Lúkàs 8
8
Nɨ̀gub yi háagekom Yésùù
1Cùr kɨ́ no, Yésù ɨ́ gì ɓéètèèsénɨ Kìn Nyɔ̧ɔ̧́ du ɓe ɨ́r Ŋgɔ̧́ɔ̧̀ Mèèín kwɨ́ì jííb ɓe mɨ̀tâín no. Ŋgə́ ɓe nɨ̀fuùb* noò cóóŋ ɨ́ bɨrɨ́b yaá cúk. 2Nɨ̀gub kù ŋgə́ ya jukɨ́na nyéhɨ̀b ɓáŋhɨ́b sóò ɓe nùb ŋgə́ ya wáaŋkɨ́na yâbí yaá ɓwê ɓe ŋgə́: hȩ Màríyà nò Màkdàláà ŋgə́ ya jukɨ́na nɨ̀wàtɨ̀b tɨ́ɓaám só rɨ u̧. 3Jáànə̀ gwi Cùsáà, nò ə́ré Hèrôdə̀, Sùsánà ɓwê, ɨ́ nɨ̀gub kù tèè ya du nàkɨ́nɨ njɔdì ɓoò àm kpɔ́k Yésù ɓe nɨ̀fuùb noò.
Sà̧à̧ gɨ̀gàìnbì Yésù ya átɨré
(Góòmɓwê Mt 13.1-9; Mk 4.1-9)
4Nɨ̀vɨ́tɨ̀b yaá éítèèwònɨ kwɨ́ì lâs no gàìnwònɨ Yésù. Hȩ kùŋkùŋ nɨ̀vɨ́tɨ̀bì ya ɓáhe gín Yésùù, á ŋgə́ nyin ɓe gɨ̀gàìn ɨnè: 5«Nɨ̀ŋgwá kù ya fó̧ó̧ gìnɨ àànɨ ɓwàá no mwa̧á̧. Hȩ ŋgə́ ya du ɓwàá ààniì, íìb kù ɨ́ ɗìtèè bɨ́ jȩ̀ȩ̀, kùb ɨ́ ɗèèrɨ̀kî kɨ́b kɨ́ á gààì go kòrɨ̀kɨ́nɨ. 6Íìb kù ɨ́ ɗìtèèsê ɗɔ̀ɔ́b ɓéhíì. Ŋgáb ɨ́ súnyàŋɓàhâ ɨ́dù ŋgáb ɨ́ cə́ŋcùkî bɨ́ ɓetí ɗɔ̀ɔ́b ya nɨ́ ɓè jəə́m ɗàà. 7Kɨ́b kù ɨ́ ɗìrê lúŋbín, ɓe lúúŋ bɨ kɨ́ ɨ́ hàmwúɓáhè cúk, ɗà lúúŋ kɨ́ ɨ́ lámkî ŋgáb. 8Ɨ́dù íìb kù yi ɗiséé ɗɔ̀ɔ́b nyɔ̧né, ɗà ŋgáb ɨ́ sû, ɓáám jííb ɨ́ pá̧à̧ɓà, ɓáám mwi̧ ɓe íì təmərì mwi̧.» Kí á Yésù kpɔɔrékwa, ŋgə́ ɨ́ tà: «Nò du ɓe tó ók àmnì, óktɨ!»
Àm níì á Yésù du átɨ̀nɨ sà̧à̧, gà̧à̧nɨ gɨ̀gàìn no
(Góòmɓwê Mt 13.10-17; Mk 4.10-12)
9Kí á nɨ̀fuùb Yésùù fɔ́ ŋgə́ njàb gɨ̀gàìn kíì. 10Á ŋgə́ piina ŋgáb ɨnè: «Kɨ́ nyínè Mèín túumnatɨ́ nyí nɨ́m yi du yo̧ó̧ ɓe ɨ́r Ŋgɔ̧́ɔ̧̀ Mèèín. Kɨ́ nùb lúu, ŋgáb á bɨ ónɨ nɨ́ɨ́b kɨ́ ɓe gɨ̀gàìn. Àm:
‹Ŋgáb tií ŋgerɨgi, ŋgáb a dù bɨ́ pə́re.
