Lúkàs 19
19
Yésù ɓe nɨ̀ŋgwá ɨ́r yi du Sàsê
1Yésù yaá ndóŋnɨ kwɨ́í Yèríkò no. 2Nɨ̀ŋgwá kù yaácè kwé ku, ɨ́r noò yaá Sàsê. Ŋgə́ yɨɨ́m mvèìn nùb ɓáhɨ làmpóò á, ŋgə́ yaácè ɓe njɔdì. 3Ŋgə́ yaá mánɨ pénɨ nò kùb ɓé Yésù rè, ɨ́dù hȩ ŋgə́ yi du nɨ́ mbɨ̀m ndèé, yi nɨ́ sàmàìn ŋgə́ pə́so ŋgéé ɗàà ɓe víì nɨ̀vɨ́tɨ̀bì. 4Á ŋgə́ lusokɔ́ɔ tíí, wúíkɨ́nɨ yɔ̀ kù ya, móŋnɨ pénɨ Yésù, ɓetí ŋgə́ yi ɓa ndóŋnɨ ɓè á. 5Ɓwâ Yésù féín mɨ́cin yɔ̀ rèè, ŋgə́ ɨ́ góòmwúsò còóm, á ŋgə́ tana Sàsê ɨnè: «Sówom kɔ́klîn, ɓetí ɗú mɨ gwín wo yó mwáín á.» 6Sàsê ɨ́ sókɔ́ɔ̀hácè, ɓe kùùŋ ɨ́ gì yó. Ŋgə́ ɨ́ gàmɓà Yésù ɓe mɨ̀tù cúk. 7Nùb lâs yi pə́ nɨ́m Yésù yi ndɨŋ kíì ɨ́ ô ɓáŋhîn, ŋgáb ɨ́ yà tànɨ mvókín ŋgábè no ɨnè: «Àmɨɨr à! Nɨ̀ŋgwá rè gií gúnnɨ nò ɓáŋhîn ndè yó à!» 8Sàsê ɨ́ ə́ŋhȩ̀ Yésùù tíí, ŋgə́ ɨ́ tà: «Kéké, péye, gbɨ́ktèìn njɔdìì moò mɨ á gɔ̀kkɨ́nànɨ nùb tiri. Duceé ɓè mɨ yi pɨmne nò kù mònéè, mɨ á ɓáànɨ fain mwèìn mwi̧ kɨ́, nààsɨ̀b mɨ a nàcù ŋgə́.» 9Á Yésù tana ŋgə́ ɨnè: «Nùb dúú rè noò kwatɨ́ ɓə́r mwáín, àm nɨ̀ŋgwá rè duɓwée nyȩ Àbɨ̀ràháàm ndè. 10Ɓetí Mwin Nɨ̀rì yi go nɨ mánɨ nùb ya lɔ̧́ lɔ̧́ne á, ŋgə́ a ɓátɨ̀ɓwê ŋgáb.»
Sà̧à̧ nùb ə́ré kùb yi narékɨ́so mòné ŋgáréè
(Góòmɓwê Mt 25.14-30)
11Hȩ nɨ̀vɨ́tɨ̀b yi du yɨrɨ́b ónɨ nɨ́m Yésù yi du nyìnniì rèé, á ŋgə́ átɨnakwa ŋgáb sà̧à̧, gà̧à̧nànɨ ŋgáb gɨ̀gàìn no. Yèrúsàlèm yaácè nɨ́ kə́sə́k ɓe kwɨ́í ŋgáb yi du nó kɨ́, á nɨ̀vɨ́tɨ̀b yi lə́mne bɨ́ ɨnayâna vúm ɓa bɨ pénɨ Mèín ŋgáŋnɨ ɓè mu̧u̧ á. 12Sà̧à̧ ŋgə́ yi átɨna ŋgáb kɨ́ á ɨnè: «Yèrɨ́mà kù yi gií ti kù no cóo. Ŋgə́ yi gɨ àm mvèìn ndóŋ kùb mvènnɨ́bí bɨwútɨ́ ní mvènnì naá, ní a cùwò ŋgáŋnɨ níì ti̧í̧ na á. 13Ŋgə́ ɓànɨ ə́llénɨ, ŋgə́ ɨ́ ɓéhô̧ nɨ̀vɨ́tɨ̀b cóóŋ mvókín nùb no ə́ré no ku. Ŋgə́ ɨ́ gɔ̀knà ŋgáb mòné, ŋgə́ ɨ́ tà: ‹Ndɨŋnáam mákə́tì ɓe kí, fə̀nndɨ̀nɨ mwèìn kɨ́ há̧á̧ hȩ mɨ ɓa cùwòniì.› 14Ɨ́dù, nùb no ti̧né yaá bɨ ŋgə́ ɓə̀ndɨ̀nɨ, á ŋgáb tómteeso nɨ̀vɨ́tɨ̀b no cùrì, gɨ̀ tànànɨ mvèìn jíri kɨ́ ɨnè: ‹Àm nɨ̀ŋgwá ɗàrɨ́ dù mvèìn nɨ́mè, nɨ́m nɨ mvó.