɨ kɨ́knɨ njɔdì ŋgábè ɓe ɨ́r ə́r Mèèín, ɓe ɨ́r kùŋ mwin yàá ɓwê.
Nɨ̀fuùb Yésùù á gùrí jȩ̀ȩ̀ ɓe ŋgə́, ŋgáb á kə́sə́k cə́ndɨ̀nɨ ɗɨ́m, ŋgáb ɗəəŋtɨ́ ɨnayâna Mèín á njɔ̧̀ nyɔ̧ɔ̧́, ŋgə́ á cè ɗúnɨ nɨ̀vɨ́tɨ̀b lâs. Ti nùb Róòm du nó ŋgáŋniì, nùb ti kɨ́ noò á tànɨ ɨnè: «Mvèìn kàm jíri du Kéké á.» Ɨ́dù Nùb ə́mní á tànɨ ɨnè: «Yésù Krístù ɨ́ du nɨ́ Kéké ru.» Nɨ́m mwi̧ Mèín yi səəmcuhó̧ó̧ Yésù cwéé ɗà ŋgə́ ɨ́ nà ŋgə́ nyòm ŋgáŋ nɨ́ɨ́b lâs yaà. Káàtà kìn nyɔ̧né Lúkààs no, ŋgə́ nɨ ɓénɨ Yésù hȩ nùb kù rè ɗàà, ŋgə́ ɓéhá nɨ́ Kéké.
Káàtà kìn nyɔ̧né Lúkàs yi tɨnndé á cɔ̧́rénɨ Yèrúsàlèm (gɔ̀ 24), yɨ́ ŋgə́ yaréceré (gɔ̀ 1 ɓe 2). Yésù túumnaá nɨ̀fuùb noò síí jáŋ, ŋgáb á cè ɓe mɨ̀tù. Yàá ɓwâ Yésù yi yarécɨ dùtèènɨ mɨ̀kùnɨ́nné, ŋgə́ yaácɨ̀ nɨ yúklîn ɓe Nyéhè Mèín yi tómsóworé, Nyéhè Sarîn (gɔ̀ 3 ɓe 4). Nɨ̀fuùb Yésùù ɓa gàmɓwênɨ Nyéhè Sarîn á (gɔ̀ 24.49). Á sàmàìn ŋgáb ŋgəmɓwée nyàŋnjɔ̧̀ Mèèín hȩ Yésù u̧.
Currently Selected:
Lúkàs Yààr Kìn Nyɔ̧ɔ̧́ Lúkàs yi tɨnndé: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon