Lúkàs 2

Fin Yésùù

(Góòmɓwê Mt 1.18-25)

1Ɓwâ kɨ́ á mvèìn kàm jíri Ògûs yi ta kùb fàìnnà ní vùùm nɨ̀vɨ́tɨ̀b du ti lâs ní du kɨ́ɨ́niì noò. 2Kìrìnûs á cè gómnà ɗɔ̀ɔ́b Sìríì, á fain yàyɨ̀rí ya ɗóhe. 3Nò lâs yaá gɨ̀cùnɨ no kwé ɨ́r noò tɨ̀nnɨ. 4Kí á Yòsə̂b ya éí Nàsàrêt ɗɔ̀ɔ́b Gàlìléè no, gìnɨ Bétɨ̀lèhêm ɗɔ̀ɔ́b Jùdéè no; yɨ́ kùb ya fein Dàvíìt. Yòsə̂b yi gɨcu ku ɓetí ŋgə́ nɨ̀mɨr yaám nyȩ Dàvíìt á. 5Ŋgə́ ɓe kóóm noò Màríyà ɨ́ gì ku tɨ̀nnɨ ɨ́r ɓoò. Kóóm no kɨ́ yaácè ɓur só. 6Mvókín ŋgáb yi du Bétɨ̀lèhêm ku kɨ́ á jíì fù̧ní Màríyà ya ɗóoréce. 7Ŋgə́ ɨ́ fèìn mwin nɨ̀ŋgwá, yɨɨ́mcè mwin nó ŋgwéé á. Ŋgə́ ɨ́ ɓòmndê ŋgə́ júúŋ ɗà ŋgə́ ɨ́ gúndɨ̀rê ŋgə́ kwáí cɔɔ̀ŋ nyèèmí no, àm ŋgáb ya du bɨ́ kwàwá yɨ́ gúnnè dúú nɨ̀gwíbí noò.

Dùgal Mèèín tanaá nùb túk jírɨ́bí kìn fin Yésùù

8Mwaai yi dutee gə́nȩ̀ȩ́ ɓèé, nùb túk jírɨ́bí yaá gwíntèènɨ no àm gə́tɨ jírɨ́bí. 9Dùgal Mèèín kù ɨ́ túùmnà ŋgáb síí ɗà mwa kàm Kékéé ɨ́ ɓə̧̀sówò ŋgáb ya. Kí á vùù ya bɨɓa ŋgáb cei. 10Ɨ́dù dùgal kɨ́ ɨ́ tànà ŋgáb ɨnè: «Nyí nɨ vùù ô, ɓetí mɨ gewona nyí kìn nyɔ̧ɔ̧́ nɨ̀vɨ́tɨ̀b lâs ɓa ókɓànɨ mɨ̀tù ɓe kíí á. 11Sɨ́mnɨ̀r mwánnè no, kùb feintɨ́ Tɨ́céín nyínè kwɨ́í Dàvíìt no. Ŋgə́ Krístù á, nò du Kékéé. 12Pə́náye lɨ̀m nyí ɓa ŋgə́ no ɗə̀ə̀ŋcùniì á rè: Gɨnáam, nyí ɓa kwànɨ náná kù júúŋ ɓomndȩ́ȩ, kwáí cɔɔ̀ŋ nyèèmí no gúndɨrȩ́ȩ á.»

13Ɓè mu̧u̧, kùŋkùŋ dùgallɨbi éísówo ɓɨllɨnne ɨ́ gò kwànɨ nò tɨ tíí rè. Ŋgáb ɨ́ yà ŋgə̀mnɨ Mèín, ŋgáb a tace ɨnè:

14«Dɨmɨɨr á ɓà ɓe Mèín ɓɨllin còóm cóo.

Ju ɗóóŋ nóò á ŋgə́ naɓwée nùb ŋgə́ ɗúré ɗɔ̀bín hò̧ne ru!»