› 15Ɨ́dù, kùb ɨ́ bɨ̀mèhâ bɨ́ ŋgə́ mvèìn, á ŋgə́ cuwo no ti̧í̧. Ŋgə́ ɨ́ tà kùb ɓéwònà ní nùb ə́ré ní yi narékɨ́so mòné ŋgáré rè, ŋgáb túùmnà ní kɨ́ ŋgáb kwaɓaaréré yáá. 16Nò tíí ɨ́ féínwò, ŋgə́ ɨ́ tà: ‹Tá, mwèìn wu tɨ nakɨ́so mé mɨ kwaɓaaréé fain mwèìn mwi̧ kɨ́ u̧ cóóŋ.› 17Á mvèìn tana ŋgə́ ɨnè: ‹Á mîn, wu nò ə́ré nyɔ̧ɔ̧́ á. Hȩ wu gə́tɨ̀nyààŋɓànɨ nɨ́m ti ŋgóbti hàráá, mɨ bií wu gómnà. Wu á kɨ́ɨ́nɨ kwɨ́ì cóóŋ ti mó rè no.› 18Nò bɨrɨ́bí ɨ́ gò, ŋgə́ ɨ́ tà: ‹Tá, mwèìn wu tɨ nakɨ́so mé, mɨ kwaɓaaréé fain mwèìn mwi̧ kɨ́ u̧ ŋgiì.› 19Á mvèìn tana nò kɨ́: ‹Mɨ bɨɓwéetɨ́ wu gómnà, wu á kɨ́ɨ́nɨ kwɨ́ì ŋgiì ti mó rè no.› 20Nò ə́ré kù mwi̧í̧ ɨ́ gò, ŋgə́ ɨ́ tà: ‹Tá, mwèìn woò á nɨ rè. Mɨ tɨ ɓomndéé mɨ́ nábkèèìn, mɨ ɨ́ yòksò mɨ́ ku. 21Vùù tɨ ánɨ mɨ ndɨ̀ŋnɨ ɓe wu, ɓetí wu wu nò ɓí á. Nɨ́m nɨ́ kùbè wu áhá wú á̧a̧. Mwar nɨ́ mwar wóò sé, wu a lê wú no cɔŋ ánɨ.› 22Á mvèìn tana ŋgə́: ‹Nò ə́ré ɓáŋhîn ndè, nyindí wu nyin ndè ya á mɨ ɓa ténnɨ àm wo sóò ru. Wu tɨ ɗəəŋtɨ́ mɨ nò ɓí á, mɨ á ánɨ nɨ́m nɨ́ kùbè, mwar du nɨ́ kɨ́ moò séé, mɨ a lê no cɔŋ ánɨ. 23Àm níì ma á wu tɨ duce wú gɨ̀wá kɨ́klénɨ mwèìn mo kɨ́ báàŋ? Hȩ mɨ cuwo rè, mɨ yè tɨ ácuhó̧ó̧ mɨ́ mwèìn mo kɨ́ ɓe mvúm ti yá.› 24Á mvèìn ndè tanagɨ nùb yi du ɓèé ɨnè: ‹Áhó̧kɨ́náam ŋgə́ mwèìn kɨ́ ŋgáré, nyí a nàsòkî nò tɨ kwaɓaaré fain mònéè cóóŋ ndɨ.› 25Á nùb yi du ɓèé tacuna mvèìn ɨnè: ‹Tá, ŋgə́ á cɨ̀ ɓe mòné ví̧i̧!› 26Á mvèìn ndè ta: ‹Nò du ɓe nɨ́m kwè, kùb a nàɓààrê ŋgə́. Nò duce ɓe nɨ́m kù ɗàwáá, dùgɨ̀ kɨ́ ti nó ŋgáréè, kùb ɓa ákɨ́nɨ á. 27Kɨ́ nùb mo ɓi̧ní tɨ duce ɗúwa mɨ dù mvèìn ndè, géwonáam ŋgáb lâs kwíìnɨ mo tíí hò̧.› »
Yésù léé Yèrúsàlèm
(Góòmɓwê Mt 21.1-11; Mk 11.1-11; Jŋ 12.12-19)
28Hȩ Yésù nyìncáàŋnɨ u̧nèé, ŋgə́ ɨ́ ɗàm jɨ̀r gìnɨ Yèrúsàlèm. 29Bètfàjê ɓe Bètànî yaá gín ŋgòm kùb yi ɓékom «Ɓe Òlìvíyéè» rɨ. Yésù yi ŋgóobsoceé ku, á ŋgə́ tómsoyaye nɨ̀fuùb bɨrɨ́b tíí, ŋgə́ ɨ́ tà: 30«Gɨnáam kwɨ́í tíí hò̧ rè no, lə́sònɨ kwé, nyí ɓa kwànɨ mwin tɨ́ha̧ní nò kù du yá wɨ́íkɨ́yèwáá lí̧í̧ súuŋ á. Pàrɨ̀wònàná mɨ ŋgə́. 31Nò kù ɨ́ fɔ̂ nyí: ‹Nyí parɨge ŋgə́ ŋga?› Tananáam nò kɨ́: ‹Kéké ɨ́ du ɗúnɨ ru.› »