Ŋgáb tií ókgi, ŋgáb a dù bɨ́ njàb kɨ́ ô.› »
Yésù á nànɨ njàb gɨ̀gàìn du sà̧à̧ tɨ́ɗȩ̀hí̧ noò
(Góòmɓwê Mt 13.18-23; Mk 4.13-20)
11«Njàb gɨ̀gàìn kíì á rè: ɓwàá kɨ́ du kìn Mèèín á. 12Nùb kù á fɨ́tîn ɓe ɗɔ̀ɔ́b gín jɨ̀rì ɓwàá ɗisé yáà. Ɓwâ ŋgáb ók kìn kíì, Sátàìn a gò gàhó̧kɨ́nɨ kìn ŋgábè njɔ̧̀ɔ̧ kɨ́, àm ŋgáb tɨ̀ ə́əmɓaye ŋgáb a ɓárèé. 13Nùb kù á cè fɨ́tîn ɓe ɗɔ̀ɔ́b ɓéhíì. Ɓwâ ŋgáb ók kìn kíì, ŋgáb a gàm ŋgə́ ɓe mɨ̀tù cúk. Ɨ́dù ŋgáb bɨ mbɨ́knɨ kìn kɨ́ cɨ́ɨ̀mndé ŋgábè sumí ɗàà, ŋgáb á bɨ ŋgə́ ə́ə̀mhó̧ɗóònɨ mvókín ti ŋgób. Ɓwâ kɨhɨr kù féínwo rɨ́, ə́ə́m ŋgábè a gù. 14Ɓwàá ɗiré lúŋbɨ́nné du nùb du óknɨ kìn, ɨ́dù féín tə̧ə̧́ ŋgáb a mbɨ̂ njɔdì, ju nyɔ̧ɔ̧́ ɗɔ̀bɨ́nné ɓe mɨ̀lə́mkáín lámkɨ́ ŋgáb, ŋgáb a dùcè bɨ́ gum nyɔ̧ɔ̧́ nàr. 15Ɓwàá ɗisé ɗɔ̀ɔ́b nyɔ̧né du nùb du óknɨ kìn kɨ́, ŋgáb a ô ɓe njɔ̧̀ nyɔ̧ɔ̧́ duɓa kerîn ndɨ á. Ŋgáb á gə́tɨ̀ɓànɨ kìn kɨ́ mîn ɓe jɨ̧ cúk, ŋgáb a nàɓà njáàb nyɔ̧ɔ̧́.»
Yésù áá lámbà hȩ túúm, gà̧à̧nɨ gɨ̀gàìn ɓe kí
(Góòmɓwê Mk 4.21-25)
16«Kùb bɨ tòŋnɨ lámbà kùb a fúùsékî mɨ̀kə́ə̀ŋ ya, kɨ́ kù kùb a kɨ́klékî kòó siín ɗàà. Kùb dɨɨ bɨ ŋgə́ laŋtɨ̧ɨ̧́ á, àm nùb ló yóò lâs a pê mwahí. 17Nɨ́m du yo̧né ɓa fó̧nɨ laŋtɨ̧ɨ̧́ á, nɨ́m duce kúllí ɓa dùnɨ vihîn á, nùb lâs a ɗə̀ŋhȩ̀. 18Gə́tɨnáam ɓe óònɨ́m nyínè! Ɓetí nò du ɓe nɨ́m kù, ɓa kwàɓààrénɨ á, nò duce ɓe kí ɗàwáá, dugɨ kɨ́ ti ŋgə́ tɨ lə́mne ní ɓa dùnɨ ɓe kíí, Mèín ɓa ákɨ́nɨ á.»
Yà ɓe mwin yàáb Yésùù
(Góòmɓwê Mt 12.46-50; Mk 3.31-35)
19Yà ɓe mwin yàáb Yésùù ɨ́ gàìnwò ŋgə́, ɨ́dù mvókín ŋgáb féín yɨ́ ŋgə́ duré ɨ́ dù nɨ́ ɗàà ɓe mɨ̀kwìn kàm nɨ̀vɨ́tɨ̀bì. 20Kùb ɨ́ tàndóŋsònà Yésù ɨnè: «Yà wóò ɓe mwin yàáb woò á lúu ə́ŋhîn, ŋgáb á ɗúnɨ wu pénɨ.» 21Ɨ́dù Yésù ɨ́ tànà nùb lâs ɨnè: «Yà móò ɓe mwin yàáb moò du bɨ nùb ók kìn Mèèín, ŋgáb a ndɨ̀ŋcè nɨ́m kìn kɨ́ taré rɨ á.»
