Lúkàs 23
23
Kùb geé Yésù Pìláàt tíí
(Góòmɓwê Mt 27.1-2, 11-14; Mk 15.1-5; Jŋ 18.28-38)
1Nùb ɓáhɨ́r ŋgwìn jírií ɨ́ éíwû, ŋgáb ɨ́ tà kùb gèsò Yésù Pìláàt tíí yáá. 2Féín ku, ŋgáb ɨ́ yà ŋgə́ àám só tȩ́nɨ̀rénɨ ɨnè: «Nɨ́m péé nɨ́ nɨ̀ŋgwá rè á njóònɨ nɨ̀vɨ́tɨ̀b ndɨ̀ŋ ŋgwé ɓáŋhîn. Ŋgə́ ta nɨ́m nɨ mvèìn kàm jíri làmpô njáàbnàr. Ŋgə́ ɨ́ tàkwà, ní nɨ̀mɨr ní Mèsî á, kí ta mvèìn jíri na á.» 3Pìlât ɨ́ fɔ̂ Yésù ɨnè: «Wu ɨ́ du mvèìn jíri Jwîf ɓoò ru à?» Yésù ɨ́ pìhè ɨnè: «Á hȩ wu ta kɨ́.» 4Á Pìlât tana mvènnɨ́b nùb na satɨgàà ɓe nùb yi du ɓèé ɨnè: «Mɨ mɨ pə́wa ɓáŋhîn kù nɨ̀ŋgwá rè ndɨŋndé.» 5Ɨ́dù ŋgáb ɨ́ nòmhâ, ŋgáb ɨ́ tà: «Tɔ̀ɔ́ ŋgéé á njóònɨ nɨ̀vɨ́tɨ̀b ndɨ̀ŋ ŋgwé ɓáŋhîn. Ŋgə́ yawo Gàlìlê, ŋgə́ ɨ́ ndóŋtèèwò Jùdê bɨ̂ŋ, á ŋgə́ féínwo hò̧ rè.»
Pìlât tómndóŋtɨ́ Yésù yɨ́ Hèrôdə̀
6Ɓwâ Pìlât yi ók nɨ́m nùb lè yi nyinndé á ŋgə́ ta: «Nɨ̀ŋgwá rè nɨ nò Gàlìléè á hàye?» 7Á kùb tana ŋgə́ Yésù nò Gàlìléè á yáá. Hèrôdə̀ nò yi du kɨ́ɨ́nɨ ɗɔ̀ɔ́b kíì yaácè Yèrúsàlèm ɓè jíìb kɨ́ noò, Pìlât ɨ́ tómndóŋsònà ŋgə́ Yésù. 8Hèrôdə̀ yaá óklɨ́ŋnɨ sà̧à̧ Yésùù, ŋgə́ ɨ́ yà mánɨ ŋgə́ ɗə̀ə̀ŋnɨ. Hȩ ŋgə́ pə́gɨ̀nɨ Yésùù, á ŋgə́ ókɓa mɨ̀tù cei, ŋgə́ ɨ́ yà lə́ə̀mnɨ ní ɓa pénɨ ŋgə́ ndɨ̀ŋnɨ nɨ́m sɨ̀sɨ̀rí kù á. 9Ŋgə́ ɨ́ fɔ́tèèɓà fɔ́ bɨ ví̧i̧, ɨ́dù Yésù ɨ́ dù nɨ́ nɨ́m kù pììwá. 10Mvènnɨ́b nùb nà satɨgàà yaá ɓè, pààŋɓànɨ, ténɨ̀wúhánɨ Yésù àám kàtɨ́b só. 11Hèrôdə̀ ɓe sójààb noò ɨ́ pə́tə̀ə̀ŋkî Yésù, ŋgáb ɨ́ yà ŋgə́ kə́ə̀nɨ. Ŋgáb ɨ́ lə́rə́nà ŋgə́ nyààŋ kàm júk mvènnì kù só, ŋgáb ɨ́ tómcùnà ŋgə́ Pìlât. 12Hèrôdə̀ ɓe Pìlât yi bɨ́ nyàŋkòm, ɨ́dù ye kɨ́, ŋgáb ɨ́ sèì ɓwàjììb.