Nùb túk jírɨ́bí ə́lléé gìnɨ Bétɨ̀lèhêm

15Ɓwâ dùgallɨb Mèèín ya wúícu ɓɨllɨnne, nùb túk jírɨ́bí ɨ́ tà: «Nɨ́m gɨ̀ná Bétɨ̀lèhêm pénɨ nɨ́m ndóŋ ku kɨ́, nɨ́m Kéké tómwo dùgal gò nɨ́m tànànɨ kɨ́.» 16Ŋgáb ɨ́ gɨ̀kɔ́hè ku, á ŋgáb kwa Màríyà ɓe Yòsə̂b. Náná á cè gúndɨrȩ́ȩ kwáí cɔɔ̀ŋ nyèèmí no. 17Ɓwâ ŋgáb pə́ náná rèè, ŋgáb ɨ́ átɨ̀ɓà nɨ́ɨ́b lâs dùgal Mèèín tɨ tana ŋgáb ɓe ɨ́r náná kíì láár. 18Nùb lâs ya ók nɨ́m ŋgáb ya átɨ kɨ́ ɨ́ gbɨ̀ɨ̀ŋɓà cei. 19Ɨ́dù Màríyà ɨ́ gə́tɨ̀rê nɨ́ɨ́b kɨ́ lâs no njɔ̧̀ɔ̧, ŋgə́ a lə́əmce mánɨ njàb nyindí kíì. 20Nùb túk jírɨ́bí ɨ́ éícùrê gùr. Ŋgáb ɨ́ yà mgbíìnɨ Mèín ŋgáb a ŋgəmgece ŋgə́ ɓe ɨ́r nɨ́ɨ́b ŋgáb ya óklé ɓe kɨ́b ŋgáb ya pə́ré lâs. Ɓetí nɨ́ɨ́b lâs ya ndóŋmetɨ́ hàrák hȩ dùgal Mèèín ya tana ŋgábè.

Kùb bɨ́naá Yésù ɨ́r

21Cùr fin kíì, hȩ mutí yi féín jíì sə́rì, kùb ɨ́ lə́nà ŋgə́ ndɨ̀. Kùb ɨ́ bɨ́nà ŋgə́ ɨ́r. Ɨ́r kɨ́ yaá «Yésù», ɓetí dùgal Mèèín ya takɨ́nacií Màríyà ɨ́r kɨ́, ŋgə́ ɓur gàmɓàyèwá.

Màríyà ɓe Yòsə̂b gií túùmnɨ Yésù Dúú Jíri Mèèín no

22Hȩ jíì sàtèé síhé Màríyà ya ɗóoré, ɗóhîn ɓe nɨ́m ɓíì Mòyíìs du tàniì, á ŋgáb yi ge mutí Yèrúsàlèm àm túumna ŋgə́ Kékéé. 23Ɓetí ɓíì Kékéé á tànɨ ɨnè: «Mwin ŋgwéé lâs du nɨ̀ŋgwáà, kùb kwá nakɨ́ Kéké àm mwin kɨ́ a ə́nna ŋgéé.» 24Ŋgáb ɨ́ nàɓwê satɨgà ɓíì Kékéé ta kùb nàte: «Mbàmkéme bɨrɨ́b. Duceé u̧ ɗàà, mɨ̀lúbè du gbákyèwáá bɨrɨ́b.»

25Nɨ̀ŋgwá kù yaá Yèrúsàlèm ku, ɨ́r noò yaá Sìmèyôŋ. Nɨ̀ŋgwá kɨ́ yaáɓà ɗɨ́ɗɨ̧́ Mèèín tíí. Ŋgə́ yaá jə̀ŋɓànɨ ɓíhɨ̀b Mèèín, ŋgə́ a móŋkɨ́cée nò yi ɓa cénnɨ gbàŋ Ísràyéèl. Ŋgə́ yaá yúklîn ɓe Nyéhè Sarîn. 26Nyéhè Sarîn kɨ́ ya tanaá ŋgə́, ŋgə́ kwá péye Mèsî Kéké ya wúrɨna gbám mvènnì mbáb, ŋgə́ a kúgì. 27Nyéhè Sarîn ɨ́ ndɨ̀ŋ Sìmèyôŋ gɨ̀ Dúú Jíri Mèèín no. Ɓwâ Yòsə̂b ɓe Màríyà ya ge Yésù Dúú Jíri Mèèín ku àm túumna ŋgə́ Kékéé, 28á Sìmèyôŋ ya hain mutí, ɗà ŋgə́ ɨ́ sáktè Mèín, ŋgə́ ɨ́ tà ɨnè:

29«Ɗàrò, Kéké, nɨ́m wu ya ɓwállé fó̧tɨ́ hàrák;

á sàmàìn wu mbɨ́kcɨ nò wo ə́ré kúɓàcɨ̀ ɗóóŋ.