Yésù ndɨŋtɨ́ kəŋmbə́r kàm kù ə́ə̀ŋtɨ
(Góòmɓwê Mt 8.23-27; Mk 4.35-41)
22Ye kù Yésù ɓe nɨ̀fuùb noò yi léé kwáí kù no, ŋgə́ ɨ́ tànà ŋgáb: «Nɨ́m pèná ɓáá cəə́r.» Á ŋgáb ə́llé. 23Ɓwâ ŋgáb yi du gɨ̀séniì, Yésù ɨ́ gwîn nɨ́ wum. Tií na, kəŋmbə́r kàm kù ɨ́ yàrê lámwònɨ mvúúm ku; mvúm ɨ́ yà fò̧rénɨ kwáìn. Ŋgáb yaácɨ̀ bɨ ŋgwé cwéé ya. 24Nɨ̀fuùb ɨ́ ŋgɨ̀ɨ̀sò gín Yésùù sə̀ə̀mnɨ ŋgə́, ŋgáb a tace: «Tá, tá, nɨ́m ɓa ndùknɨ á!» Yésù ɨ́ sə̀mnè, ŋgə́ ɨ́ pámɓà kəŋmbə́r ɓe tɔɔ̀ kàtɨ́b mvúmí rè, ŋgáb ɨ́ kèrè, nɨ́ɨ́b lâs ɨ́ dùcù ɗóóŋ. 25Yésù ɨ́ fɔ̂ nɨ̀fuùb noò ɨnè: «Ə́ə́m nyínè á cè ŋga?» Ɨ́dù vùù ya bií ŋgáb, ŋgáb ɨ́ gbɨ̀ɨ̀ŋɓà bɨ́ cei, á ŋgáb ya tàtèènɨ mvókín ŋgábè no ɨnè: «Nɨ̀ŋgwá rè mayè na! Nò duye nɨ́ pámnɨ kəŋmbə́r ɓe mvúm, ŋgáb a jə̀ŋmè bɨ́ ŋgə́ rè!»
Yésù ɓátɨhó̧ó̧ nɨ̀ŋgwá kù nɨ̀wàtɨ̀bì ŋgáré
(Góòmɓwê Mt 8.28-34; Mk 5.1-20)
26Yésù ɓe nɨ̀fuùb noò ɨ́ féìn ɓáí Gàlìléè cəə́r, ɗɔ̀ɔ́b nùb Jèràsèníì no. 27Hȩ Yésù yi du sónɨ kwánnè, nɨ̀ŋgwá kù éíwo kwéè ɨ́ gàìnwò ŋgə́. Nɨ̀ŋgwá kɨ́ yaá ɓe nɨ̀wàtɨ̀b só; yaáɓàcɨ̀ nȩ̀ȩ́ ŋgə́ yi nɨ́ júk lénɨ ɗàà, ŋgə́ yó gwîn. Ŋgə́ duteeháce nyàbȩ́ȩ́. 28Ɓwâ ŋgə́ yi pə́ Yésùù, ŋgə́ ɨ́ gbə̀k kɨ́ɨ́ŋ, ŋgə́ ɨ́ gùsê Yésùù ɓusiín, ŋgə́ ɨ́ yà wámnɨ ɨnè: «Nɨ́me wu yaye ní ya, wu Yésù Mwin Mèín nò du còóm cóo? Mɨ yóóŋ wu, wu wu mɨ jábɨ́r nàr!» 29Ŋgə́ yi nyin u̧ àm Yésù yi ta nɨ̀wàtɨ̀b éíkɨ́ ŋgéé só rè á. Nɨ̀wàtɨ̀b kɨ́ ya njáaŋkɨ́ɓatɨ́ ŋgə́ gwì ví̧i̧; kùb yaá ŋgə́ kwéílɨ́ŋnɨ ŋgárɨ̀b ɓe gurub ɓe lí tú̧ú̧ àm gə́tɨ ŋgéé, ɨ́dù ŋgə́ a tȩ́ȩ̀kî lí kɨ́, ɗà nɨ̀wàtɨ̀b kɨ́ a gè ŋgə́ yá nɨ̀vɨ́tɨ̀b du ɗàwáá. 30Á Yésù fɔ́ nɨ̀ŋgwá kɨ́ ɨnè: «Ɨ́r woò á i̧?» Kí á ŋgə́ piina Yésù ɨnè: «Ɨ́r moò á ‹kùŋkùŋ.› » Ɓetí ŋgə́ yaáɓà ɓe nɨ̀wàtɨ̀b só ví̧i̧. 31Á nɨ̀wàtɨ̀b kɨ́ yi yóŋɓa Yésù ŋgə́ nɨ vúm njaŋnjɨ̧ɨ̧́ tómndə́ər.