Ŋgù̧ú̧ téíntɨ́ ɨnayâna kùb kwíì Yésù
(Góòmɓwê Mt 27.15-26; Mk 15.6-15; Jŋ 18.39-19.16)
13 Pìlât ɨ́ ɓê mvènnɨ́b nùb na satɨgàà, ɓe kɨ̀jííb Jwíìf, ɨ́ Jwîf bɨ kù, ŋgə́ ɨ́ tànà ŋgáb: 14«Nyí tɨ gewonaá mɨ nɨ̀ŋgwá rè, nyí ɨ́ tà ŋgə́ á njóònɨ nɨ̀vɨ́tɨ̀b ndɨ̀ŋ ŋgwé ɓáŋhîn na, mɨ ma fɔ́tɨ́ mɨ́ ŋgə́ fɔ́ nyínè tíí hò̧, ɓe ɨ́r àám nyí ténɨwú ŋgə́ só rè, mɨ ɨ́ pê mɨ́ ŋgə́ nɨ nɨ́m kù u̧ ndɨ̀ŋwá. 15Hèrôdə̀ tɨ pə́ɓwéetɨ́ ŋgə́ nɨ ɓáŋhîn kù ndɨ̀ŋwá, àm kɨ́ á ŋgə́ tómcuwona nɨ́m ŋgə́ hò̧ ru. Ɓáŋhîn kù nɨ̀ŋgwá rè ndɨŋ ɨ́ tà kùb kwíìkɨ́ ŋgéé nɨ ɗàà. 16Nɨ́m mwi̧ mɨ á tànɨ kùb jɨ̀m ŋgə́ ɓe lòré, ɗà mɨ a mbɨ́kcù mɨ́ ŋgə́.» [ 17Jùrúb Páskàà lâs, Pìlât yaá ɓe ɗɨ́m áhó̧kɨ́ nɨ̀vɨ́tè mwi̧ nìrì. Nò kɨ́ yɨɨ́mcè nò nɨ̀vɨ́tɨ̀b ɓollé á.] 18Ɨ́dù ŋgáb ɨ́ yàrê gbə̀msònɨ ɨnè: «Kwíhɨm nɨ̀ŋgwá ɗàrɨ́, wu a áhó̧nàbɨ̂ŋ nɨ́m Bàrábàs!» 19(Nì̧ì̧ Bàrábàs kɨ́ yi du àm ŋgə́ yi du nɨ̀mwi̧ mvókín nùb yi ndɨŋ ŋgwé ɓáŋhîn kwéè, ɗà ŋgə́ ɨ́ kwíhè nɨ́ nɨ̀vɨ́tèé á.) 20Pìlât ɨ́ nyìnnàhâ nɨ́ nɨ̀vɨ́tɨ̀b àm ní ɗú mbɨ́knɨ Yésùù. 21Ɨ́dù ŋgáb ɨ́ yà bɨ́ gbə̀mhánɨ, tànànɨ ŋgə́: «Kpáaŋwúum ŋgə́ bɨ̧̀ɨ̧́, kpáaŋwúum ŋgə́ bɨ̧̀ɨ̧́!» 22Kɨ́ gwì taarɨ́bí, Pìlât ɨ́ gàmkwà nyindí, ŋgə́ ɨ́ tànà nɨ̀vɨ́tɨ̀b ɨnè: «Ɓáŋhîn ŋgə́ ndɨŋndé á cè ní? Mɨ mɨ pə́wa kum kù ŋgə́ ndɨŋ ɨ́ tà kwíìré ŋgə́ nó kwe. Mɨ á ndɨ̀ŋɗóònɨ kùb jɨ̀m ŋgə́ ɓe lòré, ɗà mɨ a mbɨ́kcù mɨ́ ŋgə́.» 23Ɨ́dù ŋgáb ɨ́ yà bɨ́ gbə̀mndóŋhánɨ tíí tíí, tànɨ kùb kpáàŋwúhá Yésù bɨ̧̀ɨ̧́. Gbə̀mgbə̀m ŋgábè kɨ́ ɨ́ kɨ́kmè ŋgwé. 24Pìlât ɨ́ tà ní á ŋgáb ə́ə̀mnànɨ ɓoré ŋgábè kɨ́. 25Bàrábàs yi lə́ nìrì àm ŋgə́ yi ndɨŋ ŋgwé ɓáŋhîn ŋgə́ ɨ́ kwíìgwà nɨ̀vɨ́tè rè, hȩ nɨ̀vɨ́tɨ̀b yi ɓwei Pìlât áhó̧nà vúm ŋgéé, ŋgə́ ɨ́ áhó̧nàmè ŋgáb ŋgə́. Ŋgə́ ɨ́ mbɨ́ksònàcè ŋgáb Yésù, ŋgáb ndɨ̀ŋ bɨ ŋgə́ hȩ ŋgáb tɨ ɗúré.