30Ɓetí mɨ pə́ɓatɨ́ nò ɓa ɓátɨ̀nɨ nɨ̀vɨ́tɨ̀bì ɓe íí moò.

31Nò wu ya cakɨ́ɓa àm gbààŋ lâs a pêé.

32Ŋgə́ du mwa ɓa ndɨ̀ŋnɨ gbàŋ ɗɔ̀bɨ́nné lâs a ɗə̀ŋhȩ̀ wé á.

Ŋgə́ kwá na gbàŋ woò Ísràyêl dɨmɨɨr.»

Sìmèyôŋ á tànɨ hȩ Yésù kwá duré

33Yòsə̂b ɓe Màríyà yi gbɨɨŋɓatɨ́ ɓe nɨ́m Sìmèyôŋ ya nyin ɓe ɨ́r mwin ŋgábèè. 34Sìmèyôŋ ɨ́ fàm ŋgáb, ɗà ŋgə́ ɨ́ tànà Màríyà yà Yésùù ɨnè: «Ɓe ɨ́r mwin wó rèè, gbàŋ Ísràyéèl no, nùb ví̧i̧ ɓa lɔ̧́nɨ á, nùb kù a kwàcê ɓə́r Mèèín. Ŋgə́ ɓa dùnɨ lɨ̀m Mèèín á, ɨ́dù nɨ̀vɨ́tɨ̀b ɓa ŋgə́ mvúnɨ á. 35Ŋgə́ ɓa ndɨ̀ŋnɨ mɨ̀lə́mkáín du nɨ̀vɨ́tɨ̀b ví̧i̧ njɔ̧̀ne fó̧ mwahí á. Kɨ́ wu nɨ̀mɨrí cè, njɔ̧̀ woò ɓa dùnɨ ɓe yíìnɨ́m á ɗà yíìnɨ́m kɨ́ a ɗì wu mbɨrɨmí.»

Ánà, nɨ̀gwi yi du tɨ́kìn Mèèín

36Nɨ̀gwi kù yaá ku tɨ́kìn Mèèín, ɨ́r noò yaá Ánà. Ŋgə́ yɨɨ́m mwin Fànúwèl á, gbàŋ Àséèr no. Ŋgə́ yaá ɓe dáín só ví̧i̧. Ɓe ŋgwáá yȩné noò ya jə́ə́b dáín tɨ́ɓaám, ŋgwáá kɨ́ ɨ́ kû. 37Ŋgə́ ɨ́ mè mámkwííb, ŋgə́ ɨ́ féìn dáín vii nààsɨ̀b ɨ́ yɔ̀k nààsɨ̀b. Ŋgə́ ya nɨ́ mbɨ́kkòmnɨ Dúú Jíri Mèèín ɗàà. Ŋgə́ yaá jìnɨ ɓɔ̧ ŋgə́ a yóŋlɨ́ŋce Mèín cɨ́m ɓe mvii cúk. U̧ á ŋgə́ ya jəŋkom Mèín. 38Hȩ ŋgə́ ya féínɗóoréso mvókín kɨ́ noò, ŋgə́ ɨ́ yàrê sáktɨ̀nɨ Mèín. Nùb yi du móŋnɨ cénnèé Yèrúsàlèm lâs, ŋgə́ ɨ́ nyìnnà ŋgáb àm Yésùù.