32Gín yɨ́ ŋgáb ya du kɨ́, kpáín kàm ŋgwèé yaá gurub ɓeè mátèènɨ cɔŋ. Kí á nɨ̀wàtɨ̀b lè ya yóŋ Yésù ŋgə́ tómndésò vúm ŋgwèéb kíì só. Á ŋgə́ yi ə́əmna ŋgáb. 33Kí á nɨ̀wàtɨ̀b lè ya éíkɨ́ nɨ̀ŋgwá kíì só, ɗà ŋgáb ɨ́ gì lénɨ ŋgwèéb lè no. Ŋgwèéb kɨ́ ɨ́ ndììsê lùú cɨ́ŋcɨ̧́ɨ̧́, ŋgáb a guuréndóŋce ɓárín, ɗà ŋgáb lâs ɨ́ tɨ̀m. 34Ɓwâ nùb ya gə́tɨkom ŋgwèéb kíì ya pə́ nɨ́m ya ndóŋndé, ŋgáb ɨ́ lù. Á ŋgáb gi átɨ̀nànɨ nùb kwɨ́í jírií ɓe nùb kwɨ́ì cutɨ́bí àm kɨ́. 35Nɨ̀vɨ́tɨ̀b ɨ́ éísò gìnɨ pénɨ nɨ́m tɨ ndóŋndé. Ŋgáb ɨ́ féìn gín Yésùù, ŋgáb ɨ́ kwà nɨ̀ŋgwá nɨ̀wàtɨ̀b tɨ éíkɨ́ só rè Yésùù ɓusiín du̧ú̧ júk só cɨ̀, kɨ̀cáàb ŋgwȩ́ȩ́ hàrák cùcé. Vùù ɨ́ bɨ̀ɓà nɨ́ nɨ̀vɨ́tɨ̀b. 36Nùb ya pə́ nɨ́ɨ́b ya ndóŋndé lâs ɨ́ átɨ̀nà nɨ̀vɨ́tɨ̀b hȩ tɨ ndɨŋ nɨ̀ŋgwá nɨ̀wàtɨ̀b só rè ɨ́ wáŋhȩ̀ȩ́. 37Kí á nùb ɗɔ̀ɔ́b kɨ́ noò yi ta Yésù ŋgə́ éíkɨ́nɨ vúmè ɗɔ̀bín yáá, ɓetí vùù ya bɨɓatɨ́ nɨ́ ŋgáb. Yésù ɨ́ lê nɨ́ kwáìn gìnɨ. 38Nɨ̀ŋgwá nɨ̀wàtɨ̀b ya éíkɨ́ só rè ɨ́ yôŋ Yésù ɨnè: «Yée! Mɨ ɗú nɨ́me wu dùtèètɨ.» Ɨ́dù Yésù ɨ́ dù nɨ́ ə́ə̀mwá, á ŋgə́ tana nɨ̀ŋgwá rè: 39«Gɨcum wo yó, wu a átè nɨ́m Mèín ndɨŋna wé lâs.» Kí á nɨ̀ŋgwá kɨ́ ya gi kwé, ŋgə́ ɨ́ átɨ̀tèè nɨ́ɨ́b Yésù ya ndɨŋna ŋgéé lâs.
Yésù ɓátií nɨ̀gwi kù, ŋgə́ ɨ́ sə̀ə̀mcùnà Jàhìrûs mwin nóò nɨ̀gwi
(Góòmɓwê Mt 9.18-26; Mk 5.21-43)
40Ɓwâ Yésù cuwo ɓáá cəré, kùŋkùŋ nɨ̀vɨ́tɨ̀bì ɨ́ gàìn ŋgə́, ɓetí ŋgáb yaá ŋgə́ móŋkɨ́nɨ. 41Á nɨ̀ŋgwá kù ɨ́r yi du Jàhìrûs féínndéso. Ŋgə́ yɨɨ́m mvèìn dúú mɨ̀yú̧ú̧ kwɨ́í kɨ́ noò á. Ŋgə́ ɨ́ gùcáàmsê Yésùù ɓusiín, ŋgə́ ɨ́ yôŋ Yésù gò níì yó, 42àm kpòk muní noò nɨ̀gwi yi ducɨ nɨ́ ndáŋnɨ ɓe cwéé, mwɨi kɨ́ yaá sàmàìn du ɓe dáín cóóŋ ɨ́ bɨrɨ́b.