Kùb kpáŋwúú Yésù bɨ̧̀ɨ̧́
(Góòmɓwê Mt 27.32-44; Mk 15.21-32; Jŋ 19.17-27)
26Sójààb yaá gènɨ Yésù kpáàŋwúnɨ bɨ̧̀ɨ̧́. Jȩ̀ȩ̀, ŋgáb ɨ́ ɓàìn ɓe nɨ̀ŋgwá Sìréèn kù ɨ́r yi du Sìmôŋ, ŋgə́ yi cuwokom mwa̧á̧ á. Ŋgáb ɨ́ bì nɨ̀ŋgwá rè, njóòwúnànɨ ŋgə́ ha̧á̧ bàŋ Yésùù mbɨ̧́ɨ̧́, ŋgáb ɨ́ tà ŋgə́ tùrésò Yésù cùrì. 27Kùŋkùŋ nɨ̀vɨ́tɨ̀bì ɨ́ yà tùsénɨ Yésù, nɨ̀gub á cè ŋgáár ŋgwéé saŋnîn kɨ́ígènɨ. 28Á Yésù ɓandɨré ŋgáb íí no, ŋgə́ ɨ́ tànà ŋgáb ɨnè: «Nɨ̀gub Yèrúsàlèèm, nyí nɨ ɓe ɨ́r moò kɨ̂r, kɨ́ínábɨ̂ŋ ɓe ɨ́r nyíne munɨ́b nyínè. 29Ɓetí jíìb kù kwá ɗóhɨ, kùb a tà: ‹Mɨ̀tù á ɓe mámmgbu̧ bɨ, ɓe nùb duye mwin fèìnkɨ́yèwáá!› 30Ɓwâ kɨ́ á gɨ̀ nɨ̀vɨ́tɨ̀b ɓa tànànɨ ɓəb: ‹Təmkɨ́náam nɨ́m!› Ŋgáb a tànàɓwê ŋgòom: ‹Vɨ́rɨkɨ́náam nɨ́m!› 31Ɓetí kùb ma tómgɨ̀ yɔ̀ ŋgìn u̧, ɗóògɨ̀ yɔ̀ cɨ́ŋni à?»
32Ɓwâ kùb yi du gènɨ Yésù kwíìniì, sójààb yi geɓwéetɨ́ nùb ɓáŋhɨ́b bɨrɨ́b, gìnɨ kwíìɓáànɨ ɓe Yésù. 33Ŋgáb ɨ́ féìn yɨ́ kùb du ɓénɨ «Tum ŋgwéé». Ɓè á ŋgáb yi kpáaŋwú Yésù bɨ̧̀ɨ̧́. Ŋgáb ɨ́ kpáàŋwúɓwê nùb ɓáŋhɨ́b bɨrɨ́b lè gín Yésùù, nò kù ŋgáár lame, nò kù cè ŋgáár pène. 34Á Yésù ta: «Bɨ̀bá, tɨ́í wu ŋgáb, ɓetí ŋgáb bɨ ɗə̀ə̀ŋwá nɨ́m ŋgáb du ndɨ̀ŋniì.» Sójààb ɨ́ kàìkî dùr ɓe júúb Yésùù, nò ndóblé a â. 35Nɨ̀vɨ́tɨ̀b yaá ɓè ə́ŋhîn, pénɨ nɨ́m yi du ndóŋniì. Mvènnɨ́b ɨ́ yà kə́ə̀nɨ Yésù, ŋgáb a tace: «Ŋgə́ ya ɓátɨɓaá nɨ̀vɨ́tɨ̀b, ŋgə́ ma ɓátɨ̀cùcé síí ŋgə́ nɨ̀mɨrí kà, ɓè ŋgə́ dumeɓa Mèsî, nò Mèín ya caré!» 36Sójààb yaá ŋgə́ kə́ə̀ɓwênɨ, ŋgáb ɨ́ ŋgɨ̀ɨ̀résò ŋgə́ nó, nànɨ ŋgə́ súm. 37Ŋgáb ɨ́ tà: «Duú ɓe wu du mvèìn Jwîf ɓoò, ɓátɨm síí wu nɨ̀mɨrí ye!» 38Bàŋ ndè ya péín còmné, kùb yi tɨnndéé ɨnè: «Nò rè, mvèìn jíri Jwîf ɓoò á.»
39Nɨ̀mwi̧ mvókín nùb ɓáŋhɨ́b bɨrɨ́b kùb ya kpáaŋwúɓwée bɨ̧̀ɨ̧́ rè, ɨ́ yà àndɨ̀nɨ Yésù ŋgə́ a tace: «Wu wu Mèsî sé à? Ɓátɨm síí wu nɨ̀mɨrí kà, wu a ɓátɨ̀ɓwêcè wú nɨ́m!» 40Ɨ́dù nò kù mwi̧í̧ ɨ́ yètè kùŋ noò, ŋgə́ ɨ́ tà: «Wu wu lùnɨ Mèín ɗàwá à? Jábɨ́r mwi̧ kɨ́ á nɨ́me wu duɓwéeha pénɨ rè ye. 41Kɨ́ nɨ́me wé ma gbák, nɨ́ɨ́b nɨ́m ya ɗòŋ ndɨ̧̀ɨ̧́ rè á nɨ́m ɓáb ɓe kí ru. Kɨ́ noò, ní á ŋgə́ ndɨŋce!» 42Á nɨ̀ŋgwá rè tana Yésù ɨnè: «Yésù, ɓwâ wu ɓa gònɨ ŋgáŋnɨ nɨ̀vɨ́tɨ̀b yaà, pə́wúhá mɨ íí ya.» 43Yésù ɨ́ pììnà ŋgə́ ɨnè: «Mɨ tanaɓa wu àmɨɨr wááŋ á: gùr mɨ du gìnɨ Pàràdî mwáín ndè, nɨ́me wu á gìnɨ cúk.»