32Nɨ̀fuùb bɨrɨ́b lè ɨ́ ə́llê, ŋgáb ɨ́ kwàhácè mwin tɨ́ha̧ní rè hȩ Yésù tɨ tana ŋgábè. 33Ŋgáb pàrɨ̀nɨ mwin tɨ́ha̧ní rè, á nɨ̀miib kíí fɔ́ ŋgáb: «Nyí parɨge ŋgə́ ŋga?» 34Ŋgáb ɨ́ pìhè ɨnè: «Kéké ɨ́ du ɗúnɨ ru.» 35Á ŋgáb ɗamgena Yésù mwin tɨ́ha̧ní kɨ́. Ŋgáb ɨ́ àìwû júúb ŋgábè tɨ́ha̧ní njumí. Yésù ɨ́ wû dùrénɨ ya. 36Ŋgə́ gɨ̀sénɨ, nɨ̀vɨ́tɨ̀b a aigece júúb ŋgábè jȩ̀ȩ̀, ŋgə́ ŋdóŋ ya. 37Ŋgə́ yi ndóŋwo jɨ̀r du sónɨ ɓe Òlìvíyéè ya rɨ á, ŋgə́ yi ŋgóobce ɓe Yèrúsàlèm. Mɨ̀kwìn nɨ̀fubì, ɓe mɨ̀tù sumí, yaá mgbíìnɨ Mèín kúu còóm, ɓe ɨ́r nɨ́ɨ́b sɨ̀sɨ̀rí lâs ŋgáb ya pə́ré. 38Ŋgáb a tace: «Mèín nò du Kékéé, fàm mvèìn ŋgə́ tómwo ɗàrɨ́. Mgbíí ɓe ju ɗóóŋ dù ɓe Mèín há̧á̧ ɓɨllin còóm cóo!»
39 Fàrísààb kù yi du ɓèé ɨ́ tànà Yésù ɨnè: «Tá tɔ̀hí, tanam nɨ̀fuùb woò ŋgáb dù néín.» 40Á Yésù tacu: «Mɨ tanaɓa nyí wááŋ á, nùb lè ɨ́ dù néín, sɨɨ bɨ ɨ́ ɓa kɨ́ɨ̀ŋnɨ ru!»
Yésù á kɨ́nnànɨ nùb Yèrúsàlèèm
41Yésù ya ŋgóobcií ɓe Yèrúsàlèm. Ɓwâ ŋgə́ pə́so kúrì, ŋgə́ ɨ́ yà kɨ́nnànɨ nùb Yèrúsàlèm kɨ́ noò. 42Ŋgə́ a tace: «Nyí nùb Yèrúsàlèèm, ɓè nyí tɨ fɨ́tɨ ɗə̀ə̀ŋɓwênɨ mwáín nɨ́m fɨ́tɨ nyí nànɨ ju ɗóóŋ naa. Ɨ́dù ɗàrò, nɨ́m kɨ́ á nànɨ nyí yo̧ó̧. 43Ɓetí ye kù kwá sai, nùb nyínè ɓi̧ní a gò nyí ɗèndɨ̀nɨ su. 44Ŋgáb kwá nduukɨ́ nyí lâs ɓe kwɨ́í nyínè cúk; dùgɨ̀ dúhé mwi̧ kwá nɨ còóm mèɓàr. Ɓetí ɓwâ Mèín tɨ go nyí ɓátɨ̀niì, nyí tɨ nɨ ɗə̀ə̀ŋcùwá!»
Yésù léé Dúú Jíri Mèèín no
(Góòmɓwê Mt 21.23-27; Mk 11.27-33)
45Yésù ɨ́ gì lénɨ Dúú Jíri Mèèín, ŋgə́ ɨ́ yà jùhó̧kɨ́nɨ nùb ŋgə́ yi kwa sə́rɨ̀nɨ nɨ́ɨ́b yó kwe. 46Ŋgə́ ɨ́ tànà ŋgáb: « ‹Dúú móò kwá du dúú mɨ̀yú̧ú̧›, Mèín taá u̧ káàtà noò no. Ɨ́dù kɨ́ nyínè, nyí setɨkíí dúú kɨ́ mgbàŋ ŋgàyíbì!»
47Ye lâs Yésù yaá tɔ̀hí Dúú Jíri Mèèín no. Mvènnɨ́b nùb na satɨgàà ɓe nɨ̀gááŋ káàtàbì ɨ́ nùb jííb ti̧né ɨ́ yà mánɨ kwíìnɨ Yésù. 48Ŋgáb ɨ́ dù bɨ́ ɗə̀ə̀ŋwá i̧ á vúm fɨ́tɨ ndɨ̀ŋnɨ, ɓetí nùb gbàŋné lâs yaá bɨ ɗúlɨ́ŋɓànɨ óknɨ tɔ̀ɔ́ nóò.
Currently Selected:
Lúkàs 19: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