Ɓwâ Yésù yi ə́llé gìnɨ yó kwe, nɨ̀vɨ́tɨ̀b ɨ́ yà ŋgə́ ɓálɨ̀nɨ. 43Nɨ̀gwi kù ŋgáár ɓandîn ya meré só há̧á̧ dáín cóóŋ ɨ́ bɨrɨ́b yaá ɓè. Ŋgə́ ya ɓáaŋkɨ́ɓatɨ́ mwèìn no ŋgáréè lâs, ɨ́dù nò wáŋhȩ ŋgéé ɨ́ dù nɨ́ sə̀mwá. 44Ŋgə́ ɨ́ gò Yésùù cùrì, ŋgə́ ɨ́ dì̧nè tó júú ŋgéé. Ɓè mu̧u̧ ŋgáár ɓandîn no kɨ́ ɨ́ cɔ̧̂. 45Yésù ɨ́ fɔ̂: «Na ɨ́ di̧ne mɨ?» Nùb lâs ɨ́ càm, á Píyéèr tana Yésù ɨnè: «Tá, wu pə́wa vùùm kàm nɨ̀vɨ́tɨ̀b du wu ɓálɨ̀nɨ rè à.» 46Kí á Yésù tacuna Píyéèr: «Nò kù di̧nɨháá mɨ, ɓetí mɨ péé nyòm kù fó̧tɨ́ nɨ́ mɨ só.» 47Nɨ̀gwi rè ɨ́ pê kùb ɗəəŋtɨ́ bɨ́ ní ɨ́ ndɨŋ nɨ́m kɨ́ ru, á ŋgə́ gogi gùcáàmsénɨ Yésùù ɓusiín, ŋgə́ a nɨɨŋce. Nɨ̀vɨ́tɨ̀bì lâs tíí ɓè, ŋgə́ ɨ́ tànà Yésù àm níì á ní tɨ di̧nɨ ŋgə́, ŋgə́ ɨ́ tàɓwê hȩ yáb noò tɨ cɔ̧́ɓa ɓè mu̧u̧. 48Kí á Yésù tana ŋgə́ ɨnè: «Mwin móò, ə́ə́m wóò ɓátií wu. Gɨ̀ mîn yáà.»
49Yésù á cè nyìnkɨ́yènɨ á tɨ́pénè éíwo Jàhìrúùs yóò féínwo, gònɨ tànànɨ Jàhìrûs ɨnè: «Mwin wóò kútɨ́, wu wu tá tɔ̀hí jábɨ̀kwàcɨ̀r.» 50Ɨ́dù Yésù ɨ́ ô nɨ́ àm kɨ́, á ŋgə́ tana Jàhìrûs ɨnè: «Wu wu vùù ô, sə̀ŋɗóò gíí ɓe ə́ə́m. Ŋgə́ ɓa ɓáínɨ á.» 51Ɓwâ Yésù yi féínso yóò, ŋgə́ ɨ́ dù nɨ́ mbɨ́kwa nùb lâs lə́sò ɓe ŋgə́, jɔ̀sé Píyéèr, Jâŋ, Jâk, tá muní ɓe yà muní. 52Nùb lâs yaá kɨ́kɨ́rí, ŋgáb a yíce só ɓe ɨ́r mwɨi kíì. Kí á Yésù tana ŋgáb ɨnè: «Nyí nɨ kɨ̂r, ŋgə́ nɨ kúwa, ŋgə́ gwín nɨ́ wum á.» 53Ŋgáb ɨ́ yà ndɨ̀ŋnànɨ Yésù mɨ̀cə́ŋkáín, ɓetí ŋgáb yi ɗəəŋɓatɨ́ bɨ́ ɨnayâna mwɨi lè kúú nɨ́. 54Ɨ́dù Yésù ɨ́ ɗàmwû mutí, ɗà ŋgə́ ɨ́ tà ɓe kúu còóm ɨnè: «Mwin móò, éíwúum còóm!» 55Mwɨi lè ɨ́ sə̀ə̀mcù, ŋgə́ ɨ́ éíwû còóm ɓè mu̧u̧. Á Yésù ta kùb nà ŋgə́ cɔŋ yáá. 56Tá ɓe yà mwɨi lèè ɨ́ gbɨ̀ɨ̀ŋɓà bɨ́ cei. Ɨ́dù Yésù ɨ́ tà ŋgáb bɨ nò kù nɨ́m ndóŋ kɨ́ tànàr.
Currently Selected:
Lúkàs 8: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