Cwá Yésù ya kúré
(Góòmɓwê Mt 27.45-56; Mk 15.33-41; Jŋ 19.28-30)
44-45Péín mvii ŋgwéé na, mvii ɨ́ lɨ̂m. Mɨ̀nɔ̂ɔ́m ɨ́ gù ti kɨ́ bɨ̂ŋ há̧á̧ mvii taarɨ́b lɨ́tɔ̧né, ɗà sànjà júú kùb yi súŋtéínkɨ́ Dúú Jíri Mèèín noò ɨ́ àmndê tə̧ə̧́ bɨrɨ́b. 46Á Yésù kɨ́ŋ kúu còóm ɨnè: «Bɨ̀bá, mɨ nacuréé wu nyéhè moò ŋgáré.» Nyìncáŋhȩ̀ȩ́ u̧nèé, ŋgə́ ɨ́ kû. 47Mvèìn sójàbì yi péé nɨ́m yi ndóŋndé, á ŋgə́ mgbíhe Mèín, ŋgə́ ɨ́ tà: «Nɨ̀ŋgwá rè tɨm mèɓà nò ɗɨ́ɗɨ̧́ á!» 48Nɨ̀vɨ́tɨ̀b ví̧i̧ yi ɓáawotɨ́ ɓè. Ŋgáb ɨ́ pê nɨ́m yi ndóŋndé. Á ŋgáb éícuré ɓe yəré sumí. 49Ɓwàjììb Yésùù, ɓe nɨ̀gub ya háawo ŋgə́ éíwòó Gàlìléè, yaá ə́əŋso̧ó̧, pénɨ nɨ́m yi du ndóŋniì.
Vɨ́rèé Yésùù
(Góòmɓwê Mt 27.57-61; Mk 15.42-47; Jŋ 19.38-42)
50-51Nɨ̀ŋgwá kù yaá ku, ɨ́r noò yaá Yòsə̂b. Ŋgə́ yɨɨ́m nò Àrɨ̀màtéè á, kwɨ́í Jwîf ɓoò. Ŋgə́ yaá njɔ̧̀ nyɔ̧ɔ̧́, ŋgə́ yɨɨ́mcè nò ɗɨ́ɗɨ̧́ á. Ŋgə́ yaácè móŋnɨ Ŋgɔ̧́ɔ̧̀ Mèèín ɓe gíí. Ŋgə́ yɨɨ́mɓwê nò ɓáhɨ́r ŋgwìn jírií noò á. Ɨ́dù nɨ́m kùb noò tɨ́ŋgù̧ú̧ bɨ yi ndɨŋ ndè ɨ́ dù nɨ́ ŋgə́ sumí nyàŋwá. 52Ŋgə́ ɨ́ gì yɨ́ Pìlât, ɓwèìnɨ fín Yésùù. Pìlât ɨ́ ə́ə̀mnà ŋgə́. 53Á ŋgə́ go tànɨ kùb ásónà ní fín kɨ́. Ŋgə́ ɨ́ ɓòmndê ndómbóó, ŋgə́ ɨ́ gì ŋgə́ kɨ́klénɨ sèè kù kùb ya ŋgəllé ɓéhíì no. Sèè kɨ́ kùb ya bɨ́ fín no kɨ́kléyèwá. 54Yɨɨ́m ye jumbarìì á, ye kùb du nyààŋnɨ jùrúb Sàbáà ɓa fó̧nɨ ye sanné. 55Nɨ̀gub yi háawo Yésù yàwòó Gàlìléè yi gií ɓe Yòsə̂b sèrìn ku. Ŋgáb ɨ́ góòmndésò sèrìn, ŋgáb ɨ́ pê hȩ fín Yésùù ya du nó kɨ̧́ne. 56Á ŋgáb gɨcu ŋgábè yó. Ŋgáb ɨ́ nyààŋkî kúrúm ɓe làmɨ́ndà ŋgáb ɓa gìnɨ mììnànɨ fɨ́nní. Ye Sàbáà, ŋgáb ɨ́ ùwèhácè hȩ ɓíì Mòyíìs yi du tàniì.
Currently Selected:
Lúkàs 23: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