Yòsə̂b ɓe Màríyà gɨcutɨ́ Nàsàrêt

39Ɓwâ Yòsə̂b ɓe Màríyà yi ndɨŋcáŋhȩ nɨ́ɨ́b lâs ɓíì Kékéé du ɗúniì, á ŋgáb gɨcu Nàsàrêt ŋgábè kwé, ɗɔ̀ɔ́b Gàlìléè no. 40Mutí ɨ́ yà hàmnɨ, nyéhè noò a tamce. Ŋgə́ yaáɓà ɓe kɨ̀cáàb cei, Mèín yaácè ŋgə́ ɗúɓànɨ.

Yésù á Dúú Jíri Mèèín no, ŋgə́ acè ɓe dáín cóóŋ ɨ́ bɨrɨ́b

41Dáín lâs, Yòsə̂b ɓe Màríyà yaá gɨ̀lɨ́ŋnɨ Yèrúsàlèm gùr jùrúb Páskàà. 42Hȩ Yésù ya féín dáín cóóŋ ɨ́ bɨrɨ́bí, ŋgə́ ɓe ŋgáb ɨ́ gì, ɓetí yɨɨ́m ɗɨ́m ti̧né á. 43Ɓwâ jùrúb yi cɔ̧́ré, ŋgáb ɨ́ éícùwò gùr, ɨ́dù Yésù ɨ́ mèkɨ́sò nɨ́ Yèrúsàlèm ku. Tá ni ɓe yà ní ya bɨ́ ɗə̀ə̀ŋwá. 44Ŋgáb yi gií gùr píì, ŋgáb ɨ́ lə́mnè Yésù á nɨ ɓe ɓwàjììb no gùrí. Ɨ́dù féín tə̧ə̧́, ŋgáb ɨ́ yàrécì bɨ́ ŋgə́ mánɨ mvókín ɓwàjììb ɓe gbàŋ ŋgábè. 45Hȩ ŋgáb ya du bɨ́ ŋgə́ kwàwáá, ŋgáb ɨ́ ɓàndɨ̀cù másénɨ ŋgə́ há̧á̧ cù Yèrúsàlèm. 46Cùr jíìb taarɨ́bí, ŋgáb ɨ́ gì ŋgə́ kwànɨ Dúú Jíri Mèèín no du̧ú̧ tɨŋtɨ̀ŋ tá tɔ̀hí bɨ Jwîf no, óknɨ tɔ̀ɔ́ ŋgábè, ŋgə́ a fɔ́ɓwéece ŋgáb fɔ́. 47Nùb yi du óknɨ pìí nóò ya gbɨɨŋɓatɨ́ bɨ́ cei ɓetí ŋgə́ yaáɓà ɓe kɨ̀cáàb. 48Ɓwâ tá ni ɓe yà ní yi pə́ ŋgéé, ŋgáb ɨ́ gbɨ̀ɨ̀ŋɓà cei, á yà ní ta: «Mwin móò, ní á wu ndɨŋcɨ nɨ́m ɨnè rè? Njɔ̧̀ vɨndɨréé nɨ́me tá woò ɓɔ̧ɔ̧ ɓe mátèé wé.» 49Á ŋgə́ piina ŋgáb ɨnè: «Nyí tɨ mánakomce nɨ́ mɨ ní? Kèè nyí tɨ nɨ ɗə̀ə̀ŋwá ɨnayâna á ɗúnɨ mɨ dù Tá moò yó à?» 50Ɨ́dù ŋgáb ɨ́ dù bɨ́ njàb nɨ́m ŋgə́ ya ta u̧ kɨ́ ókwa.

51Yésù ɓe ŋgáb ɨ́ gɨ̀cù Nàsàrêt, ŋgə́ ɨ́ yà ŋgáb jə̀ŋlɨ́ŋnɨ. Nɨ́ɨ́b yi ndóŋ kɨ́ lâs, yà nóò ɨ́ gə́tɨ̀rê sumí. 52Yésù ɨ́ yà hàmnɨ, kɨ̀cáàb noò a více. Ŋgə́ ɨ́ yà nyàŋndóŋnɨ Mèín sumí tíí tíí, nɨ̀vɨ́tɨ̀b a ɗúndóŋce ŋgə́ tíí tíí.

Currently Selected:

Lúkàs 2: NTV

Highlight

Copy